လါမ့ၤ ၁၀ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ်အပူၤ ဖဲလါမ့ၤ ၇ သီ မုၢ်နၤခီအဆၢကတီၢ် ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ(၀ၤပသဲ)သ၀ီဃၢၤအဃိ တၢ်ပၢၢ်ဆၢသုးပာ်ဖှိၣ်ကရူၢ်အၦၤသံ၀ဲ(၃)ဂၤဒီး ဘၣ်ဒိ(၄)ဂၤအဂ့ၢ်န့ၣ် တၢ်ပၢၢ်ဆၢသုးကရူၢ်ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ
ဖဲလါမ့ၤ ၇ သီ မုၢ်နၤခီ ၁၁ နၣ်ရံၣ်ဃၣ်ဃၣ်အဆၢကတီၢ် ခီဖျိသုးမီၤစိရိၤကဘီယူၤဟဲတ့ၢ်လီၤပီၣ်(၅၀၀)မ့ၣ်ပိၢ် ၂ ဖျၢၣ် အဃိ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA (သုးက့ ၆)သုးပာ်ဖှိၣ်အၦၤ ထိလ့အီၤႇ စွဲမၤလ့ႇ မၣ်ခ့ၤသၤဒၤစွ့ၤ တဖၣ်အံၤသံ၀ဲဒီးဘၣ်ဒိဘၣ်ထံး(၄)ဂၤအဂ့ၢ်န့ၣ် ဘီသိၣ်၀ါသုးကျိၤ ထုးထီၣ်ပာ်ဖျါ၀ဲဖဲလါမ့ၤ ၉ သီအနံၤ န့ၣ်လီၤႉ
ဖဲလါမ့ၤ ၇ သီ ဟါခီအဆၢကတီၢ် သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢဘဲလမုၣ်သ၀ီကရူၢ်အခိၣ်အဃၢၤဒီး လါမ့ၤ ၈ သီ မုၢ်ထူၣ် ၁၂ နၣ်ရံၣ်အခါ ဖဲတၢ်ခူၣ်လီၤကွံာ်ၦၤသုးဖိလၢအသံတဖၣ်အံၤအဆၢကတီၢ် ခီဖျိသုးမီၤစိရိၤအ(Mi 35) ကဘီယူၤဟဲတ့ၢ်လီၤကဒီးမ့ၣ်ပိၢ်အဃိ လီၢ်က၀ီၤကမျၢၢ်နီၢ်သ့ညိၤႇ နီၢ်စၤဒၤအ့သ့ၣ်တဖၣ်အံၤ ဘၣ်ဒိဘၣ်ထံး၀ဲဒီး မ့ၣ်အူအီၣ်ဟးဂီၤကွံာ်၀ဲနီၢ်မးစှ့ဒီးနီၢ်မုၣ်နဲၤဖီအဟံၣ်အဃီအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ(ခ့ၣ်အဲၣ်ယူၣ်)၀ီၢ်ရ့ၣ်ကီၢ်ဆၣ် ဘဲလမုၣ်ႇခၠီနခွၣ်ႇတၤဖးထီၣ်ႇ ၀ၤပသဲသ၀ီကပၤအဃိ လီၢ်က၀ီၤကမျၢၢ်အဂၤ(၈၀၀)ဃၣ်ဃၣ်ဘၣ်ဃ့ၢ်ထီၣ်၀ဲဒီးခီဖျိကဘီယူၤဟဲဆှၣ်တၢ် ကိးမုၢ်နံၤမုၢ်နၤတုၤလၢခဲအံၤအဃိ တုၤလၢခဲအံၤကမျၢၢ်လၢအဃ့ၢ်ထီၣ်တဖၣ်တက့ၤဘၣ်လၢသ၀ီဒံးဘၣ်အဂ့ၢ်န့ၣ် သ့ၣ်ညါဘၣ်လၢကမျၢၢ်ၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ
