လါအီးကထိဘၢၣ် ၆ သီႇ ၂၀၂၃ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ကီးတရံးကီၢ်ဆၣ် ကလံၤထံးဟီၣ်က၀ီၤ ဒူသ၀ီတဖၣ်အပူၤ တနံၣ်အံၤဃၢမံၤတံၢ်အၦ့ၤလီၤ ဒိၣ်န့ၢ်ဒံးအပူၤကွံာ်မဟိနံၣ်အဂ့ၢ်န့ၣ် သ့ၣ်ညါဘၣ်လၢၦၤသူၣ်ဖျးဃၢမံၤတံၢ်ဖိတဖၣ်အအိၣ်န့ၣ်လီၤႉ
ကီးတရံးကီၢ်ဆၣ်ကလံၤထံးဟီၣ်က၀ီၤဒူသ၀ီတဖၣ်အပူၤဖဲအပူၤကွံာ်လါစဲးပထ့ဘၢၣ်အခါန့ၣ်တၢ်စးထီၣ်ခူၣ်ဆါ၀ဲ ဃၢမံၤတံၢ်ဒီးတနံၣ်အံၤဃၢမံၤတံၢ်အၦ့ၤလီၤဒိၣ်န့ၢ်အပူၤကွံာ်မဟိနံၣ်အဃိလီၢ်က၀ီၤကမျၢၢ်တဖၣ်ခူၣ်ဆါကရီအ၀ဲသ့ၣ်ဃၢမံၤတံၢ်အဂ့ၢ်န့ၣ် ကမျၢၢ်လၢအသူၣ်ဖျးဃၢမံၤတံၢ်တဂၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“တနံၣ်အံၤဒီးမဟိတနံၣ်န့ၣ်ဃၢမံၤတံၢ်အၦ့ၤဖးကွၣ်ညါႉအၦ့ၤလီၤရုၢ်ရုၢ်အဃိဒွးတကဲးလၢၤဘၣ်ႉ အဃိပဆါကရီက့ၤဃၢမံၤတံၢ်လီၤႉခဲမုၢ်ဆ့ၣ်နါက့အၦ့ၤကလီၤဒံးမီၤနီၤႉဃၢမံၤတံၢ်တပီၢ်န့ၣ်အၦ့ၤအိၣ်ထဲ(၈၀၀)ကၠး လီၤႉအဃိၦၤမၤဃၢမံၤတံၢ်ဖိတဖၣ်ဘၣ်ယိၣ်၀ဲလၢအၦ့ၤကလီၤအါထီၣ်အဃိၦၤဆါဆှူကွံာ်အီၤဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
တၢ်လၢဃၢမံၤတံၢ်အံၤတၢ်စးထီၣ်သူၣ်အီၤဖဲလါဖ့ၤဘြူၤအါရံၤဒီးတၢ်က့ၤခူၣ်ဆါက့ၤအီၤဖဲလါစဲးပထ့ဘၢၣ်န့ၣ်လီၤႉ ဖဲအပူၤကွံာ်မဟိအခါဃၢမံၤတံၢ်တပီၢ်န့ၣ်အၦ့ၤအိၣ်၀ဲ(၁၅၀၀)တုၤလၢ(၂၀၀၀)ကၠးညါဒီးဘၣ်ဆၣ်တနံၣ်အံၤခီဖျိထံရူၢ်ကီၢ်သဲးတၢ်အိၣ်သးတဂၢၢ်တကျၢၤဘၣ်ႇ၀့ၢ်ပူၤတၢ်ဒုးကဲထီၣ်လၢတၢ်ပၢၢ်ဆၢသုးကရူၢ်ဒီးပယီၤသုးအဘၢၣ်စၢၤအဃိ ဃၢမံၤတံၢ်တပီၢ်န့ၣ်အၦ့ၤအိၣ်တ့ၢ်က့ၤထဲ(၈၀၀),(၉၀၀)ကၠးဒ်န့ၣ်လီၤအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ် စံးအါထီၣ် ၀ဲန့ၣ်လီၤႉ
လၢန့ၣ်အမဲာ်ညါဃၢမံၤတံၢ်သ့ၣ်တဖၣ်အံၤတၢ်ဆှၢထီၣ်ဆါအီၤဆူမၠၣ်၀တံၣ်တၢ်ကူၣ်လဲၤမၤကၤလီၢ်(ကုန်သယွ်ေရးဇုန်)ဒီး ဖဲအပူၤကွံာ်လါမးရှး ၂၅ သီအခါ ခီဖျိတၢ်ဒုးကဲထီၣ်လၢတၢ်ပၢၢ်ဆၢသုးကရူၢ်ဒီးပယီၤသုးအဘၢၣ်စၢၤအဃိ ၦၤခိးၦ့ၤဃၢမံၤတံၢ်ဖိသ့ၣ်တဖၣ်အံၤတၦ့ၤဃၢမံၤတံၢ်ဒ်လၢညါခါအသိးလၢၤဘၣ်အဂ့ၢ်န့ၣ် ၦၤခိးၦ့ၤဃၢမံၤတံၢ်ဖိတဂၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဖဲလါမးရှး ၅ သီအခါန့ၣ်တၢ်ပၢၢ်ဆၢသုးကရူၢ်နုာ်လီၤဒွဲၣ်အူအီၣ်မၠၣ်၀တံၣ်(ကုန်သွယ်ရေးဇုန်)အဃိ ဖဲန့ၣ်ပၣ်ဃုာ်ဃၢမံၤတံၢ်စ့ၢ်မီၤနီၤႉထံရူၢ်ကီၢ်သဲးတၢ်အိၣ်သးနါက့တဂ့ၤဘၣ်ႉၦၤခိးၦ့ၤဃၢမံၤတံၢ်တဖၣ်နါက့သူၣ်ကိၢ်သးဂီၤ၀ဲစ့ၢ်ႉပျံၤ၀ဲလၢၦၤကဒွဲၣ်အူအီၣ်ဒ်သိးလၢညါခါတဘျီန့ၣ်ႉဃၢမံၤတံၢ်အၦ့ၤလီၤဖးဒိၣ်ညါႉၦၤၦ့ၤဃၢမံၤတံၢ်ဒ်သိးလၢညါခါတဘူၣ်လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢကီးတရံးကီၢ်ဆၣ်ကလံၤထံးဟီၣ်က၀ီၤဒူသ၀ီတကပၤန့ၣ်အါဒၣ်တက့ၢ်ကမျၢၢ်တဖၣ်ဖံးအီၣ်မၤအီၣ်၀ဲစံာ် တကးဒံးဘၣ် လၢဟံၣ်ဖိဃီဖိကအီၣ်ကအီအဂီၢ်သူၣ်အီၣ်ဖျးအီၣ်၀ဲသဲးသၣ်,သဘ့ဟီၣ်လာ်ဒီးဃၢမံၤတံၢ်တဖၣ်န့ၣ်လီၤႉ
ဒ်န့ၣ်အသိးလၢတနီသရံၣ်ကီၢ်ခီဒိၣ် မုၢ်ထီၣ်ခိခိၣ်ဒူသ၀ီတကပၤန့ၣ်စ့ၢ်ကီး ဖဲမဟိန့ၣ် ဃၢမံၤတံၢ်တပီၢ်အၦ့ၤအိၣ်၀ဲ (၁၈၀၀)ကၠးခိၣ်ဃၢၤညါဘၣ်ဆၣ် တကီၢ်ခါခဲအံၤခီဖျိပယီၤသုးအိၣ်ခိးဃ့အီၣ်စ့လၢကျဲပူၤအဃိ ၦၤၦ့ၤဃၢမံၤတံၢ်ဖိ လီၤစှၤ၀ဲဒီး တနံၣ်အံၤဃၢမံၤတံၢ်တပီၢ်န့ၣ်အၦ့ၤအိၣ်တ့ၢ်က့ၤထဲ(၆၅၀)ကၠးလီၤအဂ့ၢ်န့ၣ် ဟီၣ်က၀ီၤဖဲန့ၣ်အပူၤ ၦၤသူၣ်ဖျးဃၢမံၤတံၢ်ဖိတဖၣ်စံး၀ဲန့ၣ်လီၤႉ
