လါယူၤ ၁၁ သီႇ ၂၀၂၃ နံၣ်ႇ ခ့ၣ်အဲးစံၣ်
လၢဖၣ်အၣ်ကီၢ်ရ့ၣ် လူၢ်ပျဲၢ်ကီၢ်ဆၣ် တရံးဖိကွံသ၀ီပူၤ တရံးဖိကွံကီၢ်သူလ့ၤတီၤခၢၣ်သးကၠိအံၤ တနံၣ်အံၤ(၂၀၂၃–၂၀၂၄) တၢ်သိၣ်လိနံၣ်အဂီၢ် တၢ်ကီတၢ်ခဲအိၣ်၀ဲလၢကၠိသရၣ်သရၣ်မုၣ်တကူတလၢ၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
တနံၣ်အံၤတၢ်သိၣ်လိနံၣ်အဂီၢ်တရံးဖိကွံကၠိအံၤအိၣ်တုၤ၀ဲဒၣ်လၢ(၈)တီၤဒီးၦၤကၠိဖိနီၣ်ဂံၢ်အိၣ်၀ဲ(၁၉၀)ဂၤဘၣ်ဆၣ် ခီဖျိကၠိအံၤကၠိသရၣ်၊မုၣ်အိၣ်ဒၣ်ထဲ(၁၂)ဂၤလီၤအဃိတၢ်ကီတၢ်ခဲအိၣ်လၢတၢ်သိၣ်လိတကပၤအဂ့ၢ်န့ၣ် တရံးဖိကွံကၠိခိၣ် သရၣ်မုၣ် နီၢ်မုၣ်ကျၢၤ စံးလီၤ၀ဲဖဲလါမ့ၤ ၆ သီ တၢ်အိးထီၣ်ကၠိတၢ်ရဲၣ်တၢ်ကျဲၤမူးအပူၤန့ၣ်လီၤႉ
အ၀ဲစံး၀ဲလၢ“တနံၣ်အံၤကၠိသရၣ်သရၣ်မုၣ်လီၢ်လံလၢအသိၣ်လိတၢ်ဖဲမဟိတနံၣ်န့ၣ်အဟးထီၣ်ကွံာ်ဃုဂၤညါမီၤနီၤႉ အဃိန့ၣ်ပဟးဃုအါထီၣ်ကဒီးဃိးဂၤႉပဟးဃုအါထီၣ်၀ံၤဘျီခဲအံၤသရၣ်သရၣ်မုၣ်ခဲလၢာ်အိၣ်၀ဲ(၁၂)ဂၤမီၤနီၤႉနဟးဃုဘၣ်ကၠိသရၣ်သရၣ်မုၣ်ကီဒိၣ်မးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
တချုးသုးဟံးန့ၢ်တၢ်စိတၢ်ကမီၤဒံးဘၣ်အခါတရံးဖိကွံကၠိအံၤမ့ၢ်ကၠိတဖျၢၣ်လၢကီၢ်ပယီၤပဒိၣ်ဒီးကညီကူၣ်သ့ဆဲးလၤ၀ဲၤကျိၤ(KECD)ပာ်ဖှိၣ်အိးထီၣ်၀ဲန့ၣ်လီၤႉသုးဟံးန့ၢ်တၢ်စိတၢ်ကမီၤ၀ံၤလီၢ်ခံကၠိအံၤအိၣ်ဆၢထၢၣ်က့ၤ၀ဲဒ်(KECD)ကၠိအသိးဒီး တၢ်သိၣ်လိ၀ဲ(KECD)အလံာ်ညိၣ်သိၣ်ဒိၣ်န့ၢ်၀ဲခံနံၣ်လံအဂ့ၢ်န့ၣ် သ့ၣ်ညါဘၣ်န့ၣ်လီၤႉ
လူၢ်ပျဲၢ်ကီၢ်ဆၣ် KNU ၦၤဘၣ်မူဘၣ်ဒါတဂၤ စံး၀ဲလၢ“မ့မၤလိကီၢ်သူလ့ၤကူၣ်သ့သနူန့ၣ်လီၤဂာ်ဒ်သိး ပကၢၤက့ၤဂၢၤက့ၤ ပလံာ်လဲၢ်ပတၢ်ဆဲးတၢ်လၤမီၤနီၤႉဒ်န့ၣ်မးပကသ့ၣ်ညါဘၣ်ပၦၤကညီအတၢ်စံၣ်စိၤတဲစိၤအဂ့ၢ်အကျိၤသ့ၣ်တဖၣ်လီၤႉပမ့သ့ၣ်ညါမးပသးလၢအအဲၣ်ၦၤကလုာ်န့ၣ်ကဟဲအိၣ်ထီၣ်၀ဲမီၤနီၤႉပဆၢမုၢ်လၢ်လၢၦၤဖိဒံဖိသၣ်သ့ၣ်တဖၣ်တသ့လံာ်သ့လဲၢ်မီၤနီၤႉၦၤဖိဒံဖိသၣ်သ့ၣ်တဖၣ်အံၤမ့သ့လံာ်သ့လဲၢ်မးအ၀ဲသ့ၣ်ကသ့နီၤဖး၀ဲတၢ်ဂ့ၤႇတဂ့ၤဒီးဃုထၢ၀ဲတၢ်လၢအကြၢးမၤ၀ဲသ့ၣ်တဖၣ်ကသ့မီၤနီၤ”အဂ့ၢ်န့ၣ် စံး၀ဲန့ၣ်လီၤႉ
ဖၣ်အၣ်ကီၢ်ရ့ၣ်ပူၤ ကၠိလၢအိၣ်(KECD)တၢ်ပၢဆှၢဖီလာ်သ့ၣ်တဖၣ်ခဲလၢာ်ဃၣ်ဃၣ်န့ၣ် တၢ်ကီတၢ်ခဲအိၣ်ထီၣ်၀ဲလၢ ကၠိသရၣ်သရၣ်မုၣ်တကူတလၢဒီးကၠိတၢ်ပီးတၢ်လီတကူတလၢ၀ဲဘၣ်အဂ့ၢ်န့ၣ် ကူၣ်သ့ၦၤဘၣ်မူဘၣ်ဒါတဖၣ် စံး၀ဲန့ၣ်လီၤႉ
ဖဲတလါအံၤလါယူၤ ၆ သီအနံၤန့ၣ် တရံးဖိကွံကၠိမၤ၀ဲ(၂၀၂၃–၂၀၂၄)တၢ်အိးထီၣ်ကၠိတၢ်ရဲၣ်တၢ်ကျဲၤမူးဒီး တၢ်ရဲၣ်တၢ်ကျဲၤဘျီ၀ဲအံၤအပူၤန့ၣ် ဟီၣ်က၀ီၤကညီဒီကလုာ်ပၢၤကီၢ်သုး ၦၤဘၣ်မူဘၣ်ဒါႇ သ၀ီၦၤဘၣ်မူဘၣ်ဒါႇ ကၠိဖိမိၢ်ပၢ်ဒီး ကၠိသရၣ်သရၣ်မုၣ်ခဲလၢာ်ဟဲထီၣ်၀ဲအဂၤ(၂၀၀)ဃၣ်ဃၣ်န့ၣ်လီၤႉ
