ပယီၤသုးခးလီၤကျိဖးဒိၣ်အဃိ ကမဲၤကိသ၀ီဖိဘၣ်ဒိကဒီး ၃ ဂၤ

လါယူၤ ၁၁ သီႇ ၂၀၂၃ နံၣ်ႇ ခ့ၣ်အဲးစံၣ်

ဖဲလါယူၤ ၉ သီ ဟါခီအဆၢကတီၢ် ပယီၤသုးလၢအိၣ်ကညီကီၢ်စဲၣ် ကီးတရံး၀့ၢ်ပူၤတဖၣ်အံၤ ခးလီၤကျိဖးဒိၣ်တပယူာ်ဃီအဃိ ကမဲၤကိသ၀ီဖိဘၣ်ဒိကဒီး၀ဲ ၃ ဂၤအဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ

ခီဖျိပယီၤသုးတဖၣ်အံၤခးလီၤနါစိၤကျိဖးဒိၣ်တပယူာ်ဃီအဃိလီၢ်က၀ီၤကမျၢၢ်သံဘၣ်ဒိဘၣ်ထံးကဲထီၣ်ခဲအံၤခဲအံၤအသိး ပယီၤသုးခးလီၤ၀ဲကျိဖးဒိၣ်ဘျီ၀ဲအံၤစ့ၢ်ကီးကမဲၤကိသ၀ီဖိဘၣ်ဒိကဒီး၀ဲ ၃ ဂၤဒီးအကျါတဂၤန့ၣ်ဘၣ်ဒိ၀ဲနးနးကျံၤကျံၤ အဂ့ၢ်န့ၣ် သ၀ီဖိတဂၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ပယီၤသုးခးလီၤကျိဖးဒိၣ်ဒီယုၢ်လီၤႉတလါအံၤအ၀ဲသ့ၣ်ခးလီၤကျိဖးဒိၣ်အါထီၣ်မီၤနီၤႉခးလီၤ၀ဲလၢကီးတရံး၀့ၢ်ခိၣ်၀့ၢ်ဃၢၤ၀း၀းတရံးလီၤႉအခးလီၤ၀ဲဖဲမဟါန့ၣ်ၦၤသ၀ီဖိဘၣ်ဒိသၢဂၤႉလၢဘၣ်အခီၣ်တဂၤန့ၣ်ကိညၢ်ထီၣ်လံႉ မ့မ့ၢ်ၦၤလၢအဘၣ်အနၢ်ဃၢၤထံးတဂၤန့ၣ်တၢ်ဘၣ်ယိၣ်အိၣ်၀ဲ”အဂ့ၢ်န့ၣ် စံးဘၣ်ခ့ၣ််အဲးစံၣ်–ကညီတၢ်ကစီၣ်ဖဲလါယူၤ ၁၀ သီအနံၤန့ၣ်လီၤႉ

သ၀ီဖိလၢအဘၣ်ဒိသၢဂၤန့ၣ်မ့ၢ်၀ဲဒီၤမူလိ(၄၂)နံၣ်ဘၣ်၀ဲဒၣ်အနၢ်ဃၢၤထံးတၢ်ဘၣ်ယိၣ်အိၣ်ဒီးမ့မ့ၢ်လၢကၠီၤမ့ထိ(၃၂)နံၣ်ဒီးစးမူသါ(၂၉)နံၣ်ခံဂၤအံၤဘၣ်၀ဲဒၣ်အဟၢဖၢဒီးအခီၣ်ကံၣ်ဒုၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်န့ၣ်အသိးဖဲအပူၤကွံာ်လါယူၤ ၇ သီအခါစ့ၢ်ကီး လဲၤ၀ၣ်ကိပယီၤသုးခးလီၤကျိဖးဒိၣ်အဃိ (ရွာတန်းရှည်) သ၀ီဖိဟံၣ်ဖိဃီဖိဘၣ်ဒိဒံး၀ဲ ၃ ဂၤဒီး ဖဲန့ၣ်အကျါဖိသၣ်သံ၀ဲ ၁ ဂၤကဲထီၣ်တ့ၢ်အသးဒံးန့ၣ်လီၤႉ

လၢကီးတရံးကီၢ်ဆၣ်အပူၤ တလါအံၤလါယူၤအတီၢ်ပူၤ ခီဖျိပယီၤသုးခးလီၤကျိးဖဒိၣ်တကးဒံးဘၣ် ကဘီယူၤစ့ၢ်ကီးဟဲခးလီၤတၢ်အဃိ လီၢ်က၀ီၤကမျၢၢ်သံ ၂ ဂၤအကျါပၣ်ဃုာ်၀ဲဖိသၣ်တဂၤဒီး ဘၣ်ဒိ၀ဲ ၈ ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤႉ