ကဘီယူၤဟဲခးလီၤအဃိ သၣ်တီၣ်ကလံၤစိးလီၢ်က၀ီၤကမျၢၢ်ဟံၣ်ဟးဂီၤကအိၣ်လၢအဖျၢၣ်(၃၀)ဃၣ်ဃၣ်

လါယူၤလံ ၂၀ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ်ဒီးကရ့ၣ်ကီၢ်စဲၣ်အဆၢ သၣ်တီၣ်ကၠံကီၢ်ဆၣ်ကလံၤစိးအပူၤ ဖဲလါယူၤလံ ၁၉ သီအနံၤန့ၣ် ခီဖျိသုးမီၤစိရိၤကဘီယူၤဟဲခးလီၤတၢ်လၢ၀ၣ်သီခိၣ်ဒီးကျ့ၤထၣ်သ၀ီပူၤအဃိ ၀ၣ်သီခိၣ်သ၀ီဖိအဟံၣ်တၢ်သူၣ်ထီၣ်ဟးဂီၤ ကအိၣ်လၢအဖျၢၣ်(၃၀)ဃၣ်ဃၣ်ညါအဂ့ၢ်န့ၣ် သ့ၣ်ညါဘၣ်လၢ လီၢ်က၀ီၤကမျၢၢ်အအိၣ်န့ၣ်လီၤႉ

သုးမီၤစိရိၤကဘီယူၤဟဲခးလီၤတၢ်ဘျီ၀ဲအံၤအခါ၀ၣ်သီခိၣ်သ၀ီပူၤဟံၣ်ဟးဂီၤအိၣ်ဘၣ်ဆၣ် မ့မ့ၢ်လီၢ်က၀ီၤကမျၢၢ်ခီန့ၣ် စးထီၣ်လၢကဘီယူၤဟဲခးလီၤတၢ်တၢတသီအခါအ၀ဲသ့ၣ်ဃ့ၢ်ထီၣ်ဃာ်အဃိ ၦၤဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် လီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ

“ကဘီယူၤဟဲခးလီၤတၢ်ႇပယီၤသုးစ့ၢ်ကီးခးလီၤကျိဖးဒိၣ်ႉထဲ၀ၣ်သီခိၣ်သ၀ီတဖျၢၣ်န့ၣ်ဟံၣ်ဟးဂီၤကအိၣ်လၢအဖျၢၣ် (၃၀)ဃၣ်ဃၣ်ညါႉလၢကျ့ၤထၣ်သ၀ီတကပၤန့ၣ်စ့ၢ်ကီးၦၤဟံၣ်ဟးဂီၤအိၣ်စ့ၢ်လီၤႉတၢ်ဟးဂူာ်ဟးဂီၤတၢ်အိၣ်သးခီန့ၣ် ပတသ့ၣ်ညါလီၤတံၢ်ဒံးဘၣ်ႉလၢ(ယၤဒိၣ်)တကပၤန့ၣ်တၢ်ဒုးကဲထီၣ်တုၤလၢခဲအံၤတစုလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲလါယူၤလံ ၁၉ သီအနံၤန့ၣ်လီၤႉ

ဖဲအပူၤကွံာ်လါယူၤလံ ၁၁ သီအနံၤ လၢယၤဒိၣ်သ၀ီပူၤ ဖဲတၢ်ဒုးကဲထီၣ်လၢဟီၣ်က၀ီၤတၢ်ပၢၢ်ဆၢသုးကရူၢ်ဒီး ပယီၤသုးအဘၢၣ်စၢၤအခါန့ၣ် အဆိကတၢၢ်တဘျီကဘီယူၤဟဲခးလီၤတၢ်လၢ၀ၣ်သီခိၣ်ႇယၤဒိၣ်သ၀ီပူၤဒီး ဖဲန့ၣ်၀ံၤလီၢ်ခံ ဖဲလါယူၤလံ ၁၈ သီ ဂီၤခီ(၄)နၣ်ရံၣ်ဃၣ်ဃၣ်အဆၢကတီၢ်စ့ၢ်ကီး သုးမီၤစိရိၤကဘီယူၤဟဲတ့ၢ်လီၤကဒီး၀ဲမ့ၣ်ပိၢ်(၆)ဘျီညါ အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

တၢ်ခးလိာ်သးကဲထီၣ်၀ံၤလီၢ်ခံလၢလ့ၣ်သိၤကျဲနုာ်လီၤဟးထီၣ်တြဲၤတၢ်သမံသမိးလီၢ်န့ၣ်ပယီၤသုးတပျဲၦၤဟးထီၣ်က့ၤလီၤလၢာ်ဘၣ်ႇမၤအါထီၣ်သုးဂံၢ်ဘါအဃိတၢ်ကီတၢ်ခဲအိၣ်လၢကလဲၤမၤစၢၤကမျၢၢ်ၦၤဃ့ၢ်မှံဟးဖျိးတဖၣ်အသိး တၢ်စူၤခါအတီၢ်ပူၤအံၤၦၢ်ပူၤကျဲစ့ၢ်ကီးဟးဂီၤပၢၢ်တုၤလၢနဟးထီၣ်က့ၤလီၤတသ့လၢၤဘၣ်အဃိတၢ်ကီတၢ်ခဲအိၣ်၀ဲ အဂ့ၢ်န့ၣ် လီၢ်က၀ီၤကမျၢၢ်လၢအမၤစၢၤၦၤဃ့ၢ်မှံဟးဖျိးတဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ပယီၤသုးဟဲထီၣ်ဒီးသုးသိလ့ၣ်(၅)ခိၣ်ဟဲမၤအါထီၣ်သုးဂံၢ်ဘါလၢလ့ၣ်သိၤတၢ်သမံသမိးတြဲၤန့ၣ်မီၤနီၤႉ တြဲၤလၢအိၣ်၀့ၢ်နုာ်လီၤဟးထီၣ်တဖၣ်န့ၣ်အ၀ဲသ့ၣ်တပျဲခီ၀ဲလ့ၣ်နီတခိၣ်လၢၤဘၣ်ႉလၢၦၢ်ပူၤကျဲစ့ၢ်ကီးသိလ့ၣ်လဲၤတသ့ဘၣ်ႉခဲအံၤဘၣ်လၢတၢ်စူၤခါအဃိကျဲဟးဂီၤကျဲတဂ့ၤလၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တုၤလၢတကီၢ်ခါခဲအံၤခီဖျိတၢ်ဒုးဆဲးကဲထီၣ်ဒံး၀ဲလၢသၣ်တီၣ်ကၠံ၀့ၢ်ကလံၤစိးတကပၤအဃိ လီၢ်က၀ီၤကမျၢၢ်လၢအလဲၤဃ့ၢ်အိၣ်ဆူသီၣ်ယ့ၤခၣ်သ၀ီႇခဲခၠီဒီးမၣ်ခၠီသ၀ီပူၤသ့ၣ်တဖၣ်အံၤအ၀ဲသ့ၣ်ဒိးန့ၢ်ဘၣ်တၢ်ဆီၣ်ထွဲမၤစၢၤလၢကရ့ၣ်နံၣ်ကီၢ်သီသုးမုၢ်ဒိၣ်အအိၣ်ဒီးလီၢ်က၀ီၤကမျၢၢ်လၢအအိၣ်ဖဲန့ၣ်တဖၣ်အအိၣ်ဘၣ်ဆၣ်ႇမ့မ့ၢ်ကမျၢၢ်လၢအလဲၤဃ့ၢ်ထီၣ်ဆူကရ့ၣ်နံၣ်ကီၢ်စဲၣ်(ဖရူၤစိၤ)တဖၣ်အံၤခီန့ၣ်တဒိးန့ၢ်ဘၣ်တၢ်ဆီၣ်ထွဲမၤစၢၤဒံးဘၣ်အဂ့ၢ်န့ၣ် သ့ၣ်ညါဘၣ်လၢ ၦၤမၤစၢၤၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၂)တၢ်ပၢဟီၣ်က၀ီၤ တီအူကီၢ်ရ့ၣ် သၣ်တီၣ်ကၠံကီၢ်ဆၣ်အပူၤ တၢ်ဒုးဆဲးကဲထီၣ်၀ဲလၢ(KNLA)သုးပာ်ဖှိၣ်ဒီးပယီၤသုးအဘၢၣ်စၢၤအဃိလီၢ်က၀ီၤကမျၢၢ်ဘၣ်ဃ့ၢ်မှံဟးဖျိးအါအါ ဂီၢ်ဂီၢ်အသိးခီဖျိပယီၤသုးတပျဲၦၤစိာ်ထီၣ်စိာ်လီၤတၢ်အီၣ်တၢ်အီႇကသံၣ်ကသီသ့ၣ်တဖၣ်ဘၣ်အဃိတၢ်ကီတၢ်ခဲအိၣ်ထီၣ်လၢၦၤဃ့ၢ်မှံဟးဖျိးတဖၣ်အံၤကဒိးန့ၢ်ဘၣ်တၢ်ဆီၣ်ထွဲမၤစၢၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ