တနံၣ်အံၤဆီကဆီအၦ့ၤဂ့ၤအဃိ တၢ်ကြဲၢ်ကီၢ်ဆၣ်ပူၤ ကမျၢၢ်တဖၣ်ဘုၣ်ဆီကဆီဟဲအါထီၣ်

လါယူၤလံ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် တၢ်ကြဲၢ်ကီၢ်ဆၣ် ဒူသ၀ီတဖၣ်အပူၤ ခီဖျိၦၤဟးၦ့ၤဆီကဆီအါမးဒီးအၦ့ၤဂ့ၤအဃိ တကီၢ်ခါခဲအံၤလီၢ်က၀ီၤကမျၢၢ်တဖၣ်ဘုၣ်၀ဲဆီကဆီဟဲအါထီၣ်၀ဲဒၣ်န့ၣ်လီၤႉ

ဟီၣ်က၀ီၤဖဲန့ၣ်အပူၤ ဆီကဆီတဘ့ၣ်န့ၣ်အၦ့ၤအိၣ်တုၤလၢ(၁)ကလီၢ်ဘျဲၣ်ညါအသိး ဆီကဆီအံၤၦၤဟဲၦ့ၤ၀ဲလၢစ့ပယီၤႇ စ့ယိၤခံခါလၢာ်ဒီးအၦ့ၤစ့ၢ်ကီးဂ့ၤအဃိ ၦၤဘုၣ်ဆီကဆီဟဲအါထီၣ်၀ဲဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်နါမုဒါ စံး၀ဲဒ်အံၤန့ၣ် လီၤႉ

နါမုဒါစံး၀ဲလၢ“လၢညါခါဆီကဆီတဘ့ၣ်န့ၣ်အၦ့ၤအိၣ်ထဲ(၈၀၀)ကၠးဒ်န့ၣ်လီၤႉတၢ်န့ၣ်မးအဘ့ၣ်ကဘၣ်ဒိၣ်မးန့ၢ်မီၤနီၤႉ ခဲအံၤတမ့ၢ်ဒ်န့ၣ်ဘၣ်အဘ့ၣ်မ့ဒိၣ်ထီၣ်တစဲးန့ၣ်တမၢဘျဲၣ်လံႉခဲအံၤဘၣ်လၢတၢ်ၦ့ၤထီၣ်ဆီကဆီအၦ့ၤဂ့ၤဒ်အံၤ ၦၤဘုၣ်ဆီကဆီဖဲသ၀ီပူၤတဖၣ်အံၤဘၣ်ဂီၢ်၀ဲမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တကီၢ်ခါခဲအံၤတၢ်ကြဲၢ်ကီၢ်ဆၣ် ဒူသ၀ီပူၤကမျၢၢ်တဖၣ် ဒ်သိးအ၀ဲသ့ၣ်ကျိၣ်စ့တၢ်ဟဲနုာ်လီၤကအိၣ်အဂီၢ် ဟံၣ်ကိးဖျၢၣ်ဒဲးဃၣ်ဃၣ်ဘုၣ်၀ဲဆီကဆီဟဲအါထီၣ်၀ဲအသိးဆီကဆီအံၤၦၤဘုၣ်အီၤမ့န့ၢ်တနံၣ်ဃၣ်ဃၣ်မး နဆါအီၤသ့၀ဲ အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ထါတပ့ၤသ၀ီဖိ ဒီၤခ့ၤအ့စံး၀ဲလၢ“ဖဲနံၣ်စးထီၣ်အခါန့ၣ်ဆီဘၣ်တၢ်ဆါဆီသံအါအဃိဖဲတၢ်တဘျီန့ၣ်ပဆှူဖးအါ ညါမီၤနီၤႉဘၣ်ဆၣ်ဒ်သိးကျိၣ်စ့တၢ်ဟဲနုာ်လၢတၢ်ချၢကအိၣ်အဂီၢ်န့ၣ်ပဘုၣ်၀ဲဒၣ်ဆီကဆီအံၤလီၤႉခဲအံၤအၦ့ၤဂ့ၤအဃိဘၣ်ဂီၢ်၀ဲန့ၣ်ႉကဲထီၣ်တၢ်မၤစၢၤလၢပဒံၣ်ပဖိကၠိတၢ်လၢာ်ဘူၣ်လၢာ်စ့ဒီးလၢတၢ်အိၣ်ဆူၣ်အိၣ်ချ့အဂီၢ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တကးဒံးဘၣ်လၢန့ၣ်အမဲာ်ညါမ့ၤကျးႇတၢ်အီၣ်ကျးဒီးကသံၣ်ကျးလၢအိၣ်၀့ၢ်ပူၤတဖၣ်အံၤစ့ၢ်ကီးဆါ၀ဲဒၣ်ဆီကဆီညၣ် တဖၣ်အိၣ်၀ဲအသိး မ့မ့ၢ်ၦၤဟးၦ့ၤ၀ဲလၢစ့ယိၤတဖၣ်ခီန့ၣ်လဲၤဆါက့ၤ၀ဲလၢမၠၣ်၀တံၣ် ကီၢ်ကၠီၣ်တဲၣ်–ကီၢ်ပယီၤကီၢ်ဆၢ စွ့ၤကိၣ်ကိၤသ၀ီတကပၤအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ

ၦၤဟးၦ့ၤဆီကဆီဖိတဂၤစံး၀ဲလၢ“ခဲအံၤလၢ၀့ၢ်ပူၤတၢ်အီၣ်ကျးတဖၣ်န့ၣ်အပာ်လီၤဆါ၀ဲဆီကဆီညၣ်ကသူန့ၢ်အဃိ ပဟဲၦ့ၤဆီကဆီလၢသ၀ီပူၤအံၤလီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ကီၢ်ပယီၤအပူၤသုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢဟီၣ်က၀ီၤတၢ်လီၢ်ကိးတီၤဒဲးဃၣ်ဃၣ်အပူၤ ဂံၢ်ခီၣ်ထံးပနံာ် တၢ်ဖိတၢ်လံၤအၦ့ၤဒိၣ်ထီၣ်ကွ့ၢ်ကွ့ၢ်အဃိလီၢ်က၀ီၤကမျၢၢ်တဖၣ်အံၤလၢတၢ်လုၢ်အီၣ်နီၢ်ခိးသမူကဘၣ်လီၢ်ဖိးဒ့အဂီၢ် အ၀ဲသ့ၣ်ဟးဃုဒဲးဆါ၀ဲတၢ်သူတၢ်သၣ်တကးဒံးဘၣ်ဘုၣ်ဆါ၀ဲထိးဖိဆီဖိလၢဟံၣ်အံၤန့ၣ်လီၤႉ