တၢ်ဒုးဆူၣ်ထီၣ်ကဒါလၢ ကၠဲးဒိ–နိၣ်တကီကျဲ

လါယူၤလံ ၁၂ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤအပူၤ လၢကၠဲးဒိ–နိၣ်တကီကျဲန့ၣ် တၢ်ဒုးဆူၣ်ထီၣ်၀ဲလၢပယီၤသုးဒီးတၢ်ပၢၢ်ဆၢသုးကရူၢ်အဘၢၣ်စၢၤတုၤလၢခဲအံၤတစုအဂ့ၢ်န့ၣ် ကမျၢၢ်လၢအိၣ်ကၠဲးဒိ၀့ၢ်ပူၤတဖၣ် စံး၀ဲန့ၣ်လီၤႉ

ဖဲလါယူၤလံ ၁၀ သီ အနံၤန့ၣ် လၢကၠဲးဒိ–နိၣ်တကီကျဲ ၁၉ မဲၤန့ၣ် တၢ်ဒုးကဲထီၣ်၀ဲလၢ ပယီၤသုးကျိၤလၢအဟဲနုာ်လီၤ လၢဟီၣ်က၀ီၤပူၤတဖၣ်အံၤဒီး(KNLA)တီခိၣ်ရိၣ်မဲတၢ်ပၢၢ်ဆၢကရူၢ်အဘၢၣ်စၢၤဒီး ခီဖျိတၢ်ဒုးကဲထီၣ်တုၤလၢခဲအံၤအဃိ ပယီၤသုးတကပၤသံဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ၦၤလၢအဘူးဒီးတၢ်ပၢၢ်ဆၢသုးကရူၢ်တဂၤစံး၀ဲလၢ“ဖဲမဟါန့ၣ်တၢ်ဒုးကဲထီၣ်လၢတပိၢ်ဖိထၣ်ႇတပိၢ်ဖိခံတကပၤန့ၣ်မီၤနီၤႉ ၦၤဘၣ်ဒိဘၣ်ထံးအိၣ်ဒီဒူၣ်ညါႉအ၀ဲသ့ၣ်ဟးပိာ်ကျဲဒီတနၤတအီၣ်ဘၣ်မ့ၤဘၣ်အဃိအ၀ဲသ့ၣ်ဟးမးတကဲလၢၤဘၣ်ႉ ဖဲတဂီၤအံၤတၢ်ဒုးကဲထီၣ်ဒံးလၢ(ရာသုံးတ)တကပၤန့ၣ်ဒံးမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲလါယူၤလံ ၁၁ သီအနံၤ န့ၣ်လီၤႉ

ခီဖျိပယီၤသုးနုာ်လီၤတၢ်ဒုးကဲထီၣ်အဃိကၠိလၢအိၣ်ဘူးဖဲတၢ်ကဲထီၣ်သးအခိၣ်အဃၢၤသ့ၣ်တဖၣ်တနီၤန့ၣ် ဘၣ်ကးပံးကွံာ်၀ဲကၠိအဂ့ၢ်န့ၣ် ကၠိသရၣ်မုၣ်တဂၤ စံး၀ဲဒ်အံၤန့ၣ်လီၤႉ

“ပယီၤသုးဟဲက့ၤဖဲပကၠိကပၤအံၤလီၤႉအ၀ဲသ့ၣ်ဟဲက့ၤမံဒံးဖဲန့ၣ်တသီခံသီဒံးႉပသိၣ်လိတၢ်တဘူၣ်လၢၤဘၣ်အဃိ ပပံးကွံာ်ကၠိမီၤနီၤ”အဂ့ၢ်န့ၣ် စံး၀ဲန့ၣ်လီၤႉ

ဘၣ်ဃးတၢ်ဒုးကဲထီၣ်ဘျီ၀ဲအံၤတၢ်သံတၢ်ဘၣ်ဒိဘၣ်ထံးတၢ်အိၣ်သးခီန့ၣ်တသ့ၣ်ညါလီၤတံၢ်လီၤဆဲးဘၣ်ဘၣ်ဆၣ် မ့မ့ၢ်ပယီၤသုးတကပၤခီသံဘၣ်ဒိဘၣ်ထံးအိၣ်၀ဲအဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်စံး၀ဲအသိး သ့ၣ်ညါဘၣ်န့ၣ်လီၤႉ