လါအီကူး ၈ သီႇ ၂၀၂၃ နံၣ်ႇ ခ့ၣ်အဲးစံၣ်
ဖဲလါအီကူး ၆ သီအနံၤ လၢကညီကီၢ်စဲၣ် သၣ်တီၣ်၀့ၢ်(၁၃)မဲၤ ပယီၤသုးနုာ်လီၤဒွဲၣ်အူအီၣ်ကွံာ်၀ဲကမျၢၢ်ဟံၣ် (၆)ဖျၢၣ်အကျါဖဲန့ၣ်ပၣ်ဃုာ်၀ဲ ကညီဘွဲကၠိသရၣ်မုၣ် ဖံနီၢ်လၢၢ်ဒါအဟံၣ်စ့ၢ်ကီးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ဖဲလါအီကူး ၆ သီ မုၢ်ထူၣ်အဆၢကတီၢ် ပယီၤသုးအိၣ်ဟဲလီၤ၀ဲလၢတီအူ၀့ၢ်တကပၤဒီးဖဲန့ၣ်၀ံၤလီၢ်ခံ ဖဲဟါခီ ၄ နၣ်ရံၣ် အဆၢကတီၢ်န့ၣ် နုာ်လီၤဒွဲၣ်အူအီၣ်၀ဲ(သၣ်တီၣ်၀့ၢ်)ကျဲကပၤၦၤဟံၣ်တနီၤဒီးတကးဒံးဘၣ်အမဲာ်ညါ နုာ်လီၤဒွဲၣ်အူအီၣ် ဃုာ်၀ဲသရၣ်မုၣ်ဖံနီၢ်လၢၢ်ဒါအဟံၣ်ဖးဒိၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ၦၤလၢအဘူးဒီးသရၣ်မုၣ်နီၢ်လၢၢ်ဒါအဟံၣ်ဖိဃီဖိတဂၤစံး၀ဲလၢ“ပယီၤသုးဒွဲၣ်အူအီၣ်ၦၤဟံၣ်လၢညါတဖၣ်န့ၣ် တၢ်ဒုးကဲထီၣ်အိၣ်မီၤနီၤႉဘၣ်ဆၣ်အဒွဲၣ်အူအီၣ်ၦၤဟံၣ်ဃုာ်ဒီးသရၣ်မုၣ်နီၢ်လၢၢ်ဒါအဟံၣ်ခဲအံၤတၢ်ဒုးကဲထီၣ်တအိၣ် နီတမံၤဘၣ်ႉဟံၣ်ဒုတၢ်ဟူဂူာ်ဟးဂီၤကလီၤလၢလၢစ့န့ၣ်လၢအကယၤညါမီၤနီၤႉအလံာ်အလဲၢ်လၢအကွဲးတ့ၢ်ဃာ်၀ဲ တဖၣ်န့ၣ်ပယီၤသုးဒွဲၣ်အူ၀ဲခဲလၢာ်လီၤႉဖဲ၀့ၢ်ပူၤအံၤၦၤကမျၢၢ်တအိၣ်ဘၣ်ႇဖဲအပူၤကွံာ်လါယနူၤအါရံၤအခါန့ၣ်ခီဖျိပယီၤသုးခးလီၤကျိဖးဒိၣ်အဃိၦၤဟးစံၣ်အိၣ်လၢတၢ်လီၢ်အဂၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
သရၣ်မုၣ်နီၢ်လၢၢ်ဒါလၢပယီၤသုးဒွဲၣ်အူအီၣ်အဟံၣ်အံၤအမ့ၢ်၀ဲဒၣ်ၦၤဘၣ်မူဘၣ်ဒါၦၤကူၣ်ဘၣ်ကူၣ်သ့တဂၤအသိး ပယီၤသုးအံၤပညိၣ်ဒွဲၣ်အူအီၣ်၀ဲသရၣ်မုၣ်အဟံၣ်လိၤလိၤဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်လၢအဂၤတဂၤစ့ၢ်ကီး စံး၀ဲဒ်အံၤန့ၣ်လီၤႉ
“သရၣ်မုၣ်အံၤမ့ၢ်သရၣ်မုၣ်တဂၤလၢၦၤပာ်ကဲအီၤတဂၤမီၤနီၤဖဲဟီၣ်က၀ီၤပူၤအံၤႉသရၣ်မုၣ်အဟံၣ်ဖိဃီဖိစ့ၢ်ကီး ၦၤအိၣ်ဖဲ၀့ၢ်ပူၤတဖၣ်အံၤၦၤယူးယီၣ်ပာ်ကဲအီၤၦၤပာ်ဂံၢ်ပာ်ဘါအီၤလီၤႉပယီၤသုးဟ့ၣ်တၢ်ဆီၣ်သနံးမၢတၢ်ဘူၣ်တၢ်ဘါ ခိၣ်နၢ်တဖၣ်အံၤဟဲက့ၤအိးထီၣ်ကဒါကၠိအိၣ်နီၤနီၤႉအ၀ဲသ့ၣ်ခးလီၤကျိဖးဒိၣ်ဒီယုၢ်အဃိၦၤက့ၤအိၣ်တဘူၣ်ဘၣ်ႉပယီၤသုးအံၤပညိၣ်ဒွဲၣ်အူအီၣ်ၦၤဘၣ်မူဘၣ်ဒါအဟံၣ်လိၤလိၤလီၤ”အဂ့ၢ်န့ၣ် စံး၀ဲန့ၣ်လီၤႉ
လၢန့ၣ်အမဲာ်ညါဖဲလါအီကူး ၇ သီ ဂီၤခီအဆၢကတီၢ်စ့ၢ်ကီး ပယီၤသုးနုာ်လီၤဒွဲၣ်အူအီၣ်ကဒီး၀ဲ သၣ်တီၣ်(၁၃)မဲၤ ၦၤဟံၣ်တနီၤဒံးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ဘၣ်ဃးပယီၤသုးဒွဲၣ်အူအီၣ်ကဒီးၦၤဟံၣ်အနီၣ်ဂံၢ်နီၣ်ဒွးအံၤန့ၣ် ပခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် ဆဲးကျိးဃုသ့ၣ်ညါမၤလီၤတံၢ်အီၤအဖၢမုၢ်န့ၣ်လီၤႉ
ခီဖျိပယီၤသုးခးလီၤကျိဖးဒိၣ်အဃိသၣ်တီၣ်၀့ၢ်ပူၤကမျၢၢ်တဖၣ်ဃ့ၢ်ထီၣ်၀ဲဒီတ၀့ၢ်လီၤဒီးၦၤလၢအအိၣ်တ့ၢ်လၢ၀့ၢ်ပူၤ တနီၤန့ၣ်ခီဖျိပယီၤသုးခးလီၤကျိဖးဒိၣ်အဃိသံဘၣ်ဒိဘၣ်ထံးအိၣ်၀ဲတလီၢ်လီၢ်ဒီးတကးဒံးဘၣ်အမဲာ်ညါ ပယီၤသုးခးသံကမျၢၢ်လၢတၢ်ဂ့ၢ်တအိၣ်နီတမံၤဘၣ်အံၤစ့ၢ်ကီးအိၣ်၀ဲအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ
စးထီၣ်ဖဲအပူၤကွံာ်လါဖ့ၤဘြူၤအါရံၤန့ၣ် လၢသၣ်တီၣ်၀့ၢ်(၁၃)မဲၤ ပယီၤသုးနုာ်လီၤဒွဲအူအီၣ်၀ဲဟီၣ်က၀ီၤ(ခ့ၣ်အဲၣ်ယူၣ်) ခိၣ်နၢ်အဟံၣ်အဃီဃုာ်ဒီးတၢ်ဘူၣ်တၢ်ဘါခိၣ်နၢ်အဟံၣ်ႇကမျၢၢ်အဟံၣ်အဃီကဲထီၣ်သးအိၣ်၀ဲတလီၢ်လီၢ်ဒီး တကီၢ်ခါခဲအံၤပယီၤသုးဒွဲၣ်အူအီၣ်ၦၤဟံၣ်ကအိၣ်လၢအဖျၢၣ်(၃၀)ဃၣ်ဃၣ်လံအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ