ဘၣ်ဟ့ၣ်ရှူ စုတခီဘၣ်ဆၣ် အ၀ဲကဆဲးဒုးဒံးသုးမီၤစိရိၤ
စးအဲၣ်ဆူ (၂၀၂၃ နံၣ်ႇ လါအီကူး)
ဘၣ်ဖဲလါအ့ဖြ့ၣ်တၢ်ကိၢ်ဒိၣ်မးအဆၢကတီၢ် လၢမၠၣ်၀တံၣ်၀့ၢ်ဃၢၤ မဲၢ်ကနဲသ၀ီ ကၠီၣ်တီၤ ကၠီၣ်မဲဟီၣ်က၀ီၤ အပူၤန့ၣ် တၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်လၢပယီၤသုးဒီးတၢ်ပၢၢ်ဆၢသုးကရူၢ်အဘၢၣ်စၢၤဒီးဖဲန့ၣ်စီၤဒါဖိ(တမ့ၢ်မံၤနီၢ်ကီၢ်)လၢအသးနံၣ်အိၣ်(၂၂)နံၣ်တဂၤအံၤဟဲတုၤ၀ဲဒၣ်ဖဲတၢ်ဒုးပူၤအံၤန့ၣ်လီၤႉ
ခံခီခံကပၤတၢ်ဒုးကဲထီၣ်အပူၤပယီၤသုးအံၤဟံးန့ၢ်၀ဲတၢ်မၤစၢၤလၢဟီၣ်က၀ီၤသုးခိးကီၢ်ဆၢ(BGF)အအိၣ်, သုးကျိၤနုာ်လီၤ၀ဲလၢဟီၣ်က၀ီၤပူၤအသိးကဘီယူၤစ့ၢ်ကီးဟဲခးလီၤစၢၤတၢ်ဒီးဘၣ်ဆၣ်တၢ်ပၢၢ်ဆၢသုးပာ်ဖှိၣ်တကပၤ က့ၤခီၣ်ဆၢဒုးကဒါ၀ဲဒူဒူအဂ့ၢ်န့ၣ် စီၤဒါဖိက့ၤတဲပၠးကဒါအကစၢ်တၢ်လဲၤခီဖျိအဂ့ၢ်အကျိၤလၢတၢ်ဒုးတၢ်ယၤပူၤအံၤ န့ၣ်လီၤႉ
“ဖဲပဟဲတုၤသီသီအခါန့ၣ်တၢ်ဒုးစးထီၣ်ကဲထီၣ်၀ဲလၢ(သိထၣ်ကွ့ၣ်)န့ၣ်မီၤနီၤႉကဘီယူၤဟဲခးလီၤစၢၤတၢ်ႇ ဖဲန့ၣ်အခါန့ၣ် တၢ်လီၢ်လၢပတုၤအိၣ်အလီၢ်န့ၣ်မ့ၢ်၀ဲဒၣ်ပဟံၣ်လီၤႉစုာ်တဖျၢၣ်ႇမိကၣ်တဘ့ၣ်န့ၣ်မ့ၢ်ဒၣ်ပဟံၣ်လီၤ”အဂ့ၢ်န့ၣ် အ၀ဲတဲပၠးကဒါက့ၤအတၢ်နုာ်လီၤပၣ်ဃုာ်လၢတၢ်ဒုးတၢ်ယၤပူၤအံၤန့ၣ်လီၤႉ
စီၤဒါဖိအံၤမ့ၢ်ၦၤတဂၤလၢအ၀ဲစံၣ်လီၤ၀ဲဒၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ခီၣ်မဲဒိၣ် သုးတၢ်သိၣ်လိတဂၤဒီး စးထီၣ်ဖဲ(၂၀၂၂)န့ၣ်အ၀ဲနုာ်လီၤပၣ်ဃုာ်၀ဲဒၣ်လၢ(Cobra)သုးကျိၤပူၤလၢအဟူးဂဲၤဖဲမၠၣ်၀တံၣ်ကလံၤထံးအံၤဒီးပၣ်ဃုာ်လၢတၢ်ထီၣ်ဒုးပယီၤသုးဒီးအစုတီၤဖီလာ်သုးကရူၢ်တၢ်ဒုးတၢ်ယၤပူၤအံၤန့ၣ်လီၤႉ
အ၀ဲန့ၣ်အိၣ်ဖျဲၣ်ထီၣ်၀ဲဒၣ်လၢအ့ၣ်ယၣ်၀တံၣ်ကီၢ်ခီဒိၣ် သၤပီကီၢ်ဆၣ်ပူၤဒီး ဖဲအ၀ဲဖျိထီၣ်တီၤထီကၠိ၀ံၤလီၢ်ခံ တချုးသုးဟံးန့ၢ်တၢ်စိတၢ်ကမီၤဒံးဘၣ် ဖဲအပူၤကွံာ်(၂၀၂၁)လါယနူၤအါရံၤအခါန့ၣ် စီၤဖိဒါအံၤအ၀ဲနုာ်လီၤ၀ဲဒၣ် လၢခ့ၣ်အဲၣ်ယူၣ်–ကညီဒီကလု၁်စၢဖှိၣ်ကရၢစုတီၤဖီလာ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ပူၤဒီး စးထီၣ်မၤလိ၀ဲဂံၢ်ခီၣ်ထံးသုးတၢ်သိၣ်လိန့ၣ်လီၤႉ
စီၤဒါဖိအံၤအဒီပုၢ်၀ဲၢ်အိၣ်၀ဲခဲလၢာ်(၆)ဂၤဒီးဖဲန့ၣ်အကျါမ့မ့ၢ်အ၀ဲန့ၣ်လၢကနုာ်လီၤမၤတၢ်ပၢၢ်ဆၢအဂီၢ် အမိၢ်ပၢ်အဒီပုၢ်၀ဲၢ် တြီအီၤဒီးဘၣ်ဆၣ်မ့မ့ၢ်တခီအ၀ဲပာ်တ့ၢ်ကွံာ်အအိၣ်ဖျဲၣ်ဒ့ပီၤလီၢ်ႇအမိၢ်အပၢ်နုာ်လီၤ၀ဲဒၣ်လၢ ကညီဒီကလုာ်တၢ်ထူၣ်ဖျဲး သုးမုၢ်ဒိၣ်(KNLA)ပူၤဒီးမ့ၢ်စ့ၢ်ကီးၦၤတဂၤလၢအသူၣ်ဆူၣ်သးဂဲၤလၢတၢ်ပၢၢ်ဆၢပူၤတဂၤ န့ၣ်လီၤႉ
“ယဟဲဖဲအံၤန့ၣ်ၦၤတဆီၣ်ထွဲဟ့ၣ်ဂံၢ်ဟ့ၣ်ဘါယၤနီတဂၤဘၣ်ႉအ၀ဲသ့ၣ်တြီယၤမီၤနီၤႉဂီၤခီဘျီယဟးထီၣ်ႇ အ၀ဲသ့ၣ် ကိးစိယၤတဲယၤလၢတဘၣ်လဲၤတဂ့ၤႉယဲယပာ်လီၤသးလၢကျဲလၢယဃုထၢအီၤန့ၣ်ယကလဲၤတုၤလၢအတုၤလီၤအဃိယလဲၤတုၤလၢအတုၤလီၤႉယကၠိ၀ံၤတဘျီဃီန့ၣ်ယဟဲဖဲအံၤလီၤ”အဂ့ၢ်န့ၣ် အ၀ဲတဲပၠးကဒါက့ၤ အတၢ်ဟဲနုာ်လီၤလၢ တၢ်ပၢၢ်ဆၢပူၤအဂ့ၢ်အကျိၤအံၤန့ၣ်လီၤႉ
စီၤဒါဖိအံၤဖဲအထီၣ်ဂံၢ်ခီၣ်ထံးသုးတၢ်သိၣ်လိ၀ံၤအခါန့ၣ်လၢဂံၢ်ခီၣ်ထံးသုးတၢ်သိၣ်လိအံၤတဆီ ကလဲၤလီၤတထံၣ်ဃီလၢ ပျီပူၤတၢ်မဲာ်ညါတသ့ဒံးဘၣ်အဃိဖဲ(၂၀၂၂)နံၣ်န့ၣ်အ၀ဲဆဲးထီၣ်ကဒါ၀ဲ(ခီၣ်မဲဒိၣ်)တၢ်သိၣ်လိလီၤဆီအံၤဒီးဖျိထီၣ်၀ဲဒၣ်န့ၣ်လီၤႉ
ဖဲအ၀ဲဖျိထီၣ်(ခီၣ်မဲဒိၣ်)သုးတၢ်သိၣ်လိအခါန့ၣ်လၢခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အကျါလီၤဆီဒၣ်တၢ်လၢ (သုးက့ ၆)လ့က့ၣ်ကိာ်လီၢ်က၀ီၤအခိၣ်အဃၢၤန့ၣ် တၢ်ဒုးဆူၣ်ထီၣ်၀ဲလၢပယီၤသုးဒီး(KNLA) ခီၤဘြၤ သုးကျိၤ အဘၢၣ်စၢၤအဃိ အ၀ဲနုာ်လီၤထီၣ်ဒုးဃုာ်တၢ်ဒီး(ခီၤဘြၤ)သုးကျိၤအံၤန့ၣ်လီၤႉ
“၀ဲဒၣ်န့ၣ်ပအဲၣ်ဒိးဒုးတၢ်မီၤနီၤႉပအဲၣ်ဒိးဒုးတၢ်အဃိပကဘၣ်လဲၤလၢတၢ်ဒုးကဲထီၣ်အလီၢ်န့ၣ်လီၤႉ အဃိယၤဒီးကၠီတဂၤ ပလဲၤထီၣ်လၢ(ခီၤဘြၤ)သုးကျိၤအအိၣ်ႉဖဲ(၂၀၂၂)တၢ်ဒုးကဲထီၣ်ဒီတနံၣ်န့ၣ်ပအိၣ်ဖဲန့ၣ်လီၤႉ” အဂ့ၢ်န့ၣ် စံး၀ဲန့ၣ်လီၤႉ
ဆၢကတီၢ်ဖဲန့ၣ်ပယီၤသုးအံၤလၢကထီၣ်မၤဆှဲကွံာ်မၠၣ်၀တံၣ်ကလံၤထံး(ခီၤဘြၤ)သုးကျိၤသုးပာ်ဖှိၣ်ဒီတခါ အဂီၢ်န့ၣ် အ၀ဲသ့ၣ်သုးကျိၤအိၣ်ဟဲထီၣ်၀ဲဒၣ်စးထီၣ်လၢလ့က့ၣ်ကိာ်တုၤလၢတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် (DKBA) တၢ်ပၢဟီၣ်က၀ီၤ ဂီၤလ့ၤဒီးဆိၣ်စံမၠဲၣ်လီၢ်က၀ီၤညါအဃိ တၢ်ဒုးဆူၣ်ထီၣ်၀ဲလၢခံခီခံကပၤအဘၢၣ်စၢၤန့ၣ်လီၤႉ
စီၤဒါဖိအံၤဖဲ(၂၀၂၃)လါအ့ဖြ့ၣ် ၁၈ သီအခါ တၢ်ဒုးကဲထီၣ်ဖဲမဲၢ်ကနဲသ၀ီကပၤ ကၠီၣ်တီၤ ကၠီၣ်မဲဟီၣ်က၀ီၤ အခါန့ၣ် အ၀ဲဟံးမူဒါဒ်သုးဆှ့ၣ်ခိၣ်တဂၤအသိးဒီးဖဲန့ၣ်လၢတၢ်တဆိမိၣ်တၢ်တပာ်သူၣ်ပာ်သးအပူၤအ၀ဲသဂၢၢ်ဘၣ် ဒီးတၢ်ဂ့ၢ်ကဲထီၣ်သးတခါန့ၣ်လီၤႉ
ဒိးန့ၢ်တၢ်ကစီၣ်လၢပယီၤသုးနုာ်ကျိၤကနုာ်လီၤအဃိစီၤဒါဖိအံၤလၢအသုးဆှ့ၣ်အပူၤအ၀ဲဆီလီၤပာ်လီၤ ၦၤခး(စနဲးဖၢး)ဖိ တဖၣ်ဖဲ(တီၤကိ)တၢ်လီၢ်တခါဒီးဖဲအမၢၦၤခိးခးပယီၤသုးအဆၢကတီၢ်ခီဖျိအ၀ဲဒီးအၦၤလၢအိၣ် ကစၢၢ်ခိၣ်(တီၤကိ)အံၤ တၢ်ဆဲးကျိးတန့ၢ်လၢၤဘၣ်အဃိဖဲအ၀ဲလဲၤထီၣ်သမံသမိးတၢ်အခါအ၀ဲဘၣ်သဂၢၢ်တိနိၣ်၀ဲဒီး (BGF)န့ၣ်လီၤႉ ဒီးဖဲအ၀ဲဂုၤက့ၤလီၢ်ခံအဆၢကတီၢ်တၢ်ခးအီၤဒီးကျိ(စနဲးဖၢး)အထံၣ်တဖၣ်အထံၣ်အဃိကျိချံဘၣ်၀ဲဒၣ်အစုဒုၣ်လၢအဆ့ၣ်တကပၤန့ၣ်လီၤႉႉ
“ဖဲန့ၣ်ယနီၣ်ဘၣ်တခါလၢဖဲယခါထီၣ်ယခီၣ်(၅)ခါန့ၣ်ယစုဘၣ်လံႉယကျိနါက့လီၤတဲာ်လၢယစုပူၤလံႉ ယမ့က့ၤထၢထီၣ်ယကျိဒုယကသံလီၤႉယကွၢ်လီၤကဒါယစုဘျီယစုအဃံန့ၣ်လီၤကရဲလၢာ်လံ”အဂ့ၢ်န့ၣ် စီၤဒါဖိစံး၀ဲန့ၣ်လီၤႉ
ဖဲစုဘၣ်ဒီးကျိချံအခါအ၀ဲမၤဟူးအစုနၢဘိတဖၣ်တန့ၢ်လၢၤဘၣ်ဘၣ်ဆၣ်ခီဖျိလဲၤတုၤလၢတၢ်ဆါဟံၣ် ဆဲးခံအဃိ စီၤဒါဖိအစုဆ့ၣ်တကပၤအံၤအထူၣ်အပျၢ်သံ၀ဲလံအဃိဘၣ်ဟ့ၣ်ဆှူကွံာ်အစုလၢအဆ့ၣ်တကပၤန့ၣ်လီၤႉ
စီၤဒါဖိအံၤမ့ၢ်၀ဲဒၣ်(ခီၣ်မဲဒိၣ်)သုးဖိလၢအနီၢ်ခိဂံၢ်ဘါလၢၦဲၤတဂၤဒီးဖဲအဘၣ်ဟ့ၣ်ဆှူကွံာ်အစုတကပၤ အခါန့ၣ် အသးသဟီၣ်လီၤစၢ်၀ဲဒီးလၢတၢ်ပၢၢ်ဆၢအပူၤအတနုာ်လီၤပၣ်ဃုာ်လၢအနီၢ်ကစၢ်လၢၤဘၣ်အဃိ အသးဘၣ်ဒိ၀ဲအဂ့ၢ်န့ၣ် အ၀ဲက့ၤတဲပၠးကဒါ၀ဲန့ၣ်လီၤႉ
“ယတူၢ်ဘၣ်လၢယဘၣ်ဟ့ၣ်ဆှူကွံာ်ယတၢ်အိၣ်မူတက့လံဒ်န့ၣ်မီၤနီၤႉယက့ၤနံၤဆၢၦၤအဂၤဘၣ်ဆၣ် တဘျီတခီၣ်န့ၣ် ယသးဆံးစ့ၢ်ႉမၤတၢ်တသ့ဒ်သိးလၢညါခါလၢၤဘၣ်အသိးယလီကီလီၤက့ၤယကစၢ်သးဒိၣ်မးႉမ့၀ံၤၦၤမၤန့ၣ်ဘၣ်ကွၢ်ဒ်န့ၣ်လီၤ”အဂ့ၢ်န့ၣ် အ၀ဲတဲဘၣ်အတၢ်တူၢ်ဘၣ်ခီၣ်ဘၣ်သ့ၣ်တဖၣ်န့ၣ်လီၤႉ
ဖဲ ၂၀၂၁ လါဖ့ၤဘြူၤအါရံၤထီၣ် ၁ သီန့ၣ် သုးစးထီၣ်ဟံးန့ၢ်တၢ်စိတၢ်ကမီၤဒီး သူၣ်ဘီၣ်သးစၢ်လၢအတတူၢ်လိာ် သုးဟံးန့ၢ် တၢ်စိတၢ်ကမီၤတဖၣ်အံၤအါဒၣ်တက့ၢ်အ၀ဲသ့ၣ်ပာ်ဖျါထီၣ်အတၢ်ဘၣ်သးလၢတၢ်မုာ်တၢ်ခုၣ်ပူၤပၢၢ်တုၤလၢတူၢ်၀ဲသုးမီၤစိရိၤအတၢ်စုဆူၣ်ခီၣ်တကးအံၤတန့ၢ်တကဲလၢၤဘၣ်ဘျီအ၀ဲသ့ၣ်ဃုထၢက့ၤ၀ဲစုက၀ဲၤလၢကက့ၤခီၣ်ဆၢတၢ်အံၤအဂီၢ်ဒီးလဲၤအိၣ်ကဒုသးလၢကလုာ်ဒူၣ်ဖီၣ်စုက၀ဲၤကရူၢ်ကရၢအဟီၣ်က၀ီၤပူၤထီၣ်၀ဲဒၣ်ဂံၢ်ခီၣ်ထံးသုးတၢ်သိၣ်လိလၢကက့ၤခီၣ်ဆၢကဒါက့ၤသုးမီၤစိရိၤအံၤဒီးတုၤလၢခဲအံၤန့ၢ်၀ဲ(၂)နံၣ်ဘျဲၣ်လံန့ၣ် လီၤႉ
တကီၢ်ခါခဲအံၤလၢတၢ်ထီဒါပၢၢ်ဆၢက့ၤသုးမီၤစိရိၤလၢ(၂)နံၣ်ဘျဲၣ်အတီၢ်ပူၤအံၤသူၣ်ဘီၣ်သးစၢ်ဘၣ်ဟ့ၣ်လီၤကွံာ်အသးသမူအါမးလံအသိးသူၣ်ဘီၣ်သးစၢ်လၢအဘၣ်ဟ့ၣ်လီၤအနီၢ်ခိက့ၢ်ဂီၤအံၤစ့ၢ်ကီးအနီၣ်ဂံၢ်အိၣ်လၢအကယၤ ဆူဖီခိၣ်လံန့ၣ်လီၤႉ
စီၤဒါဖိအသကိးၦၤသုးဖိစီၤယၤဒိၣ်စ့ၢ်ကီးစံး၀ဲလၢ“အကဲထီၣ်သးဒ်အံၤဘၣ်ပသးတမုုာ်စ့ၢ်ဘၣ်ႉဘၣ်ဆၣ် ဘၣ်စံးဘျုးလၢ အတသံဘၣ်မီၤနီၤႉဘၣ်မနုၤအဃိလဲၣ်န့ၣ်ဖဲပသကိးအကျါအံၤအသံအိၣ်ဒီဒူၣ်ညါမီၤနီၤႉအအိၣ်တ့ၢ်လၢအစုတူာ်ခီၣ်တူာ်ဒ်အံၤဘၣ်ဆၣ်တမံၤဂ့ၤတမၠိဂ့ၤအသးသမူအိၣ်ဒံးမီၤနီၤႉဆဲးဂုာ်ကျဲးစၢးလၢကျဲတဘိဘိသ့ဒံး”အဂ့ၢ်န့ၣ် ဟ့ၣ်ဂံၢ်ဟ့ၣ်ဘါ စံး၀ဲန့ၣ်လီၤႉ
စီၤဒါဖိအံၤအ၀ဲဟးထီၣ်လၢအအိၣ်ဖျဲၣ်ဒ့ပီၤလီၢ်ဒူသ၀ီအပာ်တ့ၢ်အမိၢ်အပၢ်န့ၢ်၀ဲ(၂)နံၣ်ဘျဲၣ်လံန့ၣ်လီၤႉ ဘၣ်ဆၣ်တဘျီတခီၣ်အ၀ဲသ့ၣ်နီၣ်ဘၣ်အဟံၣ်အဃီစ့ၢ်ကီးအိၣ်အသိးအ၀ဲမ့ၢ်တဲလီတဲစိဒီးအမိန့ၣ်အမိသးတမုာ်ဘၣ်,ဟီၣ်၀ဲဒၣ်ထီဘိလီၤအဂ့ၢ်န့ၣ် စီၤဒါဖိစံး၀ဲန့ၣ်လီၤႉ
ဘၣ်ဆၣ်စီၤဖိဒါအံၤကဆဲးနုာ်လီၤမၤဒံးတၢ်လၢတၢ်ပၢၢ်ဆၢပူၤအသိးနာ်၀ဲလၢမုၢ်တနံၤတၢ်ပၢၢ်ဆၢအံၤကမၤနၢၤတၢ်သၦၢ်ၦၢ်ဒီးတၢ်ပၢၢ်ဆၢမ့၀ံၤန့ၣ်အ၀ဲသ့ၣ်ကက့ၤလၢအအိၣ်ဖျဲၣ်လီၢ်(ထံထၣ်စွ့)အံၤအဂ့ၢ်န့ၣ် စီၤဒါဖိတဲဘၣ်အတၢ်တူၢ်ဘၣ်ဒ်အံၤန့ၣ်လီၤႉ
“တၢ်တဘျီအံၤကဘၣ်နၢၤတၢ်ႇမ့နၢၤမးကသ့လီၤႉတၢ်တဘျီညါအံၤပမ့တမၤနၢၤတၢ်ဘၣ်န့ၣ်ကမ့ၢ်လၢဖၣ်ဆါမးပတအီၣ်ဘၣ်လၢၤဘၣ်ႉတၢ်တဘျီအံၤမးမ့တမၤနၢၤတၢ်ဘၣ်န့ၣ်ပကက့ၤလၢဟံၣ်အဂီၢ်ဒၢးတသ့ဘၣ်ႉတၢ်တဘျီအံၤ မ့တ၀ံၤတတဲာ် ဘၣ်န့ၣ်တမ့ၢ်လၢပက့ၤလၢဟံၣ်ကသ့နီတဘျီလၢၤဘၣ်ႉယအဲၣ်ဒိးက့ၤလၢယဟံၣ်ဂ့ၤဂ့ၤ၀ါ၀ါမူၤမူၤနီၢ်နီၢ်လီၤႉယတအဲၣ်ဒိးက့ၤဟုၣ်က့ၤဘျၣ်လၢၤဘၣ်”အဂ့ၢ်န့ၣ် စီၤဒါဖိ စံး၀ဲန့ၣ်လီၤႉ
တကီၢ်ခါခဲအံၤဖီၣ်စုက၀ဲၤကရူၢ်ကရၢလၢအထီဒါပၢၢ်ဆၢသုးမီၤစိရိၤလၢအပၣ်ဃုာ်၀ဲဒီးသူၣ်ဘီၣ်သးစၢ် သ့ၣ်တဖၣ်အံၤ လၢအ၀ဲသ့ၣ်ကက့ၤလၢဟံၣ်အဂီၢ်တုၤ၀ဲဒၣ်လၢကျဲဖီခိၣ်လံန့ၣ်ၦၤစံးၦၤတဲဖျါထီၣ်၀ဲအိၣ်ဒီးလၢခီၣ်ဆၢဒုးအံၤတဆီခဲအံၤ အပတီၢ်အိၣ်ထီၣ်တုၤလၢတၢ်ထီၣ်ဒုးလံန့ၣ်လီၤႉ
သးလၢအဲၣ်ဒိးက့ၤဒုးခီၣ်ဆၢကဒါသုးမီၤစိရိၤသနူတခါအံၤအဃိလၢတၢ်ဒုးပူၤအဘၣ်ဟ့ၣ်လီၤအနီၢ်ခိက့ၢ်ဂီၤဘၣ်ဆၣ် တကီၢ်ခါခဲအံၤအတၢ်အိၣ်ဆၢထၢၣ်တၢ်ပာ်သးလၢတၢ်ပၢၢ်ဆၢအဖီခိၣ်အံၤကျၢၤမုဆှူ၀ဲဒၣ်ဒိၣ်မးန့ၣ်လီၤႉ
အ၀ဲဘၣ်ဟ့ၣ်ဆှူကွံာ်အစုတကပၤဘၣ်ဆၣ်စီၤဒါဖိအံၤအသးဆူၣ်ဒံး၀ဲလၢတၢ်ပၢၢ်ဆၢအပူၤဒံးဒီး အဲၣ်ဒိးနုာ်လီၤပၢၢ်ဆၢတၢ်ဃုာ်ဒီးအသကိးတဖၣ်ဒံးအဂ့ၢ်န့ၣ် တဲပၠး၀ဲတၢ်ပာ်သးန့ၣ်လီၤႉ
“လီၢ်ခံကတၢၢ်ယဆိမိၣ်လၢယအဲၣ်ဒိးနုာ်လီၤဒုးတၢ်ဒီးယသကိးသုးမုၢ်သံၣ်ဘိတဖၣ်ဒံးႉယခးကျိမ့ၢ်တသ့လၢၤဘၣ်ဘၣ်ဆၣ်ယအဲၣ်ဒိးလဲၤထီၣ်ကိးအ၀ဲသ့ၣ်လၢတၢ်မဲာ်ညါဒုၣ်ဒါအိၣ်အလီၢ်ဒီးယအဲၣ်ဒိးမၤၦဲၤန့ၢ်အ၀ဲသ့ၣ်ကျိချံဒံး”အဂ့ၢ်န့ၣ် စီၤဒါဖိ စံး၀ဲန့ၣ်လီၤႉ
