လါဖ့ၤဘြူၤအါရံၤ ၄ သီ, ၂၀၂၅ နံၣ်, ခ့ၣ်အဲးစံၣ်
မဲးပြ့ခံပယီၤသုးကလၢၤလၢဟီၣ်က၀ီၤ(KNLA)တၢ်ပၢၢ်ဆၢသုးပၥ်ဖှိၣ် ထီၣ်န့ၢ်၀ဲဖဲလါဖ့ၤဘြူၤအါရံၤထီၣ် ၁ သီအနံၤအံၤ လၢတၢ်ဒုးဘျီ၀ဲအံၤအပူၤန့ၣ် ပယီၤသုးတကပၤသံ၀ဲဒၣ်(၄၀)ဂၤအကျါ ပၣ်ဃုၥ်၀ဲသုးရ့ၣ်ခိၣ်-၂ အဂ့ၢ်န့ၣ် နီၣ်ဂံၢ်(၂၇)ဒုးယၤ နီၣ်ဂံၢ်(၂၇)ဒုးယၤရဲၣ်ကျဲၤ နီၣ်ဂံၢ်(၂)သုးဟီၣ်က၀ီၤဒ့ ထုးထီၣ်ပၥ်ဖျါ၀ဲဖဲတနံၤအံၤန့ၣ်လီၤ.
ခီၣ်ချ့သုးရ့ၣ်(ခမရ-၄၀၅)မဲးပြ့ခံပယီၤသုးကလၢၤလၢအိၣ်ဆီလီၤသးဖဲခ့ၣ်အဲၣ်ယူၣ်-ဒူသထူၣ်ကီၢ်ရ့ၣ် ဘံလ့ကီၢ်ဆၣ်ပူၤလၢအန့ၢ်၀ဲ အနံၣ်(၄၀)ဘျဲၣ်အံၤ ဖဲလါဖ့ၤဘြူၤအါရံၤ ၁ သီ ၁၁ နၣ်ရံၣ်အဆၢကတီၢ်န့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ် ထီၣ်မၤန့ၢ်ကွံၥ်၀ဲခဲလၢၥ်ဒီး တၢ်ဒုးအပူၤပယီၤသုးတကပၤသံ(၄၀)ဂၤ,တၢ်ဖီၣ်သမူန့ၢ်၀ဲ(၂၇)ဂၤအဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါ၀ဲန့ၣ်လီၤ.
ဒ်လံၥ်တၢ်ပၥ်ဖျါပူၤပၥ်ဖျါ၀ဲအသိးန့ၣ် ပယီၤသုးသံအဂၤ(၄၀)အကျါပၣ်ဃုၥ်၀ဲ သုးရ့ၣ်ခိၣ်-၂ သုးခိၣ်ဒိၣ်ဂီၢ်ဂ့ၢ် ခၣ်နဲၤ, သုးခိၣ်စိ စီၣ်မ့, သုးစကီၤ(၂)ဂၤ,သုးစကီၤဖိ(၂)ဂၤ, သုးစကီၤပြံ(၂)ဂၤဒီး ဒ်န့ၣ်အသိး တၢ်ဖီၣ်သမူန့ၢ်(၂၇)ဂၤအကျါန့ၣ်စ့ၢ်ကီးပၣ်ဃုၥ်၀ဲ(G3) သုးခိၣ်စိ သီၤတၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကတီၢ်ဃီတၢ်ထီၣ်သုးကလၢၤဘျီ၀ဲအံၤအခါ မ့မ့ၢ်ဒုးယၤခိၣ်-၂ , (စကခ-၈) သုးခိၣ်ဒိၣ်ဂီၢ်ဂ့ၢ် တ့ၤလွ့ၤအူ, သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စဲသူၤရၣ်ထ့ ဃုၥ်ဒီးအပှၤ(၁၇)ဂၤအံၤ ဃ့ၢ်ထီၣ်ကွံၥ်၀ဲလၢ သုးကလၢၤပူၤအဃိ တၢ်ပၢၢ်ဆၢသုးပၥ်ဖှိၣ်ကရူၢ် ဆဲးလူၤဃုဖီၣ်၀ဲအ၀ဲသ့ၣ်အဖၢမုၢ်အဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါ၀ဲန့ၣ်လီၤ.
ဒ်န့ၣ်အသိးသုးကလၢၤတၢ်ဒုးဘျီ၀ဲအံၤအပူၤစ့ၢ်ကီး တၢ်မၤန့ၢ်၀ဲ(၁၂၂ မမ)ဟီၣ်၀့ၣ်စၣ်ကျိးဖးဒိၣ်လၢခးတၢ်ယံၤ(၁)ခိၣ်ဃုၥ်ဒီး ကျိဖးဒိၣ်,ကျိဖိ,ကျိချံပှၥ်သၣ်အကလုၥ်လၢအဂၤသ့ၣ်တဖၣ်အါအါဂီၢ်ဂီၢ်န့ၣ်လီၤ.
တၢ်လဲၤထီၣ်သုးကလၢၤဘျီ၀ဲအံၤမ့ၢ်၀ဲ ဟီၣ်က၀ီၤ(KNLA)အမဲၥ်ညါ သူၤရံၣ်ယၣ်သုးကျိၤ,တပ့ၤစွ့ၤထံသုးကျိၤအပှၤ,သုးက့ဒြိကရူၢ်, ပယိၤ၀ါ သုးကျိၤ,တီၤညိၤသုးကျိၤ,(PDF),(BPLA),(FFD)ဒြိကရူၢ် သုးပၥ်ဖှိၣ်သ့ၣ်တဖၣ်ပၥ်ဖှိၣ်ထီၣ်သးထီၣ်ဒုးဖှိၣ်သကိး၀ဲ သုးကလၢၤအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်ဒ်လံၥ်တၢ်ပၥ်ဖျါပူၤပၥ်ဖျါ၀ဲအသိးန့ၣ် ဖဲအပူၤကွံၥ်(၂၀၂၄)လါအီးကထိဘၢၣ် ၁၁ သီအနံၤန့ၣ် သုးကလၢၤ၀ဲအံၤ အဒုးယၤခိၣ်, သုးရ့ၣ်ခိၣ် ဃုၥ်ဒီးအပှၤတဖၣ် ဖဲအ၀ဲသ့ၣ်မူၤထီၣ်သံးအခါ ဖီၣ်တီၢ်မၤဒၢၣ်၀ဲမဲးပြ့ခံသ၀ီဖိ(၈)ဂၤလၢ တၢ်ဂ့ၢ်တအိၣ်နီတမံၤဘၣ်အဃိ သ၀ီဖိဘၣ်သံကွံၥ်၀ဲဖဲန့ၣ်တဂၤကဲထီၣ်တ့ၢ်အသးဒံးန့ၣ်လီၤ.
