လါစဲးပထ့ဘၢၣ် ၁၃ သီႇ ၂၀၂၃ နံၣ်ႇ ခ့ၣ်အဲးစံၣ်
ဖဲလါစဲးပထ့ဘၢၣ် ၃ သီဒီး ၄ သီအနံၤ ကီၢ်သူလ့ၤသုးမုၢ်ဒိၣ်(KTLA)လၢအိၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄)ဟီၣ်က၀ီၤပူၤ အၦၤ(၁၆)ဂၤ ဟဲက့ၤပာ်ဖှိၣ်မၤသကိးတၢ်လၢကညီဒီကလုာ်တၢ်ထူၣ်ဖျဲး သုးမုၢ်ဒိၣ်(KNLA) သုးရ့ၣ် ၁၂ အအိၣ် ဟဲက့ၤစိာ်ဃုာ်ဒီးစုက၀ဲၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၄)တကပၤ စံး၀ဲန့ၣ်လီၤ
ႉ
ကီၢ်သူလ့ၤသုးမုၢ်ဒိၣ်အၦၤ(၁၆)ဂၤလၢအဟဲက့ၤပာ်ဖှိၣ်မၤသကိးတၢ်အံၤမ့ၢ်၀ဲဒၣ် တနီသရံၣ် ဆၣ်ကဆီသုးတြိၤ သုးခိၣ်အဲၣ်ခွံ(ကိး)ကီၤလၤဖိ အၦၤသ့ၣ်တဖၣ်ဒီး ၦၤသ့ၣ်တဖၣ်အံၤဟဲက့ၤပာ်ဖှိၣ်မၤသကိးတၢ်ဒီးဟီၣ်က၀ီၤ(KNLA) သုးရ့ၣ် ၁၂ အဂ့ၢ်န့ၣ် KNLA(သုးက့ ၄) သုးခိၣ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ
အ၀ဲစံး၀ဲလၢ“လၢညါန့ၣ်အ၀ဲသ့ၣ်ကဲ၀ဲဒၣ်သုခိၣ်အဲၣ်ခွံအၦၤႉအ၀ဲသ့ၣ်န့ၣ်အသုးရ့ၣ်ခိၣ်လၢဖိခွါလ့ႉခဲအံၤအ၀ဲသ့ၣ်ဟဲ က့ၤကဒါလၢအံၤတကပၤမီၤနီၤႉအ၀ဲသ့ၣ်ဟဲက့ၤစိာ်ဃုာ်တၢ်စုက၀ဲၤကျိာ်ချံၦာ်သၣ်လၢလၢၦဲၤၦဲၤလီၤႉလီလီစဲၤဒုၦၤ တဟ့ၣ်လီၤဘၣ်အ၀ဲသ့ၣ်မူဒါဒံးဘၣ်ႉဘၣ်ဆၣ်မ့မ့ၢ်လၢတၢ်ပနီၣ်န့ၣ်ၦၤဆီတလဲန့ၢ်အ၀ဲသ့ၣ်လၢာ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
တၢ်လီၢ်လၢကီၢ်သူလ့ၤသုးမုၢ်ဒိၣ်(KTLA)နုာ်လီၤဟူးဂဲၤ၀ဲအံၤမ့ၢ်၀ဲဒၣ် ဘျံးဒ၀ဲၢ်ကီၢ်ရ့ၣ်(သုးက့ ၄) KNLA သုးရ့ၣ်(၁၀) ဒီးသုးရ့ၣ်(၁၂)အဟီၣ်က၀ီၤဒီး တကီၢ်ခါခဲအံၤလၢသုးရ့ၣ်(၁၂)ဟီၣ်က၀ီၤအပူၤန့ၣ် KTLA အၦၤ ဟူးဂဲၤတအိၣ်လၢၤဘၣ် အဂ့ၢ်န့ၣ် (KNLA)သုးခိၣ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
အ၀ဲစံး၀ဲလၢ“လၢသုးရ့ၣ်(၁၂)ဟီၣ်က၀ီၤပူၤန့ၣ် KTLA တအိၣ်လၢၤဘၣ်ႉ အိၣ်တ့ၢ်က့ၤလၢသုးရ့ၣ်(၁၀)ဟီၣ်က၀ီၤပူၤ န့ၣ်လီၤႉ ပမၤတၢ်ဟူးတၢ်ဂဲၤလၢသုးရ့ၣ်(၁၂)ဟီၣ်က၀ီၤပူၤကအိၣ်လၢတလါဘျဲၣ်ဘျဲၣ်ညါအဃိခဲအံၤဂၢၢ်ထီၣ်ဖးဒိၣ်လံ” အဂ့ၢ်န့ၣ် စံး၀ဲန့ၣ်လီၤႉ
ဘၣ်ဃး(KTLA)အၦၤဟဲက့ၤပာ်ဖှိၣ်မၤသကိးတၢ်ဒီးခ့ၣ်အဲၣ်ယူၣ်(သုးက့ ၄)တၢ်ဂ့ၢ်အံၤ ပခ့ၣ်အဲးစံၣ်–ကညီတၢ်ကစီၣ် ၀ဲၤလီၢ်ခိၣ်သ့ၣ် ဆဲးကျိးၦၤဘၣ်မူဘၣ်ဒါဘၣ်ထွဲတဖၣ်ဘၣ်ဆၣ် ဆဲးကျိးတန့ၢ်ဒံးဘၣ်န့ၣ်လီၤႉ
ဒ်န့ၣ်အသိးဖဲအပူၤကွံာ်လါယူၤလံ ၁၉ သီအခါ လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ် ၁၂ ဟီၣ်က၀ီၤပူၤ ခီဖျိကီၢ်သူလ့ၤသုးမုၢ်ဒိၣ်(KTLA)အိၣ်ခိးခး၀ဲ (KNLA)သုးဂ့ၢ်၀ီခိၣ် သုးခိၣ် စီၤဖိဆံးအသိလ့ၣ်အဃိ သုးခိၣ်စီၤဖိဆံးဒီး အၦၤသံ၀ဲတဂၤ ကဲထီၣ်တ့ၢ်အသးဒံးန့ၣ်လီၤႉ
ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ်အပူၤ တၢ်သဘံၣ်သဘုၣ်လၢအဟဲကဲထီၣ်လၢ(ခ့ၣ်အဲၣ်ယူၣ်)စုတီၤဖီလာ်အၦၤဒီး ကီၢ်သူလ့ၤသုးမုၢ်ဒိၣ်(KTLA)အဘၢၣ်စၢၤအံၤ တၢ်ကဘှါဆှဲအီၤလၢအဆိအချ့အဂီၢ် လီၢ်က၀ီၤကမျၢၢ်ထုးထီၣ်ပာ်ဖျါ ဃ့ထီၣ်ဒံး၀ဲန့ၣ်လီၤႉ
ကီၢ်သူလ့ၤသုးမုၢ်ဒိၣ်(KTLA)ဖီၣ်စုက၀ဲၤကရူၢ်အံၤဘၣ်တၢ်ဒုးအိၣ်ထီၣ်အီၤဖဲ(၂၀၂၂)လၢကညီဒီကလုာ်ဂၢၤသးကရၢ (KNDO)သုးရိၣ်မဲခိၣ်ကျၢၢ်လီၢ်လံၤ သုးခိၣ်ကျၢၢ်ဖိ စီၤနၢၤဒါမၠးအံၤဒီး ကရူၢ်အံၤအိၣ်ဆီလီၤသးဟူးဂဲၤ၀ဲဒၣ်လၢ ခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ်(သုးက့ ၆)ဒီး ဘျံးဒ၀ဲၢ်ကီၢ်ရ့ၣ်(သုးက့ ၄)ဟီၣ်က၀ီၤတဖၣ်အပူၤန့ၣ်လီၤႉ
