လါယနူၤအါရံၤ ၁၇ သီႇ ၂၀၂၃ သီႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကၠၤအ့စ့ၣ်ကၠံကီၢ်ဆၣ် ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤအပူၤန့ၣ် ခီဖျိပယီၤသုးဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤတၢ်ဒုးဆူၣ်ထီၣ်အဃိ စးထီၣ်တလါအံၤ ၁၆ သီ တုၤလၢ ၂၃ သီအနံၤန့ၣ် တၢ်တဘၣ်ဟးထီၣ်က့ၤလီၤလၢကၠၤအ့စ့ၣ်ကၠံ–ဃိၣ်သၢဖျၢၣ်ကျဲအံၤ ဘၣ်အဂ့ၢ်န့ၣ် KNU ထုးထီၣ်ပာ်ဖျါ၀ဲဖဲမဟါလါယနူၤအါရံၤ ၁၆ သီအနံၤန့ၣ်လီၤႉ
တကီၢ်ခါခဲအံၤခီဖျိတၢ်ဒုးဆူၣ်ထီၣ်လၢဒူပျာ်ယာ်ကီၢ်ရ့ၣ် ကၠၤအ့စ့ၣ်ကၠံကီၢ်ဆၣ်ဟီၣ်က၀ီၤပူၤအဃိ တၢ်ဘၣ်ယိၣ်အိၣ်လၢကမျၢၢ်လၢအဟးထီၣ်က့ၤလၢကျဲ၀ဲအံၤသ့ၣ်တဖၣ်အဂီၢ်ဒိၣ်မးအဖီခိၣ် စးထီၣ်တလါအံၤ ၁၆ သီတုၤလၢ ၂၃ သီအနံၤန့ၣ် သိလ့ၣ်တီၣ်ၦၤလဲၤတၢ်ဖိတဖၣ်လ့ၤတက့ၤတဘၣ်ဟးထီၣ်က့ၤလီၤလၢ ကၠၤအ့စ့ၣ်ကၠံ– ဃိၣ်သူဖျၢၣ်ကျဲအံၤဘၣ်အဂ့ၢ်န့ၣ် ထုးထီၣ်ပာ်ဖျါ၀ဲန့ၣ်လီၤႉ
လံာ်တၢ်နဲၣ်လီၤအံၤအဖီခိၣ်လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲ“တၢ်အိၣ်သးခဲအံၤန့ၣ်ကၠၤအ့စ့ၣ်ကၠံ၀့ၢ်ပူၤန့ၣ်ခံခီခံကပၤဒုးယၤတၢ်ဖ့ၣ်စၢကဲထီၣ်အဖၢမုၢ်လီၤႉအဃိန့ၣ်ဒ်သိးကမျၢၢ်သုတဘၣ်ဒီးကျိဖးဒိၣ်တဂ့ၤအဂီၢ်န့ၣ်ၦၤထုးထီၣ်နဲၣ်လီၤတၢ်ကလုၢ်လၢကမျၢၢ်တဘၣ်ဟးထီၣ်တၢ်ချၢဘၣ်ဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ
တုၤလၢမဟါလါယနူၤအါရံၤ ၁၆ သီအနံၤန့ၣ် ခံခီခံကပၤတၢ်ဒုးကဲထီၣ်တအိၣ်ဒံး၀ဲဘၣ်ဆၣ် စးထီၣ်လၢတၢ်ထုးထီၣ်နဲၣ်လီၤတၢ်ကလုၢ်၀ံၤအလီၢ်ခံတုၤလၢခဲအံၤန့ၣ်လၢကၠၤအ့စ့ၣ်ကၠံ–ဃိၣ်သၢဖျၢၣ်ကျဲန့ၣ် ၦၤဟးထီၣ်က့ၤလီၤတအိၣ်၀ဲလၢၤဘၣ်အဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
ဘၣ်ဆၣ်ဖဲအပူၤကွံာ်စှၤသီအခါပယီၤသုးနုာ်လီၤ၀ဲဒၣ်လၢကၠၤအ့စ့ၣ်ကၠံကီၢ်ဆၣ်(သမ့ၤလဲၣ်)သ၀ီပူၤဒီး ဖီၣ်၀ဲလီၢ်က၀ီၤကမျၢၢ်ပိာ်ခွါအဂၤ(၁၀)ဘျဲၣ်အသိးဖီၣ်သမံသမိးစ့ၢ်ကီး၀ဲ(တူၣ်လ့ကိ)သ၀ီဖိတနီၤအိၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
လီၢ်က၀ီၤသ၀ီဖိလၢတၢ်ဖီၣ်အီၤသ့ၣ်တဖၣ်အံၤပယီၤသုးသူအီၣ်၀ဲလၢတၢ်ဒီသဒၢစုက၀ဲၤတခါအသိး သ၀ီ၀ဲန့ၣ်အပူၤခီဖျိကမျၢၢ်တဖၣ်ဃ့ၢ်တၢ်ဒုးအဃိအ၀ဲသ့ၣ်နုာ်လီၤမၤဟးဂီၤၦၤဟံၣ်ၦၤဃီဟံၦၤတၢ်ဖိတၢ်လံၤဒီး ဒွဲၣ်အူအီၣ်၀ဲၦၤဟံၣ်(၂)ဖျၢၣ်ညါအဂ့ၢ်န့ၣ် သမ့ၤလဲၣ် လီၢ်က၀ီၤသ၀ီဖိပိာ်မုၣ်လၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဖဲမဟါတဟါန့ၣ်ပယီၤသုးဖီၣ်ၦၤပိာ်ခွါအဂၤ(၁၀)ဘျဲၣ်ညါႉမ့၀ံၤလၢမုၢ်ဟါခါန့ၣ်ပယီၤသုးနုာ်လီၤလၢၦၤဟံၣ်ပူၤဟးမၤဟးဂီၤၦၤတၢ်ဖိတၢ်လံၤႉစ့မၤဘူၣ်နါက့ဟံဃုာ်၀ဲမီၤနီၤႉစ့န့ၣ်ကအိၣ်လၢကလီၢ်(၄၀)ညါႉမ့၀ံၤဖီၣ်အီၣ်ခးသံအီၣ်ၦၤထိးၦၤဆီမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါယနူၤအါရံၤ ၁၆ သီအနံၤန့ၣ်လီၤႉ
လၢန့ၣ်အမဲာ်ညါဘၣ်ဃး(ခ့ၣ်အဲၣ်ယူၣ်)ထုးထီၣ်ဟ့ၣ်ပလီၢ်၀ဲဒ်အံၤန့ၣ် ခီဖျိဖဲအပူၤကွံာ်စှၤသီအခါတၢ်ဒုးကဲထီၣ်ဒိၣ်ဒိၣ်မုၢ်မုၢ်အိၣ်၀ဲအသိးပယီၤသုးစ့ၢ်ကီးနုာ်လီၤဟူဂဲၤအါအါဂီၢ်ဂီၢ်အဃိ တၢ်ဒုးဆူၣ်ထီၣ်သ့၀ဲအဂ့ၢ်န့ၣ် လီၢ်က၀ီၤကမျၢၢ်ပိာ်မုၣ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
စးထီၣ်ဖဲလါဒံၣ်စ့ဘၢၣ်လၢာ်န့ၣ်တၢ်ဒုးဆူၣ်ထီၣ်၀ဲလၢကၠၤအ့စ့ၣ်ကၠံကီၢ်ဆၣ်အပူၤဒီးတုၤလၢခဲအံၤတစုတၢ်ဒုးဆဲးကဲထီၣ်ဒံး၀ဲန့ၣ်လီၤႉခံခီခံကပၤအဘၢၣ်စၢၤဒုးယၤတၢ်ဖ့ၣ်စၢအိၣ်ဒံးအဃိတၢ်ဒုးအံၤဆဲးကဲထီၣ်သ့၀ဲအသိး ခီဖျိတၢ်ဒုးအဃိလီၢ်က၀ီၤကမျၢၢ်လၢအကလးဘၣ်ပာ်တ့ၢ်ကွံာ်အဟံၣ်အဃီအဒူသ၀ီဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ
