ကီၢ်သူလ့ၤဟီၣ်က၀ီၤပူၤသုးကီၣ်ကးတၢ်ပၢတၢ်ပြးအတကွီၢ်အံၣ်လီၤ၀ဲဒီးဘၣ်ဟ့ၣ်ဆှူကွံာ်အသုးကလၢၤ ၆၀ ဘျဲၣ် အဂ့ၢ် KPSN စံး၀ဲ

လါစဲးပထ့ဘၢၣ် ၂၇ သီႇ ၂၀၂၃ နံၣ်ႇ ခ့ၣ်အဲးစံၣ်

ကီၢ်ပယီၤမုၢ်ထီၣ်ကလံၤထံးကီၢ်သူလ့ၤဟီၣ်က၀ီၤအပူၤ စးထီၣ်(၂၀၂၁)လါဖ့ၤဘြူၤအါရံၤထီၣ် ၁ သီ သုးဟံးန့ၢ် တၢ်စိတၢ်ကမီၤ တုၤလၢတနံၣ်အံၤ(၂၀၂၃)လါယူၤလံန့ၣ် သုးကီၣ်ကးအတၢ်ပၢတၢ်ပြးဒီးသုးဂ့ၢ်၀ီခံခါလၢာ် အတကွီၢ်အံၣ် လီၤ၀ဲဒီးအသုးကလၢၤလီၤမၢ်ကွံာ်၀ဲဒၣ်လၢခ့ၣ်အဲၣ်ယူၣ်ဟီၣ်က၀ီၤပူၤအိၣ်၀ဲ(၆၂)ဖျၢၣ်အဂ့ၢ်န့ၣ် ကညီတၢ်ဆီၣ်ထွဲမၤစၢၤ တၢ်မုာ်တၢ်ခုၣ်ၦာ်ဘျးစဲ(KPSN)စံးလီၤ၀ဲဖဲမဟါလါစဲးပထ့ဘၢၣ် ၂၆ သီအနံၤန့ၣ်လီၤႉ

သုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢကီၢ်ပယီၤမုၢ်ထီၣ်ကလံၤထံး(ခ့ၣ်အဲၣ်ယူၣ်)တၢ်ပၢဟီၣ်က၀ီၤတဖၣ်အပူၤ သုးကီၣ်ကးအတၢ်ပၢတၢ်ပြးအတကွီၢ်အံၣ်လီၤ၀ဲဒီးတၢ်ဒုးနဲၣ်ကီၢ်သူလ့ၤတၢ်ပၢဟီၣ်က၀ီၤကူၣ်သ့တၢ်အိၣ်သး လံာ်အမံၤလၢ အမ့ၢ်“တၢ်စိတၢ်ကမီၤတၢ်ဆီတလဲ–ကီၢ်ပယီၤမုၢ်ထီၣ်ကလံၤထံးသုးကီၣ်ကးတၢ်ပၢတၢ်ပြးအတကွီၢ် အံၣ်လီၤ” လံာ်တၢ်ပာ်ဖျါအံၤအပူၤ ပာ်ဖျါ၀ဲန့ၣ်လီၤႉ

(KPSN)ၦၤနဲၣ်တၢ် နီၢ်၀ါခုၣ်ဆှံ စံး၀ဲလၢ“ အ၀ဲသ့ၣ်တၢ်ပၢတၢ်ပြးအတကွီၢ်အံၣ်လီၤလၢပဟီၣ်က၀ီၤပူၤႉ ပယီၤသုအံၤ အဂံၢ်အဘါတအိၣ်ဒ်သိးလၢညါလၢၤဘၣ်ႉခီဖျိလၢၦၤဂဲၤဆၢထၢၣ်ထီဒါအီၤဒီထံဒီကီၢ်အဃိမီၤနီၤႉခဲအံၤပထံၣ်လၢအ၀ဲသ့ၣ်ဆှၢထီၣ်တၢ်အီၣ်တၢ်အီႇဆှၢ၀ဲဒၣ်အၦၤသုးဖိလၢခီၣ်တဖၣ်မ့ၢ်ဂ့ၤန့ၣ်ဆှၢထီၣ်၀ဲဆူသုးကလၢၤတန့ၢ်လၢၤဘၣ်ႉအဃိအသုးကလၢၤလီၤ၀ဲဒၣ်တဖျၢၣ်၀ံၤတဖျၢၣ်အဖီခိၣ်န့ၣ်အ၀ဲသ့ၣ်သူ၀ဲဒၣ်ကဘီယူၤသူ၀ဲဒၣ်ကျိဖးဒိၣ်တဖၣ်မီၤနီၤႉပမ့ၢ်ကွၢ်လၢထံဖိကီၢ်ဖိအတၢ်သံမ့ၢ်ဂ့ၤအတၢ်ဘၣ်ဒိဘၣ်ထံးမ့ၢ်ဂ့ၤန့ၣ်အါ၀ဲဒၣ်လၢကျိဖးဒိၣ်အဃိမီၤနီၤႉပမ့ၢ်ကွၢ်လၢအ၀ဲသ့ၣ်သူ၀ဲဒၣ်ကဘီယူၤဒီးကျိဖးဒိၣ်အဖီခိၣ်န့ၣ်အ၀ဲသ့ၣ်ပညိၣ်၀ဲဒၣ်ထံဖိကီၢ်ဖိကမျၢၢ်တဖၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

စးထီၣ်(၂၀၂၁)တုၤလၢ(၂၀၂၃)လါယူၤလံ လၢကီၢ်သူလ့ၤဟီၣ်က၀ီၤအပူၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) ထီၣ်မၤန့ၢ်၀ဲသုးကီၣ်ကးအသုးကလၢၤ(၆၂)ဖျၢၣ်တကးဒံးဘၣ် သုးကီၣ်ကးအစုတီၤဖီလာ်ကၠိလီၤမၢ်ကွံာ်၀ဲဒၣ် (၂၇၀)ဖျၢၣ် ညါန့ၣ်လီၤႉတကီၢ်ခါခဲအံၤကၠိသ့ၣ်တဖၣ်အံၤဟဲက့ၤအိးထီၣ်အိၣ်ဆၢထၢၣ်က့ၤလၢ(ခ့ၣ်အဲၣ်ယူၣ်)ကူၣ်သ့ဆဲးလၤ၀ဲၤကျိၤတၢ်ပၢဆှၢဖီလာ်လံအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

လၢကီၢ်သူလ့ၤတၢ်ပၢခံခီခံကပၤပၢ၀ဲဟီၣ်က၀ီၤပူၤန့ၣ် တချုးသုးဟံးန့ၢ်တၢ်စိတၢ်ကမီၤ (၂၀၁၉–၂၀၂၀) တၢ်သိၣ်လိနံၣ် အခါန့ၣ် ကၠိအိၣ်၀ဲခဲလၢာ်(၃၈၂)ဖျၢၣ်ဒီး သုးဟံးန့ၢ်တၢ်စိတၢ်ကမီၤ(၂၀၂၁)တုၤလၢ (၂၀၂၃)နံၣ်န့ၣ် ကၠိဟဲအါထီၣ်အိၣ် တုၤလၢ(၉၀၉)ဖျၢၣ်ညါအဂ့ၢ်န့ၣ် (KPSN)စံး၀ဲန့ၣ်လီၤႉ

လၢန့ၣ်အမဲာ်ညါ(KNLA)သုးပာ်ဖှိၣ်တၢ်ပၢဟီၣ်က၀ီၤတဖၣ်ဟဲအါထီၣ်လဲၢ်ထီၣ်၀ဲဒီးတကီၢ်ခါခဲအံၤသုးကီၣ်ကး အတၢ်၀ံစိာ်တီဆှၢလၢသုးဂ့ၢ်၀ီတကပၤမ့ၢ်ဂ့ၤႇလၢမုၢ်ကျိၤ၀ဲၤကွာ်တကပၤမ့ၢ်ဂ့ၤန့ၣ် ၀့ၢ်တကူၣ်ဆူကီၢ်ကၠီၣ်တဲၣ်–ကီၢ်ပယီၤ ကီၢ်ဆၢ မၠၣ်၀တံၣ်အ့ရှါကျဲအံၤန့ၣ် ကဲထီၣ်၀ဲတၢ်မၤပျံၤမၤဖုးလၢသုးကီၣ်ကးအဂီၢ်အဂ့ၢ်န့ၣ် (KPSN)လံာ်တၢ်ပာ်ဖျါအပူၤ စံး၀ဲန့ၣ်လီၤႉ

လၢတၢ်န့ၣ်အဃိဟီၣ်က၀ီၤလၢသုးကီၣ်ကးဘၣ်ဟ့ၣ်ဆှူကွံာ်၀ဲသ့ၣ်တဖၣ်အံၤလၢအကက့ၤမၤန့ၢ်ကဒါ၀ဲအဂီၢ် သူ၀ဲဒၣ်ကျိဖးဒိၣ်ဒီးကဘီယူၤသ့ၣ်တဖၣ်န့ၣ်လီၤႉဘၣ်ဆၣ်အ၀ဲသ့ၣ်တမၤန့ၢ်ကဒါဟီၣ်က၀ီၤတၢ်လီၢ်တဖၣ်ဘၣ်ဒီး ခီဖျိတၢ်ထီၣ်ဒုးအံၤအဃိကီၢ်သူလ့ၤဟီၣ်က၀ီၤအပူၤကမျၢၢ်ဘၣ်ဃ့ၢ်မှံဟးဖျိးအနီၣ်ဂံၢ်အိၣ်၀ဲ(၆၃၇ႇ၄၁၄)ဂၤညါဒီး စးထီၣ်ဖဲတနံၣ်အံၤလါဖ့ၤဘြူၤအါရံၤန့ၣ်ၦၤဃ့ၢ်မှံဟးဖျိးနီၣ်ဂံၢ်ဟဲအါထီၣ်၀ဲ(၁၈)မျးကယၤညါအဂ့ၢ်န့ၣ် (KPSN) စံး၀ဲန့ၣ်လီၤႉ

တကးဒံးဘၣ်အမဲာ်ညါခီဖျိပယီၤသုးပညိၣ်ထီၣ်ဒုး၀ဲကမျၢၢ်ထံဖိကီၢ်ဖိတဖၣ်အဃိဒူသထူၣ်ႇတီအူႇတနီသရံၣ်ႇ မုၢ်တြီၢ်ဒီးဒူပျာ်ယာ်ကီၢ်ရ့ၣ်အပူၤ ကၠိ(၁၉)ဖျၢၣ်ႇတၢ်ဘါယွၤသရိာ်(၁၅)ဖျၢၣ်ႇ သီခါဖၠၣ်(၁၀)ဖျၢၣ်ဒီး တၢ်ဆါဟံၣ်(၆)ဖျၢၣ် ဘၣ်ဒိဘၣ်ထံးဟးဂီၤ၀ဲအဂ့ၢ်န့ၣ် (KPSN)လံာ်တၢ်ပာ်ဖျါပူၤ ပာ်ဖျါ၀ဲန့ၣ်လီၤႉ

ခီဖျိသုးကီၣ်ကးအံၤပညိၣ်၀ဲကမျၢၢ်ထံဖိကီၢ်ဖိအဃိလီၢ်က၀ီၤကမျၢၢ်ဘၣ်ဃ့ၢ်မုၢ်ပြံပြါဃ့ၢ်မှံဟးဖျိး၀ဲဒီးတကးဒံးဘၣ် ခီဖျိကျိဖးဒိၣ်အံၤအဃိကမျၢၢ်တဖၣ်ဖံးအီၣ်မၤအီၣ်တၢ်တသ့လၢၤဘၣ်အဃိၦၤဃ့ၢ်မှံဟးဖျိးတဖၣ်လိၣ်ဘၣ်၀ဲဂ့ၢ်ဂီၢ်အူ တၢ်ဆီၣ်ထွဲမၤစၢၤအဂ့ၢ်န့ၣ် (KPSN)လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

“(UN)တၢ်ကရၢကရိလၢအလဲၤမၤသကိးတၢ်ဒီးသုးကီၣ်ကးသ့ၣ်တဖၣ်န့ၣ်ခီဖျိအတန့ၢ်ဘၣ်တၢ်ပျဲလၢကဟဲဆီၣ်ထွဲမၤစၢၤတၢ်ဘၣ်လဲၤ၀ဲတတုၤဘၣ်အဖီခိၣ်န့ၣ်အခီပညီစ့သ့ၣ်တဖၣ်ကလဲၤလၢန့ၣ်တကပၤအဂီၢ်န့ၣ်လဲၤ၀ဲတတုၤဘၣ်မီၤနီၤႉ ၀ဲဒၣ်ခီန့ၣ်ပလဲၤတုၤပလဲၤမၤန့ၢ်တအိၣ်ဘၣ်န့ၣ်လၢတၢ််ဆီၣ်ထွဲမၤစၢၤလီၤႉအဃိန့ၣ်ဘၣ်မနုၤဃိလၢတဃုကျဲလၢကဟဲခီဖျိလၢအံၤတကပၤလဲၣ်ဘၣ်မီၤနီၤႉအဃိန့ၣ်ပလံာ်တၢ်ပာ်ဖျါတဘ့ၣ်အံၤပအဲၣ်ဒိးဒုးသ့ၣ်ညါအ၀ဲသ့ၣ်တဖၣ်လၢအ၀ဲသ့ၣ်တဖၣ်စ့ၢ်ကီးကြၢးက့ၤဆိကမိၣ်၀ဲဒၣ်ဒီးမၤတၢ်ဆၢတဲာ်လၢအသီမီၤနီၤ”အဂ့ၢ်န့ၣ် (KPSN)ၦၤနဲၣ်တၢ် နီၢ်၀ါခုၣ်ဆှံ စံး၀ဲန့ၣ်လီၤႉ

ၦၤဃ့ၢ်မှံဟးဖျိနီၣ်ဂံၢ်လၢအဟဲအါထီၣ်သ့ၣ်တဖၣ်အံၤအဂီၢ်ဒီးဒ်တၢ်ဒွးလီၤ၀ဲလၢ(၆)ဂီၢ်နီၢ်တဂၤအသိးန့ၣ် လၢကဟဲ(၁၂)လါ အဂီၢ်လိၣ်ဘၣ်၀ဲဒၣ်အမဲရံၣ်ကၤစ့ဒီၣ်လၣ်(၄၂)ကကွဲၢ်ညါဒီးဖဲန့ၣ်အကျါလိၣ်ဘၣ်၀ဲဒၣ်တၢ်သူၣ်ထီၣ်ႇကသံၣ်ကသီႇကၠိတၢ်ဆီၣ်ထွဲမၤစၢၤဒီးလၢၦၤဖိဒံဖိသၣ်ႇၦၤပိာ်မုၣ်သ့ၣ်တဖၣ်အဂီၢ်လိၣ်ဘၣ်၀ဲဂ့ၢ်ဂီၢ်အူတၢ်ဆီၣ်ထွဲမၤစၢၤအဃိလီၤလီၤဆီဆီအဃိလီၢ်က၀ီၤတၢ်ကရၢကရိဒီးကရူၢ်လၢအဟ့ၣ်တၢ်ဆီၣ်ထွဲမၤစၢၤဒ်သိးကညီဂ့ၢ်ဂီၢ်အူတၢ်တိစၢၤမၤစၢၤကရူၢ်(KERT)တဖၣ်အံၤဆီၣ်ထွဲမၤစၢၤ၀ဲအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

ကညီတၢ်ဆီၣ်ထွဲမၤစၢၤတၢ်မုာ်တၢ်ခုၣ်ၦာ်ဘျးစဲ(KERT)အံၤ မ့ၢ်ၦာ်ဘျးစဲကရူၢ်လၢအဘၣ်တၢ်ဒုးအိၣ်ထီၣ်အီၤလၢ ကညီဂံၢ်ခီၣ်ထံးတၢ်ကရၢကရိအဒူၣ်(၂၀)ဘျဲၣ်လၢအဟ့ၣ်ၦၤဂ့ၢ်၀ီအဆီၣ်ထွဲမၤစၢၤဆူၦၤဘၣ်ကီဘၣ်ခဲဖိလၢအဘၣ်ဃ့ၢ်မှံဟးဖျိးတဖၣ်အံၤန့ၣ်လီၤႉ