လါစဲးပထ့ဘၢၣ် ၁၁ သီႇ ၂၀၂၃ နံၣ်ႇ ခ့ၣ်အဲးစံၣ်
လၢတနီသရံၣ်ကီၢ်ခီဒိၣ် သယဲၣ်ခၠီကီၢ်ဆၣ် ဒူသ၀ီတဖၣ်အပူၤ ပယီၤသုးသ့ၣ်တဖၣ်ပျိာ်လဲထီၣ်အသးဒ်တၢ်ဒီသဒၢ ကမျၢၢ်သုးကရူၢ် ဆီလီၤတြဲၤတၢ်သမံသမိးလီၢ်ဒီး အိၣ်ခိးဃ့အီၣ်စ့လၢကမျၢၢ်လ့ၢ်ထီၣ်လ့ၢ်လိၤဖဲန့ၣ်တဖၣ်အအိၣ် အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
သယဲၣ်ခၠီကီၢ်ဆၣ် သယဲၣ်ခၠီဃုာ်ဒီးဒူသ၀ီလၢအိၣ်တၢ်ခိၣ်တၢ်ဃၢၤဖဲန့ၣ်သ့ၣ်တဖၣ်အပူၤ စးထီၣ်ဖဲအပူၤကွံာ် လါစဲးပထ့ဘၢၣ် ၅ သီအနံၤ ပယီၤသုးတဖၣ်ပျိာ်လဲထီၣ်အသးဒ်တၢ်ဒီသဒၢကမျၢၢ်သုးဒီးအိၣ်ခိးဃ့အီၣ်စ့လၢကျဲပူၤ အဂ့ၢ်န့ၣ် လီၢ်က၀ီၤကမျၢၢ်လၢအသဂၢၢ်ဘၣ်တၢ်ကဲထီၣ်သးအံၤတဂၤ စံး၀ဲဒ်အံၤန့ၣ်လီၤႉ
“ယမိနါက့ၦၤဖီၣ်အီၤဖဲကျဲ၀ဲန့ၣ်လီၤႉအတဲ၀ဲလၢ(PDF)ဖီၣ်ႇဃ့၀ဲစ့အကလီၢ်(၃၀၀)ကၠးႉခဲအံၤဃ့၀ဲ(၁၅၀)လံႉ ယတဲအီၤလၢကဟ့ၣ်အကလီၢ်(၅၀)မးတန့ၢ်ဘၣ်ႉအ၀ဲသ့ၣ်ဃ့အီၣ်စ့တလၢန့ၢ်အခၢးႉ(PDF)ဃ့တၢ်ဒ်အံၤတနၢ်ဟူနီတဘျီဘၣ်ႉအဃိပဘၣ်သးကိၢ်ဒိၣ်မီၤနီၤႉခဲအံၤၦၤဟဲက့ၤထူၣ်ဖျဲးထီၣ်ထဲၦၤနီသိလ့ၣ်ဖိ(၂)ဂၤဒံးလီၤႉအ၀ဲသ့ၣ်ဆီလီၤ တြဲၤ ကယဲၢ်မ့ၢ်ၦၤလ့ၢ်ထီၣ်လ့ၢ်လိၤဖဲန့ၣ်တဖၣ်န့ၣ်ဖဲအ၀ဲသ့ၣ်အဲၣ်ဒိးဃ့န့ၣ်ဃ့၀ဲလီၤ”အဂ့ၢ်န့ၣ် လီၢ်က၀ီၤကမျၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ
လၢန့ၣ်အမဲာ်ညါပယီၤသုးအိၣ်ခိးဃ့အီၣ်စ့တကးဒံးဘၣ်အမဲာ်ညါ လၢသယဲၣ်ခၠီကီၢ်ဆၣ် ပၢၤကီၢ်၀ဲၤလီၢ်မဲာ်ညါ န့ၣ်စ့ၢ်ကီးအ၀ဲသ့ၣ်ဆီလီၤတြဲၤတၢ်သမံသမိးလီၢ် စးထီၣ်လၢဂီၤခီ ၆ နၣ်ရံၣ်န့ၣ် ခီဖျိအ၀ဲသ့ၣ်ဃ့အီၣ်စ့လၢကမျၢၢ်လၢ အဟးထီၣ်က့ၤလီၤဖဲန့ၣ်သ့ၣ်တဖၣ်အအိၣ်အဃိတၢ်ကီတၢ်ခဲအိၣ်ထီၣ်လၢတၢ်ဟးထီၣ်က့ၤလီၤတကပၤအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
ဘၣ်ဃးပယီၤသုးဆီလီၤတြဲၤအိၣ်ခိးသမံသမိးဃ့အီၣ်စ့ဒ်အံၤအဖီခိၣ်ကဟးထီၣ်က့ၤလီၤလၢတၢ်ပလီၢ်ပဒီပူၤႇ ကအိၣ်ယံၤဒီးပယီၤသုးအတၢ်လီၢ်တၢ်ကျဲအဂ့ၢ်န့ၣ် တနီသရံၣ်တၢ်ဒီသဒၢကမျၢၢ်သုးကရူၢ် တၢ်ဘိးဘၣ်ရၤလီၤမူဒါခိၣ် တဂၤ ဟ့ၣ်ပလီၢ်စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ခဲအံၤန့ၣ်ပယီၤသုးမၤထီၣ်အသးဒ်သိးၦၤ(PDF)တဖၣ်မီၤနီၤႉမ့၀ံၤအိၣ်ခိးဃ့အီၣ်စ့လၢကျဲပူၤဒ်အံၤအိၣ်န့ၣ်တၢ်လီၢ်ကိးတီၤဒဲးလီၤႉအဃိကမျၢၢ်တဖၣ်ကအိၣ်လၢတၢ်ပလီၢ်ပဒီပူၤႉပအဲၣ်ဒိးဒုးသ့ၣ်ညါကမျၢၢ်လၢဟးထီၣ်က့ၤလီၤလၢတၢ်ပလီၢ်ပဒီပူၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဒ်န့ၣ်အသိးဖဲအပူၤကွံာ်လါမ့ၤထီၣ် ၁ သီအခါန့ၣ်စ့ၢ်ကီး လၢတနီသရံၣ်ကီၢ်ခီဒိၣ် ပလီကီၢ်ဆၣ် တိၤတြဲၤတၢ်မံသမိးလီၢ်ဒီး တၢ်သမံသမိးတြဲၤသ့ၣ်တဖၣ်န့ၣ်ပယီၤသုးတဖၣ်ပျိာ်လဲထီၣ်အသးဒ်တၢ်ဒီသဒၢကမျၢၢ်သုးႇကူကၤထီၣ်ကမျၢၢ်ကူကၤ အိၣ်ခိးသမံသမိးတၢ်ဃ့အီၣ်စ့တုၤလၢခဲအံၤတစုအဂ့ၢ်န့ၣ် လီၢ်က၀ီၤကမျၢၢ်လၢအသဂၢၢ် တၢ်ကဲထီၣ်သးအံၤတဖၣ်စံး၀ဲ အသိးသ့ၣ်ညါဘၣ်န့ၣ်လီၤႉ
