လါအီးကထိဘၢၣ် ၃ သီႇ ၂၀၂၃ နံၣ်ႇ ခ့ၣ်အဲးစံၣ်
သုးမီၤစိရိၤအခိၣ် သုးခိၣ်ကျၢၢ်ဒိၣ်စိ မ့အီၤလဲၤ ကွဲမုာ်ကိးထံၣ်၀ဲခိၣ်နၢ်လီၢ်လံၤလၢအမူဒါတအိၣ်လၢၤဘၣ် သ့ၣ်တဖၣ်အံၤန့ၣ် တမ့ၢ်လၢအဘျုးကအိၣ်နီတမံၤဘၣ်အဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ၦၤကတိၤတၢ်ပၢ ပဒိၣ်စီၤကျၢၤစ့ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဖဲအပူၤကွံာ်လါစဲးပထ့ဘၢၣ် ၃၀ သီအနံၤ (ခ့ၣ်အဲၣ်ယူၣ်)ကရၢခိၣ်လီၢ်လံၤ သုးခိၣ်ကျၢၢ်ဒိၣ်စိ စီၤမူၤတူစ့ဖိႇ တၢ်ဒီသဒၢ၀ဲၤကျိၤခိၣ်လီၢ်လံၤ ပဒိၣ်စီၤရီကၠၢၤခ့ၤ ဒီး ဒူပျာ်ယာ်ကီၢ်ရ့ၣ်ခိၣ် ပဒိၣ်စီၤစွ့ၤမီ တဖၣ်အံၤ လဲၤထံၣ်လိာ်သးဒီး သုးမီၤစိရိၤအခိၣ် သုးခိၣ်ကျၢၢ်ဒိၣ်စိ မ့အီၤလဲၤ လၢန့ၣ်ပၠံၣ်တီၣ် ဘယ့ၣ်နီၤဘျီၣ်ပူၤအဂ့ၢ် သုးကီၣ်ကးအတၢ်ကစီၣ်သန့ ထုးထီၣ်ပာ်ဖျါ၀ံၤလီၢ်ခံ (ခ့ၣ်အဲၣ်ယူၣ်)က့ၤခီၣ်ဆၢစံးကဒါ၀ဲန့ၣ်လီၤႉ
တၢ်လဲၤဘျီ၀ဲအံၤသုးကီၣ်ကးကွဲမုာ်၀ဲလၢနီၢ်တဂၤအဖီခိၣ် မ့ၢ်ဒၣ်(ခ့ၣ်အဲၣ်ယူၣ်)ကရၢခိၣ်လီၢ်လံၤဒီးအကရူၢ် လဲၤထံၣ်လိာ်သးလီၤဒီးခီဖျိအ၀ဲသ့ၣ်မ့ၢ်ခိၣ်နၢ်လီၢ်လံၤႇလၢတၢ်ကရၢကရိအပူၤအတၢ်စိတၢ်ကမီၤတအိၣ်လၢၤဘၣ်အဃိ တမ့ၢ်လၢအဘျုးကအိၣ်လၢသုးကီၣ်ကးအဂီၢ်ဘၣ်အဂ့ၢ်န့ၣ် ပဒိၣ်စီၤကျၢၤစ့ စံး၀ဲဒ်အံၤန့ၣ်လီၤႉ
“သုးကီၣ်ကးကွဲမုာ်၀ဲဒၣ်ခိၣ်နၢ်လီၢ်လံၤအံၤလၢကကဲထီၣ်တၢ်တိစၢၤမၤစၢၤလၢအ၀ဲသ့ၣ်ဂီၢ်တခါခါလီၤမီၤနီၤႉ ကမၤပူၤဖျဲးအ၀ဲသ့ၣ်တၢ်၀ံဃၢထဲထဲအံၤန့ၣ်လ့ၤတက့ၤတသ့ဘၣ်န့ၣ်ပတဲအီၤသ့လီၤႉအ၀ဲသ့ၣ်ကဟဲမၤကဒံကဒါမၤနါစိၤတၢ်ဒ်အံၤစ့ၢ်ကီးန့ၣ်ပဆိမိၣ်ပတယးဃာ်အီၤလံမီၤနီၤ”အဂ့ၢ်န့ၣ် စံး၀ဲန့ၣ်လီၤႉ
လၢန့ၣ်အမဲာ်ညါတၢ်လဲၤထံၣ်လိာ်သးဘျီ၀ဲအံၤအပူၤ ပၣ်ဃုာ်စ့ၢ်ကီး ဒူပျာ်ယာ်ကီၢ်ရ့ၣ်ခိၣ် ပဒိၣ်စီၤစွ့ၤမီ ဒီး အ၀ဲန့ၣ်ဟးထီၣ်လၢအမူဒါပူၤလံအဃိတၢ်လဲၤထံၣ်လိာ်သးအံၤတမ့ၢ်အဘျုးကအိၣ်လၢသုးကီၣ်ကးအဂီၢ်ဘၣ်အသိး တၢ်လီၤဆီတအိၣ်လၢကမျၢၢ်ၦၤဃ့ၢ်မှံဟးဖျိးအတၢ်ဘံၣ်တၢ်ဘၢအဂီၢ်စ့ၢ်ကီးဘၣ်အဂ့ၢ်န့ၣ် ခ့ၣ်အဲၣ်ယူၣ် ၦၤကတိၤတၢ်ပၢ စံးအါထီၣ်၀ဲန့ၣ်လီၤႉ
ဒ်သုးကီၣ်ကးအတၢ်ကစီၣ်သန့ထုးထီၣ်ပာ်ဖျါ၀ဲအသိးန့ၣ် သုးကီၣ်ကးစံး၀ဲလၢ ခ့ၣ်အဲၣ်ယူၣ် ကရၢခိၣ်လီၢ်လံၤအံၤ မ့ၢ်၀ဲဒၣ်ကလုာ်ဒူၣ်ခိၣ်နၢ်တဂၤလၢအဆဲးလီၤတ့ၢ်ဃာ်၀ဲ(NCA)အသိးလၢကမျၢၢ်တၢ်မုာ်တၢ်ခုၣ်အဂီၢ်အမူဒါအိၣ်ဒံး၀ဲ အဃိလၢဟီၣ်က၀ီၤတၢ်မုာ်တၢ်ခုၣ်ဒီးတၢ်ဂုၤထီၣ်ပသီထီၣ်အဂီၢ်ဘၣ်တၢ်ကွဲမုာ်၀ဲလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါ(ခ့ၣ်အဲၣ်ယူၣ်)ကရၢခိၣ်လီၢ်လံၤဒီးအကရူၢ်အံၤစံး၀ဲလၢ ပမ့အဲၣ်ဒိးတၢ်မုာ်တၢ်ခုၣ်နီၢ်နီၢ်န့ၣ် ပမၤအီၤလၢတၢ်သူၣ်ဟ့သးဟ့ႇပမၤအီၤလၢဖီၣ်စုက၀ဲၤအကျဲတန့ၢ်၀ဲဘၣ်အသိးမ့မ့ၢ်တခီကလဲၤလၢတၢ်ထံၣ်လိာ်တၢၣ်ပီၣ်တဲသကိးဒီးကလဲၤလၢ(NCA)အကျဲအဂ့ၢ် သုးကီၣ်ကးအတၢ်ကစီၣ်သန့ ပာ်ဖျါ၀ဲန့ၣ်လီၤႉ
လၢကဟဲတလါအံၤလါအီးကထိဘၢၣ် ၁၅ သီအနံၤစ့ၢ်ကီး လီၤဘၣ်၀ဲတၢ်ဆဲးလီၤထံကီၢ်တၢ်ပတုာ်တၢ်ခး လံာ်ဃံးဃာ် (NCA)ၦဲၤထီၣ် ၈ နံၣ် အဃိ ခ့ၣ်အဲၣ်ယူၣ်ကရၢခိၣ်လီၢ်လံၤ သုးခိၣ်ကျၢၢ်ဒိၣ်စိ စီၤမူၤတူစ့ဖိအရူၢ်ဒီး သုးကီၣ်ကးအခိၣ် သုးခိၣ်ကျၢၢ်ဒိၣ်စိ မ့အီၤလဲၤ အတၢ်ထံၣ်လိာ်သးဟဲအိၣ်ဖျါထီၣ်၀ဲဒ်အံၤန့ၣ်လီၤႉ
လၢတၢ်န့ၣ်အဃိတၢ်ထံၣ်လိာ်သးအံၤကဲထီၣ်၀ဲဒၣ်တၢ်ထံၣ်တၢ်သးဒ့ဒီလၢ(ခ့ၣ်အဲၣ်ယူၣ်)ဒီးတၢ်ပၢၢ်ဆၢသုးကရူၢ် လၢအဂၤအဘၢၣ်စၢၤအသိးသုးကီၣ်ကးအံၤလီၤဂာ်ဒ်သိးအဲၣ်ဒိးမၤမူ၀ဲ(NCA)အံၤအဂ့ၢ်န့ၣ် နဲၤဘညါမိၤ လၢအဃုသ့ၣ်ညါ ကလုာ်ဒူၣ်ထံရူၢ်ကီၢ်သဲးအံၤ ပဲာ်ထံနီၤဖးစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ခါလၢကဟဲလါအီးကထိဘၢၣ် ၁၅ သီန့ၣ် မ့ၢ်၀ဲဒၣ်(NCA)နံၣ်ဆဲးဆၢမီၤနီၤႉ အဃိသုးကီၣ်ကးခိၣ်နၢ်အံၤ ဂုာ်ကျဲးစၢးကွဲမုာ်၀ဲခိၣ်နၢ်မ့ၢ်ဂ့ၤႇတၢ်ကရၢကရိလၢအပၣ်ဃုာ်လၢတၢ်ဆဲးလီၤ(NCA) အပူၤတဖၣ်မီၤနီၤႉ(NCA)မ့မူဒံးန့ၣ် ၂၀၀၈ တၢ်ဘျၢသဲစးကမူမီၤနီၤႉအဃိသုးကီၣ်ကးအံၤအ၀ဲသ့ၣ်မုၢ်လၢ်လၢ ထံဂုၤကီၢ်ဂၤကပာ်ပနီၣ်အ၀ဲသ့ၣ်လၢ အဖိးသဲစးႉ ဒ်န့ၣ်အသိးလၢ(ခ့ၣ်အဲၣ်ယူၣ်)ဟီၣ်က၀ီၤပူၤစ့ၢ်ကီးတၢ်ဒုးကဲထီၣ် (NCA)ဟးဂီၤလံအဃိအ၀ဲသ့ၣ်အတၢ်ဖံးတၢ်မၤအံၤ ယဲယထံၣ်လၢတမ့ၢ်လၢအကဲထီၣ်တၢ်မၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
သုးကီၣ်ကးအံၤဖဲအထံၣ်လိာ်တၢၣ်ပီၣ်တဲသကိးတၢ်ဒီး(ခ့ၣ်အဲၣ်ယူၣ်)ခိၣ်နၢ်လီၢ်လံၤအခါန့ၣ် စံး၀ဲလၢအ၀ဲသ့ၣ်အံၤ အိၣ်ဆၢထၢၣ်၀ဲလၢဂံၢ်ခီၣ်ထံးတၢ်ဘျၢသဲစးဒီးလၢ(NCA)အဖီခိၣ်လီၤဒီးလၢထံကီၢ်ဒီဘ့ၣ်တၢ်မု၁်တၢ်ခုၣ်အဂီၢ်အိးထီၣ်ကျဲလၢကတၢၣ်ပီၣ်တဲသကိးတၢ်မုာ်တၢ်ခုၣ်ဒီးကလုာ်ဒူၣ်ဖီၣ်စုက၀ဲၤ ကရူၢ်ကရၢသ့ၣ်တဖၣ်အဂ့ၢ်န့ၣ် ကွဲမုာ်စ့ၢ်ကီးန့ၣ်လီၤႉ
တကီၢ်ခါခဲအံၤသုးကီၣ်ကးမၤ၀ဲတၢ်ထံၣ်လိာ်အိၣ်သကိးတလီၢ်လီၢ်ဒီးကလုာ်ဒူၣ်ဖီၣ်စုက၀ဲၤကရူၢ်ကရၢလၢအဆဲးလီၤတၢ်ပတုာ်တၢ်ခးလံာ်ဃံးဃာ်(NCA)တဖၣ်အံၤလၢကထၢၣ်ပီၣ်တဲသကိးတၢ်မုာ်တၢ်ခုၣ်အဂီၢ်ဒီးဘၣ်ဆၣ် စးထီၣ်ဖဲ(၂၀၂၁) သုးဟံးန့ၢ်တၢ်စိတၢ်ကမီၤ၀ံၤလီၢ်ခံန့ၣ်(ခ့ၣ်အဲၣ်ယူၣ်)အံၤပာ်ဖှိၣ်မၤသကိးတၢ်ဒီးတၢ်ပၢၢ်ဆၢသုးကရူၢ်ဒီး တပၣ်ဃုာ်ပၣ်ဂီၢ်လၢၤ က့ၤလၢသုးကီၣ်ကးအတၢ်ကွဲမုာ်တၢၣ်ပီၣ်တဲသကိးပူၤလၢၤဘၣ်န့ၣ်လီၤႉ
