ပယီၤသုးခးလီၤကျိဖးဒိၣ်လၢချၢၣ်လွံၢ်ထူၣ်ကီၢ်ရ့ၣ်ပူၤအဃိ ၦၤဖိသၣ်မုၣ်သံ(၁)ဂၤႇ ဘၣ်ဒိ ၈ ဂၤ

လါအီးကထိဘၢၣ် ၁၃ သီႇ ၂၀၂၃ နံၣ်ႇ ခ့ၣ်အဲးစံၣ်

လါအီးကထိဘၢၣ် ၁၀ သီအနံၤ လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်အပူၤ ခီဖျိပယီၤသုး ခးလီၤကျိဖးဒိၣ်အဃိ ၦၤဖိသၣ်မုၣ်ဖိသံ(၁)ဂၤဒီး ဘၣ်ဒိဘၣ်ထံး(၈)ဂၤအကျါပၣ်ဃုာ်ၦၤဖိသၣ် ၂ နံၣ် ခံဂၤ အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ

ခီဖျိပယီၤသုး(ခမရ-၄၃၉)ခးလီၤကျိဖးဒိၣ်အဃိ ဖၠူကီၢ်ဆၣ် ကၠီၤလၣ်သ၀ီ ၦၤဖိသၣ်မုၣ်သံ၀ဲ(၁)ဂၤဒီး ပ့စလိၣ် ပယီၤသုး(ခလရ-၂၆၄), စွ့ၤ၀ၤ ပယီၤသုး(ခမရ-၃၀၇)ခးလီၤကျိဖးဒိၣ်အဃိ လၢၢ်ဒိၣ်ကီၢ်ဆၣ် ယွၤကၣ်လၣ်သ၀ီႇ မူကီၢ်ဆၣ် သနၣ်ကွ့သ၀ီ ဒီး ဖၠူကီၢ်ဆၣ် နဒၣ်မ့ၣ်သ၀ီ ၦၤဖိသၣ်(၂)ဂၤအံၤဃုာ်ဒီးကမျၢၢ်ခဲလၢာ်ဘၣ်ဒိဘၣ်ထံး၀ဲ (၈)ဂၤ အဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲဖဲလါအီးကထိဘၢၣ် ၁၁ သီ အနံၤန့ၣ်လီၤႉ

လၢန့ၣ်အမဲာ်ညါခီဖျိပယီၤသုးဆဲးခးလီၤကျိဖးဒိၣ်အဃိလီၢ်က၀ီၤၦၤကမျၢၢ်တဖၣ်အါဒၣ်တက့ၢဃ့ၢ်ထီၣ်၀ဲဒီး တနီၤန့ၣ်လၢအ၀ဲသ့ၣ်ကအိၣ်ဆိးအဂီၢ်တၢ်လီၢ်တၢ်ကျဲတအိၣ်ဘၣ်အဃိအ၀ဲသ့ၣ်အိၣ်တ့ၢ်လၢသ၀ီပူၤႇအိၣ်၀ဲလၢ တၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီအပူၤဒ်န့ၣ်လီၤအဂ့ၢ်န့ၣ် လၢၢ်ဒိၣ်၀့ၢ် ကမျၢၢ်ပိာ်မုၣ်တဂၤ စံး၀ဲဒ်အံၤန့ၣ်လီၤႉ

“ၦၤလၢအစံၣ်ညါန့ၣ်စံၣ်လီၤၦၤလၢအဘူးအတံၢ်အိၣ်လၢထံ၀ၢ်ခီတကပၤန့ၣ်ခီန့ၣ်အ၀ဲသ့ၣ်လဲၤအိၣ်၀ဲလၢန့ၣ်မီၤနီၤႉ မ့မ့ၢ်ၦၤလၢအဟးထီၣ်က့ၤလီၤတညီဘၣ်တဖၣ်န့ၣ်အိၣ်တ့ၢ်လၢသ၀ီပူၤလီၤႉတၢ်ဒုးမ့ကဲထီၣ်န့ၣ်နနုာ်လီၤအိၣ်လၢတၢ်ပူၤ သ့ဒံးႉခဲအံၤအခးလီၤ၀ဲကိးဆၢကတီၢ်ဒဲးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

တကးဒံးဘၣ်န့ၣ်အမဲာ်ညါလၢချၢၣ်လွံၢ်ထူၣ်ကီၢ်ရ့ၣ်အပူၤ လီၢ်က၀ီၤၦၤသ၀ီဖိတဖၣ်မ့ဟးထီၣ်က့ၤလီၤလၢ ပယီၤသုး တၢ်သမံသမိးတြဲၤလီၢ်မဲာ်ညါန့ၣ်ပယီၤသုးသမံသမိးဖီၣ်ဃာ်၀ဲဒီးမၢၦၤလဲၤက့ၤရ့ထီၣ်၀ဲဒီးစ့အိၣ်၀ဲအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ

လီၢ်က၀ီၤကမျၢၢ်တဂၤစံး၀ဲလၢ“ၦၤသ၀ီဖိမ့လဲၤၦ့ၤတၢ်န့ၣ်ပယီၤသုးသံကွၢ်အီၤသုအိၣ်သ၀ီဖဲလဲၣ်ႇၦၤမ့အိၣ်ဟဲလၢ (ခ့ၣ်အဲၣ်ယူၣ်)အိၣ်လီၢ်တကပၤန့ၣ်ဖီၣ်၀ဲလီၤႉတၢ်ကစီၣ်မ့တန့ၢ်လၢပယီၤသုးအဂီၢ်နီတမံၤဘၣ်န့ၣ်အ၀ဲသ့ၣ်တဲကျၢ ၦၤဟံၣ်ဖိဃီဖိမၢၦၤလဲၤရ့ထီၣ်ဒီးစ့ႉၦၤမ့တလဲၤရ့ထီၣ်ဘၣ်န့ၢ်ထၢနုာ်၀ဲလၢတၢ်ဒုးဃာ်လီၢ်လီၤ”အဂ့ၢ်န့ၣ် စံး၀ဲန့ၣ်လီၤႉ

ဖဲအပူၤကွံာ်လါအီးကထိဘၢၣ် ၉ သီအခါစ့ၢ်ကီး လၢၢ်ဒိၣ်ကီၢ်ဆၣ် နၣ်တလ့သ၀ီဖိ ပိာ်မုၣ်(၂)ဂၤ လၢအလဲၤၦ့ၤ တၢ်လၢ ကၠီၣ်တကါကီၢ်ဆၣ်ပူၤအံၤ ပယီၤသုးဖီၣ်ဒုးဃာ်ဒံး၀ဲလၢတၢ်ဒုးဃာ်လီၢ်အဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲ ဖဲလါအီးကထိဘၢၣ် ၁၀ သီအနံၤန့ၣ်လီၤႉ

ဖဲအပူၤကွံာ်လါစဲးပထ့ဘၢၣ်အခါပယီၤသုးကဘီယူၤဟဲခးလီၤတၢ်လၢချၢၣ်လွံၢ်ထူၣ်ကီၢ်ရ့ၣ်ပူၤအါအါဂီၢ်ဂီၢ်ဒီး ဖဲတလါအံၤလါအီးကထိဘၢၣ်ထီၣ်န့ၣ်တၢ်ဒုးဂၢၢ်ထီၣ်က့ၤတစဲးဘၣ်ဆၣ်စးထီၣ်ဖဲစှၤသီအတီၢ်ပူၤအံၤပယီၤသုးက့ၤ ခးလီၤကဒါကျိဖးဒိၣ်ဟဲအါထီၣ်၀ဲဒၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

သုးဟံးန့ၢ်တၢ်စိတၢ်ကမီၤ(၂)နံၣ်ဘျဲၣ်အတီၢ်ပူၤပယီၤသုးခးလီၤကျိဖးဒိၣ်ႇကဘီယူၤဟဲခးလီၤတၢ်လၢချၢၣ်လွံၢ်ထူၣ်ကီၢ်ရ့ၣ်ပူၤ အိၣ်၀ဲအဘျီ(၃၀၀)ဃၣ်ဃၣ်ညါဒီး ၦၤကမျၢၢ်သံဘၣ်ဒိဘၣ်ထံးတစှၤန့ၢ်(၁၅၀)ဂၤဒီး ၦၤဃ့ၢ်မှံဟးဖျိးနီၣ်ဂံၢ် အိၣ်ထီၣ် တုၤလၢအဂၤ(၂)ကလီၢ်ဘျဲၣ်လံအဂ့ၢ်န့ၣ် ကညီတၢ်ဆီၣ်ထွဲမၤစၢၤတၢ်မုာ်တၢ်ခုၣ်ၦာ်ဘျးစဲ (KPSN) ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ