လါအီးကထိဘၢၣ် ၄ သီႇ ၂၀၂၁ နံၣ်ႇ ခ့ၣ်အဲးစံၣ်
ပယီၤသုးတဖၣ်နုာ်လီၤလၢကညီဒီကလုာ်စၢဖှိၣ်ကရၢ -KNU သုးက့(၄)တၢ်ပၢဟီၣ်က၀ီၤ ပလီကီၢ်ဆၣ် သၤယၤကိသ၀ီပူၤဒီးသိလ့ၣ်ခံခိၣ်ဒီး ကိးသမံသမိး၀ဲလီၢ်က၀ီၤသ၀ီဖိတနီၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
ဖဲတနံၤအံၤလါအီးကထိဘၢၣ် ၄ သီႇ ဂီၤခီ ၅ နၣ်ရံၣ်အဆၢကတီၢ် ပယီၤသုးတဖၣ်ဟဲတုၤ၀ဲလၢသၤယၤကိသ၀ီဒီး နုာ်လီၤအိၣ်ဆိး၀ဲဖဲသီခါဖၠၣ်ကရၢၢ်ပူၤဒီး စံး၀ဲလၢကဆဲးန့ၢ်၀ဲလီၢ်က၀ီၤဖိတဖၣ်ခိ၀ံၣ်ကသံၣ်ဒီသဒၢအဂ့ၢ်န့ၣ် လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ
“အ၀ဲသ့ၣ်တဲ၀ဲလၢကဆဲးန့ၢ်၀ဲခိ၀ံၣ်ကသံၣ်ဒီသဒၢဒီးနုာ်လီၤ၀ဲလီၤႉ သုးသိလ့ၣ်ခံခိၣ်ဟဲထီၣ်၀ဲဖဲသၤယၤကိကျဲလိၤလိၤလီၤႉ ဖီၣ်၀ဲသ၀ီဖိ(၃)ဂၤ မ့ၢ်၀ဲဒၣ်ယ့ၤရှ့ၤဒီးသၤယၤကိသ၀ီဖိလီၤႉ တၢ်အံၤစ့ၢ်ကီးခီဖျိတၢ်မဲာ်ချံအဃိလီၤႉ အ၀ဲသ့ၣ်သံကွၢ်၀ဲ(PDF)အိၣ်တၢ်လီၢ်ဖဲလဲၣ်ႇမ့ၢ်အဘူးလိာ်သးဒီး(KNU)ဒ်လဲၣ်သ့ၣ်တဖၣ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ဒ်န့ၣ်အသိးလၢပ၀ိၣ်ကိသ၀ီတကပၤစ့ၢ်ကီးပယီၤသုးသိလ့ၣ်ဟဲထီၣ်၀ဲ(၃)ခိၣ်ဒီး ခီဖျိဟဲထီၣ်၀ဲတၢ်လီၢ်အံၤမ့ၢ်၀ဲ(ခ့ၣ်အဲၣ်ယူၣ်)ဟီၣ်က၀ီၤပူၤအဃိ တၢ်ဒုးကဲထီၣ်သ့၀ဲဒီးလီၢ်က၀ီၤသ၀ီဖိတနီၤစ့ၢ်ကီးဟးစံၣ်အိၣ်ခူသူၣ်ဆိပာ်အသးလံအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
“ဒိးသန့ၤထီၣ်သးလၢတၢ်အိၣ်သးဖီခိၣ်ဒီးတၢ်ဒုးကကဲထီၣ်ဒုအါ၀ဲလီၤႉ မ့မ့ၢ်(ခ့ၣ်အဲၣ်ယူၣ်)တကပၤခီန့ၣ်တဲ၀ဲလၢခီဖျိသ၀ီပူၤအဃိတအဲၣ်ဒိးခး၀ဲဘၣ်ႉ တဲ၀ဲလၢတအဲၣ်ဒိးလၢသ၀ီဖိတဖၣ်ကဘၣ်ကီဘၣ်ခဲဘၣ်မီၤနီၤႉ ဘၣ်ဆၣ်မ့ၢ်ဟဲထီၣ်တလၢ၀ဲဒုတၢ်ဒုးကကဲထီၣ်အါ၀ဲလီၤ”အဂ့ၢ်န့ၣ် လီၢ်က၀ီၤဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ
ပယီၤသုးလၢအနုာ်လီၤတလၢ၀ဲ(ခ့ၣ်အဲၣ်ယူၣ်)တၢ်ပၢဟီၣ်က၀ီၤအပူၤတဖၣ်အံၤ မ့ၢ်၀ဲခီၣ်ချ့သုးရ့ၣ်(ခလရ–၂၈၅)သုးရ့ၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ
