လါဒံၣ်စ့ဘၢၣ် ၁၃ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤအပူၤ သုးကီၣ်ကးစုတီၤဖီလာ် သုးႇၦၤမၤတၢ်ဖိဃုာ်ဒီးအ၀ဲသ့ၣ်ဟံၣ်ဖိဃီဖိတဖၣ်ကဟးထီၣ်ကွံာ်လၢတၢ်ဖံးတၢ်မၤပူၤလၢအဆိအချ့အဂ့ၢ်န့ၣ် ထုးထီၣ်ပာ်ဖျါဒုးသ့ၣ်ညါ၀ဲဖဲလါဒံၣ်စ့ဘၢၣ် ၁၀ သီအနံၤန့ၣ်လီၤႉ
သုးကီၣ်ကးစုတီၤဖီလာ်သုးဒီးၦၤမၤတၢ်ဖိတဖၣ်ကဟးထီၣ်ကွံာ်လၢတၢ်ဖံးတၢ်မၤပူၤႇကဟဲက့ၤပာ်ဖှိၣ်မၤသကိးတၢ်ဒီး ၦၤကမျၢၢ်ထံဖိကီၢ်ဖိတကးဒံးဘၣ်အမဲာ်ညါသုးၦၤဘၣ်မူဘၣ်ဒါတဖၣ်စ့ၢ်ကီးကကွၢ်န့ၢ်တၢ်လၢၦၤကမျၢၢ်တၢ်ဘံၣ်တၢ်ဘၢ အဂီၢ်ဒီးဟဲက့ၤပာ်ဖှိၣ်မၤသကိးတၢ်ဒီးၦၤထံဖိကီၢ်ဖိအဂ့ၢ်န့ၣ် (KNU)ဆီၣ်တခူထီၣ်၀ဲန့ၣ်လီၤႉ
KNU(သုးက့ ၁)ၦၤဘၣ်မူဘၣ်ဒါတဂၤစံး၀ဲလၢ“ခဲအံၤန့ၣ်သုးကီၣ်ကးအတၢ်ပၢတၢ်ပြးတကပၤန့ၣ်တဘၣ်လီၢ် ဘၣ်စး လၢၤစ့ၢ်ဘၣ်ႉ၀ံၤဘျီလၢပအိၣ်တကပၤခီဒၢးပဟူးဂဲၤဆူၣ်ထီၣ်စ့ၢ်ႉဒ်သိးဒီးတၢ်ထုးထီၣ်လံာ်အဖီခိၣ်န့ၣ်ဒၢးအ၀ဲသ့ၣ်ကဘၣ် ဟဲက့ၤပာ်ဖှိၣ်မၤသကိးတၢ်ဒီးပ၀ဲလီၤႉအ၀ဲသ့ၣ်မ့တဟဲက့ၤပာ်ဖှိၣ်မၤသကိးတၢ်ဒီးၦၤဘၣ်န့ၣ်အိၣ်ဒၣ်အ၀ဲသ့ၣ်ကဘၣ်ဟးစံၣ်အိၣ်ခူသူၣ်တလိၣ်လိၣ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢခ့ၣ်အဲၣ်ယူၣ်(သုးက့ ၁)ဟီၣ်က၀ီၤအပူၤ ၦၤကမျၢၢ်ဃုာ်ဒီးသုးကီၣ်ကးစုတီၤဖီလာ်ၦၤမၤတၢ်ဖိဒီးကယဲၢ်မ့ၢ်တၢ်ကရၢကရိ တဖၣ် ကဟဲက့ၤပာ်ဖှိၣ်ထီၣ်သးဒီး(KNU)ဒီးလၢတၢ်ဟဲက့ၤပာ်ဖှိၣ်မၤသကိးတၢ်အဖီခိၣ်အံၤစ့ၢ်ကီး ဒ်(KNU)ဆီလီၤပာ်လီၤ တၢ်သိၣ်တၢ်သီအသိးကအိၣ်ဒီးတၢ်ဟံးမူဒါသ့ၣ်တဖၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
