ကီးတရံးတၢ်ဒုးအတီၢ်ပူၤ ၦၤကမျၢၢ်သံ(၂၀)ဘျဲၣ်အဂ့ၢ်ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲ

လါဒံၣ်စ့ဘၢၣ် ၁၅ သီႇ ၂၀၂၃ နံၣ်ႇ ခ့ၣ်အဲးစံၣ်

ကီးတရံးကီၢ်ဆၣ်အပူၤ တၢ်ဒုးကဲထီၣ်ကအိၣ်၀ဲဒၣ်လၢခံနွံဃၣ်ဃၣ်လံဒီးတၢ်ဒုးကဲထီၣ်အတီၢ်ပူၤ ၦၤကမျၢၢ်သံ၀ဲဒၣ် အဂၤ(၂၀)ဘျဲၣ်ညါအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးအတၢ်မၤနီၣ်စရီအသိး သ့ၣ်ညါဘၣ်န့ၣ်လီၤႉ

စးထီၣ်ဖဲလါနိၣ်၀့ဘၢၣ် ၃၀ သီအနံၤန့ၣ် လၢကီးတရံးကီၢ်ဆၣ်အပူၤသုးကလၢၤတၢ်လီၢ်လၢသုးကီၣ်ကးအၦၤ အိၣ်ဆီလီၤသးသ့ၣ်တဖၣ်အံၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်နုာ်လီၤခး၀ဲဒီး တၢ်ဒုးကဲထီၣ်အတီၢ်ပူၤန့ၣ် ၦၤကမျၢၢ်သံ၀ဲဒၣ်(၁၉)ဂၤအကျါပၣ်ဃုာ်၀ဲၦၤဖိသၣ်(၄)ဂၤအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိး တဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“၀ဲဒၣ်န့ၣ်ပသံကွၢ်လီၢ်က၀ီၤၦၤဘၣ်မူဘၣ်ဒါဒီးၦၤလၢအထံၣ်တၢ်ကဲထီၣ်သးလၢအမဲာ်တဖၣ်ႇ ၦၤလၢအဃ့ၢ်ထီၣ်တဖၣ်မီၤနီၤႉဒ်ပမၤနီၣ်စရီအသိးန့ၣ်ၦၤဖိသၣ်(၁၅)နံၣ်ဆူဖီလာ်သံ၀ဲဒၣ်လၢကျိဖးဒိၣ်အက့အခီ န့ၣ် အိၣ်၀ဲ(၄)ဂၤႉမ့မ့ၢ်ၦၤနီၢ်ဒိၣ်န့ၣ်သံ၀ဲဒၣ်(၁၉)ဂၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ၦၤကမျၢၢ်လၢအသံသ့ၣ်တဖၣ်အံၤအသံတၢ်ဂ့ၢ်န့ၣ်ခီဖျိကဘီယူၤဟဲခးလီၤတၢ်လၢက၀ီၤဒ့၀့ၢ်ပူၤႇဒူသ၀ီပူၤဒီး ပယီၤသုးခးလီၤကျိဖးဒိၣ်အဃိလီၤအဂ့ၢ်န့ၣ်တၢ်ပၢၢ်ဆၢသုးပာ်ဖှိၣ်တကပၤစံး၀ဲဒၣ်န့ၣ်လီၤႉ ဒ်န့ၣ်အသိး မ့မ့ၢ်ၦၤလၢ အဟ့ၣ်ဂံၢ်ဟ့ၣ်ဘါသုးကီၣ်ကးတဖၣ်ခီန့ၣ်ကွဲးဖျါထီၣ်၀ဲလၢၦၤသံသ့ၣ်တဖၣ်အံၤခီဖျိလၢတၢ်ပၢၢ်ဆၢ သုးပာ်ဖှိၣ်အဃိလီၤ အဂ့ၢ်န့ၣ် လိာ်ဘၢလိာ်ကွီၢ်ပာ်ထီၣ်လိာ်သးတၢ်ကမၣ်န့ၣ်လီၤႉ

တုၤလၢတၢ်အိၣ်သးခဲအံၤလၢကီးတရံးကီၢ်ဆၣ်အပူၤတၢ်ဒုးကဲထီၣ်ဒံး၀ဲဒီးသုးကီၣ်ကးအခီၣ်ချ့သုးရ့ၣ်(ခမရ–၅၇) အံၤ ခးလီၤကျိဖးဒိၣ်ဆူ၀့ၢ်ပူၤဒီးဒူသ၀ီလၢအိၣ်ဘူးတၢ်ခိၣ်တၢ်ဃၢၤဖဲန့ၣ်တဖၣ်အပူၤကိးမုၢ်နံၤဒဲးဒီး ခီဖျိကျိဖးဒိၣ်ချံအံၤအဃိ ဘၣ်သံ၀ဲအလံၤတဂၤ အဂ့ၢ်န့ၣ် ဖံသးပှၢ်တဂၤ စံး၀ဲဒ်အံၤန့ၣ်လီၤႉ

ၦၤဖိသၣ်(၁၄)နံၣ်လၢအသံတဂၤအံၤအဖံနီၢ်မုၣ်ဒါစံး၀ဲလၢ“လၢဂီၤခီခီကျိဖးဒိၣ်လီၤတဲာ်အဃိဘၣ်၀ဲဒၣ်ယလံၤဘျီ အသံမီၤနီၤႉယသးဘၣ်ဒိဒိၣ်မးယမ့တဲန့ၣ်ယဘၣ်သးဟီၣ်လီၤႉပဟဲတုၤဖဲအံၤဘျီပမၤဘူၣ်မၤဘါတၢ်လၢအဂီၢ်မီၤနီၤႉ မ့ၢ်လၢယအိၣ်ဒီးသးတၢ်ဆါအဃိယက့ၤဆိမိၣ်တန့ၢ်အါအါဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ

တုၤလၢလါဒံၣ်စ့ဘၢၣ် ၁၄ သီအနံၤ လၢကီးတရံးကီၢ်ဆၣ်အပူၤ သုးကီၣ်ကးကဘီယူၤဟဲဆှၣ်တၢ် ဒီး ပယီၤသုးခးလီၤကျိဖးဒိၣ်ဒံးအဃိလီၢ်က၀ီၤၦၤကမျၢၢ်လၢအကလးဘၣ်ဃ့ၢ်ထီၣ်၀ဲဒီး ဒ်န့ၣ်အသိး ၦၤကမျၢၢ်အိၣ်ကတာ် ထီသးလၢတၢ်ဒုးပူၤစ့ၢ်ကီးအိၣ်ဒံး၀ဲအါမးအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ

ခီဖျိတၢ်ဒုးကဲထီၣ်အဃိကီးတရံး၀့ၢ်ပူၤဃုာ်ဒီးဒူသ၀ီလၢအိၣ်တၢ်ခိၣ်တၢ်ဃၢၤဖဲန့ၣ်တဖၣ်ၦၤကမျၢၢ်လၢအကလးဘၣ်ဃ့ၢ်ထီၣ်၀ဲဒီးတကီၢ်ခါခဲအံၤလိၣ်ဘၣ်ဒံး၀ဲဒၣ်ဂ့ၢ်ဂီၢ်အူတၢ်ဆီၣ်ထွဲမၤစၢၤတဖၣ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ် စံး၀ဲန့ၣ်လီၤႉ