လါဒံၣ်စ့ဘၢၣ် ၂၀ သီႇ ၂၀၂၃ နံၣ်ႇ ခ့ၣ်အဲးစံၣ်
ဖဲလါဒံၣ်စ့ဘၢၣ် ၁၆ အနံၤန့ၣ် တၢ်ထီၣ်မၤန့ၢ်၀ဲမိၣ်လိၣ်ကၠိ(ကိး)ဖဲထၣ်ဒီးကၠီၤထၣ်ပယီၤသုးကလၢၤ(၂)ဖျၢၣ်အံၤ ဒီးတၢ်ထီၣ်သုးကလၢၤဘျီအံၤအပူၤသုးကီၣ်ကးအၦၤသံ၀ဲဒၣ်(၇၀)ဂၤဒီးမၤန့ၢ်ဃုာ်၀ဲကျိချံၦာ်သၣ်အါအါဂီၢ်ဂီၢ် အဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်တၢ်ကစီၣ် ထုးထီၣ်ပာ်ဖျါ၀ဲဖဲမဟါလါဒံၣ်စ့ဘၢၣ် ၁၉ သီအနံၤန့ၣ်လီၤႉ
မိၣ်လိၣ်ကၠိ(ကိး)ဖဲထၣ်သုးကလၢၤဒီးကၠီၤထၣ်ပယီၤသုးကလၢၤခံဖျၢၣ်အံၤအိၣ်ဆီလီၤသးလၢကညီဒီးကရ့ၣ်နံၣ်အဆၢ ဒီးသုးကလၢၤအံၤစးထီၣ်အိၣ်ဆီလီၤသးလၢအပူၤကွံာ်(၁၉၉၂)နံၣ်အိၣ်လံ၀ဲဒၣ် ၃၁ နံၣ်လံဒီးတၢ်လဲၤထီၣ်သုးကလၢၤ ဘျီ၀ဲအံၤမ့ၢ်၀ဲခ့ၣ်အဲၣ်ယူၣ်(သုးက့ ၅)သုးပာ်ဖှိၣ်ဒီးကရ့ၣ်နံၣ်သုးတဖၣ်လီၤအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ
တၢ်ထီၣ်ပယီၤသုးကလၢၤခံဖျၢၣ်အံၤ၀ံၤဖဲတၢ်မၤဆှဲလဲတၢ်လီၢ်အခါတၢ်ထံၣ်၀ဲသုးကီၣ်ကးအၦၤသံစိၣ်အိၣ်၀ဲဒၣ် အစိၣ်(၇၀)ညါဒီးဃ့ၢ်ထီၣ်အိၣ်၀ဲတနီၤအသိးမ့မ့ၢ်လၢ(KNLA)သုးပာ်ဖှိၣ်တကပၤခီန့ၣ်ဘၣ်ဟ့ၣ်လီၤကွံာ်အသးသမူ (၅)ဂၤႇ ဘၣ်ဒိဘၣ်ထံးစ့ၢ်ကီးအိၣ်၀ဲဒၣ်အဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါတၢ်ထီၣ်သုးကလၢၤခံဖျၢၣ်ဘျီ၀ဲအံၤအပူၤန့ၣ်တၢ်မၤန့ၢ်၀ဲ(၈၁ မမ)တခိၣ်ႇအချံ(၁၂)ဖျၢၣ်ႇ(RPG-7) တခိၣ်ႇယါတီး(၄၀)တီးႇအချံ(၃၈)ဖျၢၣ်ႇ(K3)မီထး ၃ ခိၣ်ႇ(K3)၁၆ ခိၣ်ႇအဆၣ်ဒၢ(၄၅)ဘ့ၣ်ႇအချံ(၁၄၁၇၇)ဖျၢၣ်ႇ (G3)တခိၣ်ႇညၣ်မဲၢ်စဲးလးတခိၣ်ႇအချံ(၁၇၈)ဖျၢၣ်ႇ(BKM)စဲးလးတခိၣ်ႇအချံ(၉၄၆)ဖျဲၣ်ႇစဲးလးဖိတခိၣ်ႇ(၆၀ မမ) ပျီဖုၣ်တခိၣ်ႇအချံ(၈)ဖျၢၣ်ႇ(၆၀ မမ)လီရ့အချံ ၈ ဖျၢၣ်ႇ(၉ မမ)ခံခိၣ်ႇခွ့ဘိ(၁၇)ဖျၢၣ်ႇစုကွံာ်မ့ၣ်ပိၢ်(၁၂)ဖျၢၣ်ႇ (၁၄)မ့ၣ်ပိၢ် ၉၁ ဖျၢၣ်ႇ (၁၆)မ့ၣ်ပိၢ် ၁၂ ဖျၢၣ်ႇ တဲးမဲ(၁၁)ဖျၢၣ်ႇ နးတိစဲးလးအချံ(၅၅၀၀), ချံးဘိ(၈)ဘ့ၣ်ႇ တၢ်ရှဲမ့ၣ်ပိၢ်တခါႇ စဲးဖးဒိၣ်တဖျၢၣ်ႇဒြိကၢတခါအဂ့ၢ်န့ၣ် မုၢ်တြီၢ်ကီၢ်ရ့ၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါပယီၤသုးကလၢၤဖးဒိၣ်(၂)ဖျၢၣ်အံၤဟံန့ၢ်ဆူၣ်၀ဲဒၣ်တၢ်အီၣ်တၢ်အီဆူၦၤကမျၢၢ်လၢအဟးထီၣ်က့ၤလီၤဖဲန့ၣ်တဖၣ်အအိၣ်သမံသမိးမၤပျံၤမၤဖုး၀ဲဃ့အီၣ်စ့အိၣ်၀ဲတလီၢ်လီၢ်ဒီးတၢ်ထီၣ်ဒုးသုးကလၢၤဘျီ၀ဲအံၤမ့ၢ်၀ဲ (KNLA)သုးပာ်ဖှိၣ်ဒီး ကရ့ၣ်နံၣ်ဒီကလုာ်သုးမုၢ်ဒိၣ်(KNPP),ကရ့ၣ်နံၣ်(KNPLF)တဖၣ်အံၤပာ်ဖှိၣ်ထီၣ်သး ထီၣ်၀ဲ သုးကလၢၤအံၤန့ၣ်လီၤႉ
ဒ်န့ၣ်အသိးမိၣ်လိၣ်ကၠိသုးကလၢၤ(ခလရ–၅၇)အၦၤသ့ၣ်တဖၣ်အံၤဃ့ၢ်ထီၣ်လဲၤအိၣ်က့ၤ၀ဲဒၣ်လၢ ကီၤ၀့ၤကၠိသုးကလၢၤ အသကိးတၢ်လီၢ်အဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
ဒ်န့ၣ်အသိးဖဲ(KNLA)သုးပာ်ဖှိၣ်ထီၣ်န့ၢ်မိၣ်လိၣ်ကၠိသုးကလၢၤ၀ံၤတနံၤဃီန့ၣ်ကၠီၤထၣ်ပယီၤသုးကလၢၤအံၤစ့ၢ်ကီး ပာ်တ့ၢ်ကွံာ်အသုးကလၢၤဃ့ၢ်ထီၣ်လဲၤပာ်ဖှိၣ်ထီၣ်က့ၤအသးဒီး(ခလရ–၅၇),ကီၤ၀့ၤကၠိ(ခမရ–၄၄၀)သ့ၣ်တဖၣ်အံၤ အဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
