လါယနူၤအါရံၤ ၃၀ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့-၃) မူကီၢ်ဆၣ်ဒီးဆီထံးကီၢ်ဆၣ် အပူၤ ဖဲပူၤကွံာ်လါယနူၤအါရံၤ(၂၇)သီအနံၤ ခီဖျိပယီၤသုးခးလီၤကျိဖးဒိၣ်ဆူကမျၢၢ်ဒူသ၀ီပူၤအဃိကမျၢၢ် ဘၣ်ဒိ(၃)ဂၤအကျါပာ်ဃုာ်ဖိသၣ်ခံဂၤအဂ့ၢ်န့ၣ် ခ့ၣ်အဲၣ်ယူၣ်တၢ်ကစီၣ်ထုးထီၣ်ပာ်ဖျါ၀ဲ ဖဲလါယနူၤအါရံၤ (၂၈)သီအနံၤန့ၣ်လီၤႉ
ချၢၣ်လွံၢ်ထူၣ်ကီၢ်ရ့ၣ်ဆီထံးကီၢ်ဆၣ်အပူၤ ဖဲလါယနူၤအါရံၤ (၂၇)သီအနံၤ ခီဖျိပယီၤသုးခီၣ်ချ့သုးရ့ၣ် (ခမရ-၂၀) လၢအိၣ်(ပစိၤမၠီၣ်တၤဖၠဲၣ်)သ၀ီပူၤတဖၣ်အံၤ ခးလီၤ (၈၁ မမ)ကျိဖးဒိၣ် (၃)ဖျၢၣ်ဆူ (စိၤကိ) သ၀ီပူၤလီၤ တဲာ်ပိၢ်ဖးထီၣ်လၢကသံၣ်ဒၢးအဃိကသံၣ်သရၣ်မုၣ်အဖိလၢအိၣ်ဒံးဒၣ်အလါတဂၤအံၤဘၣ်၀ဲအစုထွဲစုခံဘိအသိး ဖိသၣ်မုၣ်(၁၄)နံၣ်တဂၤစ့ၢ်ကီး ကျိက့ဘၣ်၀ဲဒၣ်အခီၣ်လၢအဆ့ၣ်တကပၤအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
ဒ်န့ၣ်အသိးဖဲလါယနူၤအါရံၤ(၂၇)သီအနံၤ လၢချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ်အပူၤစ့ၢ်ကီး ခီဖျိလၢပယီၤ သုးခီၣ်ချ့သုးရ့ၣ် (ခမရ-၅၉၉)လၢအအိၣ်(တိဒီ)သုးကလၢၤသ့ၣ်တဖၣ်အံၤဒိးလီၤဃာ်၀ဲမ့ၢ်ပိၢ်ဖဲ သုးကလၢၤ အခိၣ်အဃၢၤအဃိ(ခိၤမၠီၣ်)သ၀ီဖိ မမၠိသူၤစၤ၀့(၂၁)နံၣ်အံၤယီၢ်ဘၣ်၀ဲဒၣ်မ့ၣ်ပိၢ် အခီၣ်ထွဲတကပၤတူာ်ကွံာ် ၀ဲအဂ့ၢ်န့ၣ် ခ့ၣ်အဲၣ်ယူၣ်ပာ်ဖျါ၀ဲန့ၣ်လီၤႉ
ပယီၤသုးကလၢၤလၢအိၣ်(တိဒီ)အံၤ ဖဲအပူၤကွံာ်တၢ်ထီၣ်မၤန့ၢ်၀ဲဒၣ်ဘၣ်ဆၣ် အ၀ဲသ့ၣ်ဟဲက့ၤမၤအါထီၣ် သုးဂံၢ်ဘါဒီး ဒိးလီၤဃာ်၀ဲမ့ၢ်ပိၣ်လၢသုးကလၢၤအခိၣ်အဃၢၤ လၢအဘူးဒီးကမျၢၢ်ဒူသ၀ီတၢ်ဖံးအီၣ်မၤအီၣ် လီၢ်ကျဲအဂ့ၢ်န့ၣ် မူကီၢ်ဆၣ်ၦၤကတိၤတၢ်ပၢ သရၣ်စီၤစံးပတြၢၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“တၢ်ထီၣ်၀ဲဒၣ် (ခမရ-၅၉၀) (ခမရ-၅၉၉)ဒီးမူကီၢ်ဆၣ်ပၢၤကီၢ်သုးကလၢၤသ့ၣ်တဖၣ်တၢ်ထီၣ်၀ဲ တသီဃီန့ၣ်ဖျိးခဲလၢာ်လီၤႉ ထီၣ်၀ဲ၀ံၤအလီၢ်ခံန့ၣ်ဟဲက့ၤပာ်လီၤအ၀ဲသ့ၣ်အဂံၢ်ဘါဒီးကဘီယူၤ၀ံၤဆီလီၤ၀ဲဒၣ် အဂံၢ်ဘါဖဲန့ၣ်မီၤနီၤႉ ဒီးအ၀ဲသ့ၣ်ဒိးလီၤဃာ်၀ဲဒၣ်မ့ၣ်ပိၢ်ဖဲတၢ်ကပိၤကပၤန့ၣ်ႉ ကမျၢၢ်ဖိလၢအိၣ်တၢ်ကပိၤက ပၤလၢအဖံးအီၣ်မၤအီၣ်တၢ်သ့ၣ်တဖၣ်တဘျီတခီလဲၤက့ၤ၀ဲဒီးတပျံၣ်တပျၤယီၢ်ဘၣ်၀ဲဒၣ်အိၣ်၀ဲလီၤႉ ၦၤသ၀ီဖိလၢအိၣ်ဘူးဒီးသုးကလၢၤသ့ၣ်တဖၣ်န့ၣ် ဘၣ်ပျံၤဘၣ်ဖုးတၢ်အိၣ်၀ဲဒီးကဖံးအီၣ်မၤအီၣ်တၢ်အဂီၢ် ကီခဲ၀ဲမီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဖဲတၢ်တနံၤဃီလါယနူၤအါရံၤ ၂၇ သီ ဟါခီ(၉)ဘျဲၣ်အဆၢကတီၢ်န့ၣ် ခီဖျိ(စွ့ၤ၀ၣ်)ခီၣ်ချ့သုးရ့ၣ် (ခမရ-၃၀၇) အံၤ ခးလီၤ(၁၂၀ မမ)ကျိဖးဒိၣ်လီၤတဲာ်ပိၢ်ဖးထီၣ်၀ဲလၢ (ယွၤသ့ၣ်)သ၀ီအသီခါဖၠၣ်ကရၢၢ်ပူၤအဃိဘၣ်ဒိ၀ဲ မီၤကၠီၤသူၤစိ (၁၆)နံၣ်အံၤအစုလၢအထွဲတကပၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲအသိးသ့ၣ်ညါဘၣ် န့ၣ် လီၤႉ
ဒ်န့ၣ်အသိးပယီၤသုးအံၤခီဖျိနုာ်လီၤဒိၣ်စိတၢ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ် ရ့ၣ် ဆီထံးကီၢ်ဆၣ်ပူၤတန့ၢ်လၢၤဘၣ်အဃိ ပညိၣ်၀ဲၦၤကမျၢၢ်ဒီးခးလီၤ၀ဲကျိဖးဒိၣ်အိၣ်၀ဲကိးနံၤဒဲးဃၣ်ဃၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ခီဖျိပယိၤသုးခးလီၤကျိဖးဒိၣ်ကိးနံၤဒဲးဃၣ်ဃၣ်အဃိ စးထီၣ်ဖဲလါယနူၤအါရံၤ(၁၉)သီတုၤလၢ(၂၅)သီအနံၤ န့ၣ် ပယီၤသုးခးလီၤ(၁၂၀ မမ) (၁၅၅ မမ)ကျိဖးဒိၣ်ဆူကမျၢၢ်ဒူသ၀ီပူၤအိၣ်၀ဲခဲလၢာ် (၂၄)ဖျၢၣ် အဂ့ၢ် ခ့ၣ်အဲၣ်ယူၣ်ထုးထီၣ်ပာ်ဖျါတ့ၢ်ဃာ်၀ဲဖဲ အပူၤကွံာ်လါယနူၤအါရံၤ(၂၇)သီအနံၤန့ၣ်လီၤႉ
