လါယနူၤအါရံၤ ၃၀ သီႇ ၂၀၂၄ နံၣ်ႇ ခ့ၣ်အဲးစံၣ်
အ၀ဲအံၤမ့ၢ်၀ဲသရၣ်(Brandon)လၢဘၣ်တၢ်သ့ၣ်ညါအီၤအါတဂၤဒီးဘၣ်တၢ်ကိးလိာ်ကွဲစ့ၢ်ကီးအမံၤလၢသရၣ် ဖးထီၣ်ႇ သရၣ်ဖုသဘျုၣ်စ့ၢ်ကီးန့ၣ်လီၤႉသရၣ်(Brandon)အံၤအိၣ်တၢ်ဆိးတၢ်ယိယိဖိအီၣ်သဘျုၣ်ဆူၣ်မးဒီး အ၀ဲသိၣ်လိတၢ်လၢကီၢ်ပယီၤ-ကီၢ်ကၠီၣ်တဲၣ်ကီၢ်ဆၢခီကီၢ်သူမွဲခံတီၤထီကၠိအံၤန့ၣ်လီၤႉအ၀ဲမ့ၢ်၀ဲဒၣ်ၦၤကီၢ် အမဲ ရၤဖိတဂၤဒီး အ၀ဲသိၣ်လိတၢ်လၢသူမှဲခံကၠိအံၤကထီၣ်ဘးလၢ(၁၅)နံၣ်ဃၣ်ဃၣ်လံန့ၣ်လီၤႉ
သရၣ်(Brandon)အံၤအိၣ်ဖျဲၣ်ထီၣ်ဒီးဒိၣ်ထီၣ်၀ဲဒၣ်လၢကီၢ်အမဲရကၤ(မဲစံးကဲ)ကီၢ်စဲၣ်ပူၤဒီးခဲအံၤအသးနံၣ်အိၣ်၀ဲ(၃၈)နံၣ်လံန့ၣ်လီၤႉ ဒ်န့ၣ်အသိးအဒီပုၢ်၀ဲၢ်ခဲလၢာ်အိၣ်၀ဲ(၇)ဂၤဒီးလၢအဒီပုၢ်၀ဲၢ်ကျါအ၀ဲမ့ၢ်ၦၤ(၂)ဂၤတဂၤန့ၣ် လီၤႉ
သရၣ်(Brandon)ဖျိထီၣ်တီၤထီကၠိဖဲ(မဲးစံးကဲ)ကီၢ်စဲၣ်၀ံၤလီၢ်ခံဒ်တၢ်ခွဲးတၢ်ယာ်အိၣ်၀ဲဒၣ်အါမးဘၣ်ဆၣ်ခီဖျိလၢအတၢ်ကတီၤဆိသးတအိၣ်ဘၣ်အဃိအ၀ဲဃုထၢက့ၤ၀ဲဒၣ်တၢ်နီကဘီယူၤတၢ်သိၣ်လိ(ခီလ်လ့)ကၠိန့ၣ်လီၤႉ ဖဲအ၀ဲထီၣ်တၢ်နီကဘီယူၤကၠိတနံၣ်ဒီးနီလိကဘီယူၤန့ၢ်သၢလါ၀ံၤလီၢ်ခံဘျီန့ၣ်အ၀ဲပတုာ်ကွံာ်၀ဲဒၣ်တၢ်နီ ကဘီယူၤကၠိအံၤန့ၣ်လီၤႉ သရၣ်(Brandon)အံၤမ့ၢ်ၦၤလၢအသးစဲ၀ဲဒၣ်တၢ်ဟးအယံၤတၢ်ပြၢတဂၤဒီးဒ်န့ၣ်အ သိးဖဲအ၀ဲထီၣ်(ခီလ်လ့ၤ)ကၠိအခါန့ၣ်အ၀ဲနုာ်လီၤပြၢဒံးတၢ်လၢတၢ်ဟးအယံၤလၢသၢလါအတီၢ်ပူၤအဂ့ၢ်န့ၣ် အ၀ဲစံး၀ဲဒၣ်န့ၣ်လီၤႉ
“ယသ့ၣ်ညါယဘၣ်သးထီၣ်ကၠိ ယကဘၣ်လဲၤထီၣ်ကၠိဖဲလဲၣ်ႇ ယကဘၣ်မၤလိမနုၤလဲၣ်န့ၣ်တၢ်ခွဲးတၢ်ယာ် အိၣ်ဒီဒူၣ်ဘၣ်ဆၣ်ယတကတီၢ်သးဆိဘၣ်ႇ ယတဆိမိၣ်ဆိဘၣ်အဃိန့ၣ် တၢတနံၣ်ယဃုထၢကၠိတဖျၢၣ် ဘၣ်ဃးတၢ်နီကဘီယူၤကၠိတဖျၢၣ် ဘၣ်ဆၣ်ယထီၣ်တၢတနံၣ်၀ံၤဒီးယစးထီၣ်နီကဘီယူၤကအိၣ်ခံလါသၢ လါလီၤႉ ယဆိမိၣ်ယတမၤလၢၤဘၣ်ႇ ဖဲပသးစၢ်အခါပအဲၣ်ဒိးမၤတၢ်လၢ(Adventure)တစဲးဖိဧါႉ ဖဲယထီၣ် (ခီလ်လ့ၣ်)ကၠိအခါယသကိးဟ့ၣ်ဂံၢ်ဟ့ၣ်ဘါယၤလၢနတၢ်အိၣ်ဆူၣ်အိၣ်ချ့ဂ့ၤဒီးယသကိးအဲၣ်ဒိးလၢပကဟးတၢ်ပြၢအယံာ်လၢခီၣ်မီၤႉ အဃိန့ၣ်ဖဲတၢ်ကိၢ်ခါအကတီၢ်န့ၣ်ပစးထီၣ်ဟးလၢ(New Jersey)ကီၢ်စဲၣ်မုၢ်ထီၣ်တ ကပၤဒီးပဟးလၢခီၣ်တုၤလၢမုၢ်နုာ်တကပၤလီၤႉ ပဟးလၢခီၣ်သၢလါဘျဲၣ်တစဲးဖိ” အဂ့ၢ်န့ၣ် သရၣ် (Brandon) စံး၀ဲန့ၣ်လီၤႉ
လၢန့ၣ်အမဲာ်ညါ(Brandon)အံၤမ့ၢ်စ့ၢ်ကီး၀ဲ ၦၤလၢအသးစဲတၢ်ဟးကသုၣ်ကသီလၢထံဂုာ်ကီၢ်ဂၤတဂၤဒီး ဖဲအ ၀ဲအသးနံၣ်အိၣ်(၁၉)နံၣ်အခါအ၀ဲဒိးန့ၢ်ဘၣ်တၢ်ခွဲးတၢ်ယာ်လၢ ကဘၣ်လဲၤ၀ဲဆူ(ကီၢ်အံးသံးယိဖံယါ)ထံကီၢ်ဒီး ဖဲအလဲၤတုၤလၢတၢ်လီၢ်ဖဲန့ၣ်အခါ ထံၣ်ဘၣ်၀ဲဒၣ်တၢ်အိၣ်သးအကလုာ်အလုာ်လၢ တၢ်လိၣ်အိၣ်၀ဲဒီး ၦၤလီၢ် က၀ီၤဖိဖဲန့ၣ်သ့ၣ်တဖၣ်အါမးန့ၣ်လီၤႉ ခီဖျိလၢတၢ်အိၣ်သးသ့ၣ်တဖၣ်အံၤထိးဘၣ်အသးလၢ အဲၣ်ဒိးမၤစၢၤ ၦၤလၢအလိၣ်ဘၣ်တၢ်မၤစၢၤသ့ၣ်တဖၣ်ဒီးအဲၣ်ဒိးမၤတၢ်လၢအကဲဘျုးလၢၦၤဂၤအဂီၢ်အဃိ သရၣ်(Brandon) အံၤစးထီၣ်ဖဲန့ၣ်၀ံၤအလီၢ်ခံ အ၀ဲဆၢတဲာ်လီၤအသးလၢကက့ၤထီၣ်က့ၤ(ဖၠၣ်စိမိၤ)ကၠိဒီးဃုထၢမၤလိအါထီၣ်၀ဲ (Anthropology)အဂ့ၢ်အကျိၤသ့ၣ်တဖၣ်လၢအဘၣ်ဃးဒီး(Community Development)တကပၤန့ၣ်လီၤႉ
ခီဖျိလၢတၢ်အိၣ်သးတခါအဖီခိၣ်သရၣ်(Brandon)အံၤ ဖဲအ၀ဲထီၣ်(ဖၠၣ်စိမိၤ)ကၠိအဆၢကတီၢ် အ၀ဲဒိးန့ၢ်ဘၣ် တၢ်ခွဲးတၢ်ယာ်လၢ ကဘၣ်နုာ်လီၤမုာ်သးမၤကလီဒီးမၤစၢၤတၢ်လၢၦၤတ၀ၢပူၤစ့ၢ်ကီးန့ၣ်လီၤႉ လၢတၢ်တဆိ ကမိၣ်အပူၤခီဖျိလၢအ၀ဲန့ၢ်ဘၣ်တၢ်ခွဲးတၢ်ယာ် နုာ်လီၤမၤမုာ်သးမၤကလီလၢ(World Relief) တၢ်ကရၢကရိ လၢအမၤစၢၤၦၤဘၣ်ကီဘၣ်ခဲဖိလၢ အဟဲသုးလီၢ်သုးကျဲတဖုအံၤအပူၤအဃိ အ၀ဲစးထီၣ်သ့ၣ်ညါဘၣ်၀ဲ ကညီကလုာ်ႇ အတၢ်ဆဲးတၢ်လၤသ့ၣ်တဖၣ်ဒီး စးထီၣ်ဖဲန့ၣ်အ၀ဲအတၢ်တဲလိမၤလိ၀ဲဒၣ်ကညီကျိာ်အံၤ ဟဲစး ထီၣ်အသးဖဲန့ၣ်လီၤႉ
“တၢ်ကရၢကရိ(World Relief)လၢမၤစၢၤၦၤဘၣ်ကီဘၣ်ခဲဖိသ့ၣ်တဖၣ်လၢကဃုတၢ်မၤတၢ်လဲၤတၢ်က့ၤဒီးၦၤ မၢပလဲၤသိၣ်လိကလီၤ၀ါႉ ခီဖျိလၢၦၤဒဲက၀ီၤဖိဟဲတနီၤတဲကလီၤ၀ါတဘၣ်ဘၣ်ႉ ယတီၣ်ထီၣ်လံာ်ဒီးၦၤတူၢ် လိာ်ယၤဘၣ်ဆၣ် လၢယကဘၣ်သိၣ်လိမတဂၤလဲၣ်ယတသ့ၣ်ညါဘၣ်ႉ ၦၤမၤတၢ်ဖိဟဲပိာ်စိာ်ယၤဒီးလဲၤဆှၢ ယၤလၢၦၤဟံၣ်လီၤႇ ဖဲန့ၣ်အခါယတသ့ၣ်ညါလၢအ၀ဲမ့ၢ်ကညီကလုာ်ဒံးဘၣ်ႇ လၢယလဲၤလၢအသရိာ်မၣ်ယ ထံၣ်လိာ်သးဒီးတၢ်အိၣ်ဖှိၣ်သရၣ်လၢအဖျိးထီၣ်တ့ၢ်လံာ်စီဆှံကၠိလၢဘဲကျီးဒီး အ၀ဲတဲပၠးယၤကညီတၢ်စံၣ်စိၤ တဲစိၤအတၢ်အိၣ်သးဒီးကဲထီၣ်ၦၤဘၣ်ကီဘၣ်ခဲဖိဒ်လဲၣ်န့ၣ်ယစးထီၣ်သ့ၣ်ညါအါထီၣ်ဖဲန့ၣ်လီၤႉ ယမိၢ်တဂၤႇ ၦၤကညီလၢယဘၣ်သိၣ်လိကလီၤ၀ါတဂၤန့ၣ် ယမၢအသိၣ်လိယၤၦၤကညီကျိာ်ဒီးအ၀ဲမၤလိယၤလၢကစၢ် ခရံာ်အတၢ်ထုကဖၣ်လၢၦၤရိးညီညုၢ်၀ဲ အိၣ်လၢမူခိၣ်ပပၢ်ဧၢတၢ်ခါန့ၣ်” အဂ့ၢ်အ၀ဲစံး၀ဲဒၣ်န့ၣ်လီၤႉ
ဖဲန့ၣ်၀ံၤအလီၢ်ခံတဆီဘၣ်တဆီသရၣ်(Brandon)အံၤအတၢ်ရ့လိာ်မုာ်လိာ်သးဒီးကညီဖိသ့ၣ်တဖၣ် ဟဲအါ ထီၣ်၀ဲဒၣ်ကယီကယီဖဲအ၀ဲအိၣ်(ဖၠၣ်စိမိၤ)ကၠိအဆၢကတီၢ်ဒီးအ၀ဲဃုထၢနုာ်လီၤမၤတၢ်လၢ(Partner relief and Development)တၢ်ကရၢကရိလၢအအိၣ်ဖဲ၀့ၢ်(မဲၣ်ဆီး)အပူၤန့ၣ်လီၤႉ
“ဖဲယဟဲလီၤတၢ်သိၣ်လိသီသီအခါန့ၣ်ယဟဲအိၣ်လၢမဲၣ်ဆီးႇ တချုးဒံးလၢယဟးထီၣ်လၢအမဲရကၤဘၣ်န့ၣ် တၢ်အိၣ်ဖှိၣ်သရၣ်အမံၤလၢ(ဟဲန့ၢ်သီ)တဲယၤႇ နမ့ၢ်လဲၤဟးလၢဘဲကျီးန့ၣ်ယနီအိၣ်တဂၤနမ့ၢ်ချုးနလဲၤဟးနီၤႉ ဖဲယလဲၤတုၤလၢဘဲကျီးဒီးယထံၣ်ဘဲကျီးန့ၣ်ဖးဒိၣ်ညါဒီးၦၤကညီအိၣ်ဒီဒူၣ်ႇ ယမၤတၢ်လၢတၢ်ကရၢကရိတဖု လၢမၤစၢၤတၢ်လၢဒဲက၀ီၤအပူၤဒီးအ၀ဲသ့ၣ်ကလဲၤမၤတၢ်မၤလိအဃိယလဲၤပိာ်အခံလၢဘဲကျီးဒီးယတပလီၢ်သးဘၣ်ဒီးယလဲၤထံၣ်ယတၢ်အိၣ်ဖှိၣ်သရၣ်အနီဖဲန့ၣ်အဃိအလီၤကမၢကမၣ်လၢယဂီၢ်ႇ ယတဆိမိၣ်ယက ထံၣ်အီၤဘၣ်ဒီးယထံၣ်အီၤအဆိကတၢၢ်လီၤႉ ဒီးလၢခံယလဲၤဟးအိၣ်သကိးဟံၣ်ဖိဃီဖိတဒူၣ်လၢ ယသိၣ် လိဘၣ်ကလီၤ၀ါအဘူးအတံၢ်အနီအကၠီအအိၣ်ဖဲဘဲကျီးပူၤအအိၣ်ကိးမုၢ်နွံဒဲး” အဂ့ၢ်သရၣ်(Brandon)စံး၀ဲ န့ၣ်လီၤႉ
သရၣ်(Brandon)အံၤဖဲလၢအ၀ဲထီၣ်တီၤကၠိအခါဒီးအိၣ်(ခီလ်လ့ၤ)ကၠိအခါလံၤလံၤန့ၣ်အတၢ်ပညိၣ်အိၣ်၀ဲဒၣ်လၢအဲၣ်ဒိးကဲထီၣ်ဘၣ်၀ဲကသံၣ်သရၣ်ႇၦၤနီကဘီယူဖိဒီးတၢ်အိၣ်ဖှိၣ်သရၣ်တဂၤန့ၣ်လီၤႉ ဘၣ်ဃးလၢအက ကဲထီၣ်ဘၣ်ကၠိသရၣ်တဂၤဒ်အံၤန့ၣ် တဆိမိၣ်ဃာ်၀ဲဒၣ်နီတဘျီဘၣ်န့ၣ်လီၤႉ တချုးဒံးလၢအတၢ်က့ၤကဒါ က့ၤဆူကီၢ်အမဲရကၤဘၣ်အဆၢကတီၢ် ခီဖျိလၢထံၣ်ဘၣ်၀ဲဒၣ်ကၠိဖိသ့ၣ်တဖၣ် မၤလၤကပီၤအီၤဒီးအတၢ်အဲၣ် ဘၣ်အီၤအဃိ အ၀ဲသိၣ်လိတၢ်ဖဲသူမှဲခံကၠိအံၤစးထီၣ်လၢ(၂၀၀၉)နံၣ်တုၤလၢမုၢ်မဆါတနံၤအံၤတစုန့ၣ်လီၤႉ
“မ့ၢ်လၢတၢ်လဲၤတၢ်က့ၤန့ၣ်မုာ်တၦၢ်လီၤႉ လဲၤဟးလၢဒဲက၀ီၤအပူၤမံတနၤခံနၤဒီးမၤတၢ်မၤလိႇ မၤခရံာ်အိၣ် ဖျဲၣ်ႇ မၤတၢ်တခါတခါမုာ်တၦၢ်လီၤႉ ယဟဲလၢ(သူမွဲခံ)ယမၤန့ၢ်အ၀ဲသ့ၣ်ဘၣ်ဃးထံဒီးအါတက့ၢ်ယဟဲလၢ သူမွဲခံန့ၣ်မုာ်လီၤႉ ဖဲယကဘၣ်က့ၤထီၣ်က့ၤကၠိဒီးသရၣ်အဲၣ်ကတၢၢ်တဲယၤလၢ လၢခံတနွံန့ၣ်နချုးတဟါဧါႇ ယတဲလၢယချုးႇ နမ့ၢ်ချုုးန့ၣ်ဟဲဟးအိၣ်သကိးၦၤနီၤႉ ဖဲယဟဲအခါန့ၣ်ၦၤကၠိဖိသ့ၣ်တဖၣ်မၤလၤကပီၤယၤ ဒီးလၢယတၢ်အိၣ်မူအပူၤန့ၣ်ယတထံၣ်ဘၣ်ဒ်အံၤနီတဘျီဘၣ်ႉ ၦၤသး၀ံၣ်တၢ်ၦၤဟ့ၣ်ယၤတၢ်ဟ့ၣ်ဒီးၦၤစံး ဘျုးယၤႇ ယဆိမိၣ်ယတမၤတၢ်နီမံၤ အ၀ဲသ့ၣ်သးအိၣ်ယၤဒီးကွဲမုာ်ယၤအဃိဘၣ်ယသးမုာ်ဒိၣ်မးလီၤႉ စးထီၣ်ဖဲန့ၣ်အလီၢ်ခံယက့ၤထီၣ်ကၠိဒီးယဖျိးထီၣ်ကၠိ၀ံၤယဟဲက့ၤအိၣ်က့ၤလၢသူမွဲခံဒီး ယသိၣ်လိတၢ်န့ၣ် ဘၣ်ယသးမုာ် ယသိၣ်လိတၢ်တနံၣ်၀ံၤတနံၣ်တုၤခဲအံၤၦဲၤထီၣ်လၢ(၁၅)နံၣ်လံ” အဂ့ၢ်န့ၣ် စံး၀ဲန့ၣ်လီၤႉ
တကးဒံးဘၣ်ဘၣ်ဃးဒီးကညီလုၢ်လၢ်လုၢ်လၢ်တခါလၢအမ့ၢ်တၢ်အီၣ်သဘျုၣ်အံၤန့ၣ်သရၣ်(Brandon)အံၤအ၀ဲစးထီၣ်အီၣ်၀ဲဒၣ်လၢအခါဖဲလဲၣ်ဒီးအ၀ဲစးထီၣ်အီၣ်သဘျုၣ်အခါအ၀ဲတူၢ်ဘၣ်၀ဲဒၣ်ဒ်လဲၣ်အဂ့ၢ်န့ၣ် စံး၀ဲ ဒၣ်ဒ်အံၤန့ၣ်လီၤႉ
“ယသကိး တဂၤအကသုးဟံၣ်အကလဲၤလၢတၢ်လီၢ်အဂၤအဃိန့ၣ်ယဃ့ၢ်ယတၢ်ကရၢကရိအကါဒီးယမၤ စၢၤအီၤႉ ယကဘၣ်နီကါဒီးအ၀ဲဒုးအီၣ်ယၤသဘျုၣ်ႉ နအီၣ်တခါအံၤတမူးဘၣ် တမ့ၢ်သံးဘၣ်တမ့ၢ်ဘံၤယါ ဘၣ်ဒီးနမ့ၢ်အီၣ်တဘၣ်နီမံၤဘၣ်ႉ အဃိန့ၣ်ယအီၣ်ဒီးဖဲယနီကါအခါယခိၣ်သၣ်ဃံဆါ ယခိၣ်သၣ်ဃံယူၤဒီး အ၀ဲသံကွၢ်ယၤနမူးဧါ ယတဲယတမူးဘၣ် ဘၣ်ဆၣ်ယဘၣ်ဂုာ်ကျဲးစၢကွၢ်ကျဲလီၤႉ လၢခံယတအီၣ်ကြီကြီ ဘၣ် တုၤလၢယဟဲသိၣ်လိတၢ်ဖဲသူမွဲခံတၢတၢတနံၣ်န့ၣ်ယတအီၣ်ဘၣ်ႉ တုၤလၢယလဲၤဟးလၢဘဲကျီးအိၣ် တဘျီ သဘျုၣ်ကျးအိၣ်တဖျၢၣ်ဖဲ(ဖျၢၣ်ထူၣ်ပျီ)ကပၤန့ၣ်အမံၤဒိၣ်ဒီးယစးထီၣ်အီၣ်၀ဲဖဲန့ၣ်” အဂ့ၢ် စံး၀ဲန့ၣ် လီၤႉ
သရၣ်(Brandon)အံၤဘၣ်ဃးအကက့ၤအိၣ်လၢကီၢ်အမဲရကၤဒီး အိၣ်ဘှံးက့ၤလၢကၠိသရၣ်တၢ်မၤပူၤအံၤ အ၀ဲတဆိမိၣ်၀ဲနီတဘျီဘၣ်အဂ့ၢ်န့ၣ် သရၣ်(Brandon)စံး၀ဲဒၣ်အသိးသ့ၣ်ညါဘၣ်န့ၣ်လီၤႉ
“ယသိၣ်လိတၢ်လၢသူမွဲခံန့ၣ် ယတဆိမိၣ်နီတဘျီဘၣ် လၢယဟဲအိၣ်တၢတၢအခါန့ၣ် ယအၢၣ်လီၤယသးလၢ ယကသိၣ်လိတၢ်(၉)လါဘၣ်ဆၣ် လၢယသးပူၤန့ၣ်ယကဘၣ်မၤဒံးႉ တနံၤညါအံၤ ယထံၣ်လိာ်သးဒီးယသ ကိးလၢအအိၣ်ကီၢ်ချၢ အ၀ဲသံကွၢ်ယၤ နဆိမိၣ်နကအိၣ်ဘှံးဆံးယံာ်လဲၣ်ႉ ဒီးယတဲအီၤနမ့ၢ်ဟ့ၣ်ယၤစ့လၢ (အ ကကွဲ)ထဲလဲၣ်ထဲလဲၣ်ဘၣ်ဆၣ်ယတက့ၤဘၣ်ႉ ယဆိမိၣ်တဘၣ်ဘၣ်ႇ ယမ့ၢ်တအိၣ်ဖဲအံၤဘၣ်ဒီးအလီၤဂာ် ယသးသမူတအိၣ်လၢဘၣ်ႉ ယကဘၣ်မၤတၢ်ဖဲအံၤယကဘၣ်အိၣ်ဖဲအံၤလီၤႉ ယမ့ၢ်သံဒၣ်လဲာ်ယကသံဖဲ အံၤလီၤ” အဂ့ၢ် စံး၀ဲ့နၣ်လီၤႉ
လၢန့ၣ်အမဲာ်ညါ ၦၤကၠိဖိလၢအဖျိထီၣ်လၢသရၣ်(Brandon)အစုပူၤအံၤ အိၣ်ဒၣ်လၢအဂၤ(၅၀၀)ဃၣ်ဃၣ်လံ ဒီး ခီဖျိအ ထံၣ်ဘၣ်လၢအၦၤကၠိဖိတဖၣ် နုာ်လီၤမၤတၢ်မၤလၢၦၤတ၀ၢပူၤဒီး တၢ်ကရၢကရိပူၤအဖီခိၣ် လီၤ သူၣ်မံသးမုာ် ၀ဲဒၣ်ဒိၣ်မးအဂ့ၢ်န့ၣ် အ၀ဲစံး၀ဲဒၣ်န့ၣ်လီၤႉ
ဒ်န့ၣ်အသိး သရၣ်(Brandon)ဆီၣ်တခူဟ့ၣ်ဂံၢ်ဟ့ၣ်ဘါစ့ၢ်ကီး၀ဲဒၣ် ၦၤကၠိဖိကိးဂၤဒဲးလၢ ကအဲၣ်အၦၤကလုာ် အဲၣ်ၦၤလၢအခိၣ်အဃၢၤဒီးကၠိဖိသ့ၣ်တဖၣ်ကအိၣ်ဒီးတၢ်နာ်န့ၢ်လီၤသးဒီးတဘၣ်လိၣ်ဟ့ၣ်ဆှူတၢ်ညီညီဘၣ်အဂ့ၢ်အ၀ဲစံး၀ဲဒၣ်န့ၣ် လီၤႉ
“ၦၤကၠိဖိကိးဂၤဒဲးလီၤ တၢ်အဆိကတၢၢ်န့ၣ်ကဘၣ်အဲၣ်အၦၤကလုာ် အဲၣ်ၦၤအိၣ်လၢအဃၢၤဒီးအဲၣ်အနီၢ်က စၢ်ဒူသ၀ီန့ၣ်တက့ၢ်ႉ မ့ၢ်မၤတၢ်တခါတခါန့ၣ် ကဃုသ့ၣ်ညါအတၢ်သ့တၢ်ဘၣ် တၢ်ပညိၣ်တခါမ့ၢ်တကဲထီၣ် ဘၣ်န့ၣ်ယတအဲၣ်ဒိးလၢအကဟ့ၣ်ဆှူဘၣ် ယအဲၣ်ဒိးအ၀ဲသ့ၣ်ကဃုကျဲလၢအဂၤ တၢ်ကီတၢ်ခဲမ့ၢ်ဟဲဘၣ်ၦၤ သနာ်က့ ပကဆဲးမၤဒံးႉ ယအဲၣ်ဒိးလၢၦၤကၠိဖိကိးဂၤဒဲး ကအိၣ်ဒီးနီၢ်ကစၢ်တၢ်နာ်န့ၢ်လီၤသးန့ၣ်လီၤႉ တၢ်လၢ အမၤတ့ၢ်လၢအလီၢ်ခံဒီးတၢ်လၢကမၤခါဆူညါသ့ၣ်တဖၣ် ကဘၣ်မၤလၢတၢ်နာ်န့ၢ်လီၤသးအပူၤႉ ကဘၣ်နာ် လီၤအသးဒ်သိးဒီးယမၤတၢ်သ့“
