သုးဟံးန့ၢ်တၢ်စိတၢ်ကမီၤအတီၢ်ပူၤသုးကီၣ်ကးထၢနုာ်လီၤၦၤပိ၁်မုၣ်လၢဃိ၁်ပူၤအိၣ်၀ဲ ၇၀၀ ဘျဲၣ်

လါယနူၤအါရံၤ ၂၄ သီႇ ၂၀၂၄ နံၣ်ႇ ခ့ၣ်အဲးစံၣ်

သုးဟံးန့ၢ်တၢ်စိတၢ်ကမီၤအတီၢ်ပူၤလၢကီၢ်ပယီၤဒီတဘ့ၣ်အပူၤန့ၣ် သုးကီၣ်ကးထၢနုာ်လီၤ ၦၤပိာ်မုၣ်ပိာ်မၢၤလၢ ဃိာ်ပူၤအိၣ်၀ဲဒၣ်(၇၀၀)ဘျဲၣ်အဂ့ၢ်န့ၣ် (Burmese Women’s Union) ထုးထီၣ်ပာ်ဖျါ၀ဲဖဲတနံၤအံၤလါယနူၤအါရံၤ ၂၄ သီ အနံၤန့ၣ်လီၤႉ

စးထီၣ်(၂၀၂၁)လါဖ့ၤဘြူၤအါရံၤ ၁ သီ သုးဟံးန့ၢ်တၢ်စိတၢ်ကမီၤတုၤလၢတနံၣ်အံၤ(၂၀၂၄)လါယနူၤအါရံၤ ၁၉ သီန့ၣ် ကီၢ်ပယီၤထံကီၢ်ဒီတဘ့ၣ်အပူၤသုးကီၣ်ကးထၢနုာ်လီၤၦၤပိာ်မုၣ်ပိာ်မၢၤလၢဃိာ်ပူၤလၢအတဖိးသဲစးခဲလၢာ် အိၣ်၀ဲဒၣ်(၇၁၅)ဂၤအဂ့ၢ်န့ၣ် (Burmese Women’s Union)လံာ်တၢ်မၤနီၣ်စရီပူၤအသိး သ့ၣ်ညါဘၣ်န့ၣ်လီၤႉ

သုးဟံးန့ၢ်တၢ်စိတၢ်ကမီၤ၀ံၤလီၢ်ခံၦၤပိာ်မုၣ်ပိာ်မၢၤလၢအိၣ်ကီၢ်ပယီၤပူၤတဖၣ်တနီၤန့ၣ်တသ့ဖဲအသ့နုာ်လီၤ ပၣ်ဃုာ်ပၣ်ဂီၢ်၀ဲဒၣ်လၢတၢ်ထီဒါသုးမီၤစိရိၤတၢ်ဟူးတၢ်ဂဲၤပူၤလၢအကျဲအကပၤကပၤအိၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဘၣ်ဃးသုးကီၣ်ကးထၢနုာ်လီၤၦၤပိာ်မုၣ်ပိာ်မၢၤလၢဃိာ်ပူၤအဂ့ၢ်အံၤ ကညီပိာ်မုၣ်ကရၢ(KWO)ကရၢခိၣ် နီၢ်ကညီဖီ စံး ဘၣ် ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ

အ၀ဲစံး၀ဲလၢ“ပယီၤသုးဖီၣ်ထၢနုာ်လီၤၦၤပိာ်မုၣ်လၢဃိာ်ပူၤတၢ်သ့ၣ်တဖၣ်အံၤအကဲ၀ဲတၢ်လၢအမၤဘၣ်ဒိၦၤဟီၣ်ခိၣ်ဖိ ခွဲးယာ်ဒိၣ်ဒိၣ်မုၢ်မုၢ်လီၤႉဘၣ်မနုၤအဃိလဲၣ်န့ၣ်ၦၤလၢတၢ်ဟ့ၣ်အီၤတၢ်စံၣ်ညီၣ်သံတဖၣ်အံၤတမ့ၢ်လၢအမၤကမၣ်တၢ်နီတမံၤဘၣ်ႉမ့ၢ်ၦၤလၢအပာ်ဖျါထီၣ်သးလၢတၢ်မုာ်တၢ်ခုၣ်အဲၣ်ဒိးတၢ်ဆီတလဲတတူၢ်လိာ်သုးဘၣ်အဃိတၢ်မၤအ၀ဲသ့ၣ်ဒ်အံၤန့ၣ်မ့ၢ်တၢ်မၤကမၣ်၀ဲဒၣ်ၦၤဟီၣ်ခိၣ်ဖိတၢ်ခွဲးတၢ်ယာ်ဒိၣ်ဒိၣ်မုၢ်မုၢ်ဒီး၀ဲဒၣ်န့ၣ်ပအဲၣ်ဒိးလၢထံဂုၤကီၢ်ဂၤသ့ၣ်တဖၣ်အံၤကထံၣ်၀ဲဒၣ်တၢ်သ့ၣ်တဖၣ်အံၤမီၤနီၤႉပယီၤသုးန့ၣ်တၢ်ဆီၣ်သနံးလၢအဖီခိၣ်န့ၣ်မ့တဟဲဒိဘၣ်အီၤဘၣ်န့ၣ်တၢ်သ့ၣ်တဖၣ်အံၤအ၀ဲသ့ၣ်ကဆဲးမၤ၀ဲထီဘိလီၤမီၤနီၤအဃိန့ၣ်တၢ်၀ဲအံၤကဲ၀ဲဒၣ်တၢ်အဒိတခါလီၤ”အဂ့ၢ်န့ၣ် စံး၀ဲန့ၣ်လီၤႉ

လၢန့ၣ်အမဲာ်ညါၦၤပိာ်မုၣ်ပိာ်မၢၤလၢသုးကီၣ်ကးထၢနုာ်လီၤ၀ဲဃိာ်ပူၤသ့ၣ်တဖၣ်အံၤဖဲတၢ်ဖီၣ်အီၤအဆၢကတီၢ် မ့ၢ်တၢ်ကမၤဆူးမၤဆါမၤပယွဲအီၤစ့ၢ်ဧါန့ၣ်တၢ်တသ့ၣ်ညါ၀ဲဘၣ်အသိးၦၤပိာ်မုၣ်ပိာ်မၢၤလၢအသံလၢ သုးကီၣ်ကးခးလီၤကျိဖးဒိၣ်အဃိအံၤအိၣ်၀ဲဒၣ်စ့ၢ်ကီးအါမးအဂ့ၢ်န့ၣ် နီၢ်ကညီဖီ စံးအါထီၣ်၀ဲန့ၣ်လီၤႉ

ဒ်(Burmese Women’s Union)အလံာ်တၢ်ပာ်ဖျါပူၤအသိးန့ၣ် ၦၤပိာ်မုၣ်လၢသုးကီၣ်ကးထၢနုာ်လီၤ၀ဲလၢ ဃိာ်ပူၤလၢတစိၤသးန့ၣ်အိၣ်၀ဲဒၣ်(၃၉)ဂၤဒီးစံၣ်ညီၣ်လီၤလၢဘၣ်သံန့ၣ်အိၣ်၀ဲဒၣ်(၁၆)ဂၤအဂ့ၢ်န့ၣ် ပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါၦၤလၢအဘၣ်လီၤလၢဃိာ်ပူၤတနံၣ်တုၤယဲၢ်နံၣ်န့ၣ်အိၣ်၀ဲဒၣ်(၃၁၅)ဂၤႇ ၅ နံၣ်တုၤ ၁၀ နံၣ်န့ၣ် အိၣ်၀ဲ(၂၀၅)ဂၤႇ ၁၀ နံၣ်တုၤ ၂၀ နံၣ်န့ၣ်အိၣ်၀ဲ(၁၀၅)ဂၤႇ ၂၀ နံၣ်တုၤလၢ ၃၀ နံၣ်န့ၣ်အိၣ်၀ဲ(၂၄)ဂၤႇ ၃၀ နံၣ်တုၤ ၄၅ နံၣ်န့ၣ်အိၣ်၀ဲ(၇)ဂၤႇ ၄၅ နံၣ်တုၤ ၆၅ နံၣ်န့ၣ်အိၣ်၀ဲ(၂)ဂၤ ဒီး ၦၤဘၣ်လီၤလၢဃိာ်ပူၤတနံၣ်ဆူဖီလာ်န့ၣ်အိၣ်၀ဲ(၂)ဂၤ အဂ့ၢ်န့ၣ် (Burmese Women’s Union)လံာ်တၢ်ပာ်ဖျါအပူၤ ပာ်ဖျါ၀ဲလီၤတံၢ်လီၤဆဲးန့ၣ်လီၤႉ

တကးဒံးဘၣ်တအဲၣ်ဒိးလၢထံဂုၤကီၢ်ဂၤတဖၣ်ကမၤသကိးတၢ်ဒီးသုးမီၤစိရိၤအံၤဘၣ်ဒီးမ့မၢ်တခီကမျၢၢ်ထံဖိကီၢ်ဖိ ခဲလၢာ်ကပာ်ဖှိၣ်မၤသကိးတၢ်မၤလီၤၦီၢ်ကွံာ်သုတဖုအံၤအဂ့ၢ်န့ၣ် (KWO)ကရၢခိၣ် နီၢ်ကညီဖီ စံးအါထီၣ်၀ဲဒၣ်ဒ်အံၤန့ၣ်လီၤႉ

“ပတအဲၣ်ဒိးလၢထံဂုၤကီၢ်ဂၤတဖၣ်န့ၣ်ကမၤသကိးတၢ်ဒီးသုးမီၤစိရိၤတဖုအံၤဘၣ်ႉဒ်န့ၣ်အသိးစ့ၢ်ကီးထံဖိကီၢ်ဖိတဖၣ်အံၤကသ့ၣ်ညါ၀ဲဒၣ်ပယီၤသုးတဖုအံၤအတၢ်အၢတၢ်သီဒီးကပာ်ဖှိၣ်မၤသကိးထီဒါ၀ဲဒၣ်သုးတဖုအံၤကလီၤၦီၢ်ကွံာ်ဒီး ကအိၣ်က့ၤ၀ဲဒၣ်လၢကမျၢၢ်တၢ်တီခိၣ်ရိၣ်မဲဖီလာ်အဂီၢ်န့ၣ်အရ့ဒိၣ်၀ဲဒၣ်လၢၦၤကိးဂၤဒဲးကဘၣ်ပာ်ဃုာ်မၤသကိးတၢ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ

သုးဟံးန့ၢ်တၢ်စိတၢ်ကမီၤ၀ံၤလီၢ်ခံကီၢ်ပယီၤထံကီၢ်ဒီတဘ့ၣ်လၢကလုာ်ဒူၣ်ဟီၣ်က၀ီၤတၢ်လီၢ်အါတီၤအပူၤ တၢ်ဒုးဆူၣ်ထီၣ်၀ဲဒီးခီဖျိသုးမီၤစိရိၤအံၤသူ၀ဲဒၣ်ကျိဖးဒိၣ်သူ၀ဲဒၣ်ကဘီယူၤအဃိၦၤကမျၢၢ်ဘၣ်သံဘၣ်ဒိဘၣ်ထံးအါအါအိၣ်ဂီၢ်ဂီၢ်အကျါပၣ်ဃုာ်စ့ၢ်ကီး၀ဲၦၤပိာ်မုၣ်ပိာ်မၢၤၦၤဖိဒံဖိသၣ်သ့ၣ်တဖၣ်အါမးအဂ့ၢ်န့ၣ် သ့ၣ်ညါဘၣ်န့ၣ်လီၤႉ