Home တၢ်ကစီၣ် ရှါတီ၀့ၢ်တၢ်ဒုးအပူၤသုးကီၣ်ကးတကပၤသံ(၁၆၀)ဂၤအဂ့ၢ် KNDF ထုးထီၣ်ပာ်ဖျါ၀ဲ

ရှါတီ၀့ၢ်တၢ်ဒုးအပူၤသုးကီၣ်ကးတကပၤသံ(၁၆၀)ဂၤအဂ့ၢ် KNDF ထုးထီၣ်ပာ်ဖျါ၀ဲ

241
0

လါဖ့ၤဘြူၤအါရံၤ ၁၇ သီႇ ၂၀၂၄ နံၣ်ႇ ခ့ၣ်အဲးစံၣ်ႇ

လၢကရ့ၣ်နံၣ်ကီၢ်စဲၣ်အပူၤ သုးကီၣ်ကးအသုးကလၢၤလၢအိၣ်ဆီလီၤသးဖဲ ရှါတီ၀့ၢ်ခိၣ်၀့ၢ်ဃၢၤတဖၣ်အံၤ ဖဲလါဖ့ၤဘြူၤအါရံၤ ၁၂ သီအနံၤန့ၣ် ကရ့ၣ်နံၣ်တၢ်ပၢၢ်ဆၢသုးပာ်ဖှိၣ်ထီၣ်မၤန့ၢ်၀ဲဒီး ဖဲန့ၣ်သုးကီၣ်ကးတကပၤ သံ၀ဲအဂၤ(၁၆၀)ဂၤအဂ့ၢ်န့ၣ် ကရ့ၣ်နံၣ်ဒီကလုာ်ဂၢၤသးသုး(KNDF)ထုးထီၣ်ပာ်ဖျါ၀ဲဖဲတနံၤအံၤ လါဖ့ၤဘြူၤ(၁၆)သီအနံၤန့ၣ်လီၤႉ

ရှါတီ၀့ၢ်တၢ်ဒုးဘျီ၀ဲအံၤအပူၤန့ၣ် ကရ့ၣ်နံၣ်ဒီကလုာ်တၢ်ဒီသဒၢသုး KA KNDF, Loikaw PDF တၢ်ဒီသဒၢကမျၢၢ်သုးကရုၢ်တဖၣ်ပာ်ဖှိၣ်သးလဲၤထီၣ်ဒုး၀ဲဃိၣ်လူၢ်သုးကလၢၤႇဒုးယၤသုးကလၢၤလူၢ်ခံဖျၢၣ်အံၤ တံာ်တာ်လၢတလါဃၣ်ဃၣ်ညါဒီးတၢ်ထီၣ်န့ၢ်သုးကလၢၤအံၤအခါသုးကီၣ်ကးတကပၤဘၣ်သံ၀ဲဒၣ်အါအါဂီၢ်ဂီၢ် ဒ်အံၤလီၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

တၢ်ဒုးအံၤဘျီ၀ဲအံၤအပူၤသုးကီၣ်ကးသံတဖၣ်အကျါပၣ်ဃုာ်၀ဲခီၣ်ချ့သုးရ့ၣ်(ခမရ-၄၂၈)ဒီးခီၣ်သုးရ့ၣ်(ခလရ-၂၄၉)အသုးခိၣ်ဒိၣ်စိႇ သုးခိၣ်ဒိၣ်ဂီၢ်ဂ့ၢ်ႇ သုးခိၣ်ဒိၣ်ဖိႇ၀ံစိာ်တီဆှၢႇအ့ၣ်ကၠံၣ်နံၣ်ယၢၣ်ဃုာ်ဒီးပၢၤကီၢ်ခိၣ်နၢ်သ့ၣ်တဖၣ် အဂ့ၢ်န့ၣ် ပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါကရ့ၣ်နံၣ်တၢ်ပၢၢ်ဆၢသုးပာ်ဖှိၣ်ကရူၢ်မၤန့ၢ်၀ဲသုးကီၣ်ကးအစုက၀ဲၤလၢအမ့ၢ်ကျိဖိ(၁၂၈)ခိၣ်၊ ကျိဖးဒိၣ်(၁၈)ခိၣ်Smoke ကျိ(၃)ခိၣ် Jammer ကျိ(၁)ခိၣ် တၢ်ဆဲးကျိးစဲးတဖၣ်ဃုာ်ဒီးကျိချံၦာ်သၣ်သ့ၣ်တဖၣ်အါမး အဂ့ၢ်န့ၣ် ပာ်ဖျါစ့ၢ်ကီး၀ဲန့ၣ်လီၤႉ

တချုးလၢတၢ်ထီၣ်န့ၢ်သုးကလၢၤသ့ၣ်တဖၣ်အံၤဒံးဘၣ်ဖဲကရ့ၣ်နံၣ်တၢ်ပၢၢ်ဆၢသုးပာ်ဖှိၣ်လဲၤထီၣ်က၀ီၤဃာ်အီၤအခါန့ၣ် ၦၤဟ့ၣ်သုးကီၣ်ကးအတၢ်ခွဲးတၢ်ယာ်အဘျီတဖၣ်အဘျီလၢကပာ်လီၤစုက၀ဲၤပာ်ဖှိၣ်မၤသကိးတၢ်ဒီးကမျၢၢ်ဘၣ်ဆၣ်သုးကီၣ်ကးအံၤတတူၢ်ဃၣ်အသးဘၣ်မ့မ့ၢ်တခီပျၢ်လီၤဆှၢအါထီၣ်၀ဲသုးဂံၢ်ဘါအဂၤ(၇၀)ဘျဲၣ်၊ကဘီယူၤ(၃)ဘ့ၣ် ဟဲခးလီၤစၢၤတၢ်အိၣ်၀ဲ(၂၀၅)ဘျီဒီးလီၢ်ခံကတၢၢ်ဘၣ်ဟ့ၣ်ဃၣ်ကွံာ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လါယနူၤအါရံၤ(၁၅)သီအနံၤန့ၣ် သုးကီၣ်ကးခီၣ်ချ့သုးရ့ၣ်(ခမရ-၄၂၈)ဒီးခီၣ်သုးရ့ၣ်(ခလရ-၂၄၉)သ့ၣ်တဖၣ်အံၤ စးထီၣ်နုာ်လီၤဟံးန့ၢ်အလီၢ်အကျဲလၢ ကရ့ၣ်နံၣ်ကီၢ်စဲၣ် ရှါတီၢ်၀့ၢ်ပူၤဒီး သုးရ့ၣ်အၦၤသ့ၣ်တဖၣ်မၤကီမၤခဲ၀ဲ ၦၤကမျၢၢ်အကလုာ်ကလုာ်အဂ့ၢ်န့ၣ် သ့ၣ်ညါဘၣ်န့ၣ်လီၤ

တကီၢ်ခါခဲအံၤကရ့ၣ်နံၣ်တၢ်ပၢၢ်ဆၢသုးပာ်ဖှိၣ်တဖၣ်လုၢ်ဘၢဒိၣ်စိ၀ဲရှါတီ၀့ၢ်ပူၤတၢ်လီၢ်တၢ်ကျဲသ့ၣ်တဖၣ်န့ၢ်၀ဲလံဒီး ဒ်န့ၣ်အသိးဆီၣ်တခူထီၣ်၀ဲသုးကီၣ်ကးအၦၤတဖၣ်လၢကပာ်လီၤစုက၀ဲၤ၊အိၣ်ဆၢထၢၣ်က့ၤဒ်ကမျၢၢ်အသိးအဂ့ၢ်န့ၣ် KNDF လံာ်ထုးထီၣ်ပာ်ဖျါအပူၤပာ်ဖျါ၀ဲန့ၣ်လီၤႉ