လါဖ့ၤဘြူၤအါရံၤ ၆ သီ, ၂၀၂၅ နံၣ်, ခ့ၣ်အဲးစံၣ်
မဲးပခ့ခံပယီၤသုးကလၢၤလၢအိၣ်ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်အပူၤအံၤ ဖဲတၢ်ထီၣ်န့ၢ် သုးကလၢၤအံၤအခါတၢ်ဖီၣ်န့ၢ်၀ဲပယီၤသုး(၂၉)ဂၤဒီးတၢ်မၤန့ၢ်ဃုၥ်၀ဲကျိဖးဒိၣ်ကျိဖိအခိၣ်(၄၀)ဘျဲၣ်အဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သး ထုးထီၣ်ပၥ်ဖျါ၀ဲဖဲမဟါလါဖ့ၤဘြူၤအါရံၤ ၅ သီအနံၤန့ၣ်လီၤ.
သုးကလၢၤအံၤဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲသုးပၥ်ဖှိၣ်သ့ၣ်တဖၣ်ဒီးစးထီၣ်လဲၤခး၀ဲမဲးပြ့ခံသုး ကလၢၤအံၤဖဲအပူၤကွံၥ်လါယနူၤအါရံၤ ၁ သီ ဒီး ဖဲတလါအံၤလါဖ့ၤဘြူၤအါရံၤထီၣ် ၁ သီ မုၢ်ထူၣ် ၁၁း၄၅ မံးနံးအဆၢကတီၢ် လၢတလါအတီၢ်ပူၤ တၢ်မၤန့ကွံၥ်၀ဲ သုးကလၢၤအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးလၢတၢ်ဒုးဘျီ၀ဲအံၤအပူၤန့ၣ် ဒုၣ်ဒါသံ(၂၉)ဂၤဒီး တၢ်ဖီၣ်သမူန့ၢ်၀ဲ(၂၉)ဂၤအကျါပၣ်ဃုၥ်၀ဲ သုးခိၣ်စိတဂၤ,သုးဒ့ ပၢၤသုးပီလီ သုးစကီၤတဂၤ, သုးစကီၤ(၄)ဂၤ, သုးစကီၤဖိ(၅)ဂၤ, သုးစကီၤပြံ(၄)ဂၤဒီး သုးဖိ(၁၄)ဂၤ အဂ့ၢ်န့ၣ် ခ့ၣ်အဲၣ်ယူၣ် လံၥ်တၢ်ပၥ်ဖျါအပူၤ စံး၀ဲန့ၣ်လီၤ.
တကးဒံးဘၣ်လၢန့ၣ်အမဲၥ်ညါတၢ်ပၢၢ်ဆၢသုးပၥ်ဖှိၣ်ကရူၢ် မၤန့ၢ်၀ဲ(howitzer)ဃုၥ်ဒီးကျိဖးဒိၣ်,ကျိဖိ(၄၂)ခိၣ်, ကျိဖးဒိၣ်အချံ(၁၃၃)ဖျၢၣ်, ကျိဖိအချံ(၁၇၂၆၄)ဖျၢၣ်ဒီး တၢ်မၤန့ၢ်ဃုၥ်၀ဲသုးတၢ်ဖိတၢ်လံၤပီးလီသ့ၣ်တဖၣ်အါမးအဂ့ၢ်န့ၣ် ပၥ်ဖျါ၀ဲန့ၣ်လီၤ.
ဒ်န့ၣ်အသိးမဲပြ့ခံသုးကလၢၤတၢ်ဒုးအပူၤ မ့မ့ၢ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်တကပၤန့ၣ် ဘၣ်ဟ့ၣ်လီၤကွံၥ်အသး သမူ (၃)ဂၤဒီး ဘၣ်ဒိဘၣ်ထံး၀ဲ(၃၃)ဂၤ အဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤ.
တကတီၢ်ဃီစးထီၣ်ဖဲတၢ်စးထီၣ်လဲၤခးသုးကလၢၤဒီတကတီၢ်အပူၤန့ၣ် ပယီၤသုးကဘီယူၤ(Jet Fighter) လဲၤတ့ၢ်မ့ၣ်ပိၢ်(၃၃)ဘျီ, ကဘီယူၤ(Y-12 Drock Bowm) လဲၤခးလီၤတၢ်တဘျီ, ခီၣ်ချ့သုးရ့ၣ်(ခမရ-၃) ခးလီၤစၢၤ၀ဲ(၁၅၅ မမ)ကျိဖးဒိၣ်(၃)ဘျီ တကးဒံးဘၣ် ကဘီယူၤ (Y-12) လဲၤတ့ၢ်လီၤ၀ဲကျိချံပှၥ်သၣ်,သုးတၢ်ဖိတၢ်လံၤ(၁၂)ဘျီလၢသုးကလၢၤအံၤအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါ၀ဲန့ၣ်လီၤ.
လၢတၢ်န့ၣ်အဃိစးထီၣ်ဖဲန့ၣ်သုးကလၢၤအံၤအခိၣ်အဃၢၤ မဲးပြ့ခံကရူၢ် သ၀ီ(၈)ဖျၢၣ်, အံစူၢ်ခံကရူၢ် သ၀ီ(၄)ဖျၢၣ်, ပံၣ်တံၣ်ကရူၢ် သ၀ီ(၄)ဖျၢၣ်, စွ့ၣ်လီအ့ကရူၢ် သ၀ီ(၄)ဖျၢၣ် သ၀ီပၥ်ဖှိၣ်ခဲလၢၥ်(၂၀)ဖျၢၣ်,ဟံၣ်ဒူၣ်(၈၀၄)ဒူၣ်,ပှၤနီၣ်ဂံၢ်(၃၉၈၆)ဂၤ ဘၣ်ဃ့ၢ်ထီၣ်ဟးစံၣ် အိၣ်လၢပှၤဒူပှၤသ၀ီအဖၢမုၢ်တုၤလၢခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
