(စယၣ်ကၠံ)၀့ၢ်ပူၤတၢ်ဒုးကဲထီၣ်ကဘီယူၤဟဲခးလီၤတၢ်အဃိ လီၢ်က၀ီၤကမျၢၢ်ဘၣ်ဃ့ၢ်ထီၣ်

လါဖ့ၤဘြူၤအါရံၤ ၈ သီႇ ၂၀၂၄ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် တီအူကီၢ်ရ့ၣ် ထီတထူၣ်ကီၢ်ဆၣ်(စယၣ်ကၠံ)၀့ၢ်ပူၤ ဖဲမဟါလါယနူၤအါရံၤ(၇)သီဂီၤခီအဆၢကတီၢ် န့ၣ်တၢ်ဒုးကဲထီၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးအဘၢၣ်စၢၤဒီး ဖဲန့ၣ်ခီဖျိပယီၤသုးကဘီယူၤဟဲခးလီၤတၢ်အဃိ လီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲလါယနူၤအါရံၤ ၇ သီ ဂီၤခီအဆၢကတီၢ်န့ၣ် တၢ်ပၢၢ်ဆၢသုးပာ်ဖှိၣ်နုာ်လီၤထီၣ်မၤန့ၢ်၀ဲ ပယီၤသုး သုးကလၢၤႇ ပၢၤကီၢ်၀ဲၤလီၢ်ဃုာ်ဒီးခီၣ်သုးရ့ၣ်(ခလရ-၇၃)သုးရ့ၣ်သ့ၣ်တဖၣ်အံၤဒီးဖဲန့ၣ်တၢ်ဒုးကဲထီၣ်၀ဲဒၣ်ဒိၣ်ဒိၣ်မုၢ်မုၢ်လၢခံခီခံကပၤအဘၢၣ်စၢၤဒီးခီဖျိပယီၤသုးခးလီၤကျိဖးဒိၣ်ႇ ကဘီယူၤစ့ၢ်ကီးဟဲခးလီၤတၢ်အဃိ လီၢ်က၀ီၤၦၤကမျၢၢ် ဘၣ်ဃ့ၢ်ထီၣ်၀ဲဒၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ

လီၢ်က၀ီၤကမျၢၢ်ပိာ်မုၣ်လၢအဃ့ၢ်ထီၣ်တဂၤစံး၀ဲလၢ “ပကဘၣ်ဟးပူၤဖျဲးအသးဒ်လဲၣ်ႇ ပကဘၣ်အိၣ်ဘၣ်ကၠါလဲၣ်ႇ ပကဘၣ်အိၣ်၀ဲဒၣ်ဒ်လဲၣ်ဒီးပကဘၣ်အိၣ်ဒံးတသီဧါတနွံဧါန့ၣ်ပတဲတဘၣ်လၢၤဘၣ်ႉ ဘၣ်ဆၣ်မ့ၢ်လၢပအိၣ်တသ့ပအိၣ်တဘၣ်အဃိပဟဲအိၣ်လၢၦၤကရၢၢ်ပူၤၦၤဟံၣ်ပူၤမီၤနီၤႉ ပဃ့ၢ်တနံၤညါအံၤလီၤမီၤနီၤႉၦၤဟးထီၣ်ကိးဂၤဒဲးလီၤႉ ၦၤတအိၣ်လၢသ၀ီအပူၤဟံၣ်ပူၤဃီပူၤနီတဂၤလၢၤဘၣ်ႉ ပတၢ်တပၣ်နီမံၤဘၣ်တၢ်ကူတၢ်ကၤခီဒၢးတၢ်မနုၤမးတပၣ်ဘၣ်ႉ နီၢ်ကစၢ်မ့ၢ်ပူၤန့ၣ်ဘၣ်လံမီၤႉ တၢ်ဖိတၢ်လံၤတၢ်အီၣ်တၢ်အီတသ့ၣ်နီၣ်လၢၤဘၣ်ပစံၣ်ထီၣ်ဒ်န့ၣ်လီၤမီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တကးဒံးဘၣ်ဒူသ၀ီလၢအိၣ်(စယၣ်ကၠံ)၀့ၢ်ခိၣ်၀့ၢ်ဃၢၤတဖၣ်ဒ်အမ့ၢ်(အ့ၤကၠ့သါ)(ဆွ့ၤတစီ)(အ့နွ့ၤကိ)ဒီး(အ့ၤကၠီ) သ၀ီၦၤကမျၢၢ်သ့ၣ်တဖၣ်စ့ၢ်ကီးဃ့ၢ်ထီၣ်၀ဲဒီးလဲၤစံၣ်ထီၣ်၀ဲလၢတီအူတကပၤအိၣ်၀ဲအသိး တနီၤန့ၣ်လဲၤဃ့ၢ်အိၣ်လၢ ဒူသ၀ီတၢ်လီၢ်လၢအဂၤစ့ၢ်ကီးအိၣ်၀ဲအဂ့ၢ်န့ၣ် လီၢ်က၀ီၤကမျၢၢ်လၢအဃ့ၢ်ထီၣ်တဖၣ်စံး၀ဲန့ၣ်လီၤႉ

(အ့ၤကၠီ)သ၀ီဖိလၢအဘၣ်ဃ့ၢ်ထီၣ်တဂၤစ့ၢ်ကီးစံး၀ဲလၢ “ပအိၣ်လၢ(အ့ၤကၠီ)ပဟဲစံၣ်အိၣ်လၢ(ပၠံၤကါ)ဖဲအံၤမီၤနီၤ ၦၤ ဃ့ၢ်ထီၣ်လၢလံ ၦၤလၢအဂၤန့ၣ်လဲၤဃ့ၢ်အိၣ်လၢတၢ်လီၢ်အဂၤအိၣ်၀ဲလီၤႉ လၢသ၀ီပူၤန့ၣ်ၦၤတအိၣ်နီၤတဂၤလၢဘၣ် ဒီးၦၤတဲလၢပယီၤသုးဟဲနုာ်လီၤလံမီၤနီၤ ၦၤဟဲခးတၢ်အဃိပဃ့ၢ်ထီၣ်၀ဲမီၤနီၤလီၤႉ လၢမဟါအနံၤန့ၣ်ပဃ့ၢ်ဒီနံၤဒီနၤလီၤ ပဟဲဃ့ၢ်တုၤဖဲအံၤန့ၣ်န့ၢ်မဟါအနံၤသၢနၣ်ရံၣ်ဖဲန့ၣ်မီၤနီၤႉ ပအိၣ်ဖဲအံၤန့ၣ်ဟံၣ်ဒူၣ်ခဲလၢာ်အိၣ်၀ဲလွံၢ်ဒူၣ်မီၤနီၤႉ ပအိၣ်ဖဲအံၤန့ၣ်တစ့ၣ်ခၠၣ်အါအါဘၣ်ႉ ဖဲပဃ့ၢ်န့ၣ်ပဃ့ၢ်ပိာ်ၦၤခံဒ်န့ၣ်လီၤႇ လဲၤထီၣ်တုၤလၢတီအူန့ၣ်သ့ၣ်ညါၦၤဒီးတအိၣ်ႇ ၦၤဟးဒီးဟးပိာ်ၦၤခံဒ်န့ၣ်လီၤမီၤနီၤႉ တၢ်မနုၤမးတပၣ်ဘၣ်ႇ ဟးစံၣ်ၦၤကညီဒ်အံၤန့ၣ်လီၤ” အဂ့ၢ်န့ၣ်စံး၀ဲန့ၣ်လီၤႉ

(အ့ၤကၠီ)သ၀ီအံၤဟံၣ်ခိၣ်ခဲလၢာ်အိၣ်၀ဲ(၂၀၀)ဘျဲၣ်ဒီးတကီၢ်ခါခဲအံၤခီဖျိတၢ်ဒုးတၢ်ယၤကဲထီၣ်ႇ ကဘီယူၤဟဲခးလီၤတၢ်အဃိန့ၣ်သ၀ီဒီတဖျၢၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် အ့ကၠီသ၀ီဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ

ဒ်န့ၣ်အသိးဖဲတလါအံၤလါဖ့ၤဘြူၤအါရံၤထီၣ်အခါန့ၣ်စ့ၢ်ကီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ထီၣ်မၤန့ၢ်ဒံး၀ဲတီအူကီၢ်ရ့ၣ်(လ့ၣ်သိၤ)ဟီၣ်က၀ီၤ (မဲၤလိၤ)ပယီၤသုးကလၢၤတဖျၢၣ်ဒံးဒီး ဒ်န့ၣ်အသိးနုာ်လီၤခးစ့ၢ်ကီး၀ဲ ပၢၤကီၢ်၀ဲၤလီၢ်ဒီးခီၣ်ချ့သုးရ့ၣ်(ခမရ-၆၀၃)သ့ၣ်တဖၣ်အံၤအဂ့ၢ်န့ၣ် ဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိ စံး၀ဲအသိးသ့ၣ်ညါဘၣ်န့ၣ်လီၤႉ