ဒီၣ်ဖးခိၣ်ကလံၤစိး(ကၤလၣ်)သ၀ီပူၤပယီၤသုးဒွဲၣ်အူအီၣ်ကမျၢၢ်ဟံၣ်(၅၇)ဖျၢၣ်ဒီးကမျၢၢ်သံခံဂၤ

လါဖ့ၤဘြူၤအါရံၤ ၁၃ သီႇ ၂၀၂၄ နံၣ်ႇ ခ့ၣ်အဲးစံၣ်

လၢပကိကီၢ်ခီဒိၣ်မုၢ်ထီၣ် တီအူကီၢ်ရ့ၣ် ဒီၣ်ဖးခိၣ်ကီၢ်ဆၣ်ကလံၤစိး ကလၣ်သ၀ီဒီးကၠါကၢသ၀ီအပူၤ တၢ်ဒုးကဲထီၣ်လၢခံခီခံကပၤအဘၢၣ်စၢၤ၀ံၤလီၢ်ခံဖဲလါဖ့ၤဘြူၤအါရံၤ(၁၀)သီအနံၤန့ၣ်ပယီၤသုးနုာ်လီၤဒွဲၣ်အူအီၣ်၀ဲ (ကၢလၣ်)သ၀ီပူၤၦၤကမျၢၢ်အဟံၣ်(၅၇)ဖျၢၣ်ဒီးကမျၢၢ်သံ၀ဲဒၣ်(၂)ဂၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

ဖဲလါဖ့ၤဘြူၤအါရံၤ(၈)သီတုၤလၢ(၁၀)သီဟါခီအဆၢကတီၢ်န့ၣ် တၢ်ခးလိာ်သးကဲထီၣ်၀ဲလၢကညီဒီကလုာ် တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးကီၣ်ကးအဘၢၣ်စၢၤအံၤ၀ံၤလီၢ်ခံပယီၤမၤအါထီၣ်ဂံၢ်ဘါဒီးနုာ်လီၤ၀ဲလၢ (ကၤလၣ်)သ၀ီပူၤ၀ံၤဒွဲၣ်အူကွံာ်၀ဲကမျၢၢ်ဟံၣ်ဃီဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ

လီၢ်က၀ီၤကမျၢၢ်တဂၤစံး၀ဲလၢ“တၢ်ခးလိာ်သးန့ၣ်၀ံၤ၀ဲဖဲဟါခီတၢ်ခံးလီၤန့ၣ်ပယီၤသုး(စ့ၣ်ကူၤ)ဟဲတုၤ၀ဲလီၤႉ အ၀ဲသ့ၣ်ဟးလူၤပာ်ဖှိၣ်က့ၤအၦၤလၢဘၣ်ဒိတဖၣ်န့ၣ်ဒီးနုာ်လီၤဒွဲၣ်အူအီၣ်ၦၤဟံၣ်လၢသ၀ီပူၤလီၤႉ သ၀ီအပူၤဟံၣ်အိၣ်၀ဲ(၉၀)ဘျဲၣ်န့ၣ်ဒွဲၣ်အူ၀ဲခဲလၢာ်ႉဟံၣ်လၢအဟးဂီၤလီၤကရဲခဲလၢာ်န့ၣ်အိၣ်၀ဲ(၅၇)ဖျၢၣ်၊တနီၤန့ၣ်အူအီၣ်တစဲးတမွဲၤလီၤႉ လၢအတအူအီၣ်ညါန့ၣ်တအူအီၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

ခီဖျိတၢ်ဒုးကဲထီၣ်သတူၢ်ကလာ်လၢကညီဒီကလုာ်တၢ်ပၢၢ်ဆၢသုးပာ်ဖှိၣ်ဒီးပယီၤသုးကျိၤလၢဟဲနုာ်လီၤသ့ၣ်တဖၣ်အံၤအဘၢၣ်စၢၤအဃိကမျၢၢ်လၢအိၣ်သ၀ီပူၤတဖၣ်ဃ့ၢ်ထီၣ်၀ဲဒီးဒ်န့ၣ်အသိးဖံသးၦၢ်လၢအိၣ်တ့ၢ်ဟံၣ်ပူၤတဂၤပၣ်ဃုာ်၀ဲလၢမ့ၣ်အူကျါအဃိသံ၀ဲဒၣ်န့ၣ်လီၤႉလၢန့ၣ်အမဲာ်ညါတၢ်တနံၤဃီ၀ဲန့ၣ်ပယီၤသုးက့ၤကိး၀ဲတၢ်ၦၤသ၀ီဖိပိာ်ခွါတဂၤလၢကဒုးနဲၣ်ပၠးကျဲအဂီၢ်ဒီးအ၀ဲစ့ၢ်ကီးဖဲတၢ်ဒုးကဲထီၣ်အကတီၢ်သံ၀ဲလၢတၢ်ဒုးအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ် စံးအါထီၣ်၀ဲဒၣ်န့ၣ်လီၤႉ

အ၀ဲစံး၀ဲလၢ“တၢ်ခးလိာ်သးကဲထီၣ်သတူၢ်ကလာ်အဃိၦၤသ၀ီဖိဘၣ်ဃ့ၢ်ထီၣ်၀ဲတဘျီဃီလီၤႉ ဖံလၢအပၣ်ဃုာ်လၢမ့ၣ်အူကျါတဂၤန့ၣ်အဘၣ်ကလံၤမီၤႉအဟံၣ်ဖိဃီဖိခီန့ၣ်ဆိကမိၣ်၀ဲလၢပယီၤသုးတဒွဲၣ်အူအီၣ်ဟံၣ်ဘၣ်အဃိ ပံာ်ဃာ်၀ဲဟံၣ်ဒီးပာ်တ့ၢ်ကွံာ်၀ဲဟံၣ်ပူၤဒ်န့ၣ်အဃိပၣ်ဃုာ်၀ဲလၢမ့ၣ်အူကျါလီၤ”အဂ့ၢ်န့ၣ် စံး၀ဲန့ၣ်လီၤႉ

ပယီၤသုးဒွဲၣ်အူအီၣ်ၦၤကမျၢၢ်အဟံၣ်အဃီဘျီ၀ဲအံၤအပူၤန့ၣ်ၦၤကမျၢၢ်တၢ်ဘၣ်ဒိဘၣ်ထံးတအိၣ်ဘၣ်ဘၣ်ဆၣ်ခီဖျိလၢတၢ်ဒုးကဲထီၣ်အဃိတုၤလၢခဲအံၤၦၤကမျၢၢ်တဖၣ်ဘၣ်လဲၤစံၣ်အိၣ်လၢ၀့ၢ်ပူၤဒီးသ၀ီလၢအဂၤအဂ့ၢ်န့ၣ် လီၢ်က၀ီၤကမျၢၢ်စံး၀ဲဒၣ်န့ၣ်လီၤႉ

ဖဲပူၤကွံာ်လါဖ့ၤဘြူၤအါရံၤအခါန့ၣ်ခီဖျိပယီၤသုးအံၤလိာ်ဘၢလိာ်ကွီၢ်၀ဲတီအူကီၢ်ရ့ၣ် ယ့တၤစှ့ၤကီၢ်ဆၣ်ဒီးထီတထူၣ်ကီၢ်ဆၣ်ပူၤ(ကယါပၠိခၠီ)(ဆါပၠိခၠီ)(မယိခိၤ)(သဖၢစ့ၤ)သ၀ီဖိသ့ၣ်တဖၣ်အံၤလၢအတၢ်ဘၣ်ဘျးစဲလိာ်သးအိၣ်ဒီးတၢ်ပၢၢ်ဆၢသုးကရူၢ်အဃိဒွဲၣ်အူအီၣ်ကွံာ်၀ဲၦၤကမျၢၢ်အဟံၣ်တစှၤန့ၢ်(၁၀၀)ဖျၢၣ်န့ၣ်လီၤႉ