လါဖ့ၤဘြူၤအါရံၤ ၂၈ သီႇ ၂၀၂၄ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ဖၣ်အၣ်၀့ၢ်ပူၤ ၦၤကမျၢၢ်လၢအိၣ်ခီပတာ်က၀ီၤဒ့သ့ၣ်တဖၣ်အံၤ ဘၣ်လဲၤဒုးသ့ၣ်ညါ၀ဲတမှံၤစရီတလါတဘျီအဂ့ၢ်န့ၣ် ကမျၢၢ်အိၣ်၀့ၢ်ပူၤတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ
ဖၣ်အၣ်၀့ၢ်ပူၤစးထီၣ်ဖဲပူၤကွံာ်စှၤလါအခါန့ၣ်ၦၤလၢအိၣ်ဟဲလၢတၢ်လီၢ်လၢအဂၤတကးဒံးဘၣ်ဃုာ်ဒီးၦၤအိၣ်လၢ၀့ၢ်ပူၤတဖၣ်အံၤစ့ၢ်ကီးမ့အိၣ်ဆိးခီပတာ်၀ဲက၀ီၤဒ့လၢအဂၤ မ့မံတ့ၢ်န့ၣ်ဘၣ်ဒုးသ့ၣ်ညါ၀ဲတမှံၤစရီလၢက၀ီၤဒ့ခိၣ်နၢ် ၦၤဘၣ်မူဘၣ်ဒါတဖၣ်အဂ့ၢ်န့ၣ် ၀့ၢ်ပူၤကမျၢၢ်တဂၤ စံး၀ဲန့ၣ်လီၤႉ
အ၀ဲစံး၀ဲလၢ“အပူၤကွံာ်န့ၣ်ဘၣ်လဲၤဒုးသ့ၣ်ညါအ၀ဲသ့ၣ်တနွံတဘျီႉအခဲအံၤန့ၣ်ဘၣ်လဲၤဒုးသ့ၣ်ညါက့ၤတလါတဘျီလီၤႉအ၀ဲသ့ၣ်ဟဲသမံသမိးတၢ်အခါမ့ၢ်ထံၣ်၀ဲလၢၦၤမ့တလဲၤဒုးသ့ၣ်ညါ၀ဲဘၣ်န့ၣ်အ၀ဲသ့ၣ်ဟံဃာ်ကွံာ်န(မၣ်ပိၤတ့ၤ)တၢ်ဂီၤႉမ့၀ံၤန့ၣ်မၢနလဲၤတီၣ်ထီၣ်က့ၤတမှံၤစရီလၢရူမီၤနီၤႉၦၤတနီၤန့ၣ်တမၤဖးဘၣ်ဟံၣ်ခိၣ်စရီဒံးဘၣ်အမံၤန့ၣ်အိၣ်ဒံးလၢအမိအပါဟံၣ်ခိၣ်စရီပူၤဒံးလီၤႉအဃိန့ၣ်မ့တဘၣ်သးတီၣ်ထီၣ်တမှံၤစရီဘၣ်န့ၣ်အ၀ဲသ့ၣ်မၢဆီတလဲၤက့ၤ ဟံၣ်ခိၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါတနီၤန့ၣ်ၦၤလဲၤဒုးသ့ၣ်ညါတမှံၤစရီတလါတဘျီအိၣ်၀ဲဒီးဒ်န့ၣ်အသိးၦၤလၢအအိၣ်ခီပတာ်က၀ီၤဒ့ သ့ၣ်တဖၣ်ဘၣ်လဲၤဒုးသ့ၣ်ညါတမှံၤစရီလၢတနွံတဘျီစ့ၢ်ကီးအိၣ်၀ဲအဂ့ၢ်န့ၣ် လီၢ်က၀ီၤ၀့ၢ်ကမျၢၢ်လၢအဂၤတဂၤစ့ၢ်ကီး စံး၀ဲဒ်အံၤန့ၣ်လီၤႉ
“က၀ီၤဒ့တဒ်သိးဘၣ်အဃိဟံၣ်တဆံဖျၢၣ်အခိၣ်ႇ ဟံၣ်တကယၤဖျၢၣ်အခိၣ်န့ၣ် လီၤဆီ၀ဲမီၤနီၤႉ တနီၤန့ၣ်ဘၣ်လဲၤတၢၣ်ဒုးသ့ၣ်ညါ၀ဲကိးနွံဒဲးအဃိတဘၣ်ဂီၢ်အါအါလၢဘၣ်ႉ တၢ်အံၤကဲထီၣ်ဒ်သိးတၢ်မၤတခါအဃိဘၣ်ထိၣ်ဃူက့ၤဒီးက၀ီၤဒ့ ၦၤဘၣ်မူဘၣ်ဒါ၀ံၤလဲၤဒုးသ့ၣ်ညါက့ၤအ၀ဲသ့ၣ်တလါတဘျီဒ်န့ၣ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ် န့ၣ်လီၤႉ
ဖဲတၢ်လဲၤဒုးသ့ၣ်ညါတမှံၤစရီအခါန့ၣ်လၢတၢ်သးအိၣ်ဖီခိၣ်ဘၣ်ဟ့ၣ်၀ဲစ့(၁၀၀၀)ကၠးတုၤလၢ(၅၀၀၀)ကၠးဖီခိၣ် အိၣ်၀ဲဒၣ်အဂ့ၢ်န့ၣ် သ့ၣ်ညါဘၣ်လၢၦၤလၢအလဲၤဒုးသ့ၣ်ညါဟံၣ်ခိၣ်စရီတဂၤအအိၣ်န့ၣ်လီၤႉ
ဒ်န့ၣ်အသိးကမျၢၢ်ၦၤဃ့ၢ်မှံဟးဖျိးလၢအိၣ်ကီးတရံးႇ ဖၣ်ပူၤဟီၣ်က၀ီၤလၢအဟဲစံၣ်အိၣ်ဖဲဖၣ်အၣ်၀့ၢ်ပူၤသ့ၣ်တဖၣ်အံၤစ့ၢ်ကီး ဘၣ်လဲၤဒုးသ့ၣ်ညါ၀ဲဒၣ်တမှံၤစရီလၢအမ့ၢ်ၦၤဃ့ၢ်မှံဟးဖျိးအဂ့ၢ်န့ၣ် ၀့ၢ်ပူၤကမျၢၢ်တဖၣ်စံး၀ဲန့ၣ်လီၤႉ
