တၢ်ဒုးဆူၣ်ထီၣ်လၢမၠၣ်၀တံၣ်၀့ၢ်ပူၤ ၦၤကမျၢၢ်ဃ့ၢ်ထီၣ်သုးလီၢ်သုးကျဲအါထီၣ်ရုၢ်ရုၢ်

လါအ့ဖြ့ၣ် ၁၀ သီ, ၂၀၂၄ နံၣ်, ခ့ၣ်အဲးစံၣ်

စးထီၣ်ဖဲမဟါလါအ့ဖြ့ၣ် ၉ သီ ဟါခီအဆၢကတီၢ်န့ၣ် လၢကညီကီၢ်စဲၣ် ကီးတရံးကီၢ်ဆၣ် မၠၣ်၀တံၣ်၀့ၢ်ပူၤ တၢ်ဒုးဆူၣ်ထီၣ်၀ဲဒၣ်လၢတၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤဒိၣ်ဒိၣ်မုၢ်မုၢ်အဃိ တကီၢ်ခါခဲအံၤၦၤကမျၢၢ်တဖၣ် သုးလီၢ်ကျဲဟးစံၣ်အိၣ်လၢတၢ်လီၢ်ပူၤဖျဲးအလီၢ်ဟဲအါထီၣ်၀ဲဒၣ်ရုၢ်ရုၢ်အဂ့ၢ်န့ၣ် ၀့ၢ်ပူၤကမျၢၢ်တဖၣ်စံး၀ဲန့ၣ်လီၤႉ

ဖဲမဟါဟါခီအဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇ(PDF)သုးပာ်ဖှိၣ်နုာ်လီၤခး၀ဲဒၣ် မၠၣ်၀တံၣ် ပယီၤသုးခီၣ်သုးရ့ၣ်(ခလရ-၂၇၅)တၢ်လီၢ်ဒီးဖဲန့ၣ်ခီဖျိသုးမီၤစိရိၤအကဘီယူၤဟဲက့ၤခးလီၤတၢ်လၢ (၂၇၅)တၢ်လီၢ်အခိၣ်အဃၢၤ၀း၀းတရံးဒီတနၤကျၢၤတုၤလၢမုၢ်ဆ့ၣ်ထီၣ်ခဲအံၤတစုအဃိၦၤကမျၢၢ်လၢအိၣ်၀့ၢ်တဖၣ် သုးလီၢ်သုးကျဲအါထီၣ်၀ဲဒၣ်ကွ့ၢ်ကွ့ၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဘၣ်ဃးတၢ်ကဲထီၣ်သးလၢမၠၣ်၀တံၣ်၀့ၢ်ပူၤဂ့ၢ်အံၤန့ၣ် ၦၤကမျၢၢ်လၢအိၣ်ဖဲန့ၣ်တဂၤ စံး၀ဲလၢ “ခဲအံၤကဘီယူၤ ဟဲခးလီၤ တၢ်၀း၀းလီၤတဲမးတဘၣ်လၢၤဘၣ်ႉစးထီၣ်လၢဖဲမဟါမုၢ်ဃ့ၢ်လီၤ၀ံၤန့ၣ်တကတၢၢ်နီတထံၣ်လၢၤဘၣ်ခးလီၤ ဒီတနၤကျၢၤ လီၤႉခဲအံၤအ၀ဲသ့ၣ်ဒြိဒီးကဘီယူၤသီၣ်လဲးကူၣ်လီၤႉကွံာ်လီၤလဲးလိးတးတးဖိတဖျၢၣ်ခံဖျၢၣ်တးတးဖိတဖျၢၣ်ခံဖျၢၣ်ကၠုးလီၤလဲးလိးလီၤႉလၢတံအိၣ်အံၤဒုၦၤစံၣ်လၢာ်ကၠီပျီအိၣ်တ့ၢ်က့ၤဟံၣ်တဖျၢၣ်ပိာ်ခွါတဂၤဒ်န့ၣ်လီၤႉလဲၤထီၣ်စံၣ်လၢမဲၢ်ဆီးတနီၤႇက့ၤလီၤစံၣ်ကဒါလၢလာ်တနီၤႉတဂီၤညါအံၤၦၤစံၣ်အါဒိၣ်ထီၣ်ကတၢၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် ဖဲတနံၤအံၤ န့ၣ်လီၤႉ

လၢန့ၣ်အမဲာ်ညါတကီၢ်ခါခဲအံၤခီဖျိတၢ်ဒုးတၢ်ယၤဆူၣ်ထီၣ်ႇပယီၤကဘီယူၤဟဲခးလီၤတၢ်တပယူာ်ဃီအဃိ ၦၤကမျၢၢ်လၢအိၣ်မၠၣ်၀တံၣ်ပူၤတဖၣ်ပျံၤတၢ်ဖုးတၢ်စံၣ်ထီၣ်ကအိၣ်လၢသၢပူခံပူလံဒီးဒ်န့ၣ်အသိး(ခလရ-၂၇၅)လၢ တၢ်ပၢၢ်ဆၢသုးကရူၢ်လဲၤခး၀ဲအံၤန့ၣ်တၢ်တမၤန့ၢ်၀ဲဒံးဘၣ်အဂ့ၢ်န့ၣ် ကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ် လီၤႉ

မၠၣ်၀တံၣ်၀့ၢ်ပူၤဖဲမဟါန့ၣ်ခီဖျိတၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤဒီးခီဖျိပယီၤသုးခးလီၤကျိဖးဒိၣ်ႇ ခးလီၤဒြိႇကဘီယူၤစ့ၢ်ကီးဟဲခးလီၤတၢ်အဃိမ့ၣ်အူအီၣ်တၢ်ခုၣ်ထီၣ်ကဲထီၣ်သးလၢက၀ီၤဒ့တၢ်လီၢ်အါတီၤအပူၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်န့ၣ်အသိးဖဲမဟါလါအ့ဖြ့ၣ် ၉ သီအနံၤန့ၣ် တၢ်ဂီၤမူရၤလီၤသးလၢ(စိၣ်ရှၢၣ်မံၣ်ဒံၣ်ယၢၣ်)အပူၤတခါလၢ (KNLA)သုးပာ်ဖှိၣ်ဟးဆှၣ်တၢ်ဒီးသိလ့ၣ်အါမးလၢမၠၣ်၀တံၣ်၀့ၢ်ပူၤအိၣ်၀ဲဒီးဘၣ်ဆၣ်သိလ့ၣ်လၢဟးဆှၣ်တၢ်အံၤ ၦၤကမျၢၢ်တနီၤစံး၀ဲလၢမ့ၢ်၀ဲဒၣ်(KNA)အသုးသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

တကီၢ်ခါခဲအံၤစးထီၣ်ဖဲမဟါတုၤလၢတဂီၤအံၤလါအ့ဖြ့ၣ် ၁၀ သီ မုၢ်ထူၣ်တစုန့ၣ် လၢမၠၣ်တ၀ံၣ်၀့ၢ်ပူၤ ကျိဖးဒိၣ်အကလုၢ်သီၣ်ဒံး၀ဲတပယူာ်ဃီဒီး ဒ်န့ၣ်အသိးလၢနီၣ်ဂံၢ်(၁)တိၤ ၀ၢ်ခီယိၤကီၢ်မဲၢ်ဆီး၀့ၢ် သူမှဲကျိကီၢ်ဆၢ တကပၤန့ၣ်စ့ၢ်ကီး ကၠီၣ်တဲၣ်သုးဆီလီၤအသုးဂံၢ်ဘါအိၣ်ခိး၀ဲတၢ်ဘံၣ်တၢ်ဘၢအါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ် န့ၣ်လီၤႉ