သုးမီၤစိရိၤကဘီယူၤတ့ၢ်လီၤမ့ၣ်ပိၢ်အဃိ ရီဘၢၣ်ကျီးၦၤမၤတၢ်ဖိဘၣ်ဒိ(၂)ဂၤ

လါယနူၤအါရံၤ ၅ သီႇ ၂၀၂၃ နံၣ်ႇ ခ့ၣ်အဲးစံၣ်

ဖဲမဟါလါယနူၤအါရံၤ ၄ သီဂီၤခီ ၁၁ နၣ်ရံၣ်အဆၢကတီၢ်န့ၣ် ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢကၠၤအ့စ့ၣ်ကၠံ၀့ၢ်ကပၤ(ရီဘၢၣ်ကျီး)တဘ့ၣ်ပူၤအဃိ ရီဘၢၣ်ကျီးၦၤမၤတၢ်ဖိဘၣ်ဒိ၀ဲ(၂)ဂၤအဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ

လၢကၠၤအ့စ့ၣ်ကၠံ၀့ၢ်ခိၣ်၀့ၢ်ဃၢၤန့ၣ်တၢ်ဒုးကဲထီၣ်၀ဲလၢတၢ်ပၢၢ်ဆၢသုးကရူၢ်သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤအဃိသုးမီၤစိရိၤကဘီယူၤဟဲက့ၤတ့ၢ်လီၤမ့ၣ်ပိၢ်လၢတၢ်ဒုးကဲထီၣ်အလီၢ်အဘျီတဖၣ်အဘျီန့ၣ်လီၤႉ

ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အဃိရီဘၢၣ်ကျီးၦၤမၤတၢ်ဖိပိာ်မုၣ်(၂၂)နံၣ်တဂၤဒီး ဖံသးၦၢ်(၆၀)နံၣ်တဂၤဘၣ်ဒိ၀ဲအဂ့ၢ်န့ၣ်လီၢ်က၀ီၤကမျၢၢ်လၢအိၣ်ဘူးဖဲန့ၣ်တဂၤပာ်ဂၢၢ်ပာ်ကျၢၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

အ၀ဲစံး၀ဲလၢ“အဘၣ်ဖဲ ၁၁ နၣ်ရံၣ်အခါန့ၣ်ႉဖံသးၦၢ်အနံၣ်(၆၀)တဂၤန့ၣ်ဘၣ်၀ဲဒၣ်အခံကိၢ်ႉ မ့မ့ၢ်လၢဖိသၣ်မုၣ်(၂၂)နံၣ်တဂၤခီန့ၣ်ဘၣ်၀ဲဒၣ်အမဲာ်သၣ်မီၤနီၤႉဖဲမုကၢၤအုန့ၣ်သိလ့ၣ်တီၣ်ၦၤဆါဟဲကိးအ၀ဲသ့ၣ်လံႉတၢ်ဘၣ်ယိၣ်ဒုတအိၣ်ဘၣ်ႉခဲအံၤကဘီယူၤဟဲခးလီၤတၢ်အဃိပစံၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်လါယနူၤအါရံၤ ၄ သီအနံၤန့ၣ်လီၤႉ

လၢန့ၣ်အမဲာ်ညါပယီၤသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢကၠၤအ့စ့ၣ်ကၠံ၀့ၢ်ခိၣ်၀့ၢ်ဃၢၤဒူသ၀ီတဖၣ်ပူၤအဃိလီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲစ့ၢ်ကီးအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့်ၣလီၤႉ

စးထီၣ်ဖဲအပူၤကွံာ်လါဒံၣ်စ့ဘၢၣ် ၃၁ သီတုၤလၢခဲအံၤတစုန့ၣ်လၢကၠၤအ့စ့ၣ်ကၠံကီၢ်ဆၣ်အပူၤ တၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်လၢပယီၤသုးဒီးဟီၣ်က၀ီၤတၢ်ပၢၢ်ဆၢသုးပာ်ဖှိၣ်အဘၢၣ်စၢၤန့ၣ်လီၤႉခီဖျိတၢ်နုာ်လီၤခး၀ဲပယီၤသုးကလၢၤ(၃)ဖျၢၣ်အဃိသုးမီၤစိရိၤကဘီယူၤဟဲခးလီၤစၢၤ၀ဲမ့ၣ်ပိၢ်အဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ

တၢ်ဒုးကဲထီၣ်ဘျီ၀ဲအံၤအပူၤခံခီခံကပၤတၢ်သံတၢ်ဘၣ်ဒိဘၣ်ထံးအိၣ်၀ဲအါမးအသိး လီၢ်က၀ီၤကမျၢၢ်အကထိဘၣ်ဃ့ၢ်ထီၣ်၀ဲဒၣ်စ့ၢ်ကီးန့ၣ်လီၤႉ