ကီးတရံးပူၤ လၢတသီအတီၢ်ပူၤတၢ်ဖီၣ်န့ၢ်၀ဲၦၤပာ်ဖျါထီၣ်သး ၁၁ ဂၤဒီး ၁၀ ဂၤန့ၣ်မ့ၢ်၀ဲပိာ်မုၣ်တဖၣ်

လါမးရှး ၂ သီႇ ၂၀၂၁ နံၣ်ႇ ခ့ၣ်အဲးစံၣ်

ကီးတရံး၀့ၢ်ပူၤ ဖဲလါဖ့ၤဘြူၤအါရံၤ ၂၈ သီအနံၤ တၢ်ထီဒါမၤ၀ဲသုးမီၤစိရိၤသနူတၢ်ရဲၣ်တၢ်ကျဲၤဒီး ၦၤလၢဟဲပာ်ဖှိၣ်ပာ်ဖျါထီၣ်တၢ်ဘၣ်သးလၢဟီၣ်က၀ီၤတဖၣ်အပူၤအကျါ တၢ်ဖီၣ်န့ၢ်၀ဲဒၣ် ၁၁ ဂၤဒီး အဂၤ ၁၀ န့ၣ် မ့ၢ်၀ဲပိာ်မုၣ်တဖၣ်အဂ့ၢ်န့ၣ် ၦၤလၢအပၣ်ဃုာ်လၢတၢ်ပာ်ဖျါထီၣ်သးပူၤတဖၣ် စံး၀ဲန့ၣ်လီၤႉ

ဖဲလါဖ့ၤဘြူၤအါရံၤ ၂၈ သီအနံၤ တၢ်ဂ့ၢ်ကဲထီၣ်သးလၢ ပၢၤကီၢ်သုးတဖၣ်ဖီၣ်၀ဲကၠိသရၣ်မုၣ် ၂ ဂၤဃုာ်ဒီး ပိာ်မုၣ် ၁၀ ဂၤ အဂ့ၢ်န့ၣ် ၦၤလၢအတီခိၣ်ရိၣ်မဲတၢ်ပာ်ဖျါထီၣ်သးတဂၤလၢအမ့ၢ် ဘိၤဘိၤ စံး၀ဲဒ်အံၤန့ၣ်လီၤႉ

“ပၢၤကီၢ်သုးတဖၣ်ဖီၣ်၀ဲသရၣ်မုၣ် ၂ ဂၤ တတဲတၢ်နီတမံၤဘၣ်ဒီးတီၣ်ထီၣ်၀ဲလၢကါပူၤလီၤႉ ဘိးဘၣ်သ့ၣ်ညါလီၤ ၀ဲလၢမၢမၤလီၤပြံပြါသးလီၤႉ ဒ်သိးတၢ်ကပျၢ်ကွံာ်သရၣ်မုၣ် ၂ ဂၤလၢတၢ်ဖီၣ်ဃာ်၀ဲအံၤအဂီၢ် ထံဖိကီၢ်ဖိကမျၢၢ်တဖၣ်ဃ့ထီၣ်၀ဲဘၣ်ဆၣ် ပၢၤကီၢ်သုးအံၤတပျၢ်၀ဲအမဲာ်ညါ ဒ်သိးကမျၢၢ်ကလီၤပြံပြါအဂီၢ်ခး၀ဲဒီးထံလီၤႉ ခး၀ဲဒီးထံတဘၣ်ဘၣ်အဃိ ခးသီၣ်ထီၣ်၀ဲကျိတဘျီဃီလီၤႉ ၀ံၤဘျီ မၤတဲၢ်ဖး၀ဲတၢ်မဲာ်ထံလီၤမ့ၣ်ပိၢ်ဒီး ၦၤလၢအထံၣ်၀ဲတဖၣ်ကိးထၢနုာ်၀ဲလီၤ”အဂ့ၢ်န့ၣ် စံး၀ဲန့ၣ်လီၤႉ

ဒ်သိးၦၤလၢတၢ်ဖီၣ်ဃာ်၀ဲ ၁၁ ဂၤအံၤကထူၣ်ဖျဲးထီၣ်အဂီၢ် ကညီကလုာ်ဒူၣ်ဖီၣ်စုက၀ဲၤကရူၢ်တဖၣ်ဒီး သူၣ်က့သးၦၢ်တဖၣ် မၤ၀ဲတၢ်ထိၣ်ဃူထိၣ်ဖိးဒီးပၢၤကီၢ်သုးတဖၣ်အဃိ လၢစှၤသီအတီၢ်ပူၤဟဲက့ၤပူၤဖျဲးထီၣ်၀ဲအဂ့ၢ်န့ၣ် ၦၤလၢပၣ်ဃုာ်လၢတၢ်ပာ်ဖျါထီၣ်သးပူၤတဖၣ်စံး၀ဲန့ၣ်လီၤႉ

ဖဲသုးဟံးဆူၣ်ကွံာ်တၢ်စိတၢ်ကမီၤ၀ံၤအလီၢ်ခံ ထံဖိကီၢ်ဖိကမျၢၢ်လၢအအိၣ်ဖဲကီးတရံး၀့ၢ်ကပိၤကပၤတဖၣ်အံၤ ဖဲလါဖ့ၤဘြူၤအါရံၤ ၈ သီအလီၢ်ခံန့ၣ် ဖဲကီးတရံး၀့ၢ်ပူၤ ကိးနံၤဒဲးကမျၢၢ်တဖၣ်ဟဲပာ်ဖျါထီၣ် တၢ်ဘၣ်သးအိၣ်၀ဲဘၣ်ဆၣ် ခီဖျိလၢ လါဖ့ၤဘြူၤအါရံၤ ၂၈ သီတၢ်ဂ့ၢ်ကဲထီၣ်သးအံၤအဃိ ၦၤဟဲပာ်ဖျါထီၣ်တၢ်ဘၣ်သးလီၤစှၤ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲလါမးရှး ၁ သီအနံၤစ့ၢ်ကီး ကီးတရံးအပူၤ သးစၢ်လၢအသးနံၣ်အိၣ် ၂၀ နံၣ် တုၤလၢ ၂၅ နံၣ်လၢအတီခိၣ်ရိၣ်မဲတၢ်ပာ်ဖျါထီၣ်သးတဖၣ်အံၤ ပၢၤကီၢ်သုးဂုၤကျဲးစၢး၀ဲဒ်သိးကဖီၣ်၀ဲအဂီၢ်ဘၣ်ဆၣ် နၢ်ဟူဘၣ်လၢဖီၣ်၀ဲတချုးဒံးဘၣ်အဂ့ၢ်န့ၣ် သ့ၣ်ညါဘၣ်လၢၦၤပၣ်ဃုာ်လၢတၢ်ပာ်ဖျါထီၣ်သးပူၤအအိၣ်န့ၣ်လီၤႉ

ဒ်န့ၣ်အသိး ဖဲလါဖ့ၤဘြူၤအါရံၤ ၂၈ သီ တၢ်မၤ၀ဲတၢ်ထီဒါသုးမီၤစိရိၤတၢ်ရဲၣ်တၢ်ကျဲၤအပူၤ ဖဲဂီၤခီ ၁၀ နၣ်ရံၣ်ဘျဲၣ်အဆၢကတီၢ်န့ၣ် ပၢၤကီၢ်သုးဒီးသုးတဖၣ်မၤလီၤမုၢ်ပြံပြါ၀ဲကမျၢၢ်ဒီး တၢ်ဖီၣ်န့ၢ်၀ဲၦၤကမျၢၢ် ၄၀ ဂၤဘျဲၣ်အသိး လၢမၠၣ်၀တံၣ်၀့ၢ်ပူၤစ့ၢ်ကီး ၦၤလၢအပာ်ဖျါထီၣ်သးတဖၣ်ဖဲလၢအစးထီၣ်ပာ်ဖှိၣ်ထီၣ်သးလၢ နီၣ်ဂံၢ် ၁ တၢ်ရ့လိာ်မုာ်လိာ်တိၤခိၣ်ထိးဘယ့ၣ်နီၤကျဲမုၣ်ဖီခိၣ်အဆၢကတီၢ် ပၢၤကီၢ်သုးတဖၣ်ဟးလူၤဖီၣ်တၢ်ဒီး ဖဲန့ၣ်ဖီၣ်န့ၢ်၀ဲၦၤကမျၢၢ်ဖိတစှၤန့ၢ်ဒံးအဂၤ ၁၀ ဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်တၢ်တိစၢၤမၤစၢၤထံရူၢ်ကီၢ်သဲးၦၤဃိာ်ဖိကရူၢ်(AAPP))အတၢ်မၤနီၣ်မၤဃါအပူၤအသိး ကီၢ်ပယီၤအပူၤ စးထီၣ်လၢသုးဟံးဆူၣ်ကွံာ်တၢ်စိတၢ်ကမီၤ ဖဲလါဖ့ၤဘြူၤအါရံၤ ၁ သီ တုၤလၢ လါဖ့ၤဘြူၤအါရံၤ ၂၈ သီအနံၤတစု ထံရူၢ်ကီၢ်သဲးၦၤဃိာ်ဖိလၢတၢ်ဖီၣ်၀ဲႇတၢ်လိာ်ဘၢလိာ်ကွီၢ်၀ဲႇ တၢ်စံၣ်ညီၣ်ဟ့ၣ်လီၤတၢ်ကမၣ်တဖၣ် ပာ်ဖှိၣ်ခဲလၢာ်အိၣ်တုၤ၀ဲဒၣ်လၢ(၁ႇ၁၃၂)ဂၤ အဂ့ၢ်န့ၣ် ပာ်ဖျါဃာ်၀ဲန့ၣ်လီၤႉ