လါယူၤ ၃ သီ, ၂၀၂၆ နံၣ်, ခ့ၣ်အဲးစံၣ်
ဃိၥ်လၢအိၣ်ကီၢ်ပယီၤဒီဘ့ၣ်အပူၤ ထံရူၢ်ကီၢ်သဲးပှၤဃိၥ်ဖိလၢအအိၣ်ဃိၥ်ပူၤသ့ၣ်တဖၣ်အံၤ ခီဖျိသုးမီၤစရိၤအံၤဟ့ၣ်ဝဲဂ့ၢ်ဂီၢ်အူ တၢ်ကူစါယါဘျါဒီးကသံၣ်ကသီတၢ်အံးထွဲကွၢ်ထွဲတလၢတလီၣ်ဝဲဘၣ်အဃိ လါမ့ၤတလါအတီၢ်ပူၤ ထံရူၢ်ကီၢ်သဲး ပှၤဃိၥ်ဖိသံဝဲ (၃)ဂၤအဂ့ၢ်န့ၣ် (AAPP)ထုးထီၣ် ပၥ်ဖျါဝဲဖဲတနံၤအံၤန့ၣ်လီၤ.
ထံရူၢ်ကီၢ်သဲးပှၤဃိၥ်ဖိ ကိၤမၠိတ့ၣ် လၢအအိၣ်လၢပကိကီၢ်ခီအံၤ ဖဲအပူၤကွံၥ်(၂၀၂၃)အခါ ဘၣ်တၢ်ဖီၣ်အီၤလၢသုးကရူၢ်ဝံၤ လီၤဘၣ်ဝဲဃိၥ်ပူၤဒီး တူၢ်ဘၣ်ဝဲသးတၢ်ဆါလၢဃိၥ်ပူၤနးနးတချုးဘၣ်ဆၣ် ခီဖျိဃိၥ်ပှၤဘၣ်မူဘၣ်ဒါတဟ့ၣ်ဝဲ တၢ်ကူစါယါ ဘျါတုၤ လီၤတီၤလီၤဘၣ်အဃိ ဖဲအပူၤကွံၥ်လါမ့ၤ ၁၇ သီအနံၤ တၢ်ဆှၢအီၤဆူပကိတၢ်ဆါဟံၣ်ဖးဒိၣ်ဘၣ်ဆၣ် ဖဲအတုၤလၢ တၢ်ဆါဟံၣ် တယံၤတမီၢ်န့ၣ်အသးသမူ ဟးထီၣ်ကွံၥ်ဝဲဒၣ်န့ၣ်လီၤ.
ဒ်န့ၣ်အသိးဖဲအပူၤကွံၥ်(၂၀၂၄)လါနိၣ်ဝ့ဘၢၣ်အခါန့ၣ်စ့ၢ်ကီး (NLD)ပၣ်တံၣ်ကရၢဖိ အူထ့အီၤ လၢသုးကရူၢ်ဖီၣ်အီၤဒုး လီၤဃၥ်အီၤ လၢအလီၤဘၣ်ဃိၥ်(၁၅)နံၣ်အံၤစ့ၢ်ကီး တူၢ်ဘၣ်ဝဲတၢ်ဟၢဖၢလူတၢ်ဆါဒီးကလံၤကျိၤတၢ်ဆါနးနးကျံၤကျံၤဘၣ်ဆၣ် ခီဖျိတၢ်ကူစါယါ ဘျါအီၤလၢဃိၥ်ပူၤတၢ်ဆါဟံၣ်ဒ်န့ၣ်လီၤဒီးတဒိးန့ၢ်ဘၣ်ဝဲတၢ်ကူစါယါဘျါလၢလၢပှဲၤပှဲၤဘၣ်အဃိ ဖဲလါမ့ၤ ၂၂ သီ အနံၤန့ၣ် အသးသမူဟးထီၣ်ကွံၥ်ဝဲစ့ၢ်ကီးန့ၣ်လီၤ.
တကးဒံးဘၣ်အူမၠ့ၣ်နဲၤလၢဘၣ်တၢ်ဖီၣ်အီၤဖဲအပူၤကွံၥ်(၂၀၂၃)နံၣ်ဝံၤ ဘၣ်လီၤလၢဃိၥ်ပူၤ(၁၀) နံၣ်အံၤစ့ၢ်ကီး လၢတၢ်အ့စ့ၣ် ဃိၥ်ပူၤ အံၤတဆီဖဲတၢ်သုးလီၢ်သုးကျဲလဲၤဆှၢအီၤဆူပၠံၣ်ဃိၥ်ပူၤဝံၤလီၢ်ခံအခါ တူၢ်ဘၣ်ဝဲကလံၤဖၠးတၢ်ဆါအံၤန့ၣ် လီၤ. ဘၣ်ဆၣ်ဖဲအတၢ်ဆါ နး ထီၣ်တၢ်လဲၤဆှၢကူစါယါဘျါအီၤဆူကမျၢၢ်တၢ်ဆါဟံၣ်ဖးဒိၣ်ဘၣ်ဆၣ် ခီဖျိသုးကရူၢ်အံၤအတၢ်ပၥ်ပနီၣ် ဒီး ကသံၣ်ကသီတကူ တလၢဘၣ်အဃိ ဖဲလါမ့ၤ ၂၃ သီအနံၤန့ၣ် သးသမူဟးထီၣ်ကွံၥ်ဝဲစ့ၢ်ကီးအဂ့ၢ်န့ၣ် (AAPP)တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
တကီၢ်ခါခဲအံၤပကိကီၢ်ခီ ဒဲၣ်အူဃိၥ်ဃုၥ်ဒီးကီၢ်ပယီၤဒီတဘ့ၣ်အပူၤဃိၥ်တဖၣ်န့ၣ် လီၤဆီဒၣ်တၢ်ထံရူၢ်ကီၢ်သဲးပှၤဃိၥ်ဖိ သ့ၣ်တဖၣ် အံၤ ခီဖျိတဒိးန့ၢ်ဘၣ်ဝဲထံအီဒီးတၢ်အီၣ်န့ၢ်ဂံၢ်န့ၢ်ဘါလၢလၢပှဲၤပှဲၤဘၣ်တကးဒံးဘၣ်ခီဖျိဃိၥ်ပူၤန့ၣ်ပှၤနီၣ်ဂံၢ်အါဘၣ်အိၣ်ဝဲ ကတံၥ် ကတူၥ်အဃိ ဒိးန့ၢ်ဘၣ်ဝဲဘ့ၣ်သးကုသးတၢ်ဆါဃုၥ်ဒီးတၢ်ဘၣ်ကူၣ်ဘၣ်ဂၥ်တၢ်ဆါလၢအဂၤအိၣ်ဝဲဘၣ်ဆၣ် ဃိၥ်ပှၤဘၣ်မူ ဘၣ်ဒါ တဖၣ်တုၤလၢခဲအံၤပၥ်ပနီၣ်ဃၥ်ဝဲတၢ်ကူစါယါဘျါအိၣ်ဒံးဝဲအဖၢမုၢ်အဂ့ၢ်န့ၣ် ပှၤလၢအဘူးဒီးဃိၥ်အံၤသ့ၣ်တဖၣ် စံးဝဲအသိး သ့ၣ်ညါဘၣ်န့ၣ်လီၤ.
တကးဒံးဘၣ်ဒ်(AAPP)အတၢ်မၤနီၣ်စရီပူၤပၥ်ဖျါဝဲအသိးန့ၣ် ခၠီကီၢ်စဲၣ်,မကွ့ကီၢ်ခီ,စကဲ,မါတလ့,ပကိကီၢ်ခီ, ကညီကီၢ်စဲၣ်, ကရ့ၣ်နံၣ်,ကခၠ့ၣ်,ရခၢၣ်ကီၢ်စဲၣ်အပူၤ (၂၀၂၆)လါမ့ၤ ၁ သီတုၤ ၂၃ သီအံၤ ခီဖျိလၢသုးမီၤစရိၤခးဝဲ ဒီးကျိဖးဒိၣ်,ကဘီယူၤအံၤအဃိ လီၢ်ကမျၢၢ်သံဝဲ(၄၆)ဂၤဒီး ဖဲန့ၣ်အကျါမ့မ့ၢ်လၢအဂၤ(၂)ဂၤခီန့ၣ်အသံလၢတၢ်ဂ့ၢ်မနုၤလဲၣ်န့ၣ် တၢ်ဃုသ့ၣ်ညါမၤလီၤတံၢ်အီၤ အဖၢမုၢ် န့ၣ် လီၤ.
