လါယူၤ ၁၅ သီ, ၂၀၂၄ နံၣ်, ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ဖဲမဟါလါယူၤ ၁၄ သီ ဟါခီ ၁ နၣ်ရံၣ်ဘျဲၣ်အဆၢကတီၢ် သုးကီၣ်ကးအမျိာ်သုး(၃၁၀)လၢအိၣ်သ့ၤစယၣ်အံၤ ခးလီၤ၀ဲဒၣ်ကျိဖးဒိၣ် (၂)ဖျၢၣ် လီၤတဲာ်ပိၢ်ဖးထီၣ်လၢအခဲၤသ၀ီဒီးသိခွၣ်သ၀ီဘၢၣ်စၢၤ အူစိမ့အီၤ အကျီးပူၤဒဲဃၢၤအဃိ ၀ါဒၣ်ကွ့သ၀ီ အူစိမ့အီၤအဖိမုၣ် မၣ်နဒၤလ့(၁၄)နံၣ်အံၤသံ၀ဲဒၣ်ဒီး ဘၣ်ဒိ၀ဲဒၣ်ဖိသၣ်ဆံး မၣ်စွ့ၤစ့ၤလ့(၁)နံၣ်ဘျဲၣ် သ့ၣ်တဖၣ်အံၤ အဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါစံး၀ဲန့ၣ်လီၤႉ
လၢန့ၣ်အမဲာ်ညါတၢ်တနံၤ၀ဲန့ၣ်အတီၢ်ပူၤသုးကီၣ်ကးအမျိာ်သုး(၃၁၀)ဒီး(ခမရ-၂၀၇)ခးလီၤကျိဖးဒိၣ်လၢ လီၢ်က၀ီၤကမျၢၢ်ဒူသ၀ီပူၤကအိၣ်လၢ (၁၅)ဖျၢၣ်ဃၣ်ဃၣ်ညါအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤ.
ဒ်န့ၣ်အသိးဖဲအပူၤကွံာ်လါယူၤ ၁၂ သီအနံၤစ့ၢ်ကီး သုးကီၣ်ကးအမျိာ်သုး(၃၁၀)တဒူၣ်ဃီ၀ဲအံၤခးလီၤကျိဖးဒိၣ်အဃိ ပ့နဲကိသ၀ီဖိ ဒီဖိပၢ်ခံဂၤဘၣ်ဒိဘၣ်ထံးကဲထီၣ်တ့ၢ်အသးဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
