ကၠဲးထိၣ်ကီၢ်ဆၣ် ၦၤခူၣ်ထူဖိ(၈)ဂၤလၢပယီၤသုးဖီၣ်က့ၤကိး၀ဲတဖၣ်တုၤခဲအံၤတၢ်တပျၢ်လီၤ၀ဲဒံးဘၣ်

လါယူၤ ၁၇ သီႇ ၂၀၂၄ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ် ၀ီၢ်ကျီၢ်ကရူၢ်ဒီးအ့ကၣ်ဘိၤသ၀ီပူၤန့ၣ် အပူၤကွံာ်စှၤသီအခါ ပယီၤသုးနုာ်လီၤသမံသမိး၀ဲတၢ်ခူၣ်ဟီၣ်လာ်တၢ်ထူးတၢ်တီၤထူပူၤလၢတၢ်လီၢ်ခံတီၤဒီးဖီၣ်က့ၤကိး၀ဲဒၣ်ၦၤမၤထူဖိ တဖၣ်ဘၣ်ဆၣ်တုၤလၢခဲအံၤတၢ်တပျၢ်လီၤ၀ဲဒံးဘၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲန့ၣ်လီၤႉ

ကၠဲးထိၣ်ကီၢ်ဆၣ် ၀ီၢ်ကျီၢ်ကရူၢ်ဒီးအ့ကၣ်ဘိၤ တၢ်ခူၣ်ထူပူၤတၢ်လီၢ်ခံတီၤအံၤ သုးကီၣ်ကးအၦၤ ခီၣ်ချ့သုးရ့ၣ် (ခမရ-၄၁၀) ဒီး(ခမရ-၂)နုာ်လီၤသမံသမိးတၢ်၀ံၤဖီၣ်က့ၤကိး၀ဲဒၣ်ၦၤမၤထူဖိ(၈)ဂၤ တကးဒံးဘၣ် က့ၤစိာ်ဃုာ်၀ဲ သိလ့ၣ်သ့ၣ်တဖၣ် အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ

ဖဲအပူၤကွံာ်လါယူၤ ၅ သီအနံၤန့ၣ် သုးကီၣ်ကး(ခမရ-၄၁၀)သုးရ့ၣ် အံၤ နုာ်လီၤ၀ဲဒၣ်လၢ ကၠဲးထိၣ်၀့ၢ်ဆၢခိၣ် ၀ီၢ်ကျီၢ်ကရူၢ် ၀ီၢ်ကျီသ၀ီဆၢလာ် ကၠီၤယဲအီၤ ထူပူၤတၢ်လီၢ်ဒီး ဖဲန့ၣ်ဖီၣ်က့ၤကိး၀ဲဒၣ်တၢ်မၤခိၣ် မၣ်န့ၣ်ကၠၢၣ်(၁)ဂၤႇ ၦၤနီသိလ့ၣ်ကွးဟီၣ် ခိၣ်ဖိ(၂)ဂၤ တကးဒံးဘၣ်က့ၤစိာ်ဟံဃုာ်၀ဲသိလ့ၣ်ကွးဟီၣ်ခိၣ်(၂)ခိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်န့ၣ်အသိးတကတီၢ်ဃီဖဲလါယူၤ ၈ သီအနံၤစ့ၢ်ကီး သုးကီၣ်ကး(ခမရ-၂)သုးရ့ၣ် နုာ်လီၤ၀ဲဒၣ်လၢကၠဲးထိၣ်၀့ၢ် ဆၢလာ် အ့ၤကၣ်ဘိၤသ၀ီ ကိၤကၠမါႇအူမၠ့ၣ်အီၤႇအူဖၠူၤလ့ႇကိၤခၠ့ၣ်ကိၤ ထူပူၤတၢ်လီၢ်ဒီး ဖဲန့ၣ်ဖီၣ်က့ၤကိးစ့ၢ်ကီး၀ဲ ၦၤမၤထူဖိ(၅)ဂၤ တကးဒံးဘၣ်က့ၤစိာ်ဃုာ်စ့ၢ်ကီး၀ဲ(Dosan)သိလ့ၣ် ၃ ခိၣ်ႇ (HYUNDAI)သိလ့ၣ် ၁ ခိၣ် ဒီး ဒ်န့ၣ်အသိးမၤကဒီးဖဲ (၁၄)သီ အနံၤ (ခမရ-၄၁၀)အံၤနုာ်လီၤကဒီး၀ဲဒၣ်လၢ ကိၤခၠံၣ်ကိၤ အထူပူၤတၢ်လီၢ်၀ံၤ က့ၤစိာ်၀ဲဒၣ်(HYUNDAI)သိလ့ၣ် ၁ ခိၣ်ႇ (HIJET)သိလ့ၣ် ၁ ခိၣ် အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲန့ၣ်လီၤႉ

ဘၣ်ဃးဒီးတၢ်ဂ့ၢ်အံၤ ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံး၀ဲလၢ“ၦၤလၢပယီၤသုးဖီၣ်က့ၤကိး၀ဲ တဖၣ်န့ၣ်တၢ်တပျၢ်လီၤ၀ဲဒံးဘၣ်ႉပနၢ်ဟူန့ၣ်အက့ၤဆှၢဖှိၣ်၀ဲလၢ သုးတြိၤ(၄၄)သုးရ့ၣ်န့ၣ်ခဲလၢာ်လီၤႉ ပနၢ်ဟူၦၤ ကမျၢၢ်တဲ၀ဲလၢအကဆှၢ၀ဲတုၤလၢ(ရတခ)ဧါတသ့ၣ်ညါဘၣ်ႉအက့ၤကိး၀ဲတဖၣ်န့ၣ်မ့ၢ်ၦၤတူၢ်ငါ ဖိလီၤမီၤႉတၢ်မၢၤ ဖဲန့ၣ်အကျါန့ၣ်ပၣ်ဃုာ်၀ဲ(မၣ်န့ၢ်ကၠၢၣ်)တဂၤႉမ့မ့ၢ်လၢကၠီၤယဲအီၤအထူပူၤခီန့ၣ်က့ၤကိး၀ဲဒၣ်ၦၤနီသိလ့ၣ်ဖိ(၂)ဂၤဒီးမၣ်န့ၣ်ကၠၢၣ်တဂၤႉမ့မ့ၢ်လၢအ့ၤကဘိၤဆၢခိၣ်ထူပူၤခီန့ၣ်က့ၤကိး၀ဲဒၣ်(၅)ဂၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါတၢ်လီၢ်လၢၦၤလဲၤနုာ်လီၤဖီၣ်ထူပူၤတၢ်လီၢ်သ့ၣ်တဖၣ်အံၤအိၣ်၀ဲဒၣ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ် ကရၢ တၢ်ပၢဟီၣ်က၀ီၤပူၤဘၣ်ဆၣ် တၢ်ဟဲခူၣ်ထူတၢ်ဂ့ၢ်အံၤတၢ်ဒုးသ့ၣ်ညါလီၢ်က၀ီၤၦၤဘၣ်မူဘၣ်ဒါတအိၣ်၀ဲဒၣ် ဘၣ် အသိး ၦၤလၢအဟဲခူၣ်ထူၣ်တၢ်ဖီၣ်အီၤခဲအံၤသ့ၣ်တဖၣ်န့ၣ်မ့ၢ်ၦၤအိၣ်ဆိးလၢဆီးထံးဒီး၀့ၢ်တကူၣ်တကပၤ အဂ့ၢ်န့ၣ် ပဒိၣ်စီၤအ့နဲၤ စံးအါထီၣ်၀ဲန့ၣ်လီၤႉ

ဒ်လီၢ်က၀ီၤၦၤဘၣ်မူဘၣ်ဒါစံး၀ဲအသိးန့ၣ် သိလ့ၣ်လၢပယီၤသုးက့ၤစိာ်၀ဲသ့ၣ်တဖၣ်အံၤဒီး ၦၤခူၣ်ဟီၣ်လာ်တၢ်ထူး တၢ်တီၤဖိလၢပယီၤသုးဖီၣ်က့ၤကိး၀ဲသ့ၣ်တဖၣ်အံၤန့ၣ်တၢ်က့ၤကိး၀ဲဒၣ်ဆူသုးကီၣ်ကးအသုးတြိၤ(၄၄)သုး၀ဲၤလီၢ် ခိၣ်သ့ၣ်တၢ်လီၢ်ဒီးတၢ်ဖီၣ်က့ၤကိးအ၀ဲသ့ၣ်လၢမနုၤတၢ်ဂ့ၢ်အဃိလဲၣ်တၢ်တသ့ၣ်ညါ၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ