ကၠဲးထိၣ်ကီၢ်ဆၣ် ကရူၢ်ခံဘ့ၣ်အပူၤ ပယီၤသုးဟူးဂဲၤအါထီၣ်အဃိ ဒူသ၀ီကမျၢၢ်ခဲလၢာ်ဃၣ်ဃ့ၢ်ထီၣ်

လါယူၤ ၂၁ သီႇ ၂၀၂၄ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် ခရၢၢ်ကရူၢ်ဒီး ဖွ့ဖူကၢ်ကရူၢ် အပူၤ ခီဖျိပယီၤသုးကီၣ်ကးအၦၤနုာ်လီၤဟူးဂဲၤဟဲအါထီၣ်အဃိ ဒူသ၀ီကမျၢၢ်ခဲလၢာ်ဃၣ်ဃၣ် တဖၣ်ပျံၤတၢ်ဖုးတၢ် ဘၣ်ဃ့ၢ်ထီၣ်ဟးစံၣ်အိၣ်လၢတၢ်လီၢ်အဂၤအဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါစံး၀ဲန့ၣ်လီၤႉ

ခရၢၢ်ကရူၢ်ဒီးဖွ့ဖူကၢ်ကရူၢ်ခံဘ့ၣ်အံၤအပူၤ စးထီၣ်ဖဲတလါအံၤလါယူၤထီၣ် ၅ သီအနံၤန့ၣ် ခီဖျိပယီၤသုးနုာ်လီၤမၤ ၀ဲဒၣ်သုးတၢ်ဟူးတၢ်ဂဲၤႇဟးဃိထံဟးဆှၣ်တၢ်လၢၦၢ်ပူၤဟဲအါထီၣ်အဃိ ဒူသ၀ီၦၤကမျၢၢ်ခဲလၢာ်ဃၣ်ဃၣ်လၢအိၣ် ကရူၢ်ခံဘ့ၣ်အံၤအပူၤတဖၣ်ပျံၤတၢ်ဘၣ်ဃ့ၢ်ထီၣ်ဟးစံၣ်အိၣ်လၢၦၢ်လၢ်ကျါႇၦၤဒူၦၤသ၀ီကဲထီၣ်သးဒ်အံၤလီၤအဂ့ၢ်န့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံး၀ဲန့ၣ်လီၤႉ

အ၀ဲစံး၀ဲလၢ“ပယီၤသုးတဖၣ်န့ၣ်နုာ်လီၤဟူးဂဲၤ၀ဲဒၣ်ဖဲခရၢၢ်ကရူၢ်ႇဖွ့ဖူကၢ်ကရူၢ်ပူၤအဃိ ဒူသ၀ီကမျၢၢ်တဖၣ် အိၣ်ဆိး တဘူၣ်လၢၤဘၣ်ဘၣ်ဃ့ၢ်အိၣ်ကဒုလၢၦၤဒူၦၤသ၀ီလၢမံၤခိၣ်ၦၢ်လာ်ႉဒူသ၀ီလၢအိၣ်ကရူၢ်ခံဘ့ၣ်အံၤအပူၤတဖၣ်ဃ့ၢ်ထီၣ်ခဲလၢာ်ဃၣ်ဃၣ်လီၤႉခဲအံၤဖဲမဟါန့ၣ်ၦၤပ့နဲကိဧါသ၀ီမတၤလဲၣ်သ့ၣ်တဖၣ်န့ၣ်စံၣ်ထီၣ်ဖျိလၢစံပၠီလ့သ၀ီမတၤကယၢ်မးလံ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤႉ

လၢန့ၣ်အမဲာ်ညါဘၣ်ဃးၦၤကမျၢၢ်လၢအဃ့ၢ်ထီၣ်သ့ၣ်တဖၣ်အံၤ ဟံၣ်ခိၣ်နီၣ်ဂံၢ်ဒီးၦၤကညီနီၣ်ဂံၢ်ခဲလၢာ်စံၣ်ထီၣ် ဆံးအါလဲၣ်ခီန့ၣ်လီၢ်က၀ီၤၦၤဘၣ်မူဘၣ်ဒါဃုသ့ၣ်ညါမၤလီၤတံၢ်စရီအဖၢမုၢ်အဃိ တဲလီၤတံၢ်စရီတန့ၢ်ဒံးဘၣ် အဂ့ၢ်န့ၣ် ပဒိၣ်စီၤအ့နဲၤ စံးအါထီၣ်၀ဲန့ၣ်လီၤႉ

ဒ်လီၢ်က၀ီၤၦၤဘၣ်မူဘၣ်ဒါစံး၀ဲအသိးန့ၣ် ကရူၢ်ခံဘ့ၣ်ပၤၦၤကမျၢၢ်ဘၣ်ဃ့ၢ်ထီၣ်ခဲအံၤသ့ၣ်တဖၣ်န့ၣ် အိၣ်တယံၤ တဘူးဒီးပယီၤသုးခီၣ်ချ့သုးရ့ၣ်(ခမရ-၂၀၇),အမျိာ်သုး(၃၁၀)သုးရ့ၣ်သ့ၣ်တဖၣ်အံၤဒီး လၢန့ၣ်အမဲာ်ညါ ဟီၣ်က၀ီၤပူၤအံၤတၢ်ပၢၢ်ဆၢသုးပာ်ဖှိၣ်စ့ၢ်ကီးဟူးဂဲၤ၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ပယီၤသုးသ့ၣ်တဖၣ်အံၤတချုးအ၀ဲသ့ၣ်နုာ်လီၤဟူးဂဲၤလၢကရူၢ်ခံဘ့ၣ်အံၤအပူၤဒံးဘၣ်အခါ အပူၤကွံာ်လါယူၤ ၅ႇ၈ႇ၁၄ သီ အနံၤန့ၣ် အ၀ဲသ့ၣ်နုာ်လီၤသမံသမိးတၢ်လၢၦၤထူပူၤ(တၢ်ခူၣ်ဟီၣ်လာ်တၢ်ထူးတၢ်တီၤ)တလီၢ်၀ံၤဖီၣ်က့ၤကိး ဒံး၀ဲဒၣ် ၦၤခူၣ်ထူဖိ(၈)ဂၤတကးဒံးဘၣ်ခးလီၤစ့ၢ်ကီး၀ဲကျိဖးဒိၣ်တပယူာ်ဃီအဃိဖဲန့ၣ်လီၢ်ခံၦၤကမျၢၢ်လၢအိၣ်ဘူး ဖဲန့ၣ်သ့ၣ်တဖၣ် ဘၣ်ဃ့ၢ်ထီၣ်၀ဲဒီးအ၀ဲသ့ၣ်ဟူးဂဲၤလၢကရူၢ်ခံဘ့ၣ်အံၤအပူၤတုၤလၢခဲအံၤတစုအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲအသိး သ့ၣ်ညါဘၣ်န့ၣ်လီၤႉ

တကတီၢ်ဃီဒ်န့ၣ်အသိးဖဲမဟါလါယူၤ ၂၀ သီအနံၤစ့ၢ်ကီး လၢအခဲၤသ၀ီဃၢၤန့ၣ် ပယီၤသုးလၢအနုာ်လီၤဟူးဂဲၤ သ့ၣ်တဖၣ်အံၤဒီးတၢ်ပၢၢ်ဆၢသုးကရူၢ်အဘၢၣ်စၢၤတၢ်ဒုးစဲးပြဲးကဲထီၣ်၀ဲအသိး ခါဆူညါပယီၤသုးသ့ၣ်တဖၣ်အံၤ မ့စဲးဟဲထီၣ်ဟူးဂဲၤမ့အါထီၣ်ကွ့ၢ်ကွ့ၢ်ဒုတၢ်ဒုးကဲထီၣ်သ့၀ဲအဂ့ၢ်န့ၣ် ခ့ၣ်အဲၣ်ယူၣ်ၦၤဘၣ်မူဘၣ်ဒါ စံး၀ဲန့ၣ်လီၤႉ

ကၠဲးထိၣ်ကီၢ်ဆၣ်ပူၤ သုးကီၣ်ကး(ခမရ-၂၀၇)ဒီးအမျိာ်သုး(၃၁၀)သ့ၣ်တဖၣ်အံၤ တၢ်ဒုးကဲထီၣ်အိၣ်ဂ့ၤတအိၣ်ဂ့ၤ ညီနုၢ်န့ၣ်အ၀ဲသ့ၣ်ခးလီၤ၀ဲဒၣ်ကျိဖးဒိၣ်ဆူဒူသ၀ီပူၤအိၣ်၀ဲတလီၢ်လီၢ်ဒီး အပူၤကွံာ်တလါအံၤလါယူၤ ၁၄ သီအနံၤ စ့ၢ်ကီး ခီဖျိ(၃၁၀)အၦၤခးလီၤကျိဖးဒိၣ်အဃိ ဘၣ်သံ၀ဲဒၣ် ၀ါဒၣ်ကွ့သ၀ီ ဖိသၣ်မုၣ်(၁၄)နံၣ်တဂၤဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ