လါယူၤလံ ၁၅ သီႇ ၂၀၂၄ နံၣ်ႇ ခ့ၣ်အဲးစံၣ်
ခဲမုၢ်ဆ့ၣ်လါယူၤလံ ၁၆ သီန့ၣ် မ့ၢ်၀ဲကညီဒီကလုာ်ဂၢၤသးကရၢ(KNDO) နံၣ်ဆၢက့ၤၦဲၤထီၣ် ၇၇ ၀ီတ၀ီဒီး လၢမုၢ်နံၤ ဆၢက့ၤအံၤအဖီခိၣ်အလီၢ်အိၣ်လၢကညီစုက၀ဲၤတၢ်ပၢၢ်ဆၢကရၢတဖၣ်ကဘၣ်ဖီၣ်လိာ်စုမၤသကိးတၢ်ဒီး ကလုာ်ဒူၣ် တၢ်ပၢၢ်ဆၢကရၢအဂၤအဂ့ၢ်န့ၣ် ကညီပိာ်မုၣ်ကရၢ(KWO)စံး၀ဲလၢ (KNDO)မုၢ်နံၤဆၢက့ၤလံာ်ဟ့ၣ်ယုၢ်အပူၤ န့ၣ်လီၤႉ
ကလုာ်ဒိၣ်စိသနူကကတၢၢ်ကွံာ်ဒီးတၢ်သူၣ်ထီၣ်ကီၢ်သူလ့ၤလၢအအိၣ်ၦဲၤဒီးဒံၣ်မိၣ်ခြ့ၣ်စံၣ်ႇတၢ်တုၤသိးထဲသိးႇ တၢ်စံၣ်ညီၣ် ပၢလီၤသးခွဲးယာ်အဂီၢ်န့ၣ်အလီၢ်အိၣ်လၢကညီစုက၀ဲၤတၢ်ပၢၢ်ဆၢကရၢအံၤကဘၣ်ဖီၣ်လိာ်စုမၤသကိးတၢ်ဒီးတၢ်ကလုာ်ဒူၣ်တၢ်ပၢၢ်ဆၢကရၢအဂၤႇကရူၢ်ကရၢလၢအထီဒါသုးမီၤစိရိၤ,ကမျၢၢ်သုးသ့ၣ်တဖၣ်အဂ့ၢ်န့ၣ် (KWO)စံး၀ဲန့ၣ်လီၤႉ
လၢန့ၣ်အမဲာ်ညါပတၢ်မိၣ်န့ၢ်သးလီကလၢၤၦဲၤထီၣ်အဂီၢ်တဂၤလၢသနၢၣ်ဒ်၀ဲကဖီၣ်လိာ်စုမၤသကိးတၢ်ဆီၣ်ထွဲမၤစၢၤလိာ်သးအမဲာ်ညါဒ်သိးတၢ်စံၣ်စိၤတဲစိၤလၢတၢ်ကွဲးလီၤပာ်အီၤတဖၣ်အံၤသုတလီၤမၢ်တဂ့ၤအဂီၢ်အလီၢ်အိၣ်လၢပက ဘၣ်မၤ သကိးတၢ်လၢတၢ်မုၢ်လၢ်တမံၤဃီလၢသးတဖျၢၣ်ဃီအပူၤအဂ့ၢ်န့ၣ် လံာ်ဟ့ၣ်ယုၢ်အပူၤ ဆီၣ်တခူထီၣ်၀ဲန့ၣ်လီၤႉ
တကတီၢ်ဃီထံရူၢ်ကီၢ်သဲးတၢ်သးအိၣ်သးႇတၢ်ဆီတလဲဒီးတၢ်လဲၤထီၣ်လဲၤထီအဖီခိၣ် မ့ၢ်တၢ်ဆၢကတီၢ် အရ့ဒိၣ်၀ဲလၢ ကညီဒီကလုာ်ဂၢၤသးကရၢကမၤဂ့ၤထီၣ်အါထီၣ်ကံၢ်စီဂံၢ်ဘါဒီးတၢ်အိၣ်ယၢၤဒီးကဲထီၣ်တၢ်ပၢၢ်ဆၢဂံၢ် ဘါဒ်သိးတၢ်ကမၤ လီၤသဘှံးမၤနၢၤကွံာ်ဒုၣ်ဒါတဖၣ်စ့ၢ်ကီးအဂီၢ်အဂ့ၢ်န့ၣ် လံာ်ဟ့ၣ်ယုၢ်အပူၤ ပာ်ဖျါ၀ဲန့ၣ်လီၤႉ
ဒ်န့ၣ်အသိးကညီဒီကလုာ်ဂၢၤသးကရၢ(KNDO)အံၤမ့ၢ်ကရၢတဖုလၢကညီဒီတကလုာ်အဂီၢ်ဒီးတကးဒံးဘၣ် ဒီသဒၢစ့ၢ်ကီး ၀ဲကညီအထံရူၢ်ကီၢ်သဲးတၢ်အိၣ်ဆၢထၢၣ်ဂၢၢ်ဂၢၢ်ကျၢၤကျၢၤတုၤမုၢ်မဆါတနံၤအံၤအဃိ ကဲထီၣ်တၢ်ဂံၢ် တၢ်ဘါလၢကညီ တၢ်ပၢၢ်ဆၢတၢ်ဂဲၤလိာ်ခါဆူမဲာ်ညါအဂီၢ်အဂ့ၢ်န့ၣ် KWO စံး၀ဲန့ၣ်လီၤႉ
လၢတၢ်န့ၣ်အဃိလၢတၢ်ကမၤအါထီၣ်ကံၢ်စီဂံၢ်ဘါဒီးတၢ်အိၣ်ယၢၤအဂီၢ်န့ၣ်အလီၢ်အိၣ်လၢကီၢ်ပူၤကီၢ်ချၢႇထံဆၢ ကီၢ်ဆၢ ကညီကမျၢၢ်တဖၣ်ကပာ်ဖှိၣ်ဟ့ၣ်ဂံၢ်ဟ့ၣ်ဘါ(KNDO)ကရၢအံၤဒီးမၤသကိးတၢ်ဃူဃူဖိးဖိးတကးဒံးဘၣ်ကရၢ အံၤ အိၣ်စ့ၢ်ကီးဒီးအမူအဒါလၢကဒီသဒၢကဟုကယာ်ဖိဒံဖိသၣ်ႇပိာ်မုၣ်ပိာ်မၢၤတဖၣ်ဖဲစုက၀ဲၤတၢ်သဘံၣ် သဘုၣ်ႇတၢ်ဒုး တၢ်ယၤအတီၢ်ပူၤအဂ့ၢ်န့ၣ် စံး၀ဲန့ၣ်လီၤႉ
တကးဒံးဘၣ်လၢတၢ်ဒုးဖျိးကွံာ်သုးမီၤစိရိၤတၢ်ဂဲၤလိာ်တဖၣ်အကျါစ့ၢ်ကီး(KNDO)ကရၢမၤသကိးတၢ်ဒီး(KNLA)ဘူးဘူးတံၢ်တံၢ်ဒီးအ၀ဲသ့ၣ်မ့ၢ်ကီၢ်သူလ့ၤသုးမုၢ်တဖုလၢအဂဲၤလိာ်တၢ်သၦၢ်ၦၢ်ဒ်သိးကညီကလုာ်ကထူၣ်ဖျဲးထီၣ်ကွံာ်လၢတၢ်ဆီၣ်တံၢ်မၤနၢၤဒီးဒိးန့ၢ်က့ၤတၢ်သဘျ့တၢ်တုၤသိးထဲသိးအဂီၢ်အဃိပာ်ပနီၣ်အ၀ဲသ့ၣ်တၢ်တူၢ်ဆါသးဒီးတၢ်ဟ့ၣ် လီၤသးဒိၣ်မး အဂ့ၢ်န့ၣ် (KWO)စံး၀ဲန့ၣ်လီၤႉ
ကီၢ်ပယီၤန့ၢ်တၢ်သဘျ့၀ံၤလီၢ်ခံကညီဖိတဖၣ်လၢကဒိးန့ၢ်က့ၤကညီကီၢ်အဂီၢ်လဲၤပာ်ဖျါထီၣ်တၢ်ဘၣ်သးလၢ (ဖဆပလ) ပဒိၣ်အအိၣ်လၢတၢ်မုာ်တၢ်ခုၣ်ပူၤဘၣ်ဆၣ်ခီဖျိတၢ်တတူၢ်လိာ်အ၀ဲသ့ၣ်ဘၣ်အဃိ ဖဲန့ၣ်ဒ်သိးတၢ်ကဒီ သဒၢ၀ဲကညီကလုာ် ဃုာ်ဒီးထံဖိကီၢ်ဖိကမျၢၢ်အသးသမူတၢ်စုလီၢ်ခီၣ်ခိၣ်အဂီၢ် ဖဲ(၁၉၄၇)နံၣ် လါယူၤလံ ၁၆ သီ အနံၤန့ၣ် ကညီခိၣ်နၢ်တဖၣ် ဒုးအိၣ်ထီၣ်၀ဲ(KNDO)ကရၢအံၤန့ၣ်လီၤ.