လါယူၤလံ ၂၇ သီ, ၂၀၂၆ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ တးကီၢ်ရ့ၣ် မဲၢ်လးဘၣ်ကီဘၣ်ခဲဒဲကဝီၤအပူၤ ဒ်သိးဘၣ်ကီဘၣ်ခဲဖိသ့ၣ်တဖၣ်အံၤဘှါဆှဲလီၤ ဝဲဆူၣ်ချ့တၢ်ဂ့ၢ်ကီသ့ၣ်တဖၣ်အံၤကန့ၢ်အဂီၢ် (M-Fund)တၢ်ကရၢကရိ ကမၤစၢၤဝဲဆူၣ်ချ့ကးတၢ်လၢၥ်ဘူၣ်လၢၥ်စ့ၤ(၇၅)မျးကယၤ လၢ တနံၣ်အတီၢ်ပူၤ အဂ့ၢ်န့ၣ် သ့ၣ်ညါဘၣ်လၢဒဲကဝီၤပှၤဘၣ်မူဘၣ်ဒါအအိၣ်န့ၣ်လီၤ.
မဲၢ်လးဒဲကဝီၤအပူၤ ဘၣ်ဃး(M-Fund)ဆူၣ်ချ့တၢ်ရဲၣ်တၢ်ကျဲၤအံၤ အပူၤကွံၥ်လါမ့ၤအခါ တၢ်စးထီၣ်မၤဝဲဝံၤလီၢ်ခံ ဖဲတလါအံၤ လါယူၤလံ ၁၅ သီအနံၤန့ၣ် (M-Fund)ပှၤဘၣ်မူဘၣ်ဒါဒီးဒဲကဝီၤပှၤဘၣ်မူဘၣ်ဒါထံၣ်လိၥ်သးတၢၣ်ပီၣ်တဲသကိးကဒီး တၢ်ဂ့ၢ်အံၤ န့ၣ်လီၤ.
ဒီးလၢတၢ်တဲသကိးဘျီဝဲအံၤအပူၤန့ၣ် တၢ်ရဲၣ်တၢ်ကျဲၤအိၣ်ထီၣ်အသီတခါလၢပှၤဒဲကဝီၤဖိအဂၤ(၁၀၀၀)အဂီၢ် (M-Fund)တၢ်ကရၢ ကရိလၢအတ့န့ၢ်ဝဲခီကီၢ်တၢ်အိၣ်ဆူၣ်အိၣ်ချ့ကးအံၤ ကဆီၣ်ထွဲမၤစၢၤဝဲတၢ်လၢၥ်ဘူၣ်လၢၥ်စ့ၤ(၇၅)မျးကယၤလၢတနံၣ်အတီၢ်ပူၤဒီး လၢတၢ်ရဲၣ်တၢ်ကျဲၤဘျီဝဲအံၤအပူၤ တၢ်ကမၤန့ၢ်ပှၤလၢတအိၣ်ဒီးပလးနီၣ်ဂံၢ် ၁၃ ဖျၢၣ်လီၤဘၣ်ဆၣ် ပှၤလၢအိၣ်ဒီးနီၣ်ဂံၢ်ဝဲအံၤစ့ၢ်ကီး မၤဝဲသ့အဂ့ၢ်န့ၣ် သ့ၣ်ညါဘၣ်န့ၣ်လီၤ.
အပူၤကွံၥ်(M-Fund)တၢ်အိၣ်ဆူၣ်အိၣ်ချ့ကးတၢ်လၢၥ်ဘူၣ်လၢၥ်စ့ၤအံၤ တၢ်နီၤဖးလီၤအပတီၢ်(၄)ပတီၢ်ဒ်အမ့ၢ် ပှၤ(၁၈)နံၣ်ဆူဖီလၥ် အဂီၢ်န့ၣ်တၢ်ပၥ်ပနီၣ်ဝဲ တလါလၢစ့ယိၤ(၁၃၀)ဘး, ခံပတီၢ်တပတီၢ်န့ၣ် ပှၤနီၣ်ဒိၣ်အဂီၢ်တလါ(၂၃၀)ဘး, သၢပတီၢ်တပတီၢ်ဒီး လွံၢ်ပတီၢ်တပတီၢ်ခီန့ၣ် ပှၤလၢအိၣ်ဒီးတၢ်ဆါထီရီၤဒီးပှၤမိၢ်ဒၢတဖၣ်အဂီၢ်တၢ်ပၥ်ပနီၣ်ဝဲ(၃၃၀)ဘးအဂ့ၢ်န့ၣ် ဒဲကဝီၤပှၤဘၣ်မူ ဘၣ်ဒါ စံးဝဲအသိး သ့ၣ်ညါဘၣ် န့ၣ်လီၤ.
ဘၣ်ဆၣ်(M-Fund)တၢ်အိၣ်ဆူၣ်အိၣ်ချ့ကးလၢတၢ်ဘၣ်ဟ့ၣ်ဝဲမျးကယၤပှဲၤပှဲၤဒ်တၢ်ပၥ်ပနီၣ်ဝဲအသိးအံၤ စးထီၣ်ဖဲလါအီကူးအံၤ (M-Fund) ကမၤစၢၤဝဲတၢ်လၢၥ်ဘူၣ်လၢၥ်စ့ၤ(၇၅)မျးကယၤအဃိ ပှၤအသီလၢကနုၥ်လီၤမၤ(M-Fund)တၢ်အိၣ်ဆူၣ်အိၣ်ချ့ ကးအံၤသ့ၣ်တဖၣ် တလါတဘျီတၢ်လၢၥ်ဘူၣ်လၢၥ်စ့ၤအံၤအဝဲသ့ၣ်ကဘၣ်ဟ့ၣ်ဝဲထဲ(၂၅)မျးကယၤန့ၣ်လီၤ.
ဘၣ်ဃး(M-Fund)တၢ်ကရၢကရိကမၤစၢၤဝဲပှၤဒဲကဝီၤဖိလၢအမၤ M-Fund ကး တဖၣ်လၢတၢ်လၢၥ်ဘူၣ်လၢၥ်စ့ၤ (၇၅)မျးကယၤ တၢ်ဂ့ၢ်အံၤ န့ၣ် မဲၢ်လးဒဲကဝီၤခိၣ် စီၤဆါဒ့ ဆှဲပၠးဝဲဒ်အံၤန့ၣ်လီၤ.
“အပူၤကွံၥ်ဖိသၣ်(၁၈)နံၣ်ဆူဖီလၥ်န့ၣ်ဘၣ်ပၥ်ဖှိၣ်ထီၣ်သး(၅)ဂၤဆူဖီခိၣ်န့ၣ်ဘၣ်ဟ့ၣ်ဝဲတလါန့ၣ်(၁၀၀)မီၤ.မ့မ့ၢ်ပှၤလၢအိၣ်ဒီးဆံၣ်ဆၢ,သွံၣ်ဆၢတၢ်ဆါထီရီၤတဖၣ်န့ၣ်ဘၣ်ဟ့ၣ်ဝဲတလါန့ၣ်(၃၃၀).လၢအဂၤတခါန့ၣ်ပှၤမိၢ်ဒၢစ့ၢ်ကီးဘၣ်ဟ့ၣ်ဝဲ(၃၃၀)လီၤ.အဝဲသ့ၣ်နါက့စးထီၣ်လၢအဒၢန့ၣ်ကဘၣ်နုၥ်လီၤဆိဝဲ,ဒၢန့ၣ်တဘျုးလါမးနုၥ်လီၤမၤတန့ၢ်ဘၣ်.အခီပညီန့ၣ်(၁၃၀)န့ၣ်ပှၤမၤစၢၤ(၇၅)မျးကယၤအဃိ အဝဲသ့ၣ်ကစၢ်ဘၣ်ထုးထီၣ်က့ၤဝဲ(၃၃)ဘး.မ့မ့ၢ်(၂၃၀)တခါန့ၣ်အကစၢ်ဘၣ်ထုးထီၣ်က့ၤဝဲ(၅၈)ဘးဒီး မ့မ့ၢ်လၢ(၃၃၀)တခါန့ၣ် အကစၢ်ဘၣ်ထုးထီၣ်က့ၤဝဲ(၈၃)ဘးဒ်န့ၣ်မီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဘၣ်ကီဘၣ်ခဲဒဲကဝီၤတဖၣ်အပူၤဖဲတၢ်ဆီၣ်ထွဲမၤစၢၤလီၤစှၤအတီၢ်ပူၤအံၤ ဂ့ၢ်ဂီၢ်အူတၢ်အိၣ်ဆူၣ်အိၣ်ချ့မ့အိၣ်ထီၣ်န့ၣ် ဒ်သိးလဲၤဒိးပၠး သးလၢကၠီၣ်တဲၣ်တၢ်ဆါဟံၣ်ကသ့ဝဲအဂီၢ် တၢ်အိၣ်ဆူၣ်အိၣ်ချ့ကးလၢပှၤဒဲကဝီၤဖိမၤဃၥ်ဝဲအံၤကဲထီၣ်ဝဲတၢ်တိစၢၤ မၤစၢၤဒီး လၢဆူၣ်ချ့တၢ်လၢၥ်ဘူၣ်လၢၥ်စ့ၤအဂီၢ်(ကး)အံၤအပူၤတနံၣ်န့ၣ်တၢ်ထၢနုၥ်လီၤဃၥ်ဝဲစ့(၅၀၀၀၀)ဘးန့ၣ်လီၤ.
ဘၣ်ဆၣ်လၢတနံၣ်အဂီၢ်စ့(၅၀၀၀၀)ဘးလၢတၢ်ထၢနုၥ်လီၤဃၥ်ဝဲအံၤ တနံၣ်မ့တအိၣ်ဒံး ဘၣ် နသူအီၤမ့တလၢတၢ်ပၥ်ပနီၣ်န့ၣ် တၢ်လၢၥ်ဘူၣ်လၢၥ်စ့ၤလၢအလီၤလၢဝဲတဖၣ် နကစၢ်ဘၣ်ထုး ထီၣ်က့ၤဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲလၢတၢ်ဆီၣ်ထွဲမၤစၢၤတအိၣ်လၢၤဘၣ်အကတီၢ်အံၤ ခီဖျိလၢ M-Fund တၢ်အိၣ်ဆူၣ်အိၣ်ချ့ကးအံၤအဃိ ကဲထီၣ်ဝဲ တၢ်တိစၢၤမၤစၢၤလၢပှၤဒဲကဝီၤဖိအဂီၢ်ဒိၣ်မးအဂ့ၢ်န့ၣ် မဲၢ်လးဒဲကဝီၤခိၣ် စီၤဆါဒ့ စံးအါထီၣ်ဝဲန့ၣ်လီၤ.
အဝဲစံးဝဲလၢ“ခဲအံၤလၢပဒဲကဝီၤပူၤတၢ်ဆါဟံၣ်န့ၣ်တၢ်ဆီၣ်ထွဲမၤစၢၤတအိၣ်ကူကူလၢလၢလၢၤဘၣ်အဃိ ကဲထီၣ်တၢ်ကီတၢ်ခဲတခါ. အဃိဒ်သိးပမ့လဲၤလၢတၢ်ဆါဟံၣ်ကကဲထီၣ်တၢ်ဆီၣ်ထွဲမၤစၢၤတခါအဂီၢ် လၢကးပူၤန့ၣ်ထၢနုၥ်လီၤဝဲစ့အိၣ်တနံၣ်ဂီၢ်အဃိ ကဲထီၣ် တၢ်ဘျုးတၢ်ဖှိၣ်လၢပဒဲကဝီၤဖိအဂီၢ်လီၤ.တၢ်ရဲၣ်တၢ်ကျဲၤတခါအံၤတမ့ၢ်လၢတၢ်မၢဆူၣ်ဝဲဘၣ် နီၢ်ကစၢ်တၢ်သးအိၣ်တၢ်ဆၢတဲၥ်လီၤ. ”အဂ့ၢ်န့ၣ် စံးဝဲန့ၣ်လီၤ.
မဲၢ်လးဒဲကဝီၤအပူၤ (M-Fund)တၢ်အိၣ်ဆူၣ်အိၣ်ချ့ကးလၢတၢ်စးထီၣ်လဲၤမၤတ့ၢ်ဝဲဖဲလါမ့ၤအခါန့ၣ် ပှၤဒဲကဝီၤဖိနုၥ်လီၤမၤဝဲ အနီၣ်ဂံၢ် ကအိၣ်ဝဲအဂၤ(၃၀၀) ဘျဲၣ်ဒီး ဘၣ်ဆၣ်မ့မ့ၢ်ပှၤသ့ၣ်တဖၣ်အံၤကဘၣ်ဆၣ်ဆဲးဟ့ၣ်ဝဲတၢ်ဘူးတၢ်လဲ ဒ်တၢ်ပၥ်ပနီၣ် တ့ၢ်ဃၥ်ဝဲအသိးအဂ့ၢ် ဒဲကဝီၤပှၤဘၣ်မူဘၣ်ဒါစံးဝဲဒၣ်န့ၣ်လီၤ.
ဘၣ်ဃးတၢ်ကဟ့ၣ်ဝဲဆူၣ်ချ့တၢ်လၢၤဘူၣ်လၢၤစ့(၇၅)မျးကယၤတၢ်ဂ့ၢ်အံၤ မဲၢ်လးဘၣ်ကီဘၣ်ခဲဒဲကဝီၤအမဲၥ်ညါ အူးဖၠၣ်ဘၣ်ကီ ဘၣ်ခဲဒဲကဝီၤအပူၤစ့ၢ်ကီး ပှၤလၢအအဲၣ်ဒိးမၤဝဲတဖၣ် ဒဲကဝီၤပှၤဘၣ်မူဘၣ်ဒါဟးထၢဝဲပှၤနီၣ်ဂံၢ်စရီအိၣ်ဝဲအဂ့ၢ်န့ၣ် သ့ၣ်ညါဘၣ်လၢ ဒဲကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ခီကီၢ်ပှၤမၤတၢ်ဖိဃုၥ်ဒီးအဒံၣ်အဖိလၢအတုၤအိၣ်ကီၢ်ကၠီၣ်တဲၣ်ပူၤတဖၣ် မ့ဟဲထီၣ်လၢဂ့ၢ်ဂီၢ်အူတၢ်ဆါန့ၣ် ဒ်သိးကကဲထီၣ် တၢ်တိစၢၤမၤစၢၤအဂီၢ် M-Fund တၢ်ကရၢကရိအံၤ တဟံန့ၢ်ဝဲတၢ်အထိးအနါ မ့ၢ်ဝဲဒၣ်ဆူၣ်ချ့စ့ပၥ်ကီၤတၢ်ကရၢကရိဖးဒိၣ် တဖုန့ၣ်လီၤ.
