ဒူသထူၣ်ကီၢ်ရ့ၣ် တၢ်စူၤတပယူာ်ဃီအဃိထံလုၢ်ဘၢဘုလၢကီၢ်ဆၣ်ကိးဘ့ၣ်ဒဲးဃၣ်ဃၣ်ပူၤအဂ့ၢ် ၦၤဘၣ်မူဘၣ်ဒါစံး၀ဲ

လါယူၤလံ ၃၀ သီႇ ၂၀၂၄ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤအပူၤ တနွံအတီၢ်ပူၤခီဖျိတၢ်စူၤတပယူာ်ဃီအဃိ ထံလုၢ်ဘၢ ၀ဲဒၣ်စံာ်လီၢ်ဘုသ့ၣ်တဖၣ်လၢကီၢ်ဆၣ်ကိးဘ့ၣ်ဒဲးဃၣ်ဃၣ်အပူၤဒီးတုၤလၢခဲအံၤဘုသ့ၣ်တဖၣ်ဖျါထီၣ် တလၢာ်ဒံးဘၣ် အဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါ စံး၀ဲအသိးသ့ၣ်ညါဘၣ်န့ၣ်လီၤႉ

ဒူသထူၣ်ကီၢ်ရ့ၣ် ကီၢ်ဆၣ်ကိးဘ့ၣ်ဒဲးဃၣ်ဃၣ်အပူၤ စးထီၣ်ဖဲတလါအံၤလါယူၤလံ ၂၄ သီတုၤလၢခဲအံၤ ခီဖျိတၢ်စူၤ တပယူာ်ဃီထံဒိၣ်ထီၣ်အဃိ ထံနုာ်လီၤ၀ဲလၢကီၢ်ဆၣ်ဒူပူၤသ၀ီပူၤတကးဒံးဘၣ် ဘုသ့ၣ်တဖၣ်စ့ၢ်ကီး လီၤဘျၢ၀ဲဒၣ် အါမးအဂ့ၢ်န့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲမဟါလါယူၤလံ ၂၉ သီအနံၤန့ၣ်လီၤႉ

အ၀ဲစံး၀ဲလၢ“မ့မ့ၢ်လၢပကီၢ်ရ့ၣ်ပူၤန့ၣ်စးထီၣ်လါယူၤ ၂၄ သီတုၤလၢခဲအံၤန့ၣ် မူခိၣ်န့ၣ်စူၤအါဒီးထံဒိၣ်ထီၣ်ႇထံနုာ် လီၤလၢ ဒူပူၤသ၀ီပူၤအိၣ်တနီၤစ့ၢ်ကီးလီၤႉမ့ဘၣ်ဃးလၢဘုတၢ်သူၣ်တၢ်ဖျးလီၢ်သ့ၣ်တဖၣ်န့ၣ်ထံလုၢ်ဘၢအီၤန့ၣ်တုၤခဲ အံၤဖျါထီၣ် တလၢၤခဲလၢာ်ဒံးဘၣ်ႉမ့မ့ၢ်ထံနုာ်လီၤလၢဒူသ၀ီတဖၣ်န့ၣ်မ့မ့ဖဲဘံလ့ကီၢ်ဆၣ်ခီန့ၣ်ဒ်သိးထံဖးဒိၣ်ထၣ်ႇ ကၠိ၀ဲသ၀ီကယဲၢ်မ့ၢ် ဘီနီၤကျိလဲၤလီၤဒီတကျိၤတုၤလၢဖၣ်အၣ်ကီၢ်ဆၣ် ဘီနီၤကျိကၢၢ်ခိၣ်ဒူသ၀ီတဖၣ်န့ၣ်အါဒၣ် တက့ၢ်ထံနုာ်လီၤ ကိးဖျၢၣ်ဒဲး လီၤႉ တၢ်မၢၤထံလုၢ်ဘၢဟံၣ်ဃီညါဒုတအိၣ်စ့ၢ်ဘၣ်”အဂ့ၢ်န့ၣ် စံး၀ဲန့ၣ်လီၤႉ

ဘၣ်ဃးတၢ်စူၤထံဒိၣ်ထီၣ်ဘုလီၤဘျၢတၢ်အိၣ်သးခီန့ၣ်ဒ်သိးကသ့ၣ်ညါဘၣ်ဘုဟးဂီၤအအ့ကၢၣ်အနီၣ်ဂံၢ်နီၣ်ဒွးအဂီၢ်န့ၣ် ခီဖျိတၢ်စူၤဆဲးဘုတဖျါထီၣ်ခဲလၢာ်ဒံးဘၣ်အဃိဘုဟးဂီၤအအ့ကၢၣ်နီၣ်ဂံၢ်နီၣ်ဒွးမၤလီၤတံၢ်တသ့ဒံးဘၣ်အဂ့ၢ်န့ၣ် ပဒိၣ်စီၤအ့နဲၤ စံးအါထီၣ်၀ဲန့ၣ်လီၤႉ

“မ့ဘၣ်ဃးလၢထံဒိၣ်ထံလုၢ်ဘၢ၀ဲဘုသ့ၣ်တဖၣ်အံၤခီန့ၣ်အသံအ့ကၢၣ်ကအိၣ်ဆံးအါလဲၣ်န့ၣ်ပမၤနီၣ်လီၤတံၢ်လီၤဆဲးတသ့ဒံးဘၣ်ႉတုၤလၢထံမ့လီၤဘုဖျါထီၣ်မ့လၢာ်မးအသံအဟးဂီၤအအ့ကၢၣ်န့ၣ်ပကသ့ၣ်ညါဘၣ်လီၤမီၤနီၤႉတၢ်မၢၤဖဲမဟါန့ၣ်ထံလီၤက့ၤတစဲးႉဘၣ်ဆၣ်ဖဲမနၤန့ၣ်မူခိၣ်စူၤထးထံန့ၣ်ဟဲအါထီၣ်ကဒါတၢ်မၢၤတအါဒ်သိးလၢအအါခါန့ၣ်ဘၣ် မီၤႉတၢ်မၢၤ မ့မ့ၢ်လၢမုၢ်ဒုတထံၣ်ထီၣ်နီတဘျးဒံးဘၣ်စးထီၣ်လၢ ၂၄ သီတုၤလၢတနံၤအံၤန့ၣ်”အဂ့ၢ်န့ၣ် စံး၀ဲန့ၣ်လီၤႉ

ဒ်န့ၣ်အသိးခ့ၣ်အဲၣ်ယူၣ်တၢ်ပၢဟီၣ်က၀ီၤ ဒူသထူၣ်ကီၢ်ရ့ၣ်အမဲာ်ညါကီၢ်ရ့ၣ်သုးက့လၢအဂၤသ့ၣ်တဖၣ်စ့ၢ်ကီး ခီဖျိတၢ်စူၤ ထံဒိၣ်ထီၣ်အဃိကမျၢၢ်သ့ၣ်တဖၣ်စ့ၢ်ကီးဘၣ်ကွၢ်ဆၢၣ်မဲာ်၀ဲထံဒိၣ်ဃိၣ်ယွၤတၢ်ဂ့ၢ်ကီတကးဒံးဘၣ် ကစၢၢ်ထံလီၤ ဟီၣ်ခိၣ်လာ်အဃိလၢကျဲတၢ်လဲၤထီၣ်က့ၤလီၤတကပၤစ့ၢ်ကီးဘၣ်ကွၢ်ဆၢၣ်မဲာ်၀ဲတၢ်ကီတၢ်ခဲအိၣ်၀ဲအဂ့ၢ်န့ၣ် သ့ၣ်ညါဘၣ် န့ၣ်လီၤႉ

တကတီၢ်ဃီစးထီၣ်လါယူၤလံ ၁၉ သီအနံၤ လၢကီၢ်ကၠီၣ်တဲၣ်–ကီၢ်ပယီၤကီၢ်ဆၢဒီတကျိၤ ခီဖျိတၢ်စူၤတပယူာ်ဃီ အဆၢတတဲာ်ထံကစၢၢ်လီၤထံဒိၣ်ဃိၣ်ယွၤလၢတၢ်လီၢ်အါတီၤအဃိ စံာ်လီၢ်ဘုဃုာ်ဒီးတၢ်မုၢ်တၢ်ဘိလၢအဂၤ သ့ၣ်တဖၣ် စ့ၢ်ကီးဟးဂီၤလီၤဘျၢ၀ဲလၢထံကျါအိၣ်၀ဲအသိးကီၢ်ပယီၤခူ၀့ၢ်ႇဒူသ၀ီလၢအိၣ်တၢ်လီၢ်လီၤဖုၣ်သ့ၣ်တဖၣ် ခီဖျိတၢ်စူၤထံဒိၣ် ဃိၣ်ယွၤတုၤလၢခဲအံၤအဃိၦၤကမျၢၢ်သံႇဘၣ်သုးလီၢ်သုးကျဲစ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ် န့ၣ်လီၤႉ