လါအီကူး ၃ သီ, ၂၀၂၆ နံၣ်, ခ့ၣ်အဲးစံၣ်
လၢကဟဲထီၣ်ဒိၣ်စိက့ၤ ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ရၤမတံကီၢ်ဆၣ် တီနီၢ်မုၢ်ထီၣ် ဟီၣ်ကဝီၤလၢအဘၣ်ဟ့ၣ်ဆှူဝဲတဖၣ်အံၤအဂီၢ် ပယီၤသုးကျိၤလၢအဟဲထီၣ်သ့ၣ်တဖၣ်အံၤ ခီဖျိဘၣ်တၢ်ခိးခးအဝဲသ့ၣ်လၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၂၈ သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤဒးဘီ တီခိၣ်ရိၣ်မဲကရူၢ်အံၤ အဃိ သုးကျိၤဟးဂီၤဝဲဒီတကျိၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲအသိး သ့ၣ်ညါဘၣ်န့ၣ်လီၤ.
သုးမီၤစိရိၤအသုးတြိၤ(၂၂)စုတီၤဖီလၥ် ခီၣ်ချ့သုးရ့ၣ်(ခမရ-၂၀၃)ဒီး (၂၁၀)သုးရ့ၣ်သ့ၣ်တဖၣ်အံၤ လၢကဟဲက့ၤထီၣ်ဒိၣ်စိက့ၤဝဲ တီနီၢ်မုၢ်ထီၣ်ဟီၣ်ကဝီၤအံၤအဂီၢ် ဖဲတနံၤအံၤလါအီကူး ၃ သီ ဖဲအဝဲသ့ၣ်ဟဲထီၣ်အခါ တၢ်ဘၣ်သဂၢၢ်ခးလိၥ်သးကဲထီၣ်ဝဲ ဒိၣ်ဒိၣ် မုၢ်မုၢ်လၢခံခီခံကပၤအဘၢၣ်စၢၤန့ၣ်လီၤ.
လၢတၢ်ဒုးကဲထီၣ်ဘျီဝဲအံၤအပူၤန့ၣ် သုးကျိၤဒီတကျိၤဟးဂီၤကွံၥ်ဝဲဒီး (ခမရ-၂၀၃) သုးခိၣ်ဒိၣ်ဖိပတီၢ် သုးကျိၤခိၣ်ဃုၥ်ဒီး အပှၤသုးဖိသံၣ်ဖိ အသံစိၣ်သ့ၣ်တဖၣ်အိၣ်တ့ၢ်ဝဲလၢတၢ်ဒုးကဲထီၣ်အလီၢ်အါမးအသိး တၢ်ပၢၢ်ဆၢသုးပၥ်ဖှိၣ်ကရူၢ် မၤန့ၢ်ဝဲကျိချံ ပှၥ်သၣ် အိၣ်ဝဲအါမးအဂ့ၢ်န့ၣ် ထုးထီၣ်ပၥ်ဖျါဃုၥ်ဝဲလၢတၢ်ဂီၤသံအပူၤန့ၣ်လီၤ.
ဒ်(ခ့ၣ်အဲၣ်ယူၣ်)အတၢ်ထုးထီၣ်ပၥ်ဖျါပူၤပၥ်ဖျါဝဲအသိးန့ၣ် စုကဝဲၤဃုၥ်ဒီးကျိချံပှၥ်သၣ်လၢတၢ်မၤန့ၢ်ဝဲသ့ၣ်တဖၣ်န့ၣ်မ့ၢ်ဝဲ (MA-3) ခံခိၣ်, (MA-2)ခံခိၣ်, (MA-1) တခိၣ်, (MA)တခိၣ်,( GPG) တခိၣ်, MA BMA တခိၣ်, (MA)အဒၢ ၁၂ ခါ, (MA)အချံ ၇၅၅ ဖျၢၣ်, (၆၀ မမ)အချံ ၃ ဖျၢၣ်, အံၤနၤကၤမ့ၣ်ပိၢ်(၅)ဖျၢၣ်, (GPG)အချံတဖျၢၣ်ဃုၥ်ဒီး ကျိချံလၢ အဂၤသ့ၣ်တဖၣ်မၤန့ၢ်ဝဲဒၣ်န့ၣ်လီၤ.
သုးမီၤစိရိၤလၢဘၣ်ကွၢ်ဆၢၣ်မဲၥ်ဝဲအသုးကျိၤဟးဂီၤလၢတၢ်ဒုးပျီပူၤတလီၢ်လီၢ်အံၤန့ၣ် လူၤထၢဆူၣ်ဖီၣ်ဆူၣ်ဝဲ ကမျၢၢ်ထံဖိကီၢ်ဖိ သူၣ်ဘီၣ်သးစၢ်သ့ၣ်တဖၣ်ဝံၤ ဆှၢထီၣ်ဝဲဆူတၢ်မဲၥ်ညါတၢ်ဒုးဆူၣ်အလီၢ်အဂ့ၢ် ခ့ၣ်အဲၣ်ယူၣ် စံးဝဲအသိး လၢတီနီၢ်မုၢ်ထီၣ်တၢ်ဒုးဘျီ ဝဲအံၤအပူၤ သုးဖိလၢဟဲထီၣ်တဖၣ်အါဒၣ်တက့ၢ်မ့ၢ်ဝဲသုးဖိသီတဖၣ်အဂ့ၢ်န့ၣ် တၢ်ပၢၢ်ဆၢသုးကရူၢ် စံးဘၣ်တ့ၢ်ဃၥ် ခ့ၣ်အဲးစံၣ်-ကညီတၢ်ကစီၣ်အိၣ်ဝဲန့ၣ်လီၤ.
လၢတၢ်န့ၣ်အဃိ သုးဖိသံၣ်ဖိလၢသုးမီၤစိရိၤထၢန့ၢ်ဆူၣ်အီၤလၢသုးလၢအတအိၣ်ဒီးနီၢ်ကစၢ်တၢ်ဘၣ်သး သ့ၣ်တဖၣ်အံၤ လၢတၢ်ဒီသဒၢလီၤက့ၤနီၢ်ကစၢ်သးသမူအတၢ်လီၤဘၣ်ယိၣ်အဂီၢ် ကဟဲက့ၤပၥ်လီၤစုကဝဲၤလၢတၢ်ပၢၢ်ဆၢကရူၢ် ကရၢအအိၣ် အဂ့ၢ်န့ၣ် ခ့ၣ်အဲၣ်ယူၣ် ဆီၣ်တခူထီၣ်စ့ၢ်ကီးဝဲဒၣ်လၢလံၥ်တၢ်ပၥ်ဖျါအပူၤန့ၣ်လီၤ.
