လါယူၤလံ ၅ သီႇ ၂၀၂၄ နံၣ်ႇ ခ့ၣ်အဲးစံၣ်
(KNLA)အမူဒါဒိၣ်ကတၢၢ်မ့ၢ်တၢ်ထီဒါမၤတရီတပါမၤဟးဂီၤကညီကလုာ်အထံရူၢ်ကီၢ်သဲးတၢ်ပညိၣ်ဒီးကညီကမျၢၢ်ထံဖိကီၢ်ဖိအတၢ်အိၣ်မူသုတန့ၢ်၀ဲတဂ့ၤအသိးကရၢအံၤအိၣ်စ့ၢ်ကီးမူဒါနီၢ်နီၢ်လၢကဘၣ်ဒီသဒၢကညီကမျၢၢ်ထံဖိကီၢ်ဖိတဖၣ်လၢပယီၤကလုာ်ဒိၣ်စိသနူဒီးသုးမီၤစိရိၤသနူအတၢ်ဆီၣ်တံၢ်မၤနၢၤတဖၣ်အဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ စံးလီၤ၀ဲ ဖဲတနံၤအံၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)နံၣ်ဆၢက့ၤၦဲၤထီၣ် ၇၅ ၀ီတ၀ီ အလံာ်ဟ့ၣ်ယုၢ်ပူၤန့ၣ် လီၤႉ
စးထီၣ်(၂၀၂၁)သုးဟံးန့ၢ်တၢ်စိတၢ်ကမီၤ၀ံၤတုၤလၢခဲအံၤလၢသၢနံၣ်ဘျဲၣ်အတီၢ်ပူၤအံၤ တၢ်ဒုးတၢ်ယၤအိၣ်ထီၣ်၀ဲဒၣ် လၢထံကီၢ်ဒီတဘ့ၣ်အပူၤဒီးခီဖျိလၢသုးမီၤစိရိၤအတၢ်မၤအၢမၤသီအံၤအဃိ ကညီကမျၢၢ်ထံဖိကီၢ်ဖိတဖၣ်ဘၣ်ကွၢ် ဆၢၣ်မဲာ်၀ဲတၢ်ကိၢ်တၢ်ဂီၤႇတၢ်သံတၢ်ၦၢ်ဒီးတၢ်ကီတၢ်ခဲအါအါဂီၢ်ဂီၢ်ဒီးလၢတၢ်န့ၣ်အဃိတၢ်ကဒီသဒၢကၢၤဃာ်က့ၤ ၦၤကလုာ်ကညီဖိအဂီၢ်(KNLA)သ့ၣ်ညါမူဒါလၢၦဲၤလၢတၢ်ဒုးထီဒါက့ၤဒုၣ်ဒါသုးမီၤစိရိၤအံၤအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ် လီၤႉ
ဒ်န့ၣ်အသိးဖဲတၢ်ဒုးထီဒါသုးမီၤစိရိၤတဖုအံၤအဆၢကတီၢ်စ့ၢ်ကီး(KNLA)သုးမုၢ်ဒိၣ်အံၤအိၣ်ဒီးတၢ်သူၣ်ဒူသးဒူႇ တၢ်တူၢ်ခီၣ် ပာ်သးႇတၢ်သးသဟီၣ်အလၢအၦဲၤလၢၦၤကလုာ်အဂီၢ်ဒ်သိးၦၤကလုာ်ကဒိးန့ၢ်ဘၣ်တၢ်ထဲသိးတုၤသိး ဒီးနီၢ်ကစၢ်တၢ်စံၣ် ညီၣ်ပၢလီၤသးခွဲးယာ်အဃိပာ်လုၢ်ပာ်ၦ့ၤပာ်ပနီၣ်အ၀ဲသ့ၣ်အတၢ်ကျဲးစၢးအဂ့ၢ်န့ၣ် လံာ်တၢ်ပာ်ဖျါ အပူၤ စံး၀ဲန့ၣ်လီၤႉ
လၢန့ၣ်အမဲာ်ညါကညီကမျၢၢ်ထံဖိကီၢ်ဖိဘၣ်ကွၢ်ဆၢမဲာ်တၢ်ဖှီၣ်တၢ်ယာ်ႇတၢ်ဆီၣ်တံၢ်မၤနၢၤတုၤလၢခဲအံၤန့ၣ်ပစံး သ့၀ဲဒီး အဃိလၢကဒီသဒၢၦၤကလုာ်ကညီဖိအတၢ်အိၣ်မူဒီးတၢ်စုလီၢ်ခီၣ်ခိၣ်အဂီၢ်ဘၣ်တၢ်ဒုးအိၣ်ထီၣ်၀ဲ (KNLA) သုးမုၢ်ဒိၣ်အံၤ ဒီးတကးဒံးဘၣ်လၢၦၤကလုာ်ကညီဖိအဂီၢ်ပာ်လီၤစ့ၢ်ကီးတၢ်ပညိၣ်တၢ်တူၢ်ခီၣ်ပာ်သးခိၣ်သ့ၣ်(၂)ထံၣ် လၢအပၣ်ဃုာ် ကဒီသဒၢကမျၢၢ်ထံဖိကီၢ်ဖိအသးသမူႇအဟံၣ်အဃီတၢ်စုလီၢ်ခီၣ်ခိၣ် အဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ
အဃိလၢမုၢ်နံၤဆၢက့ၤအံၤအဖီခိၣ်ဆၢဂ့ၤဘၣ်ကညီကလုာ်ခိၣ်နၢ်ႇသုးမုၢ်ဒိၣ်ခိၣ်နၢ်သိၣ်ဒူႇကမျၢၢ်ထံဖိကီၢ်ဖိဃုာ်ဒီး ကရူၢ်ကရၢလၢအပၢၢ်ဆၢထီဒါသုးမီၤစိရိၤတဖၣ်ခဲလၢာ်ကပူၤဖျဲးဒီးတၢ်တတၢာ်တနါတကးဒံးဘၣ် စံးဘျုးဘၣ် ကညီကမျၢၢ် ထံဖိကီၢ်ဖိလၢအဆီၣ်ထွဲမၤစၢၤကီၢ်သူလ့ၤသုးမုၢ်ဒိၣ်ဒ်တၢ်သ့အိၣ်ဒီးအ၀ဲသ့ၣ်အသိးအဂ့ၢ်န့ၣ် ခ့ၣ်အဲၣ်ယူၣ် ဟ့ၣ်ထီၣ်အတၢ် ဆၢဂ့ၤဆၢ၀ါတၢ်စံးဘျုးစံးဖှိၣ်န့ၣ်လီၤႉ
တနံၤအံၤလၢအလီၤဘၣ်၀ဲကညီဒီကလုာ်တၢ်ထူၣ်ဖျဲးမုၢ်ဒိၣ်(KNLA)နံၣ်ဆၢက့ၤ ၇၅ ၀ီတ၀ီ အဖီခိၣ်အံၤန့ၣ် ခ့ၣ်အဲၣ်ယူၣ်-ကညီ ဒီကလုာ်စၢဖှိၣ်ကရၢ အမဲာ်ညါ (KNLA)သုးရိၣ်မဲခိၣ်ကျၢၢ် သုးခိၣ်ကျၢၣ်ဒိၣ် စီၤကၠီၣ်နံၣ် အတၢ်ကတိၤလံာ်ဟ့ၣ်ယုၢ် ဃုာ်ဒီး လီၢ်ခၢၣ်သး ကညီသးစၢ်ကရၢ(KYO), ကညီပိာ်မုာ်ကရၢ(KWO)သ့ၣ်တဖၣ်ပာ်ဖျါထီၣ်၀ဲအလံာ်ယုၢ်သ့ၣ် တဖၣ်န့ၣ်လီၤႉ
ဖဲ(၁၉၅၆)နံၣ် လါယူၤ ၂၆ သီ လၢဆီထံးကီၢ်ဆၣ် မီကိၢ် ဒီကလုာ်ခီကရဲးတၢ်အိၣ်ဖှိၣ်အပူၤန့ၣ် တၢ်ပာ်ဂၢၢ်ပာ်ကျၢၤ ကီၢ်သူလ့ၤသုးမုၢ်ဒိၣ်အတၢ်ဒုးတၢ်ယၤကျိၤကျဲႇအတၢ်ကရၢကရိတဖၣ်ဒ်သိးကမၤဂ့ၤထီၣ်ကီၢ်သူလ့ၤသုးမုၢ်ဒိၣ်တၢ်သူၣ်ထီၣ်ဆီလီၤက့ၢ်ဂီၤအဂီၢ်ဒီးဖဲန့ၣ်လါယူၤလံ ၅ သီ လၢတၢ်ပာ်ဂၢၢ်ပာ်ကျၢၤက့ၤတၢ်သူၣ်ထီၣ်ဆီလီၤက့ၢ်ဂီၤဒီးဒုးယၤ အကျဲမုၢ်နံၤအံၤ န့ၣ်ဘၣ်တၢ်ပာ်ဂၢၢ်ပာ်ကျၢၤ၀ဲလၢအမ့ၢ်ကီၢ်သူလ့ၤသုးမုၢ်ဒိၣ်မုၢ်နံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
