လါအီကူး ၁၆သီ, ၂၀၂၄နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,တၢ်ပၢဟီၣ်ကဝီၤသုးက့(၆)ဒူပျၥ်ယၥ်ကီၢ်ရ့ၣ်,ဝီၢ်ရ့ၣ်ကီၢ်ဆၣ်ပယီၤသုးနိၣ်ခၠိနဲၣ်သုးကလၢၤအံၤ,ဒ်သိးအသုတလီၤကွံၥ်ဆူတၢ်ပၢၢ်ဆၢသုးပၥ်ဖှိၣ်အစုပူၤတဂ့ၤအဂီၢ်,စးထီၣ်ဖဲလါအီကူး(၁၀)သီအနံၤအပူၤ,ကဘီယူၤခးလီၤတၢ်ဒီးဟီၣ်ခိၣ်မဲၥ်ဖံးခိၣ်တကပၤစ့ၢ်ကီးကျိဖးဒိၣ်ခးလီၤစၢၤတၢ်အါထီၣ်ဝဲအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ.
နိၣ်ခၠိနဲၣ်သုးကီၣ်ကးအသုးကလၢၤအံၤ,သုတလီၤကွံၥ်ဆူကညီဒီကလုၥ်တၢ်ထူၣ်ဖျဲးသုးမုၢ်ဒိၣ် KNLAဒီးတၢ်ပၢၢ်ဆၢသုးပၥ်ဖှိၣ်အစုပူၤတဂ့ၤအဂီၢ်,တကီၢ်ခါခဲအံၤသုးကီၣ်ကးအကဘီယူၤခးလီၤဝဲတၢ်ဆူသုးကလၢၤခိၣ်ဃၢၤတၢ်လီၢ်တၢ်ကျဲတဖၣ်အပူၤအိၣ်ဝဲအသိး,ပယီၤသုးလၢအိၣ်သရိၥ်ဝါဝဲကလံၣ်ခီၣ်ချ့သုးရ့ၣ်(ခလရ၆၁)အမျီၤသုးကလၢၤတဖၣ်စ့ၢ်ကီးခးလီၤစၢၤဝဲကျိဖးဒိၣ်တပယူၥ်ဃီအိၣ်ဝဲအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“စးထီၣ်ဖဲ(၁၃)သီအနံၤန့ၣ်,ပှၤဟူးဂဲၤဆူၣ်ထီၣ်က့ၤဒီးသုးကီၣ်ကးလၢအိၣ်သရိၥ်ဝါဝဲကလံၣ်သ့ၣ်တဖၣ်ခးလီၤဝဲ(၁၂၀မမ)ကျိဖးဒိၣ်ဆူနိၣ်ခၠိနဲၣ်,ဒီးလိးရှါတကပၤကိးနံၤတကးဘၣ်မဟါတနံၤကဘီယူၤဟဲခးလီၤတၢ်စ့ၢ်ကီးလီၤ.တကီၢ်ခါခဲအံၤဒုခးလီၤတၢ်တပယူၥ်ဃီလီၤ.သုးကီၣ်ကးတကပၤန့ၣ်ဒ်သိးအတၢ်လီၤတလီၤတဂ့ၤအဂီၢ်ဒုခးလီၤဝဲတၢ်လီၢ်လၢပှၤတၢ်ပၢၢ်ဆၢဖိတဖၣ်အိၣ်ဆိးဝဲအလီၢ်သ့ၣ်တဖၣ်ဒီးကမျၢၢ်အိၣ်ဆိးတၢ်လီၢ်သ့ၣ်တဖၣ်အိၣ်ဝဲလီၤ.”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါ,ခီဖျိသုးကီၣ်ကးအံၤခးလီၤစိဝဲကျိဖးအဃိနိၣ်ခၠိနဲၣ်,လိးရှါလီၢ်ကဝီၤကမျၢၢ်သ့ၣ်တဖၣ်တကးဘၣ်ဃီကျါသဝီလီၢ်ကဝီၤကမျၢၢ်တဖၣ်စ့ၢ်ကီးဘၣ်ဃ့ၢ်ပဒ့ၣ်ကွံၥ်ဝဲအသးဆူခိၣ်ဃၢၤတၢ်လီၢ်တဖၣ်အပူၤအိၣ်ဝဲအဂ့ၢ်,အဝဲစံးအါထီၣ်ဝဲဒၣ်န့ၣ်လီၤ.
တကးဒံးဘၣ်,မဟါလါအီကူး(၁၅)သီအနံၤအပူၤ,တၢ်ဒုးကဲထီၣ်ဝဲလၢကညီတၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၂၇)တၢ်ပၢၢ်ဆၢသုးပၥ်ဖှိၣ်ဒီးသုးကီၣ်ကးအဘၢၣ်စၢၤဖဲ(ယဲတခိၤဖယါကိ)ခိၣ်ဃၢၤတၢ်လီၢ်တဖၣ်အပူၤဝံၤအလီၢ်ခံသုးကီၣ်ကးတကပၤအပှၤသံကွံၥ်ဝဲ(၆)ဂၤအကျါပၣ်ဃုၥ်ဝဲဒီးအသုးခိၣ်စိတဂၤအသိးဘၣ်ဒိဘၣ်ထံးဝဲနးနး(၂)ဂၤအိၣ်စ့ၢ်ကီးဝဲအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲဒၣ်န့ၣ်လီၤ
တကတီၢ်ဃီ,ဝီၢ်ရ့ၣ်ကီၢ်ဆၣ်အပူၤ,သုးကီၣ်ကးနိၣ်ခၠိနဲၣ်သုးကလၢၤအံၤသုတလီၤကွံၥ်တဂ့ၤအဂီၢ်,အပူၤကွံၥ်လါအီကူး(၅)သီအနံၤအပူၤသုးကီၣ်ကးဆှၢထီၣ်ဝဲတၢ်အီၣ်တၢ်အီဒီးတၢ်ပီးတၢ်လီတဖၣ်ဆူနိၣ်ခၠိနဲၣ်,ဃုၥ်ဒီးချၢၣ်တကူၣ်တၢၣ်ဒီးစံဖၠူၤကိသုးကလၢၤပူၤတဖၣ်အပူၤအိၣ်ဝဲအသိးဒ်သိးအသုးကျိၤကနုၥ်လီၤဟူးဂဲၤအဂီၢ်,လၢဟီၣ်ခိၣ်မဲၥ်ဖံးခိၣ်တကပၤစ့ၢ်ကီးမၤအါထီၣ်ဝဲအသုးဂံၢ်ဘါအိၣ်ဝဲအဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး,သုးကီၣ်နိၣ်ခၠိနဲၣ်သုးကလၢၤအံၤမ့ၢ်ဝဲသုးကလၢၤဖးဒိၣ်တဖျၢၣ်လၢအိၣ်ဝဲဖဲဃိၣ်သၢဖျၢၣ်-သရိၥ်ဝါအဘၢၣ်စၢၤကျဲမုၢ်အဖီခိၣ်ဒီးတကီၢ်ခါခဲအံၤဒ်သိးဟီၣ်ခိၣ်မဲၥ်ဖံးခိၣ်ပယီၤသုးဟဲထီၣ်သုတန့ၢ်တဂ့ၤအဂီၢ်,တၢ်ပၢၢ်ဆၢသုးပၥ်ဖှိၣ်တဖၣ်ခိးကးတံၥ်တြီဃၥ်ဝဲဒၣ်တပယူၥ်ဃီအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
