လါအီကူာ် ၃၀ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် မီၤစကိၤကီၢ်ဆၣ် ယသ့ၣ်ပၠၤကရူၢ်ပူၤ လၢတၢ်ကဒုးအိၣ်ထီၣ်ဒူသ၀ီဘံၣ်ဘၢကရူၢ်အဂီၢ် တၢ်အိၣ်ဖှိၣ်လၢသုးကီၣ်ကးအၦၤဘၣ်မူဘၣ်ဒါကိး၀ဲဖဲမဟါအံၤ ခီဖျိၦၤကမျၢၢ်လဲၤထီၣ်တအိၣ်နီဂၤဘၣ်အဃိ တၢ်အိၣ်ဖှိၣ် တကဲထီၣ်လိၣ်ထီၣ်၀ဲဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ
ယသ့ၣ်ပၠၤကရူၢ် ဒူသ၀ီတဖၣ်အပူၤ သုးကီၣ်ကးအံၤလၢကဒုးအိၣ်ထီၣ်ဒူသ၀ီဘံၣ်ဘၢကရူၢ်အံၤအဂီၢ် ဖဲလါအီကူာ် ၂၈ သီ အနံၤန့ၣ် သုးကီၣ်ကးဖါကၣ်ကရူၢ်ခိၣ်ဆဲးလီၤမံၤဆှၢဒုးသ့ၣ်ညါ၀ဲလံာ်တဘ့ၣ်ဆူဒူသ၀ီၦၤဘၣ်မူဘၣ်ဒါအိၣ်လၢ ကဟဲထီၣ်၀ဲတၢ်အိၣ်ဖှိၣ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒ်လံာ်ဒုးသ့ၣ်ညါတဘ့ၣ်အံၤပာ်ဖျါ၀ဲအသိးန့ၣ် လၢတၢ်ကဒုးကအိၣ်ထီၣ်ဒူသ၀ီဘံၣ်ဘၢကရူၢ်အံၤအဂီၢ် ဖၣ်ကၣ်ကရူၢ် ပိာ်ခွါလၢသးနံၣ်အိၣ်(၃၅)တုၤ(၆၅)နံၣ် ကဟဲထီၣ်ဘၣ် တၢ်အိၣ်ဖှိၣ်ဖဲ(၂၉)သီ မုၢ်ဃ့ၢ်လီၤ(၁)နၣ်ရံၣ်လၢ(ယွၤသ့ၣ်) ဒမၣ်ယိၢ်အံၤဒီး ဘၣ်ဆၣ်ခီဖျိလီၢ်က၀ီၤကမျၢၢ်လဲၤတအိၣ်နီ ဂၤဘၣ်အဃိတၢ်အိၣ်ဖှိၣ်တကဲထီၣ်၀ဲဘၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါဒီးကမျၢၢ်လၢအိၣ်ဖဲန့ၣ်သ့ၣ်တဖၣ် စံး၀ဲန့ၣ်လီၤႉ
ဘၣ်ဃးတၢ်ဂ့ၢ်အံၤလီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲလၢ“သုးကီၣ်ကးန့ၣ်လၢကဒုးအိၣ်ထီၣ်ဒူသ၀ီဘံၣ်ဘၢကရူၢ်အဂီၢ်န့ၣ်ဃ့၀ဲဒၣ်ၦၤကမျၢၢ်မီၤနီၤႉအဃိမီၤစကိၤၦၤဘၣ်မူတဲဘၣ်ကရူၢ်ၦၤဘၣ်မူဘၣ်ဒါလၢသုမ့ဟ့ၣ်သုးကီၣ်ကး အဂၤ တဆံဒု၀ဲဒၣ်စ့ၢ်ကီးသုကဘၣ်ၦၤအအဂၤတဆံဒ်န့ၣ်ႉၦၤတဲအ၀ဲသ့ၣ်ဒ်န့ၣ်ဘျီအ၀ဲသ့ၣ်ကနၣ်ထံတၢ်ႇတလဲၤ တၢ်အိၣ် ဖှိၣ်လၢၤဘၣ်ႉၦၤတလဲၤဘၣ်ဘျီတၢ်အိၣ်ဖှိၣ်တကဲထီၣ်၀ဲဘၣ်န့ၣ်ႉအတၢ်န့ၣ်ကဒုးအိၣ်ထီၣ်၀ဲသုးလၢကဒီသဒၢ၀ဲ ဒူသ၀ီအဂီၢ်ႉ တၢ်န့ၣ်လဲၤသးဒ်သိးကစၢ်ဒူသ၀ီကစၢ်ဒီသဒၢဒ်န့ၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ
ဘၣ်ဃးတၢ်ဂ့ၢ်တၢ်ကျိၤလၢကမျၢၢ်စံး၀ဲလၢအိၣ်ဖျါတၢ်ဖီခိၣ်သ့ၣ်တဖၣ်အံၤကသ့ၣ်ညါအါထီၣ်ဒီးပာ်ဂၢၢ်ပာ်ကျၢၤအီၤ လီၤတံၢ်လီၤဆဲးကန့ၢ်အဂီၢ် ပခ့ၣ်အဲးစံၣ်-ကညီတၢ်ကစီၣ် ဆဲးကျိးဒူသထူၣ်ကီၢ်ရ့ၣ်ၦၤကတိၤတၢ်ပၢဘၣ်ဆၣ် ဆဲးကျိး တန့ၢ်၀ဲဘၣ်န့ၣ်လီၤႉ
ဒ်လီၢ်က၀ီၤကမျၢၢ်ၦၤဘၣ်မူဘၣ်မူဘၣ်ဒါလၢအိၣ်ဖဲန့ၣ်တဖၣ်စံး၀ဲအသိးန့ၣ် တၢ်ရဲၣ်တၢ်ကျဲၤလၢသုးကီၣ်ကးအကဒုး အိၣ်ထီၣ်ဒူသ၀ီဘံၣ်ဘၢကရူၢ်အံၤမ့၀ံၤန့ၣ်ဖဲန့ၣ်တဆီသုးကီၣ်ကးအံၤကဟ့ၣ်လီၤဒုးဖီၣ်၀ဲကျိဒီးကဒုးကဲထီၣ်ဆီတလဲ က့ၤ၀ဲလၢ ဂၢၤကီၢ်သုး(ပြည်သူ့စစ်)သ့၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တကးဒံးဘၣ်ဘၣ်ဃးသုးကီၣ်ကးကဒုးအိၣ်ထီၣ်ဒူသ၀ီဘံၣ်ဘၢကရူၢ်တၢ်ဂ့ၢ်အံၤလၢ(လၤကၤ)ကရူၢ်ႇ (မၠဲၤကလ့) ကရူၢ်တကပၤန့ၣ် လီၢ်က၀ီၤၦၤဘၣ်မူဘၣ်ဒါဆဲးလီၤဃာ်မံၤလၢတူၢ်လိာ်၀ဲတၢ်ဟူးတၢ်ဂဲၤအံၤအိၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
တကီၢ်ခါခဲအံၤသုးကီၣ်ကးအံၤခီဖျိဆှူ၀ဲဒၣ်တၢ်ဒုးတၢ်ယၤအါမးအဃိလၢလီၢ်က၀ီၤပူၤအံၤတဆီဒ်သိးကဒိးန့ၢ်ဘၣ် ၀ဲတၢ်ကစီၣ်အဂီၢ်ဟ့ၣ်ထီၣ်တၢ်ဂ့ၢ်ဒုးအိၣ်ထီၣ်၀ဲဒူသ၀ီဘံၣ်ဘၢကရူၢ်အံၤဒီးဒ်န့ၣ်အသိးတၢ်အိၣ်သးမ့ဟဲအိၣ်လၢတၢ်ဒုးတၢ်ယၤလံန့ၣ်ကမၢအီၣ်က့ၤ၀ဲၦၤသ့ၣ်တဖၣ်အံၤလီၤအဂ့ၢ်န့ၣ် ထံၣ်လၢၦၤဟူးဂဲၤထံရူၢ်ကီၢ်သဲးဖိတဖၣ်ပဲာ်ထံနီၤဖးစံးတ့ၢ်ဃာ်၀ဲ အိၣ်န့ၣ်လီၤႉ
၂၀၂၁ သုးဟံန့ၢ်တၢ်စိတၢ်ကမီၤ၀ံၤလီၢ်ခံ ခီဖျိထံရူၢ်ကီၢ်သဲးႇဒုးယၤတၢ်အိၣ်သးတဂၢၢ်ကျၢၤဘၣ်အဃိ လၢလီၢ်က၀ီၤဒီး ကမျၢၢ်တၢ်ဘံၣ်တၢ်ဘၢအဂီၢ်ကမၤအါထီၣ်၀ဲတၢ်ဒီသဒၢကမျၢၢ်အကျဲသနူတၢ်ဟူးတၢ်ဂဲၤသ့ၣ်တဖၣ်အဂ့ၢ်န့ၣ် သုးကီၣ်ကးအသုးခိၣ်ကျၢၢ်ဂီၢ်ဂ့ၢ် စီၣ်မ့ထိ စံးလီၤ၀ဲဖဲအပူၤကွံာ်လါယနူၤအါရံၤအခါအိၣ်၀ဲန့ၣ်လီၤႉ