လါအ့ဖြ့ၣ် ၂၀ သီႇ ၂၀၂၂ နံၣ်ႇ ခ့ၣ်အဲးစံၣ်
ဖဲတနံၤအံၤလါအ့ဖြ့ၣ် ၂၀ သီ ဂီၤခီ ၆ နၣ်ရံၣ်တခီအဆၢကတီၢ် လၢသၣ်တီၣ်ကၠံကီၢ်ဆၣ် သၣ်တီၣ်ကၠံ၀့ၢ်ဒီးပၠါစခါသ၀ီအဘၢၣ်စၢၤ(၁၁)မဲၤကိကပၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ခိးထုး၀ဲပယီၤသုးခီၣ်ချ့လၢအဟးဆှၣ်တၢ်(၂)အံၤလၢမ့ၣ်ပိၢ်ဒီးသံကွံာ်၀ဲ(၂)ဂၤလၢာ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
(KNLA)သုးပာ်ဖှိၣ်မၤန့ၢ်၀ဲကျိ(၂)ခိၣ်လၢပယီၤသုးသံ(၂)ဂၤအံၤအအိၣ်အဂ့ၢ်န့ၣ် လီၢ်က၀ီၤတီအူကညီတၢ်ကစီၣ် ပာ်ဖျါ၀ဲန့ၣ်လီၤႉ
လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ“ဖဲတဂီၤအံၤ(၆)နၣ်ရံၣ်တခီအခါန့ၣ်ပယီၤသုး(၂)ဂၤဟဲထီၣ်၀ဲလၢ(၁၁)မဲၤကိမီၤနီၤႉဖဲန့ၣ်ၦၤအိၣ်ခိးထုးအ၀ဲသ့ၣ်ဒီးမ့ၣ်ပိၢ်သံ၀ဲ(၂)ဂၤလၢာ်လီၤႉပသ့ၣ်ညါဘၣ်လၢတၢ်မၤန့ၢ်ကျိ(၂)ခိၣ်လီၤႉလီၢ်က၀ီၤဖိလၢအဟးထီၣ်က့ၤလီၤဒီးဆဲးကဲးဖဲန့ၣ်တခိၣ်နါက့ဟးဂီၤတစဲး”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
တၢ်ခိးထုးပယီၤသုးဒီးမ့ၣ်ပိၢ်ကဲထီၣ်သး၀ံၤအလီၢ်ခံပယီၤသုးလၢအအိၣ်(၁၃)မံးလာ်တဖၣ်ဟဲတုၤ၀ဲဒၣ်လၢတၢ်ကဲထီၣ်သးအလီၢ်ဒီးကးတံၢ်ဃာ်ကျဲသမံသမိးတၢ်ကအိၣ်အမံးနံး(၃၀)ဘျဲၣ်၀ံၤမးက့ၤအိးထီၣ်က့ၤကျဲအဂ့ၢ်န့ၣ်် လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
ဖဲအပူၤကွံာ်(၂၀၂၁)နံၣ် လါနိၣ်၀့ဘၢၣ်အခါစ့ၢ်ကီး တၢ်ခိးထုးပယီၤသုးဒီးမ့ၣ်ပိၢ်လၢ(၁၁)မံးလာ်တၢ်လီၢ်ကဲထီၣ်တ့ၢ်အသးအိၣ်၀ဲအဂ့ၢ်န့ၣ် တီအူကညီတၢ်ကစီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ
