အ့ကဘိၤသ၀ီဃၢၤ တၢ်ခိးခးပယီၤသုးသိလ့ၣ်ကဲထီၣ်၀ံၤလီၢ်ခံပယီၤသုးမၤအါထီၣ်သုးဂံၢ်ဘါဒီးခးလီၤကျိဖးဒိၣ်

လါအီကူာ် ၂၃ သီႇ ၂၀၂၄ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် အ့ကဘိၤသ၀ီဃၢၤ တၢ်ခိးခးပယီၤသုးသိလ့ၣ်လၢကျဲပူၤ ကဲထီၣ်၀ံၤလီၢ်ခံတကီၢ်ခါခဲအံၤအ၀ဲသ့ၣ်မၤအါထီၣ်သုးဂံၢ်ဘါအါအါဂီၢ်ဂီၢ်ဒီးခးတပျုာ်တပျီာ်ကျိဖးဒိၣ်တပယူာ်ဃီ အဂ့ၢ်န့ၣ် လီၢ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိ စံး၀ဲန့ၣ်လီၤႉ

ဖဲလါအီကူာ် ၂၀ သီအနံၤ လၢဖွ့ဖူကၢ်ကရူၢ် အ့ၤကဘိၤသ၀ီဃၢၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် ခိးခးပယီၤသုးသိလ့ၣ်လၢအဟဲထီၣ်(၂)ခိၣ်ဒီး ဖဲန့ၣ်ပယီၤသုးသံ(၂)ဂၤႇသိလ့ၣ်အူအီၣ်တခိၣ်န့ၣ်လီၤႉ တၢ်ကဲထီၣ်သးဖဲန့ၣ် ၀ံၤတနံၤဃီပယီၤသုးအံၤမၤအါထီၣ်ရၤလီၤအသုးဂံၢ်ဘါလၢတၢ်ကဲထီၣ်သးလီၢ်အခိၣ်အဃၢၤဒီး ခးလီၤ၀ဲကျိဖးဒိၣ် တပယူာ်ဃီအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါလၢအိၣ်ဖဲန့ၣ်တဂၤ စံး၀ဲန့ၣ်လီၤႉ

အ၀ဲစံး၀ဲလၢ“ဖဲၦၤခိးခးအ၀ဲသ့ၣ်သိလ့ၣ်၀ံၤဘျီန့ၣ်ပယီၤသုးန့ၣ်ဟဲထီၣ်လီၤႉအ၀ဲသ့ၣ်ရၤလီၤအၦၤဖဲကါကျဲကပၤန့ၣ်ဒီတကျိၤလီၤႉဟဲမၤအါထီၣ်အၦၤကအိၣ်လၢ(၈၀)ဖီခိၣ်ညါႉဖဲၦၤခးအသိလ့ၣ်တနံၤန့ၣ်ပယီၤသုးခးလီၤကျိဖးဒိၣ်အဖျၢၣ်ဒုနဂံၢ်မးတလၢၤတကၠီလၢၤဘၣ်ႉခဲအံၤနါက့ခး၀ဲဒံးႉ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

ပယီၤသုးလၢအဟဲမၤအါထီၣ်အဂံၢ်ဘါသ့ၣ်တဖၣ်န့ၣ်မ့ၢ်၀ဲပယီၤသုးခီၣ်သုးရ့ၣ်(ခလရ-၂), ခီၣ်ချ့သုးရ့ၣ်(ခမရ-၂၀၇), (၉၆)သုးပာ်ဖှိၣ်သ့ၣ်တဖၣ်ဒီးတကီၢ်ခါခဲအံၤအ၀ဲသ့ၣ်ဟူးဂဲၤအိၣ်ခူသူၣ်သးလၢကျဲမုၢ်ကပၤႇ ဘၣ်ယိၣ်လၢတၢ်ပၢၢ်ဆၢ ကရူၢ် ကလဲၤခးအ၀ဲသ့ၣ်အဃိ ပယီၤသုးကလၢၤလၢအိၣ်တၢ်ခိၣ်တၢ်ဃၢၤဖဲန့ၣ်သ့ၣ်တဖၣ်ခးလီၤစၢၤ၀ဲကျိဖးဒိၣ် အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ

ဒ်လီၢ်ခံကတၢၢ်တၢ်အိၣ်သးအသိးန့ၣ်ကျိဖးဒိၣ်အဃိၦၤကမျၢၢ်သံဘၣ်ဒိဘၣ်ထံးတအိၣ်ဒံးဘၣ်ဒီးပယီၤသုးအံၤခီဖျိ တဟဲထီၣ်ဆူညါဆဲးအိၣ်ဒံး၀ဲလၢကျဲမုၢ်ကပၤအဃိတၢ်ခးလိာ်သးကဲထီၣ်တအိၣ်ဒံးဘၣ်ဘၣ်ဆၣ်အ၀ဲသ့ၣ်မ့ဆဲးဟဲ ထီၣ်ဒု တၢ်ဒုးကဲထီၣ်သ့၀ဲအဂ့ၢ်န့ၣ် ဂံၢ်ခီၣ်ထံးၦၤဘၣ်မူဘၣ်ဒါစံး၀ဲန့ၣ်လီၤႉ

ဒ်န့ၣ်အသိးအပူၤကွံာ်မဟါတသီခံသီခီဖျိပယီၤသုးမၤအါထီၣ်အဂံၢ်ဘါဒီးခးနါစိၤကျိဖးဒိၣ်အဃိဒူသ၀ီကမျၢၢ်လၢ အိၣ်ဘူးတၢ်ခိၣ်တၢ်ဃၢၤဖဲန့ၣ်သ့ၣ်တဖၣ်ပျံၤတၢ်ဟးစံၣ်မံလၢတၢ်လီၢ်ပူၤဖျဲးအလီၢ်အိၣ်၀ဲဒီးတကီၢ်ခါခဲအံၤအ၀ဲသ့ၣ် က့ၤလၢအဟံၣ်အဃီလံဘၣ်ဆၣ်ဘၣ်အိၣ်ဒံးလၢတၢ်ပျံၤတၢ်ဖုးတၢ်ဘၣ်ယိၣ်ပူၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲန့ၣ်လီၤႉ

ကၠဲးထိၣ်ကီၢ်ဆၣ် ဖွ့ဖူကၢ်ကရူၢ်ပူၤ အပူၤကွံာ်လါယူၤလံ ၂၃ သီအနံၤစ့ၢ်ကီး ခီဖျိတၢ်ဒုးကဲထီၣ်ပယီၤသုးခးလီၤကျိဖးဒိၣ် အဃိ ၦၤကမျၢၢ်သံဘၣ်ဒိဘၣ်ထံးတစှၤန့ၢ်(၁၃)ဂၤညါဒီးဒ်န့ၣ်အသိးသ၀ီ(၆)ဖျၢၣ်ကမျၢၢ်ဘၣ်ဃ့ၢ်ထီၣ်ဒံး၀ဲ အဂ့ၢ်န့ၣ် သ့ၣ်ညါဘၣ်န့ၣ်လီၤႉ