ဘံလ့ကီၢ်ဆၣ်ပူၤ တၢ်လဲၤခးစဲးပြဲးလ့က့ၣ်ပယီၤသုးကလၢၤခံဘျီ ဒုၣ်ဒါဘၣ်ဒိတဂၤ

လါစဲးပထ့ဘၢၣ် ၁၀ သီႇ ၂၀၂၄ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ဘံလ့ကီၢ်ဆၣ်အပူၤ ဖဲလါစဲးပထ့ဘၢၣ် ၈ သီ ဒီး ၉ သီအနံၤန့ၣ် လီၢ်က၀ီၤတၢ်ပၢၢ်ဆၢသုးကရူၢ်လဲၤခးစဲးပြဲး၀ဲလ့က့ၣ်ပယီၤသုးကလၢၤအံၤအဃိ ဘၣ်ဒိတဂၤအဂ့ၢ်န့ၣ် ဂံၢ်ခီၣ်ထံးၦၤ ဟ့ၣ်တၢ်ကစီၣ်ဖိစံး၀ဲန့ၣ်လီၤႉ

လ့က့ၣ်ပယီၤသုးကလၢၤလၢအိၣ်ဆီလီၤသးဖဲသ၀ီပူၤအံၤဖဲလါစဲးပထ့ဘၢၣ် ၈ သီ ဟါခီ ၈း၀၀ နၣ်ရံၣ်ဘျဲၣ်အဆၢကတီၢ် တၢ်ပၢၢ်ဆၢသုးကရူၢ်လဲၤခး၀ဲတဘျီဒီး မၤကဒီးမုၢ်ဆ့ၣ်ထီၣ် ၉ သီ ဂီၤခီ ၅း၀၀ နၣ်ရံၣ်ဘျဲၣ်န့ၣ် တၢ်လဲၤခးကဒီး၀ဲတဘျီ အဃိ ဒုၣ်ဒါဘၣ်ဒိ၀ဲ(၁)ဂၤဒီး မ့မ့ၢ်လၢတၢ်ပၢၢ်ဆၢသုးကရူၢ်တကပၤ တၢ်သံတၢ်ဘၣ်ဒိ ဘၣထံးတအိၣ်ဘၣ်အဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိလၢတအဲၣ်ဒိးပာ်ဖျါအမံၤဂၤ စံး၀ဲန့ၣ်လီၤႉ

အ၀ဲစံး၀ဲလၢ“အလီၤဆီဒုတအိၣ်ဘၣ်ဘၣ်ဆၣ်ဒုၣ်ဒါန့ၣ်ဘၣ်ဒိတဂၤႉမ့မ့ၢ်လၢပအိၣ်ဒုတၢ်ဘၣ်ဒိဘၣ်ထံးတအိၣ်ဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤလါစဲးပထ့ဘၢၣ် ၁၀ သီအနံၤန့ၣ်လီၤႉ
အပူၤကွံာ်လါစဲးပထ့ဘၢၣ်ထီၣ် ၁ သီအနံၤစ့ၢ်ကီး ပယီၤသုးလၢအိၣ်လ့ၣ်က့ၣ်သုးကလၢၤအံၤ ဖဲအ၀ဲသ့ၣ်လဲၤဟးထီၣ်လၢ သုးကလၢၤချၢလဲၤၦ့ၤအီၣ်တၢ်လၢသ၀ီပူၤက့ၤလၢကျဲအခါတၢ်ပၢၢ်ဆၢကရူၢ်ခး၀ဲအဃိ သံ၀ဲတဂၤကဲထီၣ်အသးဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လ့က့ၣ်ပယီၤသုးကလၢၤအံၤအိၣ်ဆီလီၤသးဖဲသ၀ီပူၤဒီးစးထီၣ်ဖဲသုးဟံန့ၢ်တၢ်စိတၢ်ကမီၤ၀ံၤလီၢ်ခံန့ၣ် တၢ်လဲၤခးစဲးပြဲး အ၀ဲသ့ၣ်သုးကလၢၤအိၣ်ဒီးအမျိာ်သုးလၢအိၣ်ကမၤမိၣ်တကပၤခးလီၤကဒါကျိဖးဒိၣ်အဃိ တုၤလၢခဲအံၤသ၀ီဖိတဖၣ် ဘၣ်ဟးဃ့ၢ်ပလဲာ်သးက့ၤအိၣ်လၢဟံၣ်တဘူၣ်ခဲလၢာ်ဒံးဘၣ်အဂ့ၢ်န့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံး၀ဲန့ၣ်လီၤႉ

“မ့မ့ၢ်လ့က့ၣ်သ၀ီဒုစးထီၣ်လၢ(၂၀၂၃)သုးဟံန့ၢ်တၢ်စိတၢ်ကမီၤတုၤမုၢ်မဆါတနံၤအံၤန့ၣ်သ၀ီပူၤန့ၣ်ခီဖျိအိၣ်ဒီး သုးကလၢၤ အဃိၦၤကမျၢၢ်န့ၣ်အိၣ်ဆိးလၢဟံၣ်ဃီတဘူၣ်ဘၣ်ႉအ၀ဲသ့ၣ်ဘၣ်အိၣ်ပလဲာ်သးလၢတၢ်ချၢတဘိယူၢ်ဃီတုၤမုၢ်မဆါတနံၤအံၤလီၤႉၦၤအိၣ်နါက့လၢသ၀ီပူၤန့ၣ်ၦၤအိၣ်စှၤဒံစှၤဂၤ အိၣ်ဒၣ်ၦၤအိၣ်ခိးဟံၣ်ဘုၣ်လီၤက့ၤထိးဆၣ်ဆီဆၣ် ဒ်န့ၣ်လီၤႉ တၢ်အိၣ်သးမ့လီၤဆီခီန့ၣ်အ၀ဲသ့ၣ်သုးပလဲာ်ဒီးသးႇမ့မ့ၢ်ကအိၣ်လၢဟံၣ်လၢလၢၦဲၤၦဲၤန့ၣ်တအိၣ်ဘၣ်ႉအ၀ဲ သ့ၣ်ပၣ်၀ဲဒၣ် လၢၦၤဃ့ၢ်ပလဲာ်တၢ်ဒုးတၢ်ယၤထီရီၤအကျါမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

လ့က့ၣ်ပယီၤသုးကလၢၤအံၤအိၣ်ဆီလီၤသးလၢသ၀ီပူၤအိၣ်လံ၀ဲအနံၣ်(၄၀)ဘျဲၣ်လံဒီးတကီၢ်ခါခဲအံၤ သုးကလၢၤပူၤန့ၣ်တၢ်တယးကွၢ်၀ဲအသုးဂံၢ်ဘါအနီၣ်ဂံၢ်ကအိၣ်အဂၤ(၅၀)ဃၣ်ဃၣ်အဂ့ၢ်န့ၣ် တၢ်ပၢၢ်ဆၢသုးက&ူၢ် ၦၤဘၣ်မူဘၣ်ဒါစံး၀ဲန့ၣ်လီၤႉ

ဒ်န့ၣ်အသိးလၢကၠဲးထိၣ်ကီၢ်ဆၣ် ခရၢၢ်ကရူၢ်အပူၤ ဖဲမဟါလါစဲးပထ့ဘၢၣ် ၉ သီ စးထီၣ်လၢမုၢ်ထူၣ်န့ၣ် အမျိာ်သုးခီၣ်ချ့သုးရ့ၣ်(ခမရ-၂၀၇)ခးလီၤကျိဖးဒိၣ်ဒီတနံၤဒီတနၤတုၤဃီ၀ဲဒၣ်လၢမုၢ်နၤခီ ၁၀ နၣ်ရံၣ်ဘျဲၣ်ညါဒီး ကျိဖးဒိၣ်အံၤအဃိဘၣ်ဃးၦၤကမျၢၢ်တၢ်သံတၢ်ဘၣ်ဒိဘၣ်ထံးတၢ်အိၣ်သးခီန့ၣ်တၢ်ဃုသ့ၣ်ညါမၤလီၤတံၢ်အီၤအဖၢမုၢ်လီၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါလၢအိၣ်ဖဲန့ၣ်တဖၣ်စံး၀ဲန့ၣ်လီၤႉ