လါအီၤကထိဘၢၣ် ၁ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ဒူပျၥ်ယၥ်ကီၢ်ရ့ၣ်(ရၤမတံ)ကလံၤထံးဟီၣ်ကဝီၤအပူၤဖဲမဟါလါစဲးပထ့ဘၢၣ်(၃၀)သီအနံၤမုၢ်ဃ့ၢ်လီၤ(၁)နၣ်ရံၣ်ဘျဲၣ် အဆၢကတီၢ်လ့က့ၣ်ကိၥ်ဝ့ၢ်သီဃၢၤပယီၤသုး(စွဲၤတီၤကိ)မျိၥ်သုးကလၢၤလူၢ်ခိၣ်ဃၢၤတၢ်လီၢ်သၢတီၤအပူၤလၢတနံၤဃီအတီၢ်ပူၤသုးကီၣ်ကးကဘီယူၤဒုးသုးဟဲခးလီၤတၢ်အဂ့ၢ်န့ၣ်ကီၢ်ဆၣ်အပှၤဘၣ်မူဘၣ်ဒါစံးဝဲန့ၣ်လီၤ.
လ့က့ၣ်ကိၥ်ပယီၤသုး(စွဲၤတီၤကိ)မျိၥ်သုးကလၢၤလူၢ်ဝဲအံၤန့ၣ်(KNLA)တၢ်ပၢၢ်ဆၢသုးပၥ်ဖှိၣ်သ့ၣ်တဖၣ်ဟူးဂဲၤတ့ၢ်လီၤဝဲဒြိမ့ၣ်ပိၢ်အသိးခီဖျိလၢတၢ်ကဝီၤတံၥ်ဃၥ်စ့ၢ်ကီးဝဲသုးကလၢၤလူၢ်အံၤဝးဝးဒ်အံၤအဃိသုးကလၢၤအပူၤထံနိတၢ်အီၣ်တၢ်အီတၢ်ဃံးတၢ်စ့အိၣ်ထီၣ်ဝဲဒၣ်အဃိသုးကီၣ်ကးကဘီယူၤဘၣ်ဟဲခးလီၤစၢၤတၢ်ဒ်အံၤလီၤအဂ့ၢ်န့ၣ်ကီးတရံးကီၢ်ဆၣ်ခိၣ်ပဒိၣ်စီၤဖၣ်ထယါစံးဝဲဒၣ်ဒ်အံၤန့ၣ်လီၤ.
“ဖဲမဟါန့ၣ်ပယီၤသုးကဘီယူၤဟဲခးလီၤတၢ်လီၤ. အဝဲသ့ၣ်ဟဲခးလီၤတၢ်န့ၣ်ကမ့ၢ်ဝဲ(စွဲၤတီၤကိ)သုးကလၢၤအပှၤသ့ၣ်တဖၣ်န့ၣ်ဃ့ဝဲ တၢ်မၤစၢၤလီၤ. ဘၣ်မနုၤအဃိလဲၣ်န့ၣ်(စွဲၤတီၤကိ)န့ၣ်ပပှၤကဝီၤတံၥ်ဃၥ်ဝဲဝးဝးလံန့ၣ်လီၤ. တၢ်အီၣ်တအိၣ်လၢၤဘၣ်ထံတအိၣ် လၢၤဘၣ်အဃိန့ၣ်အဝဲသ့ၣ်ကဃ့ဝဲတၢ်မၤစၢၤလၢကဘီယူၤအိၣ်ဒီးကဘီယူၤဟဲတ့ၢ်လီၤတၢ်ဒ်န့ၣ်လီၤ.” အဂ့ၢ်န့ၣ်စံးခ့ၣ်အဲးစံၣ်-ကညီ တၢ်ကစီၣ်န့ၣ်လီၤ.
လၢန့ၣ်အမဲၥ်ညါတနံၤဃီအတီၢ်ပူၤတၢ်လီၢ်တၢ်ကျဲသၢတီၤလၢအမ့ၢ်ဝဲ(လ့က့ၣ်ကိၥ်ဖီကျီး)တၢ်လီၢ်တတီၤ,လ့က့ၣ်ကိၥ်ရူလီၢ်ခံတတီၤဒီးထံမဲးဝါခံသဝီဃၢၤတတီၤခဲလၢၥ်တၢ်လီၢ်သၢတီၤသ့ၣ်တဖၣ်အပူၤသုးကီၣ်ကးကဘီယူၤဒုးသုးဟဲခးလီၤစၢၤတၢ်တကးဒံးဘၣ်အမဲၥ်ညါပယီၤသုးလၢအိၣ်ကီးတရံးဝ့ၢ်ပူၤသ့ၣ်တဖၣ်စ့ၢ်ကီးခးထီၣ်စၢၤစိဝဲကျိဖးဒိၣ်အိၣ်ဝဲအဂ့ၢ်န့ၣ်ပဒိၣ်စီၤဖၣ်ထယါစံးအါထီၣ်ဝဲဒၣ်န့ၣ်လီၤ.
သုးကီၣ်ကးကဘီယူၤဟဲခးလီၤတၢ်အံၤအဖီခိၣ်န့ၣ်တၢ်သူၣ်ထီၣ်သ့ၣ်တဖၣ်ဘၣ်ဒိဘၣ်ထံးဟးဂုၤဟးဂီၤတဆံးတက့ၢ်အိၣ်ဝဲဒၣ်ဒီးမ့မ့ၢ်လၢတၢ်တပၢၢ်ဆၢသုးပၥ်ဖှိၣ်တကပၤခီန့ၣ်တၢ်ဘၣ်ဒိဘၣ်ထံးတအိၣ်ဘၣ်အသိးကမျၢၢ်တကပၤနါက့စ့ၢ်ကီးတအိၣ်ဘၣ်ခီဖျိကမျၢၢ်သ့ၣ်တဖၣ်အံၤလၢတၢ်ထီၣ်(ဖလူ)သုးကလၢၤအခါလံၤလံၤဃ့ၢ်ပလဲၥ်ကွံၥ်လံသးအဂ့ၢ်န့ၣ်ပဒိၣ်စီၤဖၣ်ထယါစံးအါထီၣ်ဝဲအသိးသ့ၣ်ညါဘၣ်န့ၣ်လီၤ.
လ့က့ၣ်ကိၥ်ဝ့ၢ်သီဃၢၤ(စွဲၤတီၤကိ)ပယီၤသုးမျိၥ်သုးကလၢၤလူၢ်ဝဲအံၤန့ၣ်ဟဲအိၣ်သူၣ်ထီၣ်ဆီလီၤအသးဖဲ(၂၀၀၃)နံၣ်အတီၢ်ပူၤဒီးတကီၢ်ခါခဲအံၤန့ၣ်(သုးတြိၤ-၄၄)အစုတီၤဖီလၥ်ခီၣ်သုးရ့ၣ်(ခလရ-၂၇၅)ဃုၥ်ဒီးခီၣ်ချ့သုးရ့ၣ်(ခမရ-၉),(ခမရ-၁၁ ၈)ဒီး(ခမရ-၁၀၂)သုး ပၥ်ဖှိၣ်တဖၣ်အိၣ်ဆီလီၤသးဖဲသုးကလၢၤအပူၤဒီးအပှၤနီၣ်ဂံၢ်ကအိၣ်ဒံးဝဲအဂၤ(၁၀၀)ဃၣ်ဃၣ်အဂ့ၢ်သ့ၣ်ညါဘၣ်န့ၣ်လီၤ.
