လါဖ့ၤဘြူၤအါရံၤ ၉ သီႇ ၂၀၂၂ နံၣ်ႇ ခ့ၣ်အဲးစံၣ်
ကီၢ်စၢဖှိၣ်မုၢ်နံၤလၢပယီၤသုးမီၤစိရိၤကတီခိၣ်ရိၣ်မဲမၤ၀ဲတၢ်တၢၣ်ပီၣ်တဲသကိးတၢ်မုာ်တၢ်ခုၣ်တၢ်ရဲၣ်တၢ်ကျဲၤအပူၤအံၤ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ဒီး(KNU/KNLA-PC)ကညီတၢ်မုာ်တၢ်ခုၣ်ကီၣ်ကးကရၢလၢအဆဲးလီၤ(NCA)တဖၣ်ကလဲၤထီၣ်၀ဲအဂ့ၢ်န့ၣ် ကရၢခိၣ်နၢ်ဘၣ်ထွဲတဖၣ်ပာ်ဂၢၢ်ပာ်ကျၢၤစံး၀ဲန့ၣ်လီၤႉ
ကီၢ်ပယီၤကီၢ်စၢဖှိၣ်မုၢ်နံၤတၢ်ရဲၣ်တၢ်ကျဲၤအဂီၢ် ဖဲအပူၤကွံာ်လါဖ့ၤဘြူၤအါရံၤ ၆ သီအနံၤ ပယီၤသုးမီၤစိရိၤကွဲမုာ်၀ဲ(EAOs)ကလုာ်ဒူၣ်ဖီၣ်စုက၀ဲၤတၢ်ပၢၢ်ဆၢကရူၢ်ကရၢသ့ၣ်တဖၣ် လၢဟဲထီၣ်တၢၣ်ပီၣ်တဲသကိး၀ဲတစိၤသးတၢ်မုာ်တၢ်ခုၣ်အံၤန့ၣ်လီၤႉ
လါဖ့ၤဘြူၤအါရံၤ ၁၂ သီအနံၤ ကီၢ်စၢဖှိၣ်မုၢ်နံၤၦဲၤထီၣ်(၇၅)၀ီတ၀ီတၢ်တၢၣ်ပီၣ်တဲသကိးလၢတၢ်ကမၤ၀ဲအံၤ ဘၣ်ထွဲဒီးပယီၤသုးမီၤစိရိၤကွဲမုာ်၀ဲကရူၢ်လၢအဆဲးလီၤထံကီၢ်တၢ်ပတုာ်တၢ်ခး(NCA)တဖၣ်ဒီး ကလုာ်ဒူၣ်ဖီၣ်စုက၀ဲၤကရူၢ်လၢအတဆဲးလီၤဘၣ်ဒံး(NCA)သ့ၣ်တဖၣ်လၢကဟဲထီၣ်၀ဲတၢ်တၢၣ်ပီၣ်တဲသကိးတစိၤသးတၢ်မုာ်တၢ်ခုၣ်အံၤအဖီခိၣ်န့ၣ် (DKBA)သုးရိၣ်မဲခိၣ်ကျၢၢ် သုးခိၣ်ကျၢၢ်စိ စီၤစတံစံး၀ဲဒ်အံၤန့ၣ်လီၤႉ
“ယတလဲၤလၢယနီၢ်ကစၢ်ဘၣ်ႉ ပကပျၢ်လီၤပၦၤခၢၣ်စးဖဲအံၤတဂၤလီၤ”အဂ့ၢ်န့ၣ် သုးခိၣ်ကျၢၢ်စိ စီၤစတံ စံးဘၣ်ခ့ၣ်အဲးစံၣ်န့ၣ်လီၤႉ
ဘၣ်ဆၣ်ပယီၤသုးမီၤစိရိၤကွဲမုာ်၀ဲအဖီခိၣ်အံၤ ဃုထၢပျၢ်လီၤအ၀ဲသ့ၣ်ၦၤလၢကလဲၤထီၣ်၀ဲအိၣ်ဘၣ်ဆၣ် တုၤလၢခဲအံၤတဃုထၢဘၣ်၀ဲဒံးဘၣ်ဒီးကလဲၤ၀ဲလၢတၢ်လဲၤထီၣ်၀ဲမူးတၢ်ရဲၣ်တၢ်ကျဲၤလီၤဒီး တဘၣ်ထွဲလိာ်သးဒီးတၢ်တၢၣ်ပီၣ်ထံရူၢ်ကီၢ်သဲးဘၣ်အဂ့ၢ်န့ၣ် (DKBA)ၦၤဘၣ်မူဘၣ်ဒါတဂၤစံး၀ဲန့ၣ်လီၤႉ
လၢန့ၣ်အမဲာ်ညါတၢ်မၤအကျဲလၢထံကီၢ်အကဟံးထီၣ်ဖီၣ်ထီၣ်မၤ၀ဲခါဆူညါသ့ၣ်တဖၣ်အကျါ ဒီကလုာ်ဂ့ၢ်၀ီတၢ်မၤအကျဲႇထံရူၢ်ကီၢ်သဲးတၢ်မၤအကျဲႇတၢ်မုာ်တၢ်ခုၣ်ဒီးတၢ်စိကမီၤၦဲၤတုာ်ကအိၣ်ဂၢၢ်ဆိးကျၢၤတၢ်မၤအကျဲတဖၣ် စးထီၣ်တနံၣ်ညါအံၤကစးထီၣ်၀ဲခီၣ်ခါအသီလၢတၢ်မုာ်တၢ်ခုၣ်အဂီၢ်အဂ့ၢ်န့ၣ် ပယီၤသုးမီၤစိရိၤတၢ်မုာ်တၢ်ခုၣ်လံာ်ကွဲမုာ်အပူၤ ပာ်ဖျါဃာ်၀ဲန့ၣ်လီၤႉ
ပယီၤသုးမီၤစိရိၤကွဲမုာ်ကလုာ်ဒူၣ်ဖီၣ်စုက၀ဲၤတၢ်ကရၢကရိဒီးကမၤ၀ဲတၢ်တၢၣ်ပီၣ်တဲသကိးတၢ်မုာ်တၢ်ခုၣ်တၢ်ရဲၣ်တၢ်ကျဲၤအံၤဘၣ်ဆၣ် အ၀ဲသ့ၣ်တကပၤကလဲၤထီၣ်၀ဲထဲလၢမူးတၢ်ရဲၣ်တၢ်ကျဲၤလီၤအဂ့ၢ်န့ၣ် (KNU/KNLA-PC)တကပၤ စံး၀ဲဒ်အံၤန့ၣ်လီၤႉ
(KNU/KNLA-PC)ကညီတၢ်မုာ်တၢ်ခုၣ်ကီၣ်ကးနဲၣ်ရွဲၣ် သုးခိၣ်ဒိၣ်စိ စီၤကၠီၤညိၣ် စံး၀ဲလၢ“ဘၣ်ဃးဒီးလၢတၢ်လဲၤတၢ်က့ၤဘျီညါအံၤ လၢဟီၣ်က၀ီၤတၢ်ဂုၤထီၣ်ပသီထီၣ်တကးဒံးဘၣ် လၢတၢ်ရ့လိာ်မုာ်လိာ်တဒူၣ်ဒီးတဒူၣ်ႇကလုာ်ဒူၣ်ဖီၣ်စုက၀ဲၤတဒူၣ်ဒီးတဒူၣ်အဘၢၣ်စၢၤန့ၣ်မ့ၢ်တၢ်ဖံးသကိးမၤသကိး ပပာ်ပနီၣ်ဖဲတၢ်တခါန့ၣ်လီၤႉ တပၣ်ဃုာ်ဒီးထံရူၢ်ကီၢ်သဲးတၢ်ဂ့ၢ်တၢ်ကျိၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
တၢ်ရဲၣ်တၢ်ကျဲၤအံၤန့ၣ်(KNU/KNLA-PC)ကရၢခိၣ်(၂)နီၢ်ကပီၤထူဒီးခၢၣ်စးကရူၢ်ကလဲၤထီၣ်၀ဲဒီး တၢ်ရဲၣ်တၢ်ကျဲၤလၢကလဲၤထီၣ်၀ဲအံၤတပၣ်ဃုာ်ဒီးတၢ်ပာ်ဂၢၢ်ပာ်ကျၢၤဒီးထံရူၢ်ကီၢ်သဲးတၢ်ဆၢတဲာ်တဖၣ်ဘၣ်အဂ့ၢ်န့ၣ် သုးခိၣ်ဒိၣ်စိ စီၤကၠီၤညိၣ် စံးအါထီၣ်၀ဲန့ၣ်လီၤႉ
ပယီၤသုးမီၤစိရိၤကတီခိၣ်ရိၣ်မဲမၤ၀ဲကီၢ်စၢဖှိၣ်မုၢ်နံၤဒီးကတၢၣ်ပီၣ်တဲသကိး၀ဲတၢ်မုာ်တၢ်ခုၣ်တၢ်ရဲၣ်တၢ်ကျဲၤအံၤအပူၤ ကညီဖီၣ်စုက၀ဲၤတၢ်ကရၢကရိ(၂)ဒူၣ်ကလဲၤထီၣ်၀ဲဒၣ်ဘၣ်ဆၣ် ပယီၤသုးမီၤစိရိၤအတၢ်ကွဲမုာ်အံၤအဖီခိၣ်န့ၣ် မ့မ့ၢ်ကညီဒီကလုာ်စၢဖှိၣ်ကရၢ(KNU)တကပၤသမၢ၀ဲဒီးတလဲၤထီၣ်တၢၣ်ပီၣ်တဲသကိး၀ဲဘၣ်န့ၣ်လီၤႉ
သုးဟံးန့ၢ်ဆူၣ်ကွံာ်တၢ်စိတၢ်ကမီၤ၀ံၤအလီၢ်ခံ တၢ်စုဆူၣ်ခီၣ်တကးတၢ်သဘံၣ်သဘုၣ်တဖၣ်ဟဲအါထီၣ်၀ဲဒၣ်လၢထံကီၢ်ဒီတဘ့ၣ်အပူၤဒီး သုးမီၤစရိၤအံၤခးသံ၀ဲဒၣ် ၦၤလၢအထီဒါအ၀ဲသ့ၣ်တဖၣ်တကးဘၣ်အမဲာ်ညါ မၤ၀ဲပၢၢ်တုၤလၢတၢ်ထီၣ်ဒုးလၢကလံၤကျါန့ၣ်လီၤႉ ခီဖျိပယီၤသုးမီၤစိရိၤမၤ၀ဲဒ်အံၤအဃိလီၢ်က၀ီၤကမျၢၢ်ထံဖိကီၢ်ဖိဘၣ်သံ၀ဲဒၣ်လၢအကထိညါအသိး ဖဲလီၢ်က၀ီၤကမျၢၢ်လၢအကလီၢ်ဘၣ်ဃ့ၢ်မှံဟးဖျိးအကတီၢ်အံၤ ပယီၤသုးမီၤစိရိၤရဲၣ်ကျဲၤမၤ၀ဲကီၢ်စၢဖှိၣ်မုၢ်နံၤတၢ်ရဲၣ်တၢ်ကျဲၤအံၤန့ၣ်လီၤႉ
