လါအီးကထိဘၢၣ် ၁၅ သီ, ၂၀၂၄ နံၣ်,ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ဖဲလါအီးကထိဘၢၣ် ၁၂ သီအနံၤ ပယီၤသုးခိၣ်ဒီးအမါလၢ KNLA သုးရ့ၣ်(၃)အပှၤဖီၣ်န့ၢ်၀ဲဖဲသိခွးသ၀ီကပၤ တၢ်သမံသမိးတြဲၤလီၤအံၤန့ၣ် တၢ်ကဟံထီၣ်ဖီၣ်ထီၣ်ဂ့ၢ်၀ီ ဒ်သုးတၢ်သိၣ်တၢ်သီအိၣ်၀ဲအသိးအဂ့ၢ်န့ၣ် သုးက့ခိၣ်စံး၀ဲန့ၣ်လီၤ.
ဖဲလါအီးကထိဘၢၣ် ၁၂ သီ ဂီၤခီအဆၢကတီၢ်န့ၣ် လၢသိခွးသ၀ီကပၤ KNLA သုးရ့ၣ်(၃) သုးဒ့(၄)သုးပၥ်ဖှိၣ် တၢ်သမံသမိးတြဲၤလီၢ်န့ၣ် ပယီၤသုးခိၣ်ဒီးအမါခံဂၤအိၣ်လၢသ့ၣ်စယး(သိမ်ဇရပ်)၀့ၢ်ကလဲၤဆူအမျိၥ်သုး(၃၁၀)သုးရ့ၣ်အံၤအဂီၢ် ဖဲဟဲလၢကျဲအခါ ဘၣ်တၢ်ဖီၣ်န့ၢ်အ၀ဲသ့ၣ်ဃုၥ်ဒီးတၢ်စုက၀ဲၤဒီးခဲအံၤတၢ်အးလီၤက့ၤအ၀ဲသ့ၣ်လၢခ့ၣ်အဲၣ်ယူၣ်စုပူၤလံအဃိ တၢ်ကဟံထီၣ်ဖီၣ်ထီၣ် ဂ့ၢ်၀ီဒ်သုးတၢ်သိၣ်တၢ်သီတၢ်ဘျၢအိၣ်အသိး အဂ့ၢ်န့ၣ် (သုးက့ ၁)သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲန့ၣ်လီၤ.
အ၀ဲစံး၀ဲလၢ“အ၀ဲသ့ၣ်န့ၣ်အဟဲနုၥ်သံကွၢ်တၢ်,သံကွၢ်၀ဲအမျိၥ်သုး(၃၁၀)တၢ်လီၢ်မီၤနီၤ.အဟဲသံကွၢ်တၢ်န့ၣ်ဘၣ်လၢခ့ၣ်အဲၣ်ယူၣ်ဒီး (PDF)အတြဲၤ.ပှၤဖီၣ်အီၤန့ၣ်ပှၤမၤန့ၢ်ဃုၥ်သိလ့ၣ်တခိၣ်ဒီးကျိတခိၣ်.ခဲအံၤပှၤဆှၢထီၣ်အ၀ဲသ့ၣ်လၢခ့ၣ်အဲၣ်ယူၣ်(ကီၢ်ဆၣ်)ရူလံအဃိဒ်တၢ်ဘျၢသဲစးအိၣ်အသိးပှၤကဟံအရ့လီၤ.လၢတၢ်မၤသံမၤ၀ီဒုတအိၣ်ဘၣ်.ဘၣ်မနုၤလဲၣ်န့ၣ်ခဲအံၤပှၤဖီၣ်သမူန့ၢ်အီၤမီၤနီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ပယီၤသုးခိၣ်လၢတၢ်ဖီၣ်န့ၢ်အီၤအံၤမ့ၢ်၀ဲသုးခိၣ် ဟ့စ့ၣ်ယၣ်အူ(၃၀)နံၣ် ဆၣ်ခံဖျၢၣ်ဒီး မ့မ့ၢ်အမါန့ၣ်အမံၤမ့ၢ်၀ဲ ထဲၣ်ထဲၣ်နဲၤ(၃၀)နံၣ် မ့ၢ်၀ဲကသံၣ်သရၣ်မုၣ်တဂၤဒီး ဒ်န့ၣ်အသိးကျိတခိၣ်အမဲၥ်ညါတၢ်မၤန့ၢ်ဃုၥ်၀ဲကျိချံ(၁၂၀)ဖျၢၣ်, စ့ပယီၤ(၅၀၀,၀၀၀)ဘျဲၣ်, ဃုၥ်ဒီးသုးကူကၤလံၥ်လဲၢ်တၢ်ဂ့ၢ်တၢ်ကျိၤသ့ၣ်တဖၣ်အဂ့ၢ်န့ၣ် သုးက့ပှၤဘၣ်မူဘၣ်ဒါစံး၀ဲန့ၣ်လီၤ.
လၢန့ၣ်အမဲၥ်ညါတၢ်ပၢၢ်ဆၢသုးကရူၢ်ဖီၣ်န့ၢ် သုးခိၣ်ဟ့စ့ၣ်ယၣ်အူ(ဟိန်းဇေယျာဦး)၀ံၤလီၢ်ခံတဟါဃီန့ၣ် ပယီၤသုးခးလီၤ တပျုၥ်တပျီၥ်၀ဲကျိဖးဒိၣ်အိၣ်၀ဲအဂ့ၢ်န့ၣ် လီၢ်က၀ီၤကမျၢၢ်လၢတအဲၣ်ဒိးပၥ်ဖျါအမံၤတဂၤ စံးစ့ၢ်ကီး၀ဲဒ်အံၤန့ၣ်လီၤ.
အ၀ဲစံး၀ဲလၢ“တၢ်န့ၣ်အ၀ဲသ့ၣ်ဟဲထီၣ်န့ၣ်ဆိမိၣ်၀ဲလၢအ၀ဲသ့ၣ်အတြဲၤဒ်န့ၣ်ဧါသၢၣ်.(KNLA)သုးရ့ၣ်(၃)သုးပၥ်ဖှိၣ်ဆီလီၤတြဲၤတၢ်လီၢ်ဒီးသုးကီၣ်ကးအိၣ်တၢ်လီၢ်န့ၣ်အိၣ်တယံၤဘၣ်.အဘၢၣ်စၢၤန့ၣ်တတၢၣ်မးတအိၣ်ဘၣ်.တၢ်တဟါန့ၣ်ဖဲပှၤဖီၣ်န့ၢ်သုးခိၣ်အဒီမါ၀ၤခံဂၤန့ၣ်အသကိးခးစိလီၤကျိဖးဒိၣ်လဲးလိးလီၤ.” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးသုးကီၣ်ကးအမျိၥ်သုး(၃၁၀)သုးရ့ၣ်ဒီးခီၣ်ချ့သုးရ့ၣ်(ခမရ-၂၀၇)လၢအိၣ်သ့ၣ်စယးကပၤအံၤ ဖဲအပူၤကွံၥ်လါစဲးပထ့ဘၢၣ် ၃၀ သီအနံၤန့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၃)သုးပၥ်ဖှိၣ်လဲၤခးစဲးပြဲး၀ဲအဃိ ဖဲန့ၣ်ပယီၤသုးတကပၤ ဘၣ်ဒိဘၣ်ထံးတစှၤန့ၢ် အဂၤ(၁၀)အဂ့ၢ်န့ၣ် သ့ၣ်ညါဘၣ်န့ၣ်လီၤ.
