လါအီးကထိဘၢၣ် ၂၂သီ, ၂၀၂၄နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်,ကီၢ်ပယီၤကီၢ်ဆၢကၣ်ခၠါနၣ်ဘူရံၤသ့ၣ်ပှၢ်တၢ်လီၢ်တတီၤအပူၤ,အပူၤကွံၥ်မဟါလါအီးကထိဘၢၣ်(၂၁)သီအနံၤအပူၤကၠီၣ်တဲၣ်သ့ၣ်ပှၢ်အပှၤဘၣ်မူဘၣ်ဒါတဖၣ်ဖီၣ်ချူးန့ၢ်ကဒီးဝဲဖုအ့သံးအပှၤ(၁)ဂၤဒီး,ဖုအံသံးအပှၤအံၤခီဖျိဒိးတကဲးဝဲတၢ်အဃိကၠီၣ်တဲၣ်ပှၤဘၣ်မူဘၣ်ဒါ(၃)ဂၤတၢ်ဘၣ်ဒိဘၣ်ထံးအိၣ်ဝဲအဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်န့ၣ်လီၤ.
ဖုအ့သံးအပှၤလၢအဒိးတကဲးတၢ်ဒီးတၢ်ဖီၣ်ချူးက့ၤဝဲအီၤတဂၤအံၤ,အမံၤမ့ၢ်ဝဲ(စီၤဒံၤ)သးနံၣ်အိၣ်ဝဲ(၄၈)နံၣ်ဒီး,ခီဖျိအဝဲခူၣ်လီၤပၥ်ဝဲတၢ်ပူၤတၢ်တ့ၤလၢအဒဲခိၣ်ဃၢၤတၢ်လီၢ်တၢ်ကျဲတဖၣ်အပူၤဒီးဒိးလီၤပၥ်ဝဲတၢ်ခိၣ်စူကနၣ်အ့ၣ်ဝံၤပၥ်ဘၢလီၤဝဲဒီးသ့ၣ်လၣ်ဝၣ်လၣ်တဖၣ်အဃိ,ဖဲကၠီၣ်တဲၣ်အပှၤဘၣ်မူဘၣ်ဒါတဖၣ်ကလဲၤဖီၣ်အီၤဒီးလဲၤကစိၤဝဲအီၤဘူးထီၣ်ဒီးအဒဲအဆၢကတီၢ်,ဘၣ်ဒိဘၣ်ထံးဝဲ(၃)ဂၤအဂ့ၢ်,ကၠီၣ်တဲၣ်တၢ်ကစီၣ်ပၥ်ဖျါဝဲဒၣ်န့ၣ်လီၤ.
ဖုအ့သံးအပှၤ(စီၤဒံၤ)အံၤဖဲတၢ်ဖီၣ်ချူးအီၤဒီးသမံသမိးသံကွၢ်သံဒိးဝဲအီၤအဆၢကတီၢ် အနီၢ်ကစၢ်စံးဝဲလၢ“အပူၤကွံၥ်အဝဲအိၣ်ဆိးဝဲဒီးအဟံၣ်ဖိဃီဖိဖဲသ့ၣ်ပှၢ်ဟီၣ်ကဝီၤအပူၤအံၤဒီးဖဲလါစဲးပထ့ဘၢၣ်(၁၂)သီအနံၤအပူၤခီဖျိတၢ်ဖီၣ်ချူးန့ၢ်ကွံၥ်ဝဲအဖိအမါအဃိအနီၢ်ကစၢ်ဃ့ၢ်အိၣ်ခူသူၣ်ဝဲဒၣ်အသးတုၤလၢအခဲအံၤ”အဂ့ၢ်,ကၠီၣ်တဲၣ်တၢ်ကစီၣ်ပၥ်ဖျါဝဲဒၣ်စ့ၢ်ကီးန့ၣ်လီၤ.
လၢန့ၣ်အမဲၥ်ညါ,ဖုအ့သံးအပှၤ(စီၤဒံၤ)အံၤလၢတၢ်ကလိၥ်ဘၢလိၥ်ကွီၢ်ဝဲအီၤအဂီၢ်,ကၠီၣ်တဲၣ်ပှၤဘၣ်မူဘၣ်ဒါတဖၣ်ဖီၣ်က့ၤကိးကွံၥ်ဝဲအီၤလံအဂ့ၢ်,ကၠီၣ်တဲၣ်တၢ်ကစီၣ်တဖၣ်ပၥ်ဖျါစ့ၢ်ကီးဝဲန့ၣ်လီၤ.
ဖဲအပူၤကွံၥ်လါစဲးပထ့ဘၢၣ်(၁၂)သီအနံၤအပူၤ,ကၠီၣ်တဲၣ်ပှၤဘၣ်မူဘၣ်ဒါတဖၣ်ဖီၣ်ချူးဒီးက့ၤကိးကွံၥ်ဝဲဖုအ့သံးဒီးအပှၤအဂၤ(၃၀)ဘျဲၣ်လၢနုၥ်လီၤအိၣ်ဆိးဝဲဖဲကၣ်ခၠၣ်နၣ်ဘူရံၤသ့ၣ်ပှၢ်ဟီၣ်ကဝီၤအပူၤတဖၣ်အိၣ်ဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ.
ဒီးတကတီၢ်ဃီ,ဖုအ့သံးဃုၥ်ဒီးအပှၤလၢတၢ်ဖီၣ်က့ၤကိးကွံၥ်ဝဲအဂၤ(၃၀)ဘျဲၣ်အံၤ,ကၠီၣ်တဲၣ်ပှၤဘၣ်မူဘၣ်ဒါတဖၣ်လိၥ်ဘၢလိၥ်ကွီၢ်ဝဲအဝဲသ့ၣ်တဖၣ်လၢတၢ်ဂ့ၢ်ခိၣ်သ့ၣ်(၃)ထံၣ်လၢအမ့ၢ်,တၢ်မၤဟးဂီၤမၤလီၤတူၥ်ကွံၥ်ဆၣ်ဖိကီၢ်ဖိ,တၢ်မၤဟးဂီၤသ့ၣ်ပှၢ်တၢ်လီၢ်တၢ်ကျဲဃုၥ်ဒီးတၢ်နုၥ်လီၤအိၣ်ဆိးတဖိးမံသဲးစးလၢကၠီၣ်တဲၣ်ကီၢ်ပူၤတဖၣ်အိၣ်ဝဲအဂ့ၢ်,ကၠီၣ်တဲၣ်တၢ်ကစီၣ်ပၥ်ဖျါတ့ၢ်ဝဲဖဲအပူၤကွံၥ်လါစဲးပထ့ဘၢၣ်အပူၤအိၣ်ဝဲဒၣ်န့ၣ်လီၤ.
ဒ်န့ၣ်အသိး,ဖုအ့သံး(ကညီကလုၥ်ဒူၣ်)ပှၤလၢအတီခိၣ်ရိၢ်မဲတၢ်ဒီးနုၥ်လီၤအိၣ်ဆိးဝဲလၢကၠီၣ်တဲၣ်သ့ၣ်ပှၢ်လၢတၢ်ဖီၣ်ဃၥ်ဝဲအီၤခဲအံၤတဂၤအံၤ,ဖဲအပူၤကွံၥ်စှၤနံၣ်အတီၢ်ပူၤအမံၤဟူထီၣ်တ့ၢ်ဝဲလၢ,ကွဲန့ၢ်လွဲန့ၢ်ဝဲပှၤတသ့ၣ်ညါနၢ်ပၢၢ်တၢ်တဖၣ်လၢကစူၢ်ကနၥ်ဝဲအီၤဒီး,ဃ့ဝဲစ့ဆူပှၤလၢအနၥ်န့ၢ်အီၤတဖၣ်အအိၣ်,လံၣ်အီၣ်လီအီၣ်တ့ထီၣ်န့ၢ်ဝဲတၢ်ဂီၤလၢတၢ်ပၥ်ပနီၣ်အီၤတသ့ဘၣ်တဖၣ်အိၣ်ဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ.
