ပယီၤသုးဒြိအဃိ ဖလူ(ကၠါဖၠၣ်)တၢ်မၤလီၢ်တရူးသံ ၃ ဂၤဒီးဘၣ်ဒိၣ်ဘၣ်ထံး ၁၃ ဂၤ

လါမးရှး ၂၇ သီ, ၂၀၂၆ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)မၠၣ်ဝတံၣ်ကလံၤထံး ဖဲမဟါအနံၤပယီၤသုးလဲၤတ့ၢ်လီၤဝဲဒြိမ့ၣ်ပိၢ် လၢ တရူး(ကၠါဖၠၣ်)တၢ်လီၢ်ကရၢၢ်ပူၤအဃိ တရူးသံဝဲ(၃)ဂၤဒီး ဘၣ်ဒိဘၣ်ထံး(၁၃)ဂၤ အဂ့ၢ်န့ၣ် သ့ၣ်ညါဘၣ် န့ၣ်လီၤ.

ဖဲမဟါလါမးရှး ၂၆ သီ ကဘၣ်ဖဲမုၢ်နၤခီ ၁၁း၃၀ ဃၣ်ဃၣ်အဆၢကတီၢ်န့ၣ် ကၠိတီ(ကၠါဖၠၣ်)တၢ်မၤလီၢ်လၢအိၣ် ဖလူဖိသဝီချၢ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)တၢ်ပၢဟီၣ်ကဝီၤပူၤအံၤ ပယီၤသုးလဲၤတ့ၢ်လီၤဝဲဒီး (ကၤမံၤကၤစံၤ)ဒြိတူၢ်သံသး အံၤန့ၣ်လီၤ.

ဘၣ်ဃးတၢ်ဂ့ၢ်အံၤပှၤလၢအဘူးဒီး(DKBA)ကရူၢ်ကရၢတဂၤစံးဝဲလၢ“အဟဲတ့ၢ်လီၤဝဲန့ၣ်ကဘၣ်ဖဲမုၢ်နၤခီ ၁၁ နၣ်ရံၣ်တခီအခါန့ၣ်. အလီၤ တဲၥ်ဝဲလိၤလိၤလၢ(ကၠိတီ)ကၤစံၤနိၤလီၢ်န့ၣ်လီၤ.တရူးလၢအသံ(၃)ဂၤန့ၣ်မ့ၢ်သးစၢ်တဖၣ်လီၤ.ပှၤလၢအဘၣ်ဒိဘၣ်ထံး ဒီးမ့ၣ်ပိၢ်အက့အခီန့ၣ်အိၣ်ဝဲ(၁၃)ဂၤ.ပှၤလဲၤဆှၢအဝဲသ့ၣ်လၢတၢ်ဆါဟံၣ်.မ့မ့ၢ်လၢတၢ်ဟးဂူၥ်ဟးဂီၤခီန့ၣ်ပှၤမၤဆှဲက့ၤတဂီၤအံၤလီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.

လၢတၢ်လဲၤတ့ၢ်လီၤဒြိအံၤအဃိ ပှၤလၢအဘၣ်ဒိဘၣ်ထံး ၁၃ ဂၤအံၤအကျါမ့ၢ်မတဂၤသ့ၣ်တဖၣ်ပၣ်ဃုၥ်လဲၣ်န့ၣ် ပခ့ၣ်အဲးစံၣ်-ကညီတၢ်ကစီၣ် ဆဲးကျိးမၤလီၤတံၢ်အီၤအဖၢမုၢ်န့ၣ်လီၤ.

ကၠိတီ(ကၠါဖၠၣ်)တၢ်ဖံးတၢ်မၤလီၢ်လၢတၢ်လဲၤတ့ၢ်လီၤဝဲဒြိခဲအံၤန့ၣ် ဖဲအပူၤကွံၥ်လါယနူၤအါရံၤတဘျီဒီး တလါအံၤလါမးရှး ၁၃ သီအခါန့ၣ် ပယီၤသုးခးလီၤဝဲဒီးကျိဖးဒိၣ်,လဲၤတ့ၢ်လီၤဒြိဒံးအံၤအဃိဖဲန့ၣ် တရူးဃုၥ်ဒီးထံဂုၤကီၢ်ဂၤကၠါဖၠၣ်ပှၤမၤတၢ်ဖိ, (DKBA)အပှၤ သံဘၣ်ဒိဘၣ်ထံးတစှၤ န့ၢ်ဝဲအဂၤ (၂၀)ကဲထီၣ်ဒံးဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.

(ကၠါဖၠၣ်)လီၢ်ဝဲအံၤအိၣ်ဝဲဒၣ်လၢ(DKBA)တၢ်ပၢဟီၣ်ကဝီၤပူၤအိၣ်ဘူးစ့ၢ်ကီးဝဲဒီးပယီၤသုးတၢ်လီၢ်အဃိ အပူၤကွံၥ် တၢ်ခိတၢ် သွဲအံၤတၢ်ဟ့ၣ်နီၤလီၤဝဲပယီၤသုးမ့အိၣ်ဘၣ်ဆၣ်လီၢ်ခံအံၤခီဖျိတၢ်တဟ့ၣ်ဝဲလၢၤဘၣ်အဃိ ဘၣ်တၢ်က့ၤခးလီၤကဒါ တၢ်ဘၣ်ဟဲ အိၣ်ထီၣ် ဒ်အံၤ အဂ့ၢ်န့ၣ် ပှၤလၢအိၣ်ဘူးဖဲန့ၣ်တဖၣ်ပဲၥ်ထံနီၤဖးစံးဝဲအိၣ်န့ၣ်လီၤ.

ဘၣ်ဃးတၢ်ဂ့ၢ်အံၤ (DKBA)ပှၤကတိၤတၢ်ပၢ သုးခိၣ် စီၤဖါဘျဲၣ်စံးဝဲလၢ“ဒ်သိးယသ့ၣ်ညါအသိးန့ၣ် ဘၣ်ဃးတၢ်တခါအံၤပှၤတဲ သကိး တၢ်အိၣ်ဘၣ်ဆၣ်ပယီၤန့ၣ်တတူၢ်လိၥ်ဝဲဘၣ်.ခံထံၣ်တထံၣ်န့ၣ်အဝဲသ့ၣ်အိၣ်သုးတြိၤ(တမ ၄၄),(တမ ၂၂)ပှၤခံဒူၣ်အံၤ တဘၣ်ဂီၢ်လိၥ်သးစ့ၢ်ဘၣ်.နထိၣ်ဃူမ့န့ၢ်တဒူၣ်န့ၣ်အဝဲတဒူၣ်န့ၢ်ခးတၢ်.နမ့လဲၤထိၣ်ဃူလၢအံၤတဒူၣ်န့ၣ်တၢ်တဒူၣ်န့ၣ်က့ၤခးလီၤကဒါတၢ်မၤဝဲဒ်န့ၣ်.အဝဲသ့ၣ်ဖဲအဘၣ်သးမၤဝဲတဒူၣ်န့ၣ်မၤဝဲလီၤ.အဝဲသ့ၣ်ကဒဲကဒဲန့ၣ်မးတဘၣ်ဂီၢ်လိၥ်သးဘၣ်အိၣ်နါက့တၢ်မဲၥ်ညါဒ်သိးသိးန့ၣ်.ပယီၤနါက့အမၤတၢ်မၤန့ၣ်အတဒုးသ့ၣ်ညါလိၥ်သးခဲလၢၥ်ဘၣ်.မ့ဘၣ်တဲန့ၣ်အဝဲသ့ၣ်ဒဲဘီလိ မီၤ”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.

တကီၢ်ခါခဲအံၤဖလူ,မ့လဲၣ်ပၤ,ဖလူသဝီဖိဟီၣ်ကဝီၤအပူၤ တရူး(ကၠါဖၠၣ်)တၢ်မၤလီၢ်ဆဲးအိၣ်ဒံးဝဲ ၃ တီၤဒီး တၢ်လီၢ်သၢတီၤလၢၤအံၤ အိၣ်ဝဲဒၣ်လၢ(DKBA)တၢ်ပၢဟီၣ်ကဝီၤအပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.